John 18
18
1Lī Jesus gla wīs disciples yīks lā ī qātl nīk sīk lāwītl lākā wā Kedron, yiḵ uḵ‐āsasa garden, yiḵ lā lāzaulī zāts glā wīs disciples.
2Wa yiḵ Judas, kā lāḵūdēk, kauklila um kād ūgwākā ḵā awīnāqis, kā Jesus āḵs qātl qināla ī lā lāk gla wīs disciples.
3Yiḵs lā ī loklī Judas ā ḵā kīnum soldiers, gla wa hībūbātl zanayī lāḵā gī‐gākumāyī priest glū lāḵā Pharisees, gāḵ qāsū tlil nī‐nīgwāzī wātilā gla wa hyīhyīḵbāla gla wa kyīlāgāyū dālāsūh dāḵws.
4Lī Jesus kā īs qātlila īnī um kauklilā ḵā nāhwā qāqiya āsik, lā kākāyālāk kās nīk yīk, ungwīs ālēh dāḵwa?
5Lāh dāḵw nānāḵmīk, hī mī Jesus as Nazareth: lī Jesus nīk yik, Nūgwa‐um: gloqīlīs mī sī Judas āk, ḵā lāḵūdēk.
6Wa gil mīs nīk yik, Nūgwa‐um, lāh dāḵw nuklumgālīsā.
7Wa lā ītīd wuklāk, ungwīs ālēh dāḵwā? Lāh dāḵw nīkyā Jesus as Nazareth.
8Lī Jesus nānāḵmīk, la mī gin nīkūklāḵ gin Nūgwā mīg: kāsū uḵ‐īḵsdih dāḵw lāḵ gāḵun, wīgā umās glā gādā lā qīstā.
9Kā ī da wātldumī aulāh‐īdīs, yiḵ nīgim ās, yiḵ gāyūtl lāḵā lāḵīs lā yūs zawī gāḵun kīyos un num ūqilḵ glī lāk.
10Wa lī Simon Peter, uḵnūgwāda ā sa qīḵāyū, tluqwutl‐zūdik, kās qīḵ īdīḵ hīlūbātl zanā yasa gīkumāyī priest, qīḵūdiḵ hītlkyūdinū‐klināyī puspayūs, Malchus klī da hīlūbātl zānāyī.
11Wa lā Jesus nīk yiḵ Peter, uḵzūdā tsūḵ da qīḵāyūḵ lāḵūs klāszawā sīḵ, kīs klā un nāḵīd‐kl ḵā lē zawē sī da Umpa kun nāḵ‐id tsawa ā?
12Lā wīs glī da kīmaula, gla wī da captain gla wa hilūbātl‐zanāya sa Jews dāh‐īdiḵ Jesus, kās yitl‐īdik.
13Lāh dākw wātilāk, la mā wīs glas lāḵ Annas, kā īḵs nagwūmpa as Caiaphas ḵā gīkumāyī priest.
14Wa yiḵ Caiaphas hī um nīk zūd ḵā Jews, yikīḵs ekīklī kā numūqī‐sī tlilā kā i da līlqilā‐klāyī.
15¶ Lī Simon Peter lāskum īḵ Jesus, lā ūgwākī da numūq disciple: wa yiḵā disciple mātltēlā sa wī sī da gīkumāyī priest, la la‐īkl glū Jesus lāḵ gūqā sa gīkumāyī priest.
16Au mīs glā Peter glaḵstaulas lāḵā klāsānauyī: wa lī da numūq disciple yiḵ mātltēlā sa wā sī da gīkumāyi preist, lotlzau‐lītl kās ūḵ‐kigātlī‐ḵā zidāk aāḵsīla ḵā tihyilā, la gāḵīklā masiḵ Peter.
17Lī da hītl‐ākās ḵā aāḵsīlē ḵā tihyilā nīk yiḵ Peter, īs as gayūtl um ḵād lāḵ disciples āsūḵ da bagwānum ḵā? La nīkyā, kīs un.
18Hī tā lī da hīlūbātl zanāyī glāhgla wītlā, la ī luḵ‐wālītlāh dāḵw sa zūzātlmūt; kā īḵs wudāla ī; lāh dāḵw tā titl‐zā, gloqī lī lāts Peter, ūgwākā titl‐zā.
19¶ Lī da gīkumāyī priest wuklāḵ Jesus lāḵīs disciples gla wīs glīḵs‐ālāyū.
20Lī Jesus nānāḵmīk, nītlātlā umh din nīk ḵwā awīnāgwīs īḵ, himun‐ātla umh din kākūklā mas lāḵā synagogue gla wī da temple, yīḵ lā nāhwā kāpīkawā tsā Jews, kīyos tin tāyaulāyau.
21Mā zīs nūgwā gītla wuklā sa wā? wuklā zau ḵā wuklilā nāhwāh dē gāḵun, ḵun wātldum āk, doḵ gādā, ga um kauklilā ḵun wātldāmī lē lāh dē.
22Gil mīs nīkyā, lī da numūqī hīlūbātlzanāya ḵā glāḵwēnau lītlāk kluḵ‐īdiḵ Jesus, nīkyā, hī mas qīkyālā ḵwā gīkumāyīḵ priesta ā?
23Lī Jesus nānāḵmīk, nītla zau tsā yāksamā lāḵ un wātldum āk, kun klū yākpāḵstālāḵuk; mā sīs hī gītlā qīh‐īd gāḵun, kū ek um lāḵ?
24Wa lī Annas yītl zanundik kās lāmās īs lāḵ Caiaphas ḵā gīkumāyī priest.
25Wa glāwītl tsē mī sī Peter titlzā: lāh dāḵw nīk yik, sū ma ī ḵād gāyūtl lāḵ disciples ās gā? La hīhwā nīkyā, kīsun.
26Lī da numūq lāk hīlūbātl zanāyā sa gīkumāyī priest, glīgla‐glaulēs qīḵawāqās, puspayū yis Peter, nīkya, kīs da un dūqilūkl lāḵā garden glawūḵwā?
27Lī Peter ītīd hīhwā; hīh īdā mī sī da kākā‐ū kākā‐ū qagātla.
28¶ Wa lāh dāḵw wātī duk Jesus lāḵ Caiaphas kās lēs lāḵā dādalīta‐īlas: kaāla kyās tā; wa kīs dāḵw tā la‐īkl lāḵā dādalīta īlas, kās kīs dāḵwī yāksumh īda lāḵ; kāglās humāp dāḵwī ḵā hayākutl tsimāyi.
29Lā gītl‐ts Pilāte lā‐wils lāh dāḵwuk, kās nīkī, māsīs sīnāt dāḵwa ūs āḵ gāda bagwānumg?
30Lāh dāḵw nānāḵmī nīk yik, gil mī lāḵs dēḵ sā bagwānumḵ kīs yāksāmā, lā lāḵs dunūh kīs gāḵ zaw sūḵ lūkl.
31Hī mīs nīkītl‐ts Pilate lāh dāḵwik, sūh dāḵw umā uḵ kig, kās dādalīta ūs ākig lāḵīs law yūs: lī da Jews nīk yik, kīs unūh hitlau lāḵā law kunūh tlilā mas īḵ ungwē bāgwānumā.
32Kā aulī sī wātldum as Jesus, yīḵ nīgim ās, qāqīxāl lāḵīs tlila‐ās ūgwītl.
33Wa lī Pilate īdī‐kl lāḵā dādalīta‐īlas, kās klīlālīk, lā nīk yik, Gīkumāyasī tsūḵ da Jews īḵā?
34La nānāḵmāyī Jesus, qilīx mas nīkya ā? īs as nītlā sūs ūgwilē nīk gāḵun ā?
35Lī Pilate nānāḵmayā Jew ā unā? yū ma āḵ sūs gūqilūt ā kūs, gla wā gī‐gikumāyīḵ priest zaw ūs gāḵun; mā zīs qīh‐īda āsā ūs?
36La nānāḵmayī Jesus, yiḵun gīkāsā kīsa ā gāyūtl lāḵwā awīnāgwīs īḵ; gil mī lāḵs dē sin gīkāsā gāyūtl lāḵwā awīnāgwīs īḵ, lālā ḵun hīlūbātl‐zanāyī hēkaulā, kun kīsī zawē lāḵā Jews: wā kīs glā glin gīkāsā gāyūtl lāq.
37Lā gītl ts Pilate nīk yik, Gīkumī mas ī glā? lī Jesus nanāḵmāyā, nik ma ā kūsāḵ gin gīkumāyīg: hī mun gāḵītl wūtl māyūglum ī, wa hī mī sin gāḵītl lāḵwā awīnāgwīs īḵ, kun nītlū‐gwītlī sa aulā: yiḵā nāhwē bagwānum gāyūtl lāḵā aulā hūklīlī gāḵun.
38Lī Pilate nīk yik, māzī dā aulē? wa gil mīs nīkya, la lā‐wils ītīd lāḵā Jews kās nīkīk, kīyosī gin khā sū yāksum lāk ig.
39Lā glāh dākw tas qāyāyaīlā‐zādis, uḵ kun lāwilsā masī ḵā numūqī kāh dāḵws yiḵs lānāhwā ī hayākutl‐tsimāyā, wīgā hyin lāwilsāḵ gāda Gīkumī ga sa Jews kāh dāḵws wā?
40Lāh dākw hāsil ītīd nīkyā, qālā yau, yū lā hyī glūḵ Barabbas āḵ: wa yiḵ Barabbas gilūklīq wūtlī.
Currently Selected:
John 18: Kwak
Highlight
Share
Copy
Want to have your highlights saved across all your devices? Sign up or sign in
Historical texts first published by the British and Foreign Bible Society 1882-1897. These texts were digitised for the Canadian Bible Society.
