Mateu 16

Afariseu ni Asaduseu yeeta chilayi

(Tala nawa Mar 8:11-13; Luk 12:54-56)

1Afariseu ni Asaduseu#16:1 AFARISEU NI ASADUSEU: tala 3:7. yeeza kuli Yesu ha kumweseka, yaamwita chilayi chize muchaalweza ngwo: chiyulo chenyi cha mwilu. 2Yesu ngwenyi: “Chingoloshi nwakwamba ngwenu: ‘Kumukucha, mumu lilu linachili.’ 3Chichamene nwakwamba ngwenu: ‘Vula kumanoka mumu lilu linachili, linavunduka.’ Nunanyingika ha kusa yinyingi ku yuma ya mwilu, alioze kunushi mana kulumbununa yinyingi ya mwakono! 4Yenu atu ja mwakono, yingulungulu, kunushi kulivwa ni Zambi. Nunafupu chilayi, alioze kechi kunwaha cho nichimwe, shina chilayi cha mukwa munanyi wa Zambi, Yona.” Mba yaahichika, yaya kwenyi.

Yitumbo ya mbolo ya Afariseu ni ya Asaduseu

(Tala nawa Mar 8:14-21)

5Ha kuzauka musali lia chitende, tumbaji yaavulama kumbata mbolo. 6Yesu yaamba ngwenyi: “Talenu kanawa, keyelenu yitumbo ya mbolo ya Afariseu ni ya Asaduseu.” 7Tumbaji yaalihanjekesa ngwo: “Kanambe chino mumu kutwambachile mbolo.” 8Yesu yachinyingika, yaahula ngwenyi:

“Kuchi kevwe nunalihanjekesa ngwenu: ‘Kanambe chino mumu kutushi mbolo’? Ufulielo wenu ukepe! 9Kanda chinulumbunukina, nyi? Kunushi kwiwuluka mbolo jize jitano nabalwile kuli atu tununu atano, nyi? Tupaya angahi nwazalishile? 10Kunushi kwiwuluka mbolo jize shimbiali nabalwile kuli atu tununu awana, nyi? Tupaya angahi nwazalishile? 11Kuchi mba kuchanulumbunukinyine, nyi? Chahanijikile kuli yenu hakutwala ku mbolo? Keyelenu yitumbo ya mbolo ya Afariseu ni ya Asaduseu!”

12Mba yichalumbunukina ngwo, kuma te kahanjikile ko hakutwala ku yitumbo ya mbolo, alioze hakutwala ku longeso lia Afariseu ni lia Asaduseu.

Petulu yashindakenya ngwenyi: “Yesu mwe Chilamwina yoze Zambi alakenyene.”

(Tala nawa Mar 8:27-30; Luk 9:18-21)

13Yesu yaya ku chifuchi chakusulangana ni limbo lia Sesarea Filipu,#16:13 sesarea Filipu: kilometro 40 ku norde ya chitende cha Galilea. yahula tumbaji twenyi: “Atu kuchi akunguvuluka yami Mwana Mutu#16:13 mwana mutu: tala 8:20. ngwo: nguli iya?” 14No yaakumbulula ngwo: “Akwo kaakwamba ngwo: ‘Yoano Chipapachisa’; akwo ngwo: ‘Eliya;’ akwo ngwo: ‘Jeremia, hanji umwe mukwa munanyi mukwo wa Zambi!’ ” 15Yesu yaahula ngwenyi: “Alioze yenu, kuchi mwakunguvuluka ngwenu: nguli iya?” 16Simone Petulu ngwenyi: “Yena mwe Chilamwina yoze Zambi alakenyene, yena mwe Mwana wa Zambi ya mwono.” 17Yesu yamwamba ngwenyi: “Kuwawaha, yena Simone mwana wa Yoano, mumu mukwa hashi niumwe kausolwele umwenemwene uno, alioze Tata wa mwilu. 18Ni yami ngunakwambe ngwami: yena uli Petulu (liwe), ni ha luliwe luno mungukatunga Chikungulwila chami. Chibwe kufwa kuchichi kachikumba. 19Mungukakwaha sapi ja wanangana wa mwilu. Cheswacho muukalituna hano hashi, Zambi mwilu halituna cho kulu; ni cheswacho muukatayiza hano hashi, Zambi mwilu neye hachitayiza kulu.”

20Mba Yesu yaha tumbaji twenyi koki ngwenyi, kanda ambulwila mutu niumwe ngwo: iye mwe Chilamwina yoze Zambi alakenyene.

Yesu yambulula kufwa chenyi ni uhindukilo wenyi

(Tala nawa Mar 8:31—9:1; Luk 9:22-27)

21Chize ku tangwa lize, Yesu yabutuka kwambulula mwazu kuli tumbaji twenyi ngwenyi: “Changutamba kuya ku Yerusaleme. Kwenako makulwana ja Ayuda ni mahako a lutwe a Zambi, ni alongeshi a Shimbi maakangumwesa lamba linji, maakangushiha, mba ha tangwa lia muchitatu Zambi kumakanguhindwisa.” 22Petulu yamutwala ku tenga, yabutuka kumukanjisa ngwenyi: “Zambi kanda achitayiza kama Mwene. Chino kanda chibwa kama hali yena nichimwe!” 23Alioze Yesu yatewuluka kuli Petulu, ngwenyi: “Ngukatuke, Sakwonga! Uli chitalingiso kuli yami, mumu kuushi kunyonga ngwe Zambi alioze ngwe atu!”

24Yesu yambila tumbaji twenyi ngwenyi: “Nyi umwe mazanga kungukaula, alitwamine kulinyonga iye mwene; azundule kulusu yenyi, angukaule. 25Mutu yoze mazanga kulamwina mwono wenyi, kumakautokesa, alioze yoze matokesa mwono wenyi mumu hali yami, kumakauwana nawa. 26Mutu chika mafumbula nyi mabita hashi heswe, alioze makatokesa mwono wenyi? Mutu chika mahasa kuhana ha kuyuka nawa mwono wenyi? 27Mumu Mwana Mutu#16:27 mwana mutu: tala 8:20. makeza mu uhenya wa Tato hamwe ni tunganda twenyi a mwilu. Mba makalia mutu mweswe nikulita ni yitanga yenyi. 28Chamwenemwene ngunanwambulwila ngwami, amwe atu anamana hano keechi kafwa ndoo maakamona Mwana Mutu kaneza mwe Mwanangana.”

Currently Selected:

Mateu 16: CHK1970

Highlight

Copy