Qāyīlelas (Acts) 3

1Lī Peter glū John la lāgūstaul lā la ā laḵa umyāḵulazī laḵa la hawāḵ‐ulāh dumā, yiḵā la nānumā‐zākīlā.

2Wa numūq tī da bagwanum yiḵā aūzagīla gegiklil laḵīs māyūglumh dum ūtla sīs abump daāqā, yiḵ lā‐nāhwā gilga‐ulzumk daḵws laḵ tihyile sa umyāḵulazī, yiḵā glīkula su was Hyāhyīlinūs, kās dāk̤iālī lah daḵwī da la‐īklila laḵa umyāḵulazī;

3Hī mīs yiḵs lā ī dūqileḵ Peter glū John la‐īklil laḵa umyāḵulazī, dāk̤igātl kās wāḵ‐īd sū wī.

4Lī Peter dūduḵs‐unduk, glū John, nīkia, dūḵ‐wīdas gaḵunūh.

5Wa la hūklīla lah daḵwuk, nāk̤iātl kās zaw sūh dāḵwīs.

6Au mī sī Peter nīkia, dālā glū gold kīyos gāḵun; yiglā ḵun uḵī, hīmun zaw yūkl: laḵ glīkum as Jesus as Nazareth, kās‐īdaga.

7La dāh‐īduḵ hītl‐kiūtl zanes kās nīḵūstūdīk: wa hīhīdā mīs gūgagwayaus glū ḵākā sīs ka‐ātlkūq tloqīmas īda.

8La dihwilsā, kās glāḵwilsī, kās kās‐īdī; wa la la‐īkl glūh dāḵwī laḵa umyāḵulazī, kāsa, dihwa‐nāqila zilwā‐kutawī ḵunts Ike Gīkumī,

9Wa nāhwā mī sa bagwanum dūqilā kīḵs lā ī kāsā, gla wīs zilwākā īnāya ḵunts Ike Gīkumī:

10Wa lah dāḵw kauklila umk, yikīḵs hīma ī da qāstaulīs‐nāhwak de ḵā Hyāhyīlinūs tihyilā sa umyāḵulazī: lah daḵw kūtāḵ sīs ḵunyā‐zīnayī yisa la qīh‐īdaasuk.

11Wa lāḵīs dātla īnāyāḵ Peter glū John, la ās nāhwī da bagwanum zilh‐wīd kāpīkū lah daḵwuk, lā ḵī da awīnāgwītl yiḵā hus wūtlā laḵ Solomon, aul ḵunyasa.

12Gil mī sī Peter dūqilāḵīk, la ās yākugātl ḵā kīnum bagwanum, yūkl bībagwanums Israel, mās daḵw zīs ḵunyāyāla gītlas gada bagwānumk? mā sī ḵa īs dūduḵs‐undih dāḵwītla gaḵunūh, nūs ta āq munūhwā kī tlāhwī glū k̤īs aūmzālazī ḵunūh lāgītla kāsīdā mas kuk?

13Yiḵ Gīyās Abraham, glū Isaac, glū Jacob, yiḵ Gīyā sints wī‐ūmp wūtla, la um ekīlā ḵīs Kwanūqa ī Jesus; yiḵīs lah daḵwūs zawya, glū la hīhwāk laḵ kūqumāyas Pilate, yiḵs lā ī tloqīmas nīk kās qītlūdīk.

14Auh daḵw mī sis yaksum ḵī da Ekiā Numūq ma Nukā de ḵād, las hī qayū‐buziyī da yāksāma bagwānum kā hes la zawe lūkl,

15Las k̤īlāk‐īd ḵī da Qilāgīle; yiḵ qilākīdā matsū wa sa Ike Gīkumī laḵa tlilī, yiḵunūh aula k̤iāla kauglitla.

16Wa hī mī sī glīkuma sī, ūqizīnāyāḵ glīkuma sī la tloqīmas īdā mas gāda bagwanumk, yiḵ gas dūqitl daḵw gwūs glū mātl‐tītl mā: kegl, yiḵī da ūqizālaze sī ga kī, la zaw kuk yis gas la‐īnīk hīnūm hītl‐tsīstā kās dūqitl daḵw mūs nāhwā mā.

17Wa, la mī sin nātl‐numwīyūt, kauklilā umḵs k̤īsa ā kūs kauklilā ḵīs qīhīdaās ūs, hī qīx ī k̤īzīnāya ḵa ās kauklilīs gīgikumā yūs.

18Wa yiglā ḵī da nāhwā yiḵ qātlilā mūtlā nīlum sa Ike Gīkumī simzā dūtl tsī da nāhwūtla prophets, yikīḵs hiyūgwītla ī qīh‐īdī Christ, hī mīs lā qātl‐tsīstā mas tsū sī.

19Wa māyātāk daḵw laga kās klāyau ūsā ḵūs qīxdum īḵ, kā dīgiklilūd tsu wī sīs yekīnāyūs, kā gāḵī‐kl tsī da hītlilkulāh dum nāhwā kla gāyanāqilā‐kl laḵ uḵāsa sints Ike Gīkumāya;

20Glū kā yālāḵ‐īda mī kla sī yisī da Christ a, yiḵī da qātlila mūtla uḵe kās gāḵī lūkl, ya‐umḵ Jesus a:

21Yiḵī da le uḵūstū‐yū lāḵā īk̤ī, lā‐kl getlā‐kl lākī lāga‐āklilā‐kl lāḵ lāh dum kla nākīs‐tundih dum‐kl ḵwā nāhwāḵ, yiḵ wātldum ūtla sints Ike Gīkumī simzād sīs nāhwā ek prophets gegiklil lāḵ gilgālīs dum ūtla sa bunīḵ awīnāgwīs.

22Kā Moses yiḵs aula ūtla nīk, uḵe nūq klī Gīyā ḵunts Ike Gīkumī sīs glāḵwilīsā mas tsū kla kā prophet klūs, gāyūtl kla lāh daḵwūkl numāhyis‐kl gla wun, hī mī sis hūklīlā sū klī lāḵ nāhwā kla wātldum‐īlelā‐kl sī lūkl.

23Wa lā klī yiḵī da nāhwā kla k̤īs hūklīla‐kl ḵī da prophet kla, kīyo‐hwīdā matsū‐kl lāḵwā līlqilākla‐yīḵ.

24Hī ma ā ḵa ās qātlilā mūtl wātldum sa nāhwūtla pī‐prophet gegiklilā um lāḵ Samuel glūh daḵwī da qāsa‐yas klāyūnāqilāk, yiḵ wāḵūgwāsa sī da yāk̤ugātl nāhwūtlas, nīk mūtl ḵa ī sūḵ‐da lāḵ gāḵ nālā.

25Yūklāḵs sāsuma ākūsā sa pī‐prophet wūtlā, hī mī sī hawātldum‐kaula‐yū wūtla sints Ike Gīkumī gla wunts wī‐ūmp wūtla, nīkiḵ Abraham, we lāḵī da gāyūtl kla lāḵīs sāsum kla ūs ekīlā sū gwītl‐kl sū‐kl nāhwāḵ līlqilāklī sa awīnāgwīs‐īḵ kā klī.

26Sū mīs gil sū sa Ike Gīkumī, yiḵs la ā qilāgilīsā mas ḵīs Ḵwanūqa ī Jesus, yālāḵīd tsī kās ekīlī lūkl, tlūhwināqilā mas nāhwāh daḵwūkl kās qātla ūsā ḵīs yekīnīh daḵwūs.

Currently Selected:

Qāyīlelas (Acts) 3: Kwak

Highlight

Copy