C'eysun 4
4
Q'ončuğon Moiseya möcüzoox ak'est'uni ext'iyər tast'un
1Ama Moiseyen metəre coğab tadi: «P'oy şot'oğon za nu věbaki, bezi əyitə nu ǔmǔxlaxi "Q'ončux va ak'eśitene" uk'ayt'un?»
2T'e vədə Q'ončuğon Moiseya pine: «Vi kiyel bakalo hik'ə?» Şot'in pine: «Çombağ». 3Q'ončuğon pine: «Şot'o oq'a bosa». Moiseyen şot'o bonesi, çombağ dizik'əne fırıpi. Moisey qoş-qoşe baki. 4Q'ončuğon isə Moiseya pine: «Vi kula boxodi şot'ay oǰulaxun biq'a». Moiseyenal iz kula boxodi dizik'ə biq'at'an şo p'urum iz kiyel çombağe baki. 5Oşa Q'ončuğon pine: «Me nišan şot'o görəne ki, israilluğon Q'ončuğoy, içoğoy bavoğoy - Avrahami Buxačux, İsaak'i Buxačux saal İak'ovi Buxačuğoy va ak'esuna věbakat'un».
6Oşa Q'ončuğon pine: «Vi kula vi q'oltuğe laxa». Moiseyen kula q'oltuğe lanexi, kula q'oltuğexun c'evk'at'an isə iz kul dirist' q'otur baft'iney, şo ı̌ǰ k'inək' mapmas'iney. 7Oşa Q'ončuğon pine: «İsə kula p'urum vi q'oltuğe laxa». Moiseyen p'urum iz kula q'oltuğene laxi, kula q'oltuğexun c'evk'at'an isə şo iz bədən k'inək' təmizey.
8 Q'ončuğon saal pine: «Əgər va nu věbakayt'un, süft'in möcüzinen içoğo nu vědayin, oşin möcüzinen şot'oğo vědale. 9Ama əgər me p'rannal nu věbaki vi əyitə nu ǔmǔxlaxayt'un, Nil oqe xenaxun ext'i q'ariluğa śipa. Oqexun ext'i xe q'ariluğa p'iya tarak'ale».
10Moiseyen Q'ončuğo pine: «Ay bezi Q'ončux, zu nə t'evaxt' yönbəri əyitk'al tez bake, nəəl isə, Hun me Vi k'ulaxun əyitk'ala vədineyal sa yönbəri əyitk'al tezu». 11Q'ončuğon şot'o pine: «Amdara muz tadiyo şuva? Amdara lal, kar, k'ač'i nəəl iz ak'es baksuna tadiyo şuva? Mot'o balo Zu Q'ončux tezu ki? 12Həysə isə taki! Zu va köməyboz, vi k'ə upsun lazımesa va zomboz».
13Moiseyen pine: «Ay bezi Q'ončux, xoyinšezbsa, q'erəz sa amdar yaq'aba». 14Q'ončuğon Moiseyi loxol əcuğon biq'i pine: «Axıri vi viçi Levit' Aaronal bune. Avazu ki, şot'in şaat' əyitp'es baneksa. Həysə şo vi běše eysa. Va ak'at'anal şo ük'in mǔqbakale. 15Vi viçəxun exlətp'a, k'ə upsun lazımesa, şot'o upa. Və̌n p'rannanal əyitk'at'an Zu və̌x köməyboz, k'ə bsun lazımesa zomboz. 16Vi gala camaataxun Aaronen əyitk'ale. Hun şot'o Bez əyitmoğo p'ap'esp'alnu, şot'inal vi muzen camaataxun exlətp'ale. 17Me çombağal vi kiyel ext'a, şot'ay köməyen möcüzoox ak'est'alnu».
Moiseyi Misirə qaybaksun
18Moisey iz q'ayinba Yet'roni t'ǒğǒl qaybaki pine: «Barta bezi Misirə bakala q'oomxoy t'ǒğǒl qaybakaz, běğaz běyn şorox dirist't'un». Yet'ronen Moiseya pine: «Taki, vaynak' şaat' yaq'». 19Moisey Midyan oç̌ala bakat'an Q'ončuğon içu peney: «Misirə qaybaka, vi elmoğo haq'sun çureğalt'oğoy bito ene p'uret'un».
20Metərluğen, Moiseyen iz çuğo q'a ğarmoğo elema arśevk'i, Buxačuğon içu bürüşi çombağal iz kiyel ext'i Misirəne taśi. 21Q'ončuğon Moiseya pine: «Běğa, Misirə qaybakat'an Bezi va ak'est'eynak' tadi zoren bito t'e möcüzoğo faraoni běš ak'est'a. Ama Zu şot'o inadkərboz, şot'inal azuk'a tene tərbal. 22T'e vədə faraona uk'alnu: "Q'ončuğon metəre nex: "İsrailluyox Bezi süft'in ğar k'inək't'un. 23Va pizu ki, Za bul k'os'bseynak' Bezi ğara tərba! Hun isə şot'o ten çureśi tərbsun. Mot'o görə Zu vi süft'in ğara besp'oz"». #4:23 C'eys. 12:29
24Yaq'a, üşe bask'i vədine Q'ončux ı̌šalayinşaki, şot'o bespsune çureśi.
25Sip'p'oran isə sa ğayin ǰě ext'i iz ğara sünnətebi, oşa sünnətbi yeq'a şot'ay turmoğo laft'est'i pine: «Hun bezi p'iye q'oomnu». #4:25 - Mo damna sa ədəte, yəgin ki, p'iye toyen günaxa os'ksune. Mot'o p'ə̌ cürəne q'amişakes bakon: 1). İz ğare bari p'iyen Moiseya Buxačuğone qayst'a. 2). Sip'p'oran iz ğara nexe: "P'i barst'unen hun zaynak' sünnəten baki". 26T'e vədə Q'ončuğon şot'oxun kule haq'i. Sip'p'oran ğara sünnətbsuna görəne «Hun bezi p'iye q'oomnu» pey.
Moiseyi q'a Aaroni israilluğoy ağsaq'q'alxoy t'ǒğǒl taysun
27 Q'ončuğon Aarona pine: «Moiseyi běš c'eyseynak' ams'i oç̌ala taki». Aaronenal taśi Buxačuğoy buruğoy #4:27 yəni Sinay burux t'ǒğǒl iz viçə irəst'e hari, şot'o muçepi. 28Moiseyen Q'ončuğoy içu hetər yaq'absuni, içu mani əyitmoğo upsuni, hetər möcüzoğoy ak'est'uni barada pi əyitmoğo bütümə Aarona exlətebi. 29Şot'oğon taśi israilluğoy bütüm ağsaq'q'alxo girt'unbi. 30Aaronen Q'ončuğon Moiseya pi əyitmoğo bitova şot'oğo exlətebi, Moiseyenal azuk'i běš möcüzoğone ak'est'i. 31Azuk'al mot'oğo věnebaki. Şot'oğon Q'ončuğoy israilluğoy əzyətə ak'i İz kula şot'oğoy loxolxun nu zapsuna ibakat'an, Şot'o bult'un k'os'bi.
Currently Selected:
C'eysun 4: udi
Highlight
Share
Copy
Want to have your highlights saved across all your devices? Sign up or sign in
© Translation Services International Ltd.