Mat'fey 17

İsusi ak'esuni badalbaksun

(Mrk'. 9:2-13; Luk'. 9:28-36)

1Ǔq ğinaxun oşa İsusen İçuxun P'yot'ra, İak'ova saal şot'ay viçi İoana ext'i alloy sa buruğone laśi. 2Bürdən şot'oğoy piin běš İsusi ak'esun badalebaki: Şot'ay ç̌oyen běğ k'inək' işiğe saki, İz loxol bakala paltaral map'-mas'ine baki. 3Hame vədine şot'oğon İsusaxun çurpi exlətp'ala Moiseya q'a İlyal at'unk'i. 4P'yot'ren İsusa pine: «Ay Q'ončux, he şaat'e yaynak' memiya! Eki memiya xib dənə çadır laxaz: soğo Vaynak', soğo Moiseyeynak', soğoval İlyaynak'».

5P'yot'ren əyitk'ala vədine işiğ sakala sa asoye ak'eśi. Şot'ay xoji içoğoy loxole biti. Asoyi boşt'an sa səse hari: «Mo Bez çureğala Ğare, Kot'oxun irəzizu, Kot'o ǔmǔxlaxanan!» #17:1-5 K'an. 18:15; Ǐvel mə̌ğ. 2:7; İsa. 42:1; Mat'. 3:17; 12:18; Mrk'. 1:11; Luk'. 3:21-22; 2 P'y. 1:17-18 6Səsə ibakat'an şagirdxo q'ı̌yene haq'i, şorox ç̌ooq'a bit'unti. 7İsus ı̌šalayinşaki, İz kula şot'oğoy loxol laxi pine: «Hayzanan, ma q'ǐbanan!» 8Şot'oğon içoğoy bula alabi İsusaxun q'erəz şuk'k'ala tet'un ak'i.

9Buruğoxun śiğat'an İsusen İz şagirdxo tapşurebi: «Amdari Ğar p'uri ganuxun běyinbakamin ef ak'it'oğo şuk'k'ala ma exlətp'anan».

10Şagirdxon Şot'oxun xavart'un haq'i: «K'anun zombalxon het'aynak't'un nex ki, Xrist'osaxun běš İlya eğalane?» #17:10 Mal. 4:5 11İsusen coğabe tadi: «Düze, İlya həgigiyal süft'ə hari hər şeya həzirbalane. 12Zu və̌x nexzu: ene İlya harene, ama şot'o tet'un çalxi, şot'ay bel nu eçeri əş tene mandi. Haketərəl Amdari Ğaren şot'oğoy kiyexun gele koruğ zap'k'ale». #17:12 Mat'. 11:14

13Şagirdxon t'e vədə q'amişt'unbaki ki, İsusen mot'oK'unuk'bal İoani baradane nex.

Věbaksuni zor

(Mrk'. 9:14-29; Luk'. 9:37-43)

14Şorox qaybaki camaati t'ǒğǒl eğat'an sa amdar İsusa ı̌šalayinşaki, İz běš çökt'i 15pine: «Ay Q'ončux, bez ğara gorox eki! Şot'ost'a sust'baksune bu, gele əzyəte aksa. İçu ext'i sa ği aruğo, t'e soğo ği isə xenane bost'a. 16Şot'o Vi şagirdxoy t'ǒğǒlez eçeri, ama şot'o q'olaybes tet'un baki».

17İsusen pine: «Ay nu věbakala q'a iz yaq'a aç̌esp'i nəsil! Hələ heq'ədər və̌xun bakoz zu? He vaxt'al śirik' və̌x portp'oz? Ğara memiya, Bez t'ǒğǒl eçanan». 18İsusen əyeli boş bakala murdar urufa əmirebi, murdar urufal c'ere. Ğar hat'e saad q'olayebaki.

19Şagirdxo İsusaxun tək mandit'uxun oşa Şot'oxun xavart'un haq'i: «Yan het'u görə murdar urufa c'evk'es teyan baki?» 20İsusenal şot'oğo coğabe tadi: «Və̌st'a věluğ mal baksuna görə. Və̌x düzinəz nex: və̌st'a sa pilpiluni śile hama věbaksun bakiyniy, və̌n me buruğo "t'ağaybaka" uk'at'an şo t'ağayebakoy, və̌ynak' mümkün nu bakala hik'k'al tene bakoy. #17:20 Mat'. 21:21; Mrk'. 11:23; Luk'. 17:5-6; 1 K'or. 13:2 21Amma me cür murdar urufxo saycə afırınen q'a ğurux efsunene c'evk'es baksa». #17:21 - Bəzi kiinśamurxost'a me əyitmux butene.

İsusi p'urum saturběš İzi p'uri-běyinbaksunaxun əyitpsun

(Mrk'. 9:30-32; Luk'. 9:43-45)

22İsus İz şagirdxoxun sagala Galileyina bakat'an şot'oğo pine: «Male mande, Amdari Ğara amdarxoy kiyel tadi 23besp'est'alt'un, ama Şo p'urit'ay xibimci ğine běyinbakale». Şagirdxo me əyitmoğoxun oşa gele pist'unbaki.

Xrame nalog

24Şorox K'efernauma qaybakit'uxun oşa P'yot'ri t'ǒğǒl Buxačuğoy xrameynak' bakala p'ə̌ dirhəm tənginə girbalxo hari xavart'un haq'i: «Ef Məəlimen nalog tanest'ane, ketəre?» #17:24 C'eys. 30:13; 38:26 25P'yot'ren coğabe tadi: «Tanest'a».

P'yot'r k'oya bağat'an süft'ə İsusene exlətə burqi: «Simon, hun hetəren fikirbsa - me dünyəni padçağxon het'ayesa haq'q'a nəəl ki naloga şuxunt'un haq'sa? İçoğoy amdarxoxun yoxsa davina taşevk'i ölköğoy amdarxoxun?» 26P'yot'ren coğabe tadi: «Davina taşevk'i ölköğoy amdarxoxun». İsusen şot'o pine: «T'e vədə metəre c'eysa ki, içoğoyt'oğon nalog nuval tades bat'unkon. 27Ama barta həysə me amdarxoy əyitə oq'a ma saken. Göle t'ǒğǒl taki q'armağ bosa, q'armağa baft'ala samci çəlinə ext'a. Şot'ay ǰomo qaypi sa gümüş təngə #17:27 Sa gümüş təngə - grek'i muzin memiya "st'at'ir" əyite bu. Sa st'at'iren bip' dirhəme bsay. bə̌ğə̌balnu. Şot'o ext'a beş p'rannay gala şot'oğo tada».

Currently Selected:

Mat'fey 17: udi

Highlight

Copy