Luke 17
17
1La nīk lāḵīs kīkākūklā matsa wī, kīyosa ī qīh‐īdaās īs gāḵī qāqākialasa, lā glā tā klī lāk̤āla klī gāḵ klas!
2Ekī lāḵsdī kā ī kū kulīḵūd tsūs wālasa tīsum, kās le zukutūyū laḵa klāsāq, lāḵ qihīda masuḵ numūqā laḵ gada ginginānum munī ḵwik.
3¶ Yāklauh daḵw‐la: kū yaksumh‐īdilā ḵīs numwīyūt ūs, klūtlilā lak; wa gil mīs māyātā, kās kīyoh‐wīda ūsāḵ qīh‐īdaas as.
4We kū yāksum lāḵ lūkl aglabū punā ḵā nālā, kās aglabū punī qestā lūkl, nīkia māyātin, la mī sis kīyoh wīd kluḵ qīh‐īdaas as.
5Lī yīyālākum as nīk ḵā Gīkumāyī, ginwāla ḵunūh ūqizālazī.
6Lī da Gīkumayī nīkia, gilh daḵw mī laḵa kūs uḵnūgwādis ūqizalaze hī walasī numskum stū mustard zimālāsā, lāh daḵw lāḵus nīk laḵ gada sycamine glosā, wīga klūpukilīsuḵ, kās la ūs glāga‐āklī laḵa zilātl, lā lāḵ nānākīgī um lāḵūkl.
7Wa ungwā tī lāh daḵwūkl hīlūbātlzānī nūq sa tulqulīsā glū aāḵsīlā lāḵuḵ mūsmūse, yiḵā nīk klāk, yiḵs gaḵa ī la‐īkl lāḵīs īāḵulā īnīh‐dī, kīlaga hīnāqil qāgalītluḵ kās humh‐īda ūs?
8Kās kīsā lasī īs nīkik, wīga qātl ālītlāḵ kun humh‐īda āsa, wusīk‐īdā, kās aāḵsīla ūs gāḵun, kun he‐kl lā‐kl humaā‐gūtl‐kl glū nākaāgūtl klī; lā‐kl wīs glas humh‐īd‐kl glū nāḵīd‐kl?
9Kīlakias‐ḵā ma ī ḵā hīlūbatl‐zanayī kā īḵs la ī uḵīd ḵā qayū kā uḵīd tsūsa?
10Hīh daḵw um ḵa ā wī sis ūgwākā qīhīdī, yiḵs la ā kūs uḵ‐īduḵ nāhwā qayū kās uḵ‐sa wūs, nīkia, kīyosī gānūh qenum ās hīhīlūbātl‐zanī; lamunūh uḵīd ḵī da uḵ‐sū wā la sunūh.
11¶ Wa yiḵs lah daḵwa ī qayūtlil lāḵ Jerusalem, la ās nuḵ‐sau lāḵ Samaria glū Galilee.
12Wa yiḵs la ī lākulīsā ḵā numī gūqila, hī mīs nukās kī sa nukoqī bībagwanum yiḵī da ḵīḵāsulātl‐unī yiḵā glāhglawīs laḵa qīsātla:
13Lah daḵw hāsila, nīkia, Jesus, Gī, wāḵ‐īda gaḵunūh.
14Wa gil mīs dūḵ‐wāklilāh daḵwuk, la nīk lah daḵwuk, hāga nītlā sūs bībagwanumīnīh daḵwā kūs laḵa priests: wa gil mīs qīyūtlilāh daḵw lāk, lah daḵw ek‐īda.
15Wa numūq lah daḵwuk, yiḵs la ī dūḵwāklilāḵs la ī ek‐īda, aīdaākā, hāsula zilwākā ḵunts Ike Gīkumī.
16Wa la huḵ‐wālīs lāḵ gūgwayaus, kīlākias‐ḵulak: Samaritan tā.
17Lī Jesus nānāḵmī nīkia, kīsa ī da nukoqā ek‐īda ā? wī zau tī da nānumūqe?
18Kīsosa ī nīk kās aīdaāke kās zawīs zilwākā laḵa Ike Gīkumī, hīga ma ī gada ūgwuḵsumāq zis ga?
19Wa la nīkīk, glāḵ‐wīdaga, kās lā laga ūs: hī mīs ūqizalazī yūs qilā masūkl.
20¶ La wuklāsū sa Pharisees wīlāq klī gāḵ klī da gīkāsa sa Ike Gīkumī, la nānāḵmīh daḵwuk nīkia, yiḵ gīkāsa sa Ike Gīkumī kīsī awilhyisā.
21Kīs daḵw um‐kl ḵa ā wīsī nīk‐kl, dok, lāḵ ga! glū lāḵī, lāḵā! kā dok, yiḵ gīkāsā sa Ike Gīkumī gīgakīmī lūkl.
22La nīk ḵīs kīkākūklā matsa wī, gāḵ um klī da nālā kla kāsū lāh daḵw‐kl wātlākīlā‐kl kās dūqila ūsāḵ numā lāḵ nāle sa Ḵwanūqā sa bagwanum, wa lāh daḵw klis kīs dūḵ‐wāklilā‐kl kī.
23Lah daḵw klī nīk‐kl lūkl, dok, lāḵā; dok, lāḵ ga, qālā lāḵ, kīs ḵād laskumīh daḵwuk.
24Kā qīx zāsa sa klinīqā, yiḵs la ī klinīqukau laḵa numh‐īda ī sī lāḵ bunāziya sa īkī, kās quḵ‐īdī lāḵ upsbālī sa sa īkī: hī mīs qīxdum‐kl tsa Ḵwanūqā sa bagwanum lāḵīs nālā.
25La mīs gla tlālāwotlilā ma wīs glā‐kl glū yakmūdum‐kl tsa līlqilāklayīḵ.
26Wa hī mīs qīxdum ūtlas nālūtlas Noah, hī um‐kl wīs gāḵ qīx kla ḵa ī nāles Ḵwanūqās bagwanum.
27Humāp dāḵwa ūtla, nākāh dāḵwūtl, hīhāyāsikiaulāh dāḵwa ūtla, lah daḵwūtlī zawe lāḵ hāyāsikiūhwīdī, lāga ā laḵa nālūtla lah dum ūtlas Noah lāḵs laḵa ūgwā, wa lūtlī da pa‐ūtla gāḵ, lūtl wīwilā masuḵ nāhwā.
28Lā ḵa ā ḵāt qīh‐īdaās lāḵ nālūtlas Lot: humāp daḵwa ūtla, lah daḵwūtl ḵa ī nākā, kilhwāh daḵwūtl, lāḵūdih daḵwūtl, zimāh daḵwa ūtl, gūqīlāh daḵwa ūtlā;
29We lā glā ḵā nālā yiḵs la ī Lot lotlzau lāḵ Sodom yūgwih‐īdī hyīhyikula gla wa hyīhyuḵsumāla tīsum gāyāḵul laḵ īkī, lūtl hyisīdā mas wīlūtl kī.
30Hī mīs qīgīlas klī lāḵī da nālā klā yiḵ nītl‐īdāyūh dum kla sa Ḵwanūqas bagwānum.
31Lāḵī da nālā klā yiḵī da hīklā lī da ūgwesa sa gūq, gla wīs māmīkia ga‐īklil laḵa gūq, qālā hyī lā ḵā kās uḵ‐īdīk; gla wī da āawīnāgwītsīla, qālā hyī ḵa ī aīdaākā.
32Mulqilā lāḵ kunum ūtlas Lot.
33Yiḵ ungwā kla ālē‐kl kās loklī ḵīs qilātla gītl hyisā mas klīk: wa yiglāḵ ungwā kla hyisā mas‐kl ḵīs qilātla gītl qāqilā āqilā klīk.
34Nīkin klūkl, laḵī da kānūklā mālūgwī klī bībagwanum kla laḵa num ga‐īlas; numūqī da uḵ‐īd tsū‐kl, lā klī da numūq qalītl‐awī‐kl.
35Mālūq klī zīdāk kla qītlā‐kl; numūqī da uḵ‐īd tsū kla, lā klī da numūq qa‐īs awī‐kl.
36Mālūq kla bībagwanum kla āawīnāgwī tsīlā‐kl; numūqī da uḵ‐īd tsū klā, lī da numūq glā wīs āwī‐kl.
37Lahdaḵw nānāḵmī nīkik, lāḵwe, Gīkumī? la nīk lah daḵwuk, lāḵ uḵ‐āsa sa yāqīsī, hī mīs la k̤āpīkaula tsa qīq.
Currently Selected:
Luke 17: Kwak
Highlight
Share
Copy
Want to have your highlights saved across all your devices? Sign up or sign in
Historical texts first published by the British and Foreign Bible Society 1882-1897. These texts were digitised for the Canadian Bible Society.
