तोलिङ्‌सोमु 6:1-4

इक्‍सादिङ् खाम्‍बेःक्‍मो मे़न्‍छाम् याप्‍मिहाॽ यरिक् मे़बोःन्‍दे़र मे़बे हे़क्‍क्‍याङ् खे़ङ्‌हाॽरे़ खुन्‍छिॽ सा मे़न्‍छुमाहाॽ मे़वये़, निङ्‌वाॽफुमाङ्‌साहाॽरे़ मनाहाॽरे़ खुनिॽ मे़न्‍छुमा साहाॽ नुमा मे़निसुसि, हे़क्‍क्‍याङ् खुन्‍छिॽ सिराॽथाङ्‌धाङ् मे़ल्‍लिङ्‌गे़न् मेःत् मे़दारुसि॥ खे़ब्‍याङ् यहवे दाङ्‌बाल्‍ले़ पाःत्तु, “मे़न्‍छाम् याप्‍मिहाॽनु आयाम्‍साम्‍मिन् सदादिङ् मे़वाॽने़न्, थेआङ्‌भे़ल्‍ले़ खे़न् नासिगे़न् थक्‍लारक्‍लो॥ खे़न् किप् थिक्‍काङ् निबोङ् तङ्‌बे थारिक् हिङ्‌लो॥” खे़न् ये़म्‍मो नु खे़न् एगाङ्‌ङाङ् इक्‍सादिङ् खाम्‍बेःक्‍मो होरुहाॽ मे़वये़॥ निङ्‌वाॽफुमाङ्‌साहाॽ मे़न्‍छाम् याप्‍मिहाॽरे़ खुन्‍छिॽ मे़न्‍छुमा साहाॽरो पेःक्‍मा मे़हेःक्‍ते़, हे़क्‍क्‍याङ् सामे़गत्ते़॥ खे़ङ्‌हाॽरे़ मे़गत्तुसिबा साहाॽए उन्‍छेःन्‍बा ये़म्‍मोबा मुक्‍के़गुबा नु कुमिङ् के़इङ्‌बा मनाहाॽ मे़वये़॥