Jenesis 49

Jakob Blessing

1Den Jakob koll all en sons kon sey, “Make all of una kom, so dat I go tell una wetin go happen for future.

2“Make una listin to mi, una wey bi Jakob shidren;

make una listin to Israel wey bi una papa.

3Reuben, na yu I first-born,

my strent and di first fruit wey I plok.

Na yu bi di nomba one,

both for rank and pawa.

4But yu dey skata tins like wota,

so yu nor go prosper,

bikos yu sleep with yor papa wife for my bed!

5Simeon and Levi na brodas,

dem like war and trobol well-well!

6Make I neva ever join dia meetin

or go where dem for gada dey make plan.

Bikos as dem dey vex,

dem kill many pipol

kon break animals leg just as dem like.

7I curse dia wiked mind,

bikos e too strong and dia annoyance,

bikos e dey bad well-well.

I go divide dem inside Jakob family

kon skata dem among Israel pipol!

8Yu Judah, yor brodas go praiz yu.

Yor hand go strong pass yor enemy own.

Yor papa sons go bow down for yu.

9Judah my pikin,

yu bi yong lion

wey just chop wetin e kill finish.

Yu dey kill like lion

kon kwayet dey look;

yu bi like woman lion,

na who go fit fight am?

10Di pawa rod nor go komot from Judah

and di pawa to take rule,

go always dey en leg,

until e go rish di pesin wey really get am

and evribody go obey yu.

11E tie en donkey put for di vine,

di vine wey e choose.

Na wine e take dey wosh en klot

and na grape e take dey wosh en garment.

12En eyes dark pass wine

and en tit white pass milk.

13Zebulun go dey stay near di sea

and e go dey kontrol many sheep for di sea,

en land go long go rish Sidon.

14Issakar na very strong donkey

wey dey rest on-top two strong bags.

15Wen e si how di kountry side bi

and how di land good,

e go fit bear di load wey e karry

kon bi savant to odas.

16Dan go rule pipol

like any oda tribe for Israel.

17Dan go bi like snake wey dey di road korna;

like betta wiked snake wey dey bite horse leg,

so dat who dey ride am go fall.

18My Oga God, I trust Yu sey, Yu go save mi!

19Pipol wey dey tif, go attack Gad,

but e go attack dem wen dem don go back.

20Na rish-rish food Asher go dey chop

and e go dey provide betta food for kings.

21Naftali go bi like animal wey dey free;

di words wey e go tok,

go dey good well-well.

22Josef na betta vine wey dey produce good food;

betta vine wey dem plant near wota

and en branches dem dey klimb di wall.

23Hunta go attack am,

dem go shot and oppoz am.

24But en bow go dey strong

and e nor go move

and e hand go sabi work

bikos of Jakob God, di Shepad,

wey bi di Rock for Israel,

25una papa God wey go help una,

di God wey get pawa wey go bless una

with di blessing wey dey di sky for up;

di Pesin wey get blessings wey dey wota

and under di eart and even di ones from animals.

26Una papa blessing dey great pass

all di blessings wey

dey from di mountins go rish di hills.

Dis blessings go rest for Josef head,

bikos e bi prince among en brodas.

27Benjamin go bi like wolf

wey dey skata en enemy.

For morning, e dey distroy wetin e katch

and for evening, e dey divide wetin e katch.”

28Dis na di twelf tribes for Israel. Dis na wetin dia papa tell dem wen e dey bless dem. E bless all of dem as e suppose bless dem.

Jakob Die

29Den Jakob kommand sey, “I go soon die. So, make una beri mi with my papa dem for di grave wey dey Efron field for Hit land. 30Na di grave wey dey Makpelah field for Mamre land for Kanaan, wey Abraham buy as burial groun from Efron wey bi Hit pesin. 31Na der dem for beri Abraham and en wife Sarah; na der two dem for beri Isaak and en wife Rebekah and na der I for beri Leah. 32Dem buy di field and di grave wey dey inside from Het shidren.” 33Wen Jakob don kommand all en sons finish, e karry en leg well enter di bed, breath en last breath, den e kon die.

Currently Selected:

Jenesis 49: pcm

Highlight

Copy