Qāyīlelas (Acts) 16

1Wa gāḵa ā lāḵ Derbe glū lāḵ Lystra: wa dok, numūqī da disciple hī gāḵ lī, glīkādis Timothy, ḵwanūq sa Jew zidākā, yiḵā ūqisā; lā tī ūmp as Greek ā.

2Hī mīs hyāshyīlā sū sī da nātlnumwiyūt ḵā hī lī Lystra glū Iconium.

3Hī mīs uḵ īḵsda sūs kā lā gla wī, la uḵ‐īduk kās circumcise īdīk kā ī da Jews hī gāḵ lī da awīnāgwīs, kā īḵs nāhwāh dāḵw mā ī kauklilāḵ ūmpā sīḵs Greek a ī.

4We lāḵīs la‐īnīh dāḵwī ke‐nāqilā lāksau līsilā lāḵa ātl‐ūgwuḵ sumīs līlqilāklayā, lāh dāḵw zawk yisī da la qātlīlāq wātldum ā kā āḵīlā sūh dāḵws, yiḵī da ek um la īāḵīsī da apostles gla wa qils‐qilyāq hī gāḵ lī Jerusalem.

5Wa lī da nāhwā church tloqīmas‐īdīs ūqizālazī, lā ḵād kī‐nāqilīs wāḵa āsa ḵūḵ nīnālāḵ.

6¶ Wa lāh dāḵw lāḵsau līsilā lāḵ Phrygia glū Galatia, la um bulā sū sa Holy Spirit kās k̤īsī yākugātl tsī da wātldum lāḵ Asia;

7Wa gilh dāḵw mīs gāḵ‐āklil lāḵ Mysia, lāh dāḵw wāh nīk kās le lāḵ Bithynia; lā tī Spirit as Jesus k̤īs hītl‐k̤ālāk;

8Lāh dāḵw hiyākulāḵ Mysia, gāḵ dāḵw lāḵ Troas.

9La ās dūḵ‐wāglitl nūqī Paul ḵā nītl īdī lākī ḵā kānūklī; glāwītla bagwānum lāk gāyūtl lāḵ Macedonia hawāḵ‐ulāk, nīkia, kīlā gāḵā‐wītl lāḵ Macedonia, kās giwāla ūs gāḵunūh.

10We yiḵs la ī dūqila ḵīs dūḵ‐wāglitlī, hīh‐īda mī sunūh nīk kunūh le lāḵ Macedonia, la um kauklilāḵ gānūh la mīk uḵ‐k̤iāla sū sints Ike Gīkumī kunūh le khālā‐gīlā matsa ek zik̤iālum lāh dāḵwuk.

11Lā nūh gluḵ‐īd lāḵ Troas, la mī sunūh nuk̤uḵ‐glātl hayūtlil lāḵ Samothrace, la tlinsā lānūh lāḵ Neapolis;

12Wa geh‐īd lāk lā lāḵ Philippi numskumāqī lāḵ Macedonia, yiḵā maqumāyas gāyūtlī lāḵā Romans; wa, ga mī sunūh wālātla as mā wīs gla gada gūqilak’.

13We yiḵs lā ī Sabbath nālā lānūh lā‐wils kunūh le lāḵ klāsāzīlīsa sā gūqila mākiātla um lāḵā wā, yiḵunūh qayū hawāḵ‐ulā ās nāhwā, lānūh qisumgālīs kunūh yākugātlī ḵā zīdākī gāḵ kāpīkū‐nāhwā lāk.

14La āsā numūqī zidākā glīkādis Lydia, lāḵulī ḵā klāqā qītl‐qela, gāyūtl lāḵ Thyatira khātlī ḵunts Ike Gīkumāya, wuklilā gāḵunūh; hī mīs lā uḵstūd tsa wī naukāyas yisints Iḵe Gīkumāya, kās hūklīlīḵ ḵā nāhwā qāqīx‐ālats Paul yiḵs lā ī yākuntālā.

15Wa gil mīs qātluḵs la ī baptize tsū wā, gla wīs sāsum ī, la hawāḵ‐ulā gāḵunūh, nīkia, kāsū la um lāḵ nīkin ek lāḵā Gīyā, kīlāga gāḵītl lāḵun gūqī, kās hī ūs gāḵ lī, la tloqāla gāḵunūh.

16¶ We yiḵ gānūh lek qiyūtlil lāḵā hawaḵ‐ulās nāhwā, la āsa numūqī nunwālāqikul hītl‐ākās nākū gla wunūh, yiḵā k̤īyūklilā kā īs k̤āgwīdī yisīs nunwāla‐k̤wālāyū wātldum ā.

17Hī mīs gāḵ gāḵsum īḵ Paul gla wunūh, hāsil nīgitauyā, yiḵ gāda bībagwānumk ga um hīlūbātlzanī sa Ike Gīkumāya, ga mīs gāḵ nītlūklā sa tihyiles hītlilā‐gīle.

18Hī qīk̤iālā ḵā k̤īḵ sa nālā, lā tī Paul, la um wīwūzīḵ‐īdis qīk̤iālas as, qīkumh īd lāk, kās nīkī ḵī da spirit, la mun nīkiūkl lāḵ glīkum as Jesus Christ lāwe laga lāq; la mīs hīh‐īda um lāwe.

19Wa gil mīs glī k̤āgwīdes dūḵwāklilā kīḵs la ī lāwī‐yīs qāqenumā‐yūk dī, la dāh‐īdiḵ Paul glū Silas, kās lī nīḵa‐nāqilas lāḵā dādalīta ās kās les lāḵā hīhānāgāzī.

20Wa gilh dāḵw mīs gāḵs lāḵā hīhānāgazī, lāh dāḵw nīkia, yiḵ gāda bībagwānumk yiḵs Jew īk, gāḵ ik k̤īk̤ā‐īkula ḵunts awīnāgwīs īḵ.

21Kākūklā mat sa qīgīlas yiḵā k̤īsī ek kunts dādāla sū wā, glū kunts k̤ātla sū lāḵ yiḵ gints Roman ī gīnts.

22Wīlā mī sī da kīnum ī bagwānum haweḵau kās kākādālīk: lī da hīhānagazī qāpumūduḵ qītlqelāh dāḵwas, la weḵā kā hwisā sūh dāḵw lagīs yisa hwiyāyū.

23Wa gilh dāḵw mīs la k̤īpīnūstukā yisā hwiyāyū lāh dāḵwuk, lāh dāḵw wulgālītlāk lāḵā wālazī kā ekīs dūqātlāk:

24Hī mīs, yiḵs la ī glīḵs‐ālāq, la la‐īklas lāḵā nākukīlītl wālaze, lā wulwulk sīzinduk gūgwayūk dāḵwas.

25Au mī sī Paul ḵī da leḵunt nukīgayā hawāḵ‐ulā glū Silas, dunḵulā ḵād yisa zilwāḵklinī lāḵunts Ike Gīkumī, la wuglitl dāḵw sī da wuh‐wulītl;

26La āsī da ūdāh‐īdāmī nitl‐īdī da awīnāgwīs, nitl‐īdī gūq‐dume sa wālazī, wa hīh‐īdā mī sī da tihyile sa wālaze uḵstūda, lāḵa ī wuh‐wulīlumā sa nāhwā wuh‐wulītl qītlum we.

27Wa la āsī da aāḵsīle ḵā wālazī yiḵs la ī zigitl māyā, glūḵs la ī dūqilā ḵā tihyile sa wālazī uḵstautla, tluqwutlzūd ḵīs qīḵāyū, kās qilī‐gīlī lāḵst, wūtl um nīk iḵ la um wīlum wilsī da wuh‐wulītl.

28La āsī Paul qākligātl hāsil nīkia, qātlas hī qāqayī; wīla ītl munūh.

29La uḵ‐k̤igātl kā gāḵ yū wīs nīgwayau, la, da‐wīkla, ek‐ḵwunāla sīs kitlāyī, humḵwālītl lāḵ Paul glū Silas,

30La lotlzau lītlas kās nīkī, Aāde, māzun qīh‐īda ās klā kun qilī?

31Lāh dāḵw nīkia, ūqis lagāḵ Gīya ī Jesus Christ, la mī sis qilā‐kl, gla wīs gūqa ūs.

32Lāh dāḵw yāk̤ugātl tsa wātldum ā sints Ike Gīkumī lāk, gla wī da nāhwā hī gāḵ lī gūqas.

33Hī mīs lāh dums uḵ‐īd kī ḵī da kānūkl kās le zūzūḵstūduk hwīhwi‐zītlayas, wa la baptize īda, wīla gla wīs husāk, hīh‐īdā mā.

34Wa lā, lās lāḵīs gūqī, kās humgīlāh īdīk, la ek̤īkulāh dāḵwā, wīla gla wīs gūqī, yiḵs lāh dāḵwa ī ūqis ḵunts Ike Gīkumī.

35¶ Gil mīs nāh‐īda, la āsī da dīdādalītāīnūḵ yālāḵ‐īd tsīs yālāḵ‐īdāyū, nīkia, lā wils le hyūḵ da bībagwānum āk.

36La āsī da aāḵsīle ḵā wālazī nītlāsī da wātldum lāḵ Paul, nīkia, la mī da dīdādalītāīnūḵ yālāḵ‐īd kās lālā‐gih dāḵwa ūs, kīlaga, kās ek ma ūs lā.

37Au mī sī Paul nīk lāh dāḵwuk, lāh dāḵw mīk de sī dādūqilā māzā sīs k̤īlāh‐īdā īnayā gāḵunūh, wutl k̤āla um hī qīh‐īd k̤īyos sīnātā, yiḵ gānūh Roman īk bībagwānum a, gāḵ ḵād wulgalītlā gāḵunūh lāḵ gāda wālazīk; lā tī nīk kās qilākla wilsa unūhwā? k̤īsā la sunūh lā; hī umā gāḵ lāwilsānūh.

38Lī da yālākum ī nītlas gada wātldumk lāḵā dīdādalītā īnūḵ, lāh dāḵw kitl‐īda yiḵs la ī kautl‐āklilā kīḵs Roman dāḵwa ī;

39Wa gāḵ dāḵwa ās hawāḵ‐ulāk; wa gilh dāḵw mīs lāwilsāk, lāh dāḵw uḵ‐k̤iālāk kā lāh dāḵw la gīs klīḵ‐wīd lāḵā awīnāgwīs.

40Wa lāh dāḵw lāwils lāḵā wālazī, la la‐īkl lāḵ gūqas Lydia: wa gilh dāḵw mīs dūḵ‐wāklilā ḵā nātl‐numwiyūt, lāh dāḵw hāyātlilk̤ulh‐īdik, lāh dāḵwa ās ek um lā.

Currently Selected:

Qāyīlelas (Acts) 16: Kwak

Highlight

Copy