ᒪᑎᔪᐤ 7
7
ᒋᓴᔅ ᑲ ᐊᔨᒧᑕᐧᒃ ᐊ ᑎᐸᔅᑯᓂᑐᓇᓄᐎᒡ
ᓗᒃ 6.37,38,41,42
1“ᐊᑲᐎᔾ ᑎᐸᔅᑯᓂᒐᒄ, ᑭᔭ ᓇᒪ ᒋᑭ ᐅᒋ ᑎᐸᔅᑯᓂᑯᓇᐛᐤ᙮ 2ᐛᔅ ᑕᓐ ᒥᒄ ᒐ ᐃᓯ ᑭᓄᐛᐸᑎᒧᐛᒂ ᑕᓐ ᐊ ᐃᓯ ᑎᐸᔅᑯᓇᒄ ᐊᐛᓐ ᐊᐅᑯᓐ ᒧᔭᒻ ᒐ ᐃᓯ ᑭᓄᐛᐸᑕᐧᒃ ᑭᔭ ᐎᔾ ᒋᓴᒪᓂᑐᐤ ᑎᐸᔅᑯᓂᑕᒂ, ᑭᔭ ᒧᔭᒻ ᐊᔅᐱᔅ ᓂᓱᐅᓇᒋᒪᐧᑯᒡ ᑯᑎᑭᒡ ᐊᐅᑯᓐ ᑭᔭ ᐎᔾ ᒐ ᐃᔅᐱᔅ ᓂᓱᐅᓇᒋᒥᑕᒄ ᒋᓴᒪᓂᑐᐤ᙮”
3“ᒐᒂᓐ ᐛᒋ ᓇᔅᒡ ᑭᓄᐛᐸᑎᒧᑦ ᒋᐧᑲᓂᔅ ᐊ ᐊᐱᓴᓯᔨᒡ ᐅᐱᓯᓄᐅᓐ ᐊᑲ ᒪᒃ ᒋᔾ ᐊᐱᑕᔨᑎᒥᓐ ᐊ ᒥᒐᔎᒡ ᒥᔅᑎᒄ ᑲ ᐱᓯᓂᔨᓐ ? 4ᑕᓐᑕ ᒐᒋ ᐅᒋ ᐃᑎᑦ ᒋᐧᑲᓂᔅ, ‘ᐊᑯᔅ ᓂᑭ ᐎᐎᐱᑕᓐ ᒋᐱᓯᓄᐅᓐ,’ ᒋᔾ ᒪᒃ ᐊ ᒥᒐᔎᒡ ᒥᔅᑎᒄ ᑎᑯᓐ ᑎᐱᔨᐛ ᒋᔅᒋᓯᑯᒡ ? 5ᒋᔾ ᑲ ᐊᔭᒥᐊᐧᑲᓱᔨᓐ, ᓂᔅᑎᒻ ᐎᐎᐱᑕ ᐊᓐ ᒥᔅᑎᒄ ᑲ ᒥᒐᔎᒡ ᒋᔅᒋᓯᑯᒡ ᐊ ᑎᒂᒡ ᐊᑯ ᒪᒃ ᒐ ᒥᔪ ᐛᐸᑎᒥᓐ ᒐᒋ ᐎᐎᐱᑎᒧᑦ ᑲ ᐱᓯᓐᑦ ᒋᐧᑲᓂᔅ᙮”
6“ᐊᑲᐎᔾ ᒥᔭᐧᑯᒡ ᐊᑎᒧᒡ ᐊ ᐸᔭᐧᑭᓂᔨᒡ ᒐᒂᔪᐤ᙮ ᐊᑲ ᑭᔭ ᐛᐱᓂᒧᐛᐧᑯᒡ ᑯᐧᑯᓯᒡ ᐊ ᓱᓇᔭᐎᔨᒋ ᐛᐛᓯᐅᓇ ᐛᔅ ᒥᒄ ᒋᑭ ᑕᑕᐧᑯᔅᑲᑕᒧᒡ ᑭᔭ ᒋᑭ ᐊᐱᒧᔅᑕᑯᐛᐅᒡ ᒐᒋ ᐅᓯᑯᐃᑕᑯᒡ᙮”
ᓂᑐᑎᒪᒄ, ᓇᓂᑐᐛᔨᒐᒄ, ᑎᑥᐛᐃᒐᒄ
ᓗᒃ 11.9-13
7“ᓂᑐᑎᒪᒄ ᑕᓐ ᐊ ᐃᓯ ᓂᑐᐛᔨᑎᒪᒄ, ᐊᑯ ᒪᒃ ᒐ ᒥᔨᑯᐅᔭᒄ᙮ ᓇᓂᑐᐛᔨᑎᒧᒄ, ᐊᑯ ᒪᒃ ᒐ ᒥᔅᑭᒪᒄ᙮ ᑎᑥᐛᐃᒐᒄ, ᐊᑯ ᒪᒃ ᒐ ᔪᑕᓂᒪᑯᐅᔭᒄ᙮ 8ᐛᔅ ᒥᓯᐛ ᑕᑐᐤ ᐊᐛᓐ ᑲ ᓂᑐᑎᒪᑦ ᒋᑭ ᒥᔭᑭᓄᐤ ᐊᓂᔭ ᑲ ᐃᓯ ᓂᑐᑎᒪᑦ᙮ ᐊᓐ ᒪᒃ ᑲ ᓇᓂᑐᐛᔨᑕᐧᒃ ᒋᑭ ᒥᔅᑭᒻ ᐊᓂᔭ ᒐᒂᔪᐤ ᓂᔭᓂᑐᐛᔨᑕᐧᒃ᙮ ᑭᔭ ᑕᑐᐤ ᐊᐛᓐ ᑲ ᑎᑥᐛᐃᒐᑦ ᒋᓴᒪᓂᑐᐛ ᒋᑭ ᔪᑕᓂᒪᑯᐤ ᔅᑐᐧᑭᓇ᙮
9ᒋᔨᐛᐤ ᐅᑕᐎᒪᑐᒄ, ᓂᑐᐛᔨᑎᒪᔅᒃ ᐊᓐ ᒋᑯᔅ ᐸᒂᓯᑭᓇ, ᐊᓯᓂᔭ ᐊ ᒋᐸ ᒥᔭᐤ ? 10ᑭᔭ ᒪᒃ ᓂᒪᓴ ᓂᑐᐛᔨᑎᒪᔅᒃ ᒋᓇᐱᒂ ᐊ ᒋᐸ ᒥᔭᐤ ? 11ᐊᑎ ᐊ ᐃᔅᐱᔅ ᒪᔭᑎᓯᔭᒄ ᐊᔪᐛᒡ ᒋ ᒋᔅᒐᔨᑕᓇᐛᐤ ᒐᒋ ᒥᔭᑯᒡ ᒋᑦ ᐊᐛᓯᒧᐛᐅᒡ ᒥᔪ ᒐᒂᔪᐤ᙮ ᐊᑐᐎᔅ ᒪᒃ ᒍᑕᐎᐛᐤ ᒋᒋᒋᓯᑯᒡ ᐊ ᑕᑦ ᐅᔅᑕ ᒋᑭ ᒥᔪ ᒥᔭᐤ ᐊᓂᔭ ᐊᐛᔪᐛ ᑕᓐ ᐊ ᐃᓯ ᓂᑐᐛᔨᑎᒪᑯᑦ᙮
12ᑕᓐ ᐊ ᐃᓯ ᓂᑐᐛᔨᒪᑯᒡ ᐊᐛᓐᒋ ᒐᒋ ᐃᑐᑕᑕᑯᒡ, ᐊᐅᑯᓐ ᑭᔭ ᒋᔨᐛᐤ ᐃᑐᑐᐛᐧᑯᒡ, ᐛᔅ ᐊᐅᒄ ᐅ ᐊ ᐃᓯ ᒋᔅᑯᑎᒪᒐᒥᑲᒡ ᐎᓱᐛᐅᓐ ᑭᔭ ᐊᐅᑯᓐ ᑲ ᐃᓯ ᐛᐎᑕᒡ ᐅᒋᔅᒋᐛᐃᒐᓱᒡ᙮”
ᑲ ᓴᑯᐛᒡ ᒪᔅᑭᓄᐤ
ᓗᒃ 13.24
13“ᐱᒐᒄ ᑲ ᓴᑯᐛᒡ ᐃᔎᑕᒻ, ᐛᔅ ᐃᔨᑭᔅᑲᐤ ᐃᔎᑕᒻ᙮ ᑭᔭ ᐛᑎᓐ ᒪᔅᑭᓄᐤ ᓂᓱᐅᓇᑎᓯᐅᓂᒡ ᐊ ᐃᑎᒧᒡ᙮ ᒥᒐᑐᐅᒡ ᒪᒃ ᐊᐛᓐᒋ ᐸᒧᑕᒡ ᐊᓂᔭᔪᐤ ᒪᔅᑭᓇᔪᐤ᙮ 14ᐛᔅ ᓴᑯᐛᐤ ᐃᔎᑕᒻ, ᑭᔭ ᐊᔨᒥᓐ ᒪᒃ ᐊ ᐱᒧᑕᓄᐅᒡ ᐊᓐ ᒪᔅᑭᓄᐤ ᑲᒋᒡ ᐱᒪᑎᓯᐅᓂᒡ ᐊ ᐃᑎᒧᒡ᙮ ᓇᒪ ᒪᒃ ᒥᒐᑦ ᐊᐛᓐ ᒥᔅᑭᒻ ᐊᓂᔭᔪᐤ ᒪᔅᑭᓇᔪᐤ᙮”
ᑕᓐ ᐊ ᐃᓯ ᒥᓂᓱᐅᑦ ᒥᔅᑎᒄ
ᓗᒃ 6.43,44
15“ᐃᔭᒂᒥᔅᑐᐛᐧᑯᒡ ᒥᒋ ᐅᒋᔅᒋᐛᐃᒐᓱᒡ᙮ ᒧᔭᒻ ᒪᔭᑕᓂᓯᒡ ᐃᓯᓇᑯᓱᐅᒡ ᐅᑕ ᐅᔅᒡ, ᒥᒄ ᒪᒃ ᐱᒡ ᐊᓐᑕ ᐅᐱᒪᑎᓯᐅᓄᐛᒡ ᒧᔭᒻ ᒥᐃᐧᑭᓂᒡ ᐃᑕᔨᑕᑯᓱᐅᒡ᙮”
16“ᐊᓂᔭ ᐊ ᐃᑕᑎᓯᒡ ᐊᑯᑕ ᒐ ᐅᒋ ᒋᔅᒐᔨᒪᑯᒡ᙮ ᒺᒡ ᒥᓂᓴ ᓇᒪᐎᔾ ᒋ ᓂᑕᐅᒋᓇ ᐅᑐᔅᐱᔭᑎᑯᒡ, ᑭᔭ ᐃᔭᑎᒄ ᓇᒪᐎᔾ ᒋ ᓂᑕᐅᒋᑕᐤ ᒥᓂᓴ᙮ 17ᐛᔅ ᐊ ᒥᔪ ᓂᑕᐅᒋᑦ ᒥᔅᑎᒄ ᐊ ᒥᔪᓯᒡ ᐛᐱᒥᓂᒡ ᒋᑭ ᓂᑕᐅᒍᐅᒡ ᐊᓐᑕ ᒥᔅᑎᑯᒡ ᑭᔭ ᐊᑲ ᒥᔪ ᓂᑕᐅᒋᑦ ᒥᔅᑎᒄ ᓇᒪ ᒋᑭ ᒋ ᓂᑕᐅᒍᐅᒡ ᐊ ᒥᔪᓯᒡ ᐛᐱᒥᓂᒡ ᐊᓐᑕ ᒥᔅᑎᑯᒡ᙮ 18ᐊ ᒥᔪ ᓂᑕᐅᒋᑦ ᒥᔅᑎᒄ ᓇᒪ ᒋᑭ ᒋ ᓂᑕᐅᒋᑕᐤ ᒥᒋᒥᓇ ᑭᔭ ᐊᑲ ᒥᔪ ᓂᑕᐅᒋᑦ ᒥᔅᑎᒄ ᓇᒪ ᒋᑭ ᒋ ᓂᑕᐅᒋᑕᐤ ᒥᔪᒥᓇ᙮ 19ᐊᓐ ᒪᒃ ᒥᔅᑎᒄ ᐊᑲ ᒥᔪ ᒥᓂᓱᐅᑦ ᒋᑭ ᓇᑥᑲᐛᑭᓄᐤ ᐊᑯ ᒐ ᒥᑐᔅᑕᐛᐱᓇᑭᓄᐅᑦ ᐃᔅᑯᑕᒡ᙮ 20ᐊᐅᒄ ᒪᒃ ᐛᒋ ᐃᑎᑎᑯᒡ ᐊᑯᑕ ᒐ ᐅᒋ ᒋᔅᒐᔨᒪᑯᒡ ᐊᓐᒡ ᑲ ᐎᔭᓯᐃᐛᒡ ᐊᓂᔭ ᐊ ᐃᑕᑎᓯᒡ ᒧᔭᒻ ᐊ ᐃᓯᓇᑯᓯᒡ ᐊᓐᒡ ᒥᔅᑎᑯᒡ ᑲ ᐊᔨᒧᑎᒪᑎᑯᒡ᙮”
ᓇᒪ ᓂᑕ ᒋ ᐅᒋ ᒋᔅᒐᔨᒥᑎᓐ
ᓗᒃ 13.25-27
Matthew 7.21-29 (Proper-4 Year A)
21“ᓇᒪ ᒥᓯᐛ ᐊᐛᓐ ᑲ ᐸᒋ ᐃᓯᓂᐧᑲᓯᑦ, ‘ᑕᐸᔨᒋᒐᔨᓐ, ᑕᐸᔨᒋᒐᔨᓐ,’ ᒋᑭ ᐅᒋ ᐱᒐᐤ ᒋᒋᒋᓯᒄ ᒋᓴᐅᒋᒪᐅᓂᒡ, ᐊᓐᒡ ᑲ ᑐᑕᒡ ᑕᓐ ᐊ ᐃᓯ ᓂᑐᐛᔨᒥᑯᒡ ᓄᑕᐎᔭ ᒋᒋᒋᓯᑯᒡ ᐊ ᑕᔨᒋ ᐊᐅᑯᓐᒡ ᐊᓐᒡ ᒐ ᐱᒐᒡ᙮”
22“ᐃᔅᐱ ᐅᑎᒋᐱᔨᒐ ᐊᓐ ᒐᒋᓯᑲᒡ ᒋᓴᒪᓂᑐᐤ ᒐ ᑎᐸᔅᑯᓇᑦ ᒥᓯᐛ ᐊᐛᔪᐛ, ᒥᒐᑦ ᐊᐛᓐᒋ ᓂᑭ ᐃᑎᑯᒡ ᐊᓂᔭ ᐊ ᒋᓯᑲᔨᒡ, ‘ᑕᐸᔨᒋᒐᔨᓐ, ᑕᐸᔨᒋᒐᔨᓐ, ᒋᑦ ᐃᓯᓂᐧᑲᓱᐅᓐ ᓂᒋ ᐊᐱᒋᑕᓇᓐ ᐊ ᒋᔅᒋᐛᐃᒐᔭᒡ, ᒋᑦ ᐃᓯᓂᐧᑲᓱᐅᓐ ᑭᔭ ᓂᒋ ᐊᐱᒋᑕᓇᓐ ᒥᒐᑦ ᒥᒋ ᐊᒐᐧᑯᒡ ᐊᒋ ᐱᒋᔅᑯᐛᒡ ᐊᐛᔪᐛ ᒐᒋ ᐎᐎᑎᓴᐅᒋᒡ, ᑭᔭ ᒋᑦ ᐃᓯᓂᐧᑲᓱᐅᓂᒡ ᐅᒡ ᒪᒥᔅᑲᒡ ᒐᒂᔪᐛ ᓂᒋ ᐃᑐᑕᓇᓐ᙮’ 23ᐊᑯ ᒐ ᐃᑎᒂᐤ, ‘ᓇᒪ ᓂᑕ ᒋ ᐅᒋ ᒋᔅᒐᔨᒥᑎᓇᐛᐤ᙮ ᒪᒋᒄ ᓂᑭᓯᒄ ᓇᑕ ᒋᔨᐛᐤ ᑲ ᒥᒋ ᐃᔪᔭᒄ᙮’ ”
ᓂᓱ ᐊᐛᓐᒋ ᑲ ᒥᒋᐛᐱᒐᒡ
ᓗᒃ 6.47-49
24“ᒥᓯᐛ ᑕᑐᐤ ᐊᐛᓐ ᑲ ᐸᑕᐧᒃ ᓂᑦ ᐃᔨᒧᐅᓂᔪᐤ ᑲ ᐊᑎ ᐃᑐᑕᐧᒃ ᒪᒃ ᐊᓂᔭ ᑲ ᐃᔅᒋᔄᐅᒡ, ᒧᔭᒻ ᓇᐸᐤ ᑲ ᑭᒐᑕᐛᔨᑕᐧᒃ ᐊᓐᑕ ᐊ ᐸᐸᒋᐱᔅᑲᔨᒡ ᑲ ᐎᔨᑲᐳᐅᑕᑦ ᒥᒋᐛᐱᔪᐤ ᐃᑕᔨᑕᑯᓱᐤ᙮”
25“ᐃᔅᐱ ᒪᒃ ᒥᔅᑎ ᒋᒧᓂᔨᒡ, ᒪᒃ ᐃᔅᐱ ᐊ ᐊᑎ ᐅᑎᒋᐳᑕᔨᒡ ᐛᔅᑲ ᐊᓂᔭ ᐎᒡ ᒪᒃ ᐃᔅᐱ ᒥᔅᑎ ᔪᑎᓂᔨᒡ ᐊᔭᒋᐱᔨᒡ ᐊᓂᔭ ᐎᒡ, ᒥᒄ ᓇᒪ ᐛᐛᒡ ᒋ ᑯᐱᔪᐤ, ᐛᔅ ᓇᔅᒡ ᑕᑈ ᒋ ᐊᔨᒋᑲᐳᑕᐤ ᐊᓐᑕ ᐊᓂᔭ ᑲ ᐸᐸᒋᐱᔅᑲᔨᒡ ᐊᒋ ᐎᔨᑲᐳᐅᑕᑦ᙮”
26“ᐊᑯ ᑕᑐᐤ ᐊᐛᓐ ᑲ ᐸᑕᐧᒃ ᑕᓐ ᐊᓂᔭᔪᐤ ᑲ ᐃᔅᒋᔄᐅᒡ ᐊᑲ ᒪᒃ ᐃᑐᑕᐧᒃ ᒧᔭᒻ ᐊᐛᓐ ᐊᑲ ᓂᔍᔨᑕᐧᒃ ᐊᓐᑕ ᐃᔭᑲᒡ ᑲ ᐎᔨᑲᐳᐅᑕᑦ ᐎᒡ ᐊᐅᑯᓐ ᐊ ᐃᓯᓇᑯᓯᑦ᙮”
27“ᐃᔅᐱ ᒪᒃ ᒥᔅᑎ ᒋᒧᓂᔨᒡ, ᒪᒃ ᐃᔅᐱ ᐊ ᐊᑎ ᐅᑎᒋᐳᑕᔨᒡ ᐛᔅᑲ ᐊᓂᔭ ᐎᒡ ᒪᒃ ᐃᔅᐱ ᒥᔅᑎ ᔪᑎᓂᔨᒡ ᐊᔭᒋᐱᔨᒡ ᐊᓂᔭ ᐎᒡ, ᑎᐛᒡ ᑯᐅᐱᔪᐤ ᐊᓂᔭ ᐎᒡ, ᓇᔅᒡ ᓂᓱᐅᓇᑎᓂᔪᐤ ᐊᓂᔭ ᐎᒡ᙮”
ᒋᓴᔅ ᐅᑭᔅᒋᐅᓐ
28ᐃᔅᐱ ᒪᒃ ᒋᓴᔅ ᑲᒋ ᐃᔅᒋᔄᑦ ᐅᔭ ᑕᓐ ᑲ ᐎ ᐃᔅᒋᔄᑦ, ᒥᓯᐛ ᐊᓂᔭ ᐊᐛᔪᐛ ᓇᔅᒡ ᒋ ᒥᔅᑲᑕᔨᑎᒥᑯᔪᐛ ᐊᓂᔭ ᑲ ᐃᓯ ᒋᔅᑯᑎᒪᒐᑦ᙮
29ᐛᔅ ᐊ ᒋᔅᑯᑎᒪᒐᑦ ᓇᒪ ᐅᒋ ᐃᑕᔨᑕᑯᓱᐤ ᐊ ᐃᑕᔨᑕᑯᓯᔨᒋ ᐊᓂᔭ ᐎᓱᐛᐅᓂᔪᐤ ᑲ ᒋᔅᑯᑎᒪᒐᔨᒋ᙮ ᐛᔅ ᐎᔾ ᒋᔅᑯᑎᒪᒐᐤ ᑕᐱᔅᑯᓐ ᐊᐛᓐ ᐊ ᐊᔭᑦ ᑭᔅᒋᐅᓂᔪᐤ᙮
Currently Selected:
ᒪᑎᔪᐤ 7: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
