Mateu 8

Yesu yabemesa mukwa mbumba

(Tala nawa Mar 1:40-45; Luk 5:12-16)

1Muze te Yesu hapalumuka ha mulundu mbunga jinene amukawile. 2Mukwa mbumba yamukundama, yaliumba ha makungunwa ku meso ja Yesu ngwenyi: “Mwene, nyi unazange muuhasa kama kungubemesa.” 3Yesu yolola kwoko, yamukwata nikwamba ngwenyi: “Ngunazange, bwako mubema!” Hazehene mwe mutu yabema ku musongo wenyi. 4Mba Yesu yamwamba ngwenyi: “Unevu? Kanda ukambulwila mutu niumwe. Alioze yako ukaliweze kuli hako wa Zambi. Mba lambula mulambu uze ambile Mose, ni kulweza eswe ngwe, hiwabema.”

Yesu yawuka kavumbi ka mwata wa tujita

(Tala nawa Luk 7:1-10)

5Muze Yesu hanjila mu limbo lia Kafarnaume,#8:5 kafarnaume: Ku mbumbulu ya chitende cha Galilea, ku norde ku chitokelo. umwe mwata wa tujita twa Aroma yamukundama, yamulembejeka ngwenyi: 6“Mwene, kavumbi kami kanabombo mu zuwo. Kali ni misongo ya kalepa, kanabinji chinji.” 7Yesu yamwamba ngwenyi: “Nguneza ngumuwuke.” 8Alioze mwe mwata yamukumbulula ngwenyi: “Mwene, yami chatelele nichimwe yena unjile mu zuwo liami, alioze amba liji wika mba kavumbi kami kumahinduka. 9Yami mwene nguli mu chiyulo cha miata jami, ni tujita nguli no mu chiyulo chami. Mungwambila umuwika ngwami: ‘Yako!’ mba maya; ni mukwo ngwami: ‘Tweya!’ mba meza. Mungwambila kavumbi kami ngwami: ‘Linga chino!’ mba machilinga.” 10Ha kwivwa maliji wano, Yesu yalishimwoka, yambila waze te anamukaula ngwenyi: “Chamwenemwene ngunanwambe ngwami, kanda ngumono kama ufulielo ubwa haha, chibwe mu Israele ka. 11Ngunanwambe ngwami, anji maakeza ku chivumbuko ni ku chitokelo ni kutwama ku mesa mu Wanangana wa mwilu hamwe ni tata Abrahama ni tata Isake, ni tata Yakoba. 12Alioze waze te chaatamba kubwa enya Wanangana makaambila mu milima, haze. Kwenako atu maakalila, ni kulicheka ku mazo.” 13Mba Yesu yambila mwata wa tujita ngwenyi: “Yako kwe ku mahie, chikabwe ngwe chize hiwafuliela.” Kavumbi ka mwata wa tujita yahinduka lume ha ola yizeyene.

Yesu yawuka mieji anji

(Tala nawa Mar 1:29-34; Luk 4:38-39)

14Yesu yanjila mu zuwo lia Petulu, yawana naye weno ya Petulu te kanabombo ha muhela, kanayiji kachiki. 15Yesu yamukwata ku kwoko, kachiki yamuhwa. Naye weno ya Petulu yakatuka, yabutuka kulingila Yesu yakulia.

16Muze te tangwa hiliatoka kulu, atu yaanehena Yesu mieji anji waze te akwete miku yibi. Yesu yatuhwisa miku yize yibi ni liji lienyi, yawuka mieji eswe. 17Yachilinga hanga chikamanunune liji lize Zambi ahanjikile kuli mukwa munanyi wenyi, Izaya, ngwenyi: “Iye mwene wambachile kukokoloka chetu ni misongo yetu.”

Atu waze akuyambashana kukaula Yesu

(Tala nawa Luk 9:57-62)

18Muze Yesu hamona mbunga kaanamukunguluka, yaambila tumbaji ngwenyi: “Tuzaukenu musali.” 19Umwe longeshi ya Shimbi yamukundama, yamwamba ngwenyi: “Longeshi mungukukaula kweswako mwoya.” 20Yesu ngwenyi: “Mikuza mena akwete, ni tujila yaswa akwete, alioze Mwana Mutu#8:20 mwana MUTU: jina lilemu, lia Yesu wika mu Usendo Waha. keshi homa haze mahasa kubomba.” 21Mutu mukwo, te kambaji, yamwamba ngwenyi: “Mwene, ngutayize kama hatangu nguye ni kufunda tata.#8:21 kufunda TATA: tangwa likwo maliji wano kaanalumbununa ngwo, “kufunga tata ndoo makafwa.”” 22Yesu ngwenyi: “Ngukaule. Echele afu akafunde afu jo ene.”

Yesu yaholesa kangonga wa tachi

(Tala nawa Mar 4:35-41; Luk 8:22-25)

23Yesu yanjila mu wato. Tumbaji twenyi yaaya nenyi. 24Susumuku kangonga wa tachi yabinjisa chitende, miavu ya meya yiifuka wato. Alioze Yesu te kanabombo. 25Tumbaji yaamukundama, yaamulawisa, ngwo: “Mwene, tulamwine! Tunafu!” 26Yesu yaakumbulula ngwenyi: “Kuchi nunevu woma? Ufulielo wenu ukepe!” Mba yakatuka, yakanjisa kangonga ni meya. Neyo yiihola lume kuluu. 27Eswe yaalishimwoka kuhiana, ngwo: “Awu mwene iya? Chibwe fuji ni meya yakumwononokena!”

Yesu yawuka atu aali akwa mwiku wa luchisa

(Tala nawa Mar 5:1-20; Luk 8:26-39)

28Muze Yesu haheta musali lia chitende mu chifuchi cha Gadara, malunga aali yaatuhuka mu yivwenge ya mafuka, yeeza, yaakundama kuli Yesu. Atu wano mwiku wa luchisa te akwete, yitoji asasu chikolo. Mutu niumwe wahamukine kubalika mu jila yize. 29No yaakololoka nikwamba ngwo: “Kuchi yena ni yetu, Yesu Mwana wa Zambi? Wejile kuno ni kutubinjisa shimbu tangwa kanda lichiheta, nyi?” 30Kwabwile kamwe kapinji kuze chendo cha ngulu, te kaanali. 31Mwiku wa luchisa yiulembejeka Yesu ngwo: “Nyi unambe kututuhwisa, tutume kama mu chendo chize cha ngulu.” 32Yesu yawamba ngwenyi: “Yeenu!” Newo yiutuhuka, yiunjila muli ngulu. Chendo yaalundumuka mu mbongo, yaanjila mu chitende, yaafwa.

33Tufunga yaachina, yaanjila mu limbo. Mwenamo ambulwile yuma yeswe, ni chize chabwile hali akwa mwiku wa luchisa. 34Mba akwa limbo eswe yaatuhuka ni kubatwiza Yesu. Muze haamumona, yaaliumba kuli iye ngwo, akatuke ku chifuchi cho.

Currently Selected:

Mateu 8: CHK1970

Highlight

Copy