C'eysun 9
9
Qomci caza: heyvanxoy k'as'esun
1T'e vədə Q'ončuğon Moiseya pine: «Faraoni t'ǒǒx taki şot'o upa: "Q'ončuğon, əbraniğoy Buxačuğon metəre nex: "Bezi azuk'a tərba ki, Za bulq'at'un k'os'bi! 2Əgər hun şot'oğo p'urum nu tərbi efayin, 3Q'ončuğoy kulen vi çöle bakala heyvanxoynak' - ěkurxoynak', elemxoynak', buşurxoynak', belineynak' saal eğel-keçiğoynak' k'as'esun eçale. 4Ama Q'ončuğon israilluğoy heyvanxoy q'a misirluğoy heyvanxoy arane fərg laxale. İsrailluğoy heyvanxoxun sayco tene əfçibakal"». 5Q'ončuğon vaxt' təyinbi pine: «Q'ončuğon mot'o me ölkinə əyc'ə bale».
6Əyc'indəri Q'ončuğon hametərəl bine. Misirluğoy bütüm heyvanxo k'as'eśi. Ama israilluğoy heyvanxoxun sayco tene əfçibaki. 7Faraonen amdar yaq'abi avanebaki ki, israilluğoy heyvanxoxun həgigiyal sayco tene əfçibake. Ama şot'in p'urum inadkərluğbi azuk'a tene tərbi.
Ǔqǔmci caza: marbiq'i çibanxo
8 Q'ončuğon Moiseya q'a Aarona pine: «Buxarinaxun hərt'in sa q'ošamağ jeq' ext'anan. Barta Moiseyen şot'o faraoni piin běš havinaq'an muşadi. 9Şot'ay tozen dirist' Misiri oç̌ala haq'layinşale, amdarxoy q'a heyvanxoy loxolal marbiq'i çibanxo c'eğale».
10Metərluğen, şot'oğon buxarinaxun jeq'a ext'i faraoni běš çurt'unpi. Moiseyen jeq'a havinane muşadi, amdarxoy q'a heyvanxoy bədəneyal marbiq'i çibanxone c'eri. #9:10 Qay. əyit 16:2
11Sehirbazxoval Moiseyi běš çurpes tet'un baki, şot'aynak' ki, içoğoy bədənəl, bütüm misirluğoy bədənə haq'i k'inək', çibanxon haq'eney. 12Ama Q'ončuğon Moiseya pi k'inək'e baki: Q'ončuğon faraona inadkərebi, faraonenal Moiseya q'a Aarona tene ǔmǔxlaxi.
Vǔğǔmci caza: təər
13 Q'ončuğon Moiseya pine: «Əyc'ə savaxt'an üşenen hayza, faraoni t'ǒǒx taśi şot'o metər upa: "Q'ončuğon, əbraniğoy Buxačuğon metəre nex: Bezi azuk'a tərba ki, Za bul k'os'bane! 14Tene, Zu me dönə vi loxol, vi azuk'i loxol, vi sarayi amdarxoy loxol bı̌hi q'azoox yaq'aboz. Mot'oxun avabakalnu ki, bütüm dünyəne Zallarik'o butene. 15Zu həysə çureğayiz, Bezi kula boxodi vi saal vi azuk'i loxol t'etər sa k'as'esunez yaq'abon ki, oç̌ali ç̌oyexun ef tume əfçibakon. 16Ama va şot'aynak'ez q'orişi efsa ki, Bezi zora va ak'est'az, Bezi s'i bütüm dünyəne bayanbakane. #9:16 Rim. 9:17 17Hun isə hələl Bezi azuk'i běšinə̌mə bot'est'i şot'o ten tərbsa! 18Mone, Zu əyc'ə me vədine gele zorba sa təər yaq'aboz: t'etər sa təər ki, Misiren iz binora laxeśit'uxun mağay metəro tene ak'e. 19Həysə isə vi heyvanxo saal çöle bakala hər şeya bona badest'a, şot'aynak' ki, qavuna bakala bütüm amdarxoy saal heyvanxoy loxol t'etər sa təər barale ki, şorox bütüm k'as'eğalt'un"».
20Faraoni sarayi amdarxoy boşt'an Q'ončuğoy əyitəxun q'ǐbit'oğon içoğoy k'ulurxo saal heyvanxo usum eçeri bonat'un badi. 21Q'ončuğoy əyitə nu fikir tadit'oğon isə içoğoy k'ulurxo q'a heyvanxo çöle et'unfi.
22 Q'ončuğon Moiseya pine: «Vi kula alaba. Barta dirist' Misiri oç̌ala - t'et'iya bakala amdarxoy, heyvanxoy saal bütüm çöle bakala bit'k'iğoy loxol təərq'an bari». 23Moiseyen iz çombağa göynule alabi. Q'ončuğonal göyen gürubsun q'a təəre yaq'abi, s'ə̌q'ene duği; Q'ončuğon Misiri oç̌ali loxol təəre śipi.
24Metərluğen, gele ost'aar sa təəre barst'ay, s'ə̌q'ene duğsay; misirluğon içoğoy tarixast'a metər təər atet'unkey. #9:24 Qay. əyit 8:7; 16:21 25Təəren bütüm Misiri oç̌ala amdarxoxun burqi çöle bakala bitk'iğol śirik' hər şeya əfçinebi. Çöle bakala bütüm oyurxo t'ap'epi, xodurxoval xoxebi. 26Saycə israilluğoy yəşəyinşala Goşen oç̌ala təər tene bari.
27T'e vədə faraonen Moiseya q'a Aarona iz t'ǒğǒl k'alpest'i şot'oğo pine: «Me dönə günaxez əşp'est'i! Q'ončux düzgüne, zu q'a bez azuk' isə haq'suzyan. 28Q'ončuğo xoyinšbanan ki, me dəhşətlü s'ə̌q' q'a təər çurpeq'an. Və̌x tərezbsa, takinan, ene və̌x memiya efal butene!» 29Moiseyen şot'o pine: «Şəhərexun c'eğala k'inək' bezi kula Q'ončuğoç alabi afırık'oz s'ə̌q'al çurk'ale, təərəl ene tene baral. Metər avabakalnu ki, dirist' dünyə Q'ončuğoye. 30Ama zu avazu ki, hun saal vi sarayi amdarxon hələl Q'ončuğoxun tenan q'ǐbsa».
31(Təəren kətana q'a muya əfçibeney, şot'aynak' ki, t'e vədə muyen bul c'eq'ala, kətani isə s'is'ik' qayk'ala vədəney. 32Ama arum q'a cir arum tene əfçibakey, şot'aynak' ki, morox samal c'əyine p'ap'sa.)
33Moisey faraonaxun cöybaki şəhərexun c'erit'uxun oşa iz kula Q'ončuğoç alabi afırınepi. S'ə̌q'en duğsun q'a təər hat'e dayğa bot'ebaki, ağalal çurepi. 34Faraonen ağalin, s'ə̌q'en duğsuni q'a təəri bot'baksuna ak'ala k'inək' p'urumal günaxe əşp'est'i: şot'in q'a iz sarayi amdarxon inadkərluğt'unbsay. 35Metərluğen, Q'ončuğon Moiseya pi k'inək', faraonen p'urum inadkərluğbi israilluğo tərbsun tene çureśi.
Currently Selected:
C'eysun 9: udi
Highlight
Share
Copy
Want to have your highlights saved across all your devices? Sign up or sign in
© Translation Services International Ltd.
