İoan 12

Mariyay İsuseynak' eçeri pay

(Mat'. 26:6-13; Mrk'. 14:3-9)

1C'ovaksuni axsibayaxun #12:1 C'eys. 12:1-27 ǔq ği běš İsus Bet'anyinane hari. İsusen p'uri ganuxun běyinbi Lazaral t'et'iyane yəşəyinşbsay. 2T'et'iya İsusi eysuni s'iyal q'onaxluxt'un tadi. Mart'an q'ulluğebsay. Lazaral İsusaxun sagala q'onağxoy araneney. 3Mariyan isə sa lit'ra #12:3 sa lit'ra - 300 gr. samal gele toyexlu təmiz narde c'əyin ext'i İsusi turmoğoy loxol lapi iz popen šarpsane burqi. C'əyini muč'a aden k'oja haneq'i. #12:3 Luk'. 7:37-38

4Ama İsusi şagirdxoxun sunt'in, mat'in ki, oşa Şot'o toydaley, İuda İsk'ariot'en pine: 5«Mot'oxunsa me c'əyinə xibbaç̌ dinara #12:5 Sa dinar fəəlin sa ğiluğ maaşa barabarey. toydi kəsibxo paybese bakoy». 6Me əyitə kəsibxoy q'ayğina manst'una görə təə, iç oğri baksuna görəne nexey, şot'aynak' ki, içust'a bakala təngin toraya amdarxoy laxalt'uxun sa paya başeq'say. 7T'e vədə İsusen pine: «Me çuğo ma galda, şot'aynak' ki, me c'əyin Za oç̌alaxbala ğineynak'ey. 8Kəsibxo həmişə ef t'ǒğǒlt'un, Zu isə həmişə ef t'ǒğǒl tez bakal».

9Me vədə iudeyxoy gelo isə İsusi Bet'anyina baksuna avabaki ham İsusa görə, hamal Şot'in p'uri ganuxun běyinbi Lazara ak'seynak' t'et'iyat'un hari. 10T'e vədə samci běyinšxo Lazaral besbsuni q'ərarat'un hari 11şot'aynak' ki, iudeyxoy gelo Lazara görəne İsusi tərəf c'ovaki Şot'o vě baki.

İsusi Yerusalima baysun

(Mat'. 21:1-11; Mrk'. 11:1-11; Luk'. 19:28-40)

12Əyc'indəri, axsibaya hari amdarxoy gelo İsusi Yerusalima eysuna ibaki 13p'almin xode c'ik'urxo ext'i Şot'ay běše c'eri. Şot'oğon

"Hosanna! #12:13 Hosanna - əbrani muzin «Buxačuğo alxışq'an baki» upsune.

Q'ončuğoy s'iyen eğalo he bəxt'əvəre!

İsraili padçağeynak' xeyir-bərəkətq'an baki!"

uk'a harayt'unney. #12:13 Ǐvel mə̌ğ. 118:25-26

14İsusen sa cəyil elem bə̌ğə̌bi iz bač'ane laneśi. Hetər ki, śameśene:

15«Ay Sioni xuyər, #12:15 Sioni xuyər - "Sion" Yerusalima tadeśi q'erəz s'iyurxoxun soğone. "Xuyər" isə memiya "amdarxo" upsune. ma q'ǐba!

Běğa vi padçağ sa cəyil elema laśi enesa». #12:15 Zək. 9:9

16İsusi şagirdxon t'e vədə mot'oğoy k'ə upsuna tet'un q'amişaksay. Ama İsusi s'i alabakit'uxun oşa, Şot'ay barada śameśit'oğo saal camaati Şot'ay běš hetər śameśeneysa, hat'etərəl c'eysuna eyex badi q'amişt'unbaki.

17Lazara gərəmzoğoxun k'alpi p'uri ganuxun běyinbat'an İsusi t'ǒğǒl bakala camaaten hələl me barada exlətebsay. 18Amdarxon İsusi me möcüzəlü nišana ak'est'una ibakeney, şot'o görəne Şot'ay běš c'erey. 19Şot'aynak'al fariseyxon sun-suna next'uniy: «Běğanan, beşi kiyexun hik'k'al tene ayesa. Dirist' dünyə Şot'ay bač'anexune taysa».

İsusi saturběš İz bisuna avabakest'un

20Axsibaya Yerusalima bul k'os'bsa harit'oğoy arane sa hema grek'i muzin əyitk'ala amdare buy. 21Şot'oğon Galileyin Bet'sayda ayizexun bakala Filip'i t'ǒğǒl hari şot'o xoyinšt'unbi: «Ağa, yan İsusa aksunyan çuresa». 22Filip'en taśi Andreyane pi, Andreyenal Filip'axun sagala taśi İsusat'un xavar tadi.

23İsusen coğabe tadi: «Mone, Amdari Ğar əslində Şu baksuni ç̌oyel c'eğala vaxt' harene. 24Serina, serinaz və̌x nex: əgər sa arumi dən oç̌ala biti tene bisasa, tək sa arum k'inək'əl manest'a, ama bisanesa, gele bare tast'a. 25İz yəşəyinşə çureğalt'in şot'o aç̌esebon, izi me dünyəne bakala yəşəyinşə hik'k'al nu hesabbalt'in isə şot'o həmişəluğ yəşəyinşeynak'e q'orişon. #12:25 Mat'. 10:39; 16:25; Mrk'. 8:35; Luk'. 9:24; 17:33 26Şin Za q'ulluğbsun çureğayin, Bezi bač'anexunq'an hari. Zu maya bakayiz, Za q'ulluğbaloval t'et'iya bakale. Şin Za q'ulluğbayin, Bavanal şot'o hörmətbale.

27Həysə Bezi ük' narahate. K'ə uk'az? "Ay Bava, Za me dəyğinəxun çark'est'a" uk'az? Ama Zu dünyəne me dəyğin koruğaxun c'ovakseynak'ez hare! 28Ay Bava, Vi s'iya alaba!» Göynuxunal sa səse hari: «Alazbi, saal alaboz».

29T'et'iya çurpi camaati bəzit'oğon mot'o ibaki "göyene gürupi", t'e sunt'oğon isə "Şot'oxun sa angelene əyitp'i" pit'un. 30İsusen pine: «Me səs Zaynak' tene, və̌ynak'e. 31Həysə isə me dünyə divanebaksa, me günaxbala dünyəni kalaluğbalal #12:31 me dünyəni kalaluğbal - yəni şeytan. qavuna boseğale. 32Za isə oç̌alaxun ala ěqevk'at'an, bütüm amdarxo Zaç zap'k'oz».

33İsusen me əyitə upsunen İz mani cürə bisunane ibakest'i. 34Camaaten Şot'o coğabe tadi: «Ǐvel Śamurxoxun ibakeyan ki, Xrist'os həmişəluğ mandale. P'oy Hun het'aynak'en "Amdari Ğar ala ěqeğalane" nex? Amdari Ğar şuva?» #12:34 Ǐvel mə̌ğ. 110:4; İsa. 9:7; Yez. 37:25; Dan. 7:14

35T'e vədə İsusen şot'oğo pine: «İşiğ samal vədə ef arane bakale. İşiğ bakala vədine tarapanan ki, və̌x bayinq'luğen maq'an biq'i. Şot'aynak' ki, bayinq'luğa tarak'alt'in maya taysuna tene avabaksa. 36İşiğ bakala vədine İşiğa věbakanan ki, İşiği əylux bakanan». İsusen me əyitmoğo pit'uxun oşa taneśi, şot'oğoy piyexunal aneç̌i.

İudeyxoy inadkərluğ

37Ama İsusen camaati běš meq'ədər möcüzəlü nišanxo ak'est'it'uxun oşal amdarxo Şot'o vě teney. 38Morox kot'o görəne baki ki, İsaya xavareçali me əyitmux bex p'ap'ane:

«Ay Q'ončux, beşi xavara şuva věbaki,

Q'ončuğoy zor şineynak'e qayeśi?» #12:38 İsa. 53:1

39İsayan pi k'inək', şorox şot'o görə vě tet'un baksay ki:

40"Buxačuğon şot'oğoy pulmoğo k'ač'inebi,

İçoğoy haq'ıla kütebi ki,

İçoğoy pulmoğon maq'an ak'i,

İçoğoy haq'ılen maq'an bot'i

Saal Zaç maq'at'un fırıpi ki,

Zu şot'oğo q'olaybaz». #12:40 İsa. 6:10; Mat'. 13:14-15; Mrk'. 4:12; Ap'ost'. 28:26-27

41İsayan İsusi kalaluğa aksuna görəne me əyitmoğo Şot'ay barada pey.

42Əslində isə kalat'oğoy gelo İsusa věney, ama fariseyxon içoğo sinagogaxun maq'at'un şəp'eśi pi mot'o qay tet'un avabakest'ay. 43Buxačuğoxun eğala tərifəxunsa amdarxoxun eğala tərifət'un c'ək'p'i.

44İsusen ost'aar pine: «Za vě bakalo saycə Za təə, Za Yaq'abit'uval věne. 45Za ak'alt'in Za Yaq'abit'uval aneksa. 46Zu işiğzu. Me dünyəneyal harezu ki, Za vě bakalo bayinq'luğa maq'an mandi. 47Bezi əyitə ibaki şot'o nu əməlbalt'u isə Zu tez divanbal, şot'aynak' ki, dünyənə divanbseynak' təə, dünyənə çark'est'eynak'ez hare. 48Za t'ǒǒxbi Bezi əyitmoğo nu q'abulbalt'ay divanbal ene bune: Bezi uk'ala əyiten axırınci ğine şot'aynak' q'ərar c'evk'ale. 49Şot'aynak' ki, Zu Zaxun tez əyitp'i, Za yaq'abi Bavane Bezi k'ə upsuni saal hetər exlətbsuni barada Za əmir tadi. 50Zu avazu ki, Şot'ay çureğalt'oğon həmişəluğ yəşəyinşe tast'a. Metərluğen, Bavan za mani əyitmoğo upsuna əmirbenesa şot'oğoz əyite».

Currently Selected:

İoan 12: udi

Highlight

Copy