ᒪᑎᔪᐤ 12
12
ᐊ ᐊᔭᒥᐊᐅᒋᓯᑲᒡ ᐊ ᐊᔨᒧᑕᒡ
ᒪᕐᒃ 2.23-28; ᓗᒃ 6.1-5
1ᒪᒂᒡ ᒪᒃ ᐊ ᒍᐤ ᐊᔭᒥᐊᐅᒋᓯᑲᔨᒡ ᒋᓴᔅ ᒋ ᐎᒐᐛᐤ ᐅᒋᔅᒋᓄᐊᒧᐛᑭᓇ, ᐊ ᐊᑎ ᐱᒧᑕᒡ ᐊᓐᑕ ᑲᒋ ᓂᑕᐅᒋᓂᔨᒋ ᓂᑕᐅᒋᑕᑭᓇ ᐊᓐᑕ ᐛᒋ ᐅᓯᐊᑭᓄᐅᑦ ᐸᒂᓯᑭᓐ᙮ ᒋ ᓯᐛᔪᐛ ᒪᒃ ᐊᓂᔭ ᐅᒋᔅᒋᓄᐊᒧᐛᑭᓇ, ᐊᑯ ᑲ ᓇᓇᑥᔭᔅᑯᐱᑎᒥᔨᒋ ᐊᓂᔭ ᓂᑕᐅᒋᑕᑭᓇ ᒐ ᒥᒋᔨᒋ᙮ 2ᐃᔅᐱ ᒪᒃ ᐊᓐᒡ ᐸᕆᓯᔨᒡ ᐎᔭᐱᒪᒡ ᐊᓂᔭ ᐊ ᐃᑎᔨᒋ ᒋ ᐃᑕᐅᒡ ᐊᓂᔭ ᒋᓴᓴ, “ᒐᒂᓐ ᐛᒋ ᐃᑐᑎᒪᒄ ᐊᓐ ᒐᒂᓐ ᐊᑐᒡ ᒋᐸ ᐅᒋ ᐃᑐᑕᑭᓄᐤ ᐊ ᐊᔭᒥᐊᐅᒋᓯᑲᒡ ?”
3ᐊᑯ ᒋᓴᔅ ᐊᑕᑦ ᐊᓂᔭ ᐸᕆᓯᐊ, “ᔅᒋ ᐃᔨᒥᑕᓇᐛᒐ ᒥᓯᓇᐃᑭᓂᒡ ᑲ ᑎᐸᒋᒪᑭᓄᐅᑦ ᐊᓂᔭ ᒋᓴᐅᒋᒪᐤ ᑎᐱᑦ, ᒥᓯᐛ ᒪᒃ ᐊᓂᔭ ᑲ ᐎᒐᐅᑯᑦ ᐃᔅᐱ ᑲ ᐎ ᒥᒋᓱᒡ ? 4ᐊᓂᔭ ᒋᓴᐅᒋᒪᐤ ᑎᐱᑦ ᒋ ᐱᒐᐤ ᒋᓴᐊᔭᒥᐊᐅᒋᐛᐱᒡ ᑭᔭ ᒂ ᒧᐛᑦ ᐊᓂᔭ ᑲ ᐸᔭᒋᓯᔨᒋ ᐸᒂᓯᑭᓇ, ᐊᑯ ᒂ ᐊᓯᒪᑦ ᐎᒐᐛᑭᓇ᙮ ᒥᒄ ᒪᒃ ᐊᔭᒥᐊᐅᒋᒪᐅᒡ ᒋ ᐃᑕᔨᑕᑯᓱᐅᒡ ᒐᒋ ᒧᐛᒡ ᐅᔭ ᐸᒂᓯᑭᓇ, ᐛᔅ ᐊᐅᑯᓐ ᑲ ᐃᑎᔅᑕᔨᒡ ᐊᔭᒥᐊᐅ ᐎᓱᐛᐅᒥᓯᓇᐃᑭᓂᒡ᙮ ᑎᐱᑦ ᒪᒃ ᓇᒪ ᐅᒋ ᐛᐛᓯᐊᑭᓄᐤ᙮ 5ᑭᔭ ᔅᒋ ᐃᔨᒥᑕᓇᐛᒐ ᐊᓐᑕ ᐎᓱᐛᐅᒥᓯᓇᐃᑭᓂᒡ, ᐊᓐᒡ ᐊᔭᒥᐊᐅᒋᒪᐅᒡ ᐊ ᐊᑐᔅᒐᒡ ᐊᓐᑕ ᒋᓴᐊᔭᒥᐊᐅᒋᐛᐱᒡ ᐊ ᐊᔭᒥᐊᐅᒋᓯᑲᔨᒡ ᐱᑯᓂᒧᒡ ᐊᓂᔭ ᐎᓱᐛᐅᓂᔪᐤ ᑕᓐ ᒋᐸ ᐃᓯ ᓂᓇᑭᑐᐛᔨᑕᑭᓄᐅᔪᐤ ᐊ ᐊᔭᒥᐊᐅᒋᓯᑲᔨᒡ, ᓇᒪ ᒪᒃ ᒐᒂᔪᐤ ᒋᑭ ᒋ ᐃᓯ ᐊᑕᒪᔨᑕᑯᓱᐅᒡ ? 6ᒋ ᐎᑎᒪᑎᓇᐛᐤ, ᑕᐤ ᐊᐛᓐ ᐅᑕ ᐅᔅᑕ ᐊ ᐃᔅᐸᔨᑕᑯᓯᑦ ᐃᔅᐱᔅ ᐎ ᑕᓐ ᐊ ᐃᑐᑕᑭᓄᐅᒡ ᒍᐤ ᒋᓴᐊᔭᒥᐊᐅᒋᐛᑉ᙮ 7ᐛᔅ ᐃᑎᔅᑕᐤ ᒥᓯᓇᐃᑭᓂᒡ ᒋᓴᒪᓂᑐᐤ ᐊᒋ ᐃᔅᒋᔄᑦ, ‘ᒋᓴᐛᑎᓯᐅᓐ ᐊᐅᒄ ᓇᑐᐛᔨᑎᒪᓐ, ᓇᒪ ᐎ ᐊ ᒥᑐᔅᑕᐊᒪᓄᐅᒡ ᒐᒂᓐ,’ ᓂᔅᑐᑎᒧᒄ ᒪᒃ ᐅ ᑕᓐ ᐊᓐ ᐊ ᐃᔅᒋᔄᒥᑲᒡ, ᓇᒪ ᒋᐸ ᐅᒋ ᑎᐸᔅᑯᓇᐛᐅᒡ ᐊᓐᒡ ᐊᑲ ᒥᒋᑐᑕᒡ᙮ 8ᐛᔅ ᐃᔪᐤ ᐅᑯᓯᓴᓐ, ᐛᐛᒡ ᐊ ᐊᔭᒥᐊᐅᒋᓯᑲᔨᒡ ᑎᐸᔨᑎᒻ᙮”
ᓇᐸᐤ ᑲ ᒪᔅᑲᔨᒡ ᐅᑎᒋᔾ
ᒪᕐᒃ 3.1-6; ᓗᒃ 6.6-11
9ᐊᑯ ᒋᓴᔅ ᒂ ᔅᑐᑕᑦ ᐊᓐᑕ ᐅᒋ, ᐊᑯ ᐊᓐᑕ ᐊᔭᒥᐊᐅᒋᐛᐱᒡ ᒂ ᐱᒐᑦ᙮ 10ᒋ ᑕᐤ ᒪᒃ ᐊᓐᑕ ᓇᐸᐤ ᐅᑎᒋᔾ ᐊ ᒪᔅᑲᔨᒡ᙮ ᒋ ᑕᐅᒡ ᒪᒃ ᐊᓐᑕ ᐱᔅᒐ ᐸᕆᓯᔨᒡ ᐊ ᒋᒧᑦ ᓂᓇᑭᑐᐛᔨᒪᒡ ᐊᓂᔭ ᒋᓴᓴ ᐊ ᐎ ᓇᓂᑐᐤ ᒥᔅᑲᒡ ᒐᒂᔪᐤ ᒐᒋ ᐅᒋ ᐊᑕᒪᔨᒪᒡ ᐊ ᒥᒋᑐᑎᒥᔨᒋ ᐊᑯ ᒂ ᑯᒂᒋᒪᒡ, “ᐅᓂᑐᑕᑭᓄᐤ ᐊ ᐊᐛᓐ ᐊ ᒥᓏᒋᐊᑭᓄᐅᑦ ᐊᔭᒥᐊᐅᒋᓯᑲᔨᒡ ?”
11ᐊᑯ ᒋᓴᔅ ᐊᑕᑦ, “ᐸᐃᒄ ᐊᓐ ᐊᐛᓐ ᐊᓐᑕ ᐊ ᑎᓯᔭᒄ ᐅᒪᔭᑕᓂᓯᒪ ᐱᒋᐱᔨᒋ ᐊᓐᑕ ᐊ ᐱᑯᓇᔭᔨᒡ ᓇᒪᐎᔾ ᐊ ᐃᔭᐱᒡ ᒋᑭ ᐅᒋ ᐎ ᐎᐧᑯᒋᐊᐤ ᐊᓐᑕ ᐊᓂᔭ ᑲ ᐱᒋᐱᔨᒋ ᐊᑎ ᐊᔭᒥᐊᐅᒋᓯᑲᔨᒡ ? 12ᐅᔅᑕ ᒪᒃ ᓇᐸᐤ ᐃᑕᔨᑕᑯᓱᐤ ᐃᔅᐱᔅ ᒪᔭᑕᓂᓴ᙮ ᓇᒪ ᒪᒃ ᐎᔭᓯᔨᓐ ᐊ ᒥᔪ ᐎᒋᐃᑦ ᐊᐛᓐ ᐊᔭᒥᐊᐅᒋᓯᑲᔨᒡ᙮” 13ᐊᑯ ᐊᑕᑦ ᐊᓂᔭ ᓇᐸᐛ ᐅᑎᒋᔪᐤ ᑲ ᒪᔅᑲᔨᒡ, “ᓴᑐᐱᔨᑕ ᔅᑎᒋᔾ᙮” ᒋ ᓴᑐᐱᔨᑕᐤ ᒪᒃ ᐊᓐ ᓇᐸᐤ ᐊᓂᔭ ᐅᑎᒋᔾ, ᐊᑯ ᒪᒃ ᑲ ᒥᓏᒋᑕᑭᓄᐎᒡ ᐊᓂᔭ ᐅᑎᒋᔾ᙮ ᒧᔭᒻ ᐊᓂᔭ ᑯᑎᒋᔪᐤ ᐅᑎᒋᔾ ᑲ ᐃᓯ ᒥᔽᔨᒡ, ᐊᐅᑯᓐ ᑲ ᐃᓯᓇᑯᓂᔨᒡ ᐊᓂᔭ ᐅᑎᒋᔾ ᑲ ᒪᔅᑲᔨᒡ᙮ 14ᐊᑯ ᒂ ᔅᑐᑕᒡ ᐊᓐᒡ ᐸᕆᓯᔨᒡ, ᒂ ᐃᔭᔨᒺᐛᐃᑯᒡ ᑕᓐ ᒋᐸ ᒋ ᐃᑐᐅᒡ ᒐᒋ ᓂᐸᐊᒡ ᒋᓴᓴ᙮
ᐊᓂᔭ ᑲ ᐅᑎᓇᑦ ᒐ ᐅᑦ ᐊᐱᒋᐊᑭᓐᑦ ᒋᓴᒪᓂᑐᐤ
15ᐃᔅᐱ ᒪᒃ ᒋᓴᔅ ᐱᔭᑕᐧᒃ ᑕᓐ ᐛᑐᑐᐛᑭᓄᐅᑦ ᒋ ᔅᑐᑕᐤ, ᒥᒐᑦ ᒪᒃ ᐊᐛᔪᐛ ᒋ ᓇᓴᐅᑯᐤ᙮ ᒋ ᒥᓏᒋᐊᐤ ᒪᒃ ᐊᓂᔭ ᒥᓯᐛ ᑲ ᐊᐧᑯᓯᔨᒋ ᐊᐛᔪᐛ᙮ 16ᐊᑯ ᒋᓴᔅ ᒂ ᐃᑎᓱᒪᑦ ᒐ ᐊᑲ ᐎᑎᒧᐛᔨᒋ ᑯᑎᑲ ᐊᐛᔪᐛ ᑕᓐ ᑲ ᐃᑎᑦ᙮ 17ᐊᓂᔭ ᒪᒃ ᑲ ᐃᑎᑦ ᐊᐅᑯᓐ ᑲ ᐃᔅᐱᔨᒡ ᐊᓂᔭ ᑕᓐ ᑲ ᐃᔅᒋᔄᑦ ᒋᓴᒪᓂᑐᐤ, ᑕᓐ ᑲ ᐃᓯ ᒥᔭᑦ ᐅᒋᔅᒋᐛᐃᒐᓱᐛ ᐊᐃᓴᔭᔨᒋ ᒐᒋ ᐃᓯ ᐊᔨᒧᑎᒥᔨᒋ᙮
18ᒪᐅ ᓂᑦ ᐊᐱᒋᐊᑭᓐ ᑲ ᐅᑎᓂᒃ, ᐊᓐ ᑲ ᓴᒋᐊᒃ, ᑭᔭ ᑲ ᓂᓇᐊᔨᑎᒥᐃᑦ᙮
ᓂᑭ ᒥᔭᐤ ᓂᑦ ᐊᒐᒂ ᑭᔭ ᒐ ᐎᑎᒧᐛᑦ ᒥᓯᐛ ᐊᐛᔪᐛ ᓂᓇᐧᑯᐤ ᐊ ᐃᑎᔅᑲᓇᓯᔨᒋ ᒐ ᑎᐸᔅᑯᓇᑭᓄᔨᒋ᙮
19ᓇᒪ ᒋᑭ ᐅᒋ ᓇᓂᑐᐤ ᒥᒋᐱᔪᐤ ᑭᔭ ᓇᒪ ᒋᑭ ᐅᒋ ᑕᑈᐤ ᓂᑦ ᐊᐱᒋᐊᑭᓐ, ᒪᒃ ᒐᒋ ᐱᐸᑕᑯᐅᑦ ᐊᓐᑕ ᒪᔅᑭᓇᒡ᙮
20ᑭᔭ ᓇᒪ ᒋᑭ ᐅᒋ ᐸᒋᓯᒪᐤ ᐊᓂᔭ ᒐᑲᑦ ᑲ ᐸᒋᓯᓂᔨᒋ ᑭᔭ ᒋᑭ ᐎᒋᐊᐤ ᐊ ᓯᒋᒪᑦ ᒐ ᐊᑲ ᐳᓂᔨᒋ ᐊᓂᔭ ᑲ ᐎ ᓄᑎᐳᓂᔨᒋ᙮
ᓇᒪ ᒪᒃ ᒋᑭ ᐅᒋ ᐳᓂᔪᐤ ᐸᑐᔅ ᒥᓯᐛ ᒐᒂᔪᐛ ᒋ ᑯᐃᔅᑯᓇᑯᑕᒐ ᑭᔭ ᒋᑭ ᓴᒂᐊᐤ ᐊᓂᔭᔪᐛ ᑲ ᐎ ᓂᔅᑯᔅᑕᑯᑦ᙮
21ᒥᓯᐛ ᒪᒃ ᐊ ᐃᑎᔅᑲᓇᓯᔨᒋ ᐃᔪᐛ ᒋᑭ ᐃᔅᐸᔨᑎᒥᔪᐛ ᐅᑦ ᐃᓯᓂᐧᑲᓱᐅᓐ᙮
ᐊᐅᑯᓐ ᒪᒃ ᐅᔭ ᑲ ᓂᑲᓐ ᐃᔅᒋᔄᒂ ᐊᓂᔭ ᐅᒋᔅᒋᐛᐃᒐᓱᐤ ᐊᐃᓴᔭ ᐊ ᐊᔨᒧᒪᑦ ᒋᓴᓴ᙮
ᑕᓐᑕ ᑲ ᐅᑎᓇᐧᒃ ᒋᓴᔅ ᐅᒥᔅᑯᓯᐅᓐ
ᒪᕐᒃ 3.20-30; ᓗᒃ 11.14-23
22ᐱᔅᒐ ᐊᐛᓐᒋ ᒋ ᐸᓱᐛᐅᒡ ᓇᐸᐛ ᐊᓐᑕ ᒋᓴᓴ ᐊ ᑕᔨᒋ ᐊᑲ ᐛᐸᑎᒥᔨᒋ ᑭᔭ ᐊᑲ ᐅᒋ ᐃᔨᒥᔨᒋ, ᐊᒋ ᐱᒋᔅᑲᑯᔨᒋ ᒥᒋ ᐊᒐᒂ᙮ ᐊᑯ ᒋᓴᔅ ᑲ ᒥᓏᒋᐊᑦ ᐊᓂᔭ ᓇᐸᐛ, ᐊ ᐊᑲ ᐅᒋ ᓂᑕᐛᔨᒋ ᑭᔭ ᐊ ᐊᑲ ᐅᒋ ᐛᐸᑎᒥᔨᒋ᙮ 23ᐊᓐᒡ ᒪᒃ ᐃᔪᒡ ᒥᓯᐛ ᒋ ᒥᔅᑲᑕᔨᑎᒧᒡ ᑕᓐ ᑲ ᐃᓯ ᐛᐱᒪᒡ ᒋᓴᓴ ᐊ ᐃᑐᑎᒥᔨᒋ᙮ ᒋ ᐃᑕᐅᒡ ᒪᒃ, “ᒂᔄᓐ ᑕᑈ ᒋᓴᔅ, ᐊᐅᒄ ᐊᓂᔭ ᒋᓴᒪᓂᑐᐤ ᑲ ᐸᒋ ᐃᑎᓴᐛᑦ ᐊᓐᑕ ᐊᓂᔭ ᒋᓴᐅᒋᒪᐛ ᑎᐱᑕ ᐊ ᑕᔨᒋ ᑲ ᐃᑎᔅᑲᓇᓯᑦ᙮”
24ᒥᒄ ᒪᒃ ᐃᔅᐱ ᑲ ᐸᑐᐛᒡ ᐊᓐᒡ ᐸᕆᓯᔨᒡ ᐊᓂᔭ ᐊ ᐃᔅᒋᔄᔨᒋ, ᒋ ᐃᑕᐅᒡ, “ᐸᐃᓪᓯᐳᓪ, ᐊᓂᔭ ᒥᒋ ᐊᒐᐧᑯᒡ ᐅᒋᒪᒧᐛᐛ ᐊᔪᑯᓐ ᐊᓂᔭ ᑲ ᒥᔨᑯᑦ ᒥᑕᐅᓂᔪᐤ ᒐᒋ ᐎᐎᑎᓴᐛᔨᒋ ᒥᒋ ᐊᒐᒂ᙮”
25ᒋᓴᔅ ᒪᒃ ᒋ ᒋᔅᒐᔨᒪᐤ ᑕᓐ ᐊ ᐃᓯ ᒪᒥᑐᓇᔨᑎᒥᔨᒋ ᐊᑯ ᐊᑕᑦ, “ᐃᔪᒡ ᐅᑕ ᐸᐃᒄ ᐅᑕᓇᒡ ᒪᓯᐧᑲᑐᑥᐛ ᒋᑭ ᓂᓱᐅᓇᒋᐃᑐᐅᒡ᙮ ᒧᔭᒻ ᑕᓐ ᐊ ᐃᓯᓇᒂᒡ ᐸᐃᒄ ᐅᑕᓄᐤ ᐊᐛᓐᒋ ᐊ ᒥᒋᐱᔨᒡ, ᐊ ᑎᐸᓂᐃᑐᒡ, ᐊ ᒥᒋᐱᔨᒡ ᓇᒪ ᒋᑭ ᐅᒋ ᒋᐧᑲᐛᒋᐱᔪᐅᒡ ᑭᔭ ᒋᑭ ᓂᓱᐅᓇᒋᐃᑐᐅᒡ᙮ 26ᐊᓐᒡ ᒪᒃ ᑲ ᓇᓴᐛᒡ ᒥᒋᒥᓂᑐᐛ, ᒪᓯᐧᑲᑐᑥᐛ ᒪᒃ, ᒋᑭ ᓂᓱᐅᓇᒋᑕᑭᓄᐅᔪᐤ ᒥᒋᒥᓂᑐᐤ ᐅᒋᓴᐅᒋᒪᐅᓐ᙮ 27ᐊᐅᒄ ᒪᒃ ᒋᐸ ᐃᔅᐸᐃᔪᐤ ᑕᑈ ᐊᓐ ᒥᒋ ᐊᒐᐧᒄ ᐅᒋᒪᐤ ᐸᐃᓪᓯᐳᓪ ᑲ ᐃᓯᓂᐧᑲᑕᑭᓄᐅᑦ ᐸᒋ ᒥᔨᑦ ᑭᔅᒋᐅᓂᔪᐤ ᒐᒋ ᐊᐱᒋᑕᐅᒡ ᒐᒋ ᐎᐎᑎᓴᐅᒂᐤ ᒥᒋ ᐊᒐᐧᑯᒡ᙮ ᒋᔨᐛᐤ ᒪᒃ ᓇᓂᑎᒻ ᒋᑦ ᐃᔨᒧᐛᐅᒡ ᐊ ᐎᐎᑎᓴᐛᒡ ᒥᒋ ᐊᒐᒂ᙮ ᐊᐛᔪᐛ ᒪᒃ ᐎᔨᐛᐤ ᑲ ᒥᔨᑯᒡ ᑭᔅᒋᐅᓂᔪᐤ ᐊᓂᔭ ᒐᒋ ᐃᑎᒡ ? ᐊᑯ ᒪᒃ ᒋᔨᐛᐤ ᓇᓂᑎᒻ ᒋᑦ ᐃᔨᒧᐛᐅᒡ ᒋᔅᒐᔨᑎᒧᒡ ᐊ ᑭᑭᒋᔭᔭᒄ ᐊᓐ ᐊ ᐃᔅᒋᔄᔭᒄ ᒥᒋᒥᓂᑐᐤ ᐊ ᒥᔨᐛᑦ ᑭᔅᒋᐅᓂᔪᐤ ᒐᒋ ᐎᐎᑎᓴᐛᑭᓄᔨᒋ ᒥᒋ ᐊᒐᒂ᙮ 28ᓇᒪᔭᐤ ᐸᐃᓪᓯᐳᓪ ᐅᑦ ᐊᒐᒂ ᑲ ᐸᒋ ᒥᔨᑦ ᑭᔅᒋᐅᓂᔪᐤ ᒐᒋ ᐎᐎᑎᓴᐅᒥᒋ ᒥᒋ ᐊᒐᒂ, ᒋᓴᒪᓂᑐᐤ ᐅᑦ ᐊᒐᒂ ᐊᐅᒄ ᑲ ᐸᒋ ᒥᔨᑦ ᑭᔅᒋᐅᓂᔪᐤ ᐅᔭ ᒐᒋ ᐃᑐᑎᒧᒡ᙮ ᐊᑯᑕ ᒪᒃ ᐛᒋ ᐛᐸᑎᔨᑯᐅᔭᒄ ᑕᑈ ᒋᓴᒪᓂᑐᐤ ᐅᒋᓴᐅᒋᒪᐅᓐ ᓴᔅ ᓇᔅᒡ ᐊ ᐅᑎᑕᐅᑯᐛᒄ᙮”
29“ᓇᒪ ᐊᐛᓐ ᒋᑭ ᒋ ᐱᒐᐛᐤ ᐊ ᓱᒋᔨᒋ ᓇᐸᐛ ᐎᒋᐛᔨᒡ ᒐᒋ ᑭᒐᒧᑎᒧᐛᑦ ᑕᓐ ᐊ ᐃᓯ ᑎᐱᔨᐛᐅᓯᔨᒋ ᐸᑐᔅ ᓂᔅᑎᒻ ᒋ ᒪᑯᐱᑕᒐ ᐊᓂᔭ ᓇᐸᐛ ᑲ ᓱᒋᔨᒋ, ᑭᔭ ᐃᔭᒄ ᒐᒋ ᒋᒧᑎᒧᐛᑦ ᑕᓐ ᐊ ᐃᓯ ᑎᐱᔨᐛᐅᓯᔨᒋ ?”
30ᒋᓴᔅ ᒪᒃ ᒥᓐ ᒋ ᐃᑕᐤ, “ᐊᓐ ᐊᐛᓐ ᐊᑲ ᐸᒋ ᐎᒋᐃᑦ ᓂᔅᑯᔅᑕᒄ᙮ ᐊᐛᓐ ᐊᑲ ᐎᒋᐃᑦ ᐊ ᒪᒧᓴᒋᓂᒐᐅᒡ ᐃᒐᑎᓴᐃᒐᐤ ᐃᓯᓇᑯᓱᐤ᙮ 31ᐊᐅᒄ ᒪᒃ ᐅ ᐛᒋ ᐎᑎᒪᑎᑯᒡ, ᒋᑭ ᒋ ᐛᐸᔨᑎᒧᐛᑭᓄᐤ ᐊᐛᓐ ᒥᒄ ᑕᓐ ᐊ ᐃᓯᓇᑯᓂᔨᒡ ᒥᒋᑥᐅᓂᔪᐤ ᐊ ᐃᑐᑕᐧᒃ ᒪᒃ ᐊ ᐃᓯ ᒪᔭᔨᒐᑦ, ᒥᒄ ᒪᒃ ᓇᒪ ᒋᑭ ᒋ ᐛᐸᔨᑎᒧᐛᑭᓄᐤ ᐊᐛᓐ ᑲ ᒥᒐᒋᒪᑦ ᑲ ᐸᔭᒋᓯᔨᒋ ᐊᒐᒂ᙮ 32ᒥᓯᐛ ᐊᐛᓐ ᑲ ᒪᔭᔨᒪᑦ ᐃᔪᐤ ᐅᑯᓯᓴᓇ ᒋᑭ ᒋ ᐛᐸᔨᑎᒧᐛᑭᓄᐤ᙮ ᓇᒪ ᓂᑕ ᒋᑭ ᒋ ᐛᐸᔨᑎᒧᐛᑭᓄᐤ ᐊᐛᓐ ᒪᔭᔨᒪᒐ ᑲ ᐸᔭᒋᓯᔨᒋ ᐊᒐᒂ᙮”
ᒥᔅᑎᒄ ᑕᓐ ᐊ ᐃᓯ ᒥᓂᓱᐅᑦ
ᓗᒃ 6.43-45
33“ᐊᓂᔭ ᑕᓐ ᐊ ᐃᓯ ᓂᑕᐅᒋᑕᑦ ᒥᓂᓴ ᒥᔅᑎᒄ ᐊᑯᑕ ᐛᒋ ᓂᔅᑐᓄᐛᑭᓄᐅᑦ ᒐᒄ ᒥᔅᑎᒄ ᐊᓐ᙮ ᐊᑲ ᒪᒃ ᒥᔪ ᓂᑕᐅᒋᑦ ᒥᔅᑎᒄ ᓇᒪ ᒥᔽᔪᐛ ᐊᓂᔭᔪᐛ ᒥᓂᓴ᙮ 34ᑕᓐᑕ ᒐᒋ ᐅᒋ ᐃᔅᒋᔄᔭᒄ ᒐᒂᓐ ᐊ ᒥᔪᑕᒂᒡ ᐊ ᒥᒐᑎᓯᔭᒄ ᒪᒃ ᒧᔭᒻ ᒋᓇᐱᑯᒡ ᐊ ᐃᑕᔨᑕᑯᓯᔭᒄ᙮ ᑕᓐ ᐊ ᐃᓯ ᐃᔨᒥᑦ ᐊᐛᓐ ᐊᑯᑕ ᐛᒋ ᒋᔅᒐᔨᑕᑯᓯᑦ ᑕᓐ ᐊ ᐃᓯᑕᐊᑦ ? 35ᐛᔅ ᑕᓐ ᐊ ᐃᓯ ᐊᔭᑦ ᐊᐛᓐ ᐅᐱᒪᑎᓯᐅᓂᒡ ᒋᑭ ᓄᑯᓂᔪᐤ᙮ ᐛᔅ ᐊ ᐃᓯ ᐃᔨᒥᑦ ᐊᐛᓐ ᐊᑯᑕ ᐛᒋ ᒋᔅᒐᔨᑕᑯᓯᑦ ᑕᓐ ᐊ ᐃᓯᑕᐊᑦ᙮”
36“ᒋ ᐎᑎᒪᑎᓇᐛᐤ, ᒐᔅᑎᓇᔅ ᒥᓯᐛ ᑕᓐ ᑲ ᐃᓯ ᐃᔨᒥᑦ ᐊᐛᓐ ᐊᑲ ᐊᐱᑎᓂᔨᒡ ᒋᑭ ᐎᑎᒧᐛᑭᓄᐤ ᑎᐸᔅᑯᓂᒐᐅ-ᒋᓯᑲᔨᒐ᙮ 37ᐊᓐ ᑕᓐ ᐊ ᐃᓯ ᐃᔨᒥᔭᒄ, ᐊᐅᒄ ᐊᓐ ᒐ ᐊᐱᑎᒡ ᑎᐸᔅᑯᓂᑯᐅᔭᒂ᙮ ᐊᓐ ᑕᓐ ᐊ ᐃᓯ ᐃᔨᒥᔭᒄ, ᐊᑯᑕ ᒐ ᐅᒋ ᒋᔅᒐᔨᑕᑯᓯᔭᒄ ᑯᐃᔅᒄ ᑲ ᐃᑐᐛᒂ ᑭᔭ ᒪᒃ ᐊᑲ ᑯᐃᔅᒄ ᐅᒋ ᐃᑐᐛᒂ᙮”
ᑲ ᓂᑐᐛᔨᑕᒡ ᐊᐛᓐᒋ ᒐᒋ ᐛᐸᑎᔭᑭᓄᐎᒡ ᒪᒥᔅᑲᒡ ᐃᑐᐅᓂᔪᐤ
ᒪᕐᒃ 8.11,12; ᓗᒃ 11.29-32
38ᐱᔅᒐ ᒪᒃ ᐊᓐᒡ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ ᑭᔭ ᐱᔅᒐ ᐊᓐᒡ ᐸᕆᓯᔨᒡ ᒋ ᐅᒋ ᐃᔨᒧᐅᒡ ᐊ ᐃᔅᒋᔄᒡ, “ᒋᔅᑯᑎᒪᒐᓱᐤ, ᓂ ᐎ ᐛᐸᑕᓇᓐ ᒪᒥᔅᑲᒡ ᒐᒂᓐ ᐊ ᐃᑐᑎᒥᓐ᙮”
39ᐊᑯ ᒋᓴᔅ ᐊᑕᑦ, “ᐊᓄᒡ ᐊᐛᓐᒋ ᑲ ᐱᒪᑎᓯᒡ ᓇᔅᒡ ᑕᑈ ᒥᒐᑎᓯᐅᒡ ᑭᔭ ᐱᓯᒂᑎᓯᐅᒡ᙮ ᑲ ᑯᒂᒋᒐᒧᔭᒄ ᒐᒋ ᐛᐸᑎᔨᑯᐅᔭᒄ ᒪᒥᔅᑲᒡ ᐛᐸᑎᔨᐛᐅᓐ, ᓇᒪ ᒋᑭ ᐅᒋ ᐛᐸᑎᔨᑯᐅᓇᐛᐤ᙮ ᒥᒄ ᐊᓂᔭᔪᐛ ᑕᓐ ᑲ ᐃᓯ ᒪᒥᔅᑲᒡ ᐃᔅᐱᔨᑦ ᐊᓂᔭ ᐅᒋᔅᒋᐛᐃᒐᓱᐤ ᒍᓇ ᐊᐅᒄ ᒥᒄ ᐊᓐ ᒐ ᐛᐸᑎᔨᑯᐅᔭᒄ᙮ 40ᒧᔭᒻ ᒍᓇ ᑲ ᐃᔅᐱᔅ ᑕᑦ ᐊᓐᑕ ᒥᔅᑎ ᓂᒪᓴ ᐎᑕᔨᒡ ᓂᔅᑐ ᒋᓯᑲᐛ ᑭᔭ ᓂᔅᑐ ᑎᐱᔅᑲᐛ, ᐊᐅᑯᓐ ᑭᔭ ᐃᔪᐤ ᐅᑯᓯᓴᓐ ᒐ ᐃᔅᐱᔅ ᒋ ᓇᐃᐧᑯᐛᑭᓄᐅᑦ ᐊᓐᑕ ᐃᔅ ᐊᔅᒋᒡ᙮ 41ᐃᔅᐱ ᒪᒃ ᑎᐸᔅᑯᓂᒐᐅ ᒋᓯᑲᒐ, ᐊᓂᔭᐧᑲ ᐃᔪᒡ ᐊᓐᑕ ᓂᓇᐸᒡ ᑲᒋ ᑕᒡ ᒋᑭ ᐅᐱᑲᐳᐅᒡ ᒐ ᐃᔅᒋᔄᒡ ᒐᒋ ᐛᐛᓯᐃᑯᐅᔭᒄ ᒋᔨᐛᐤ ᐊᓄᒡ ᑲ ᐱᒪᑎᓯᔭᒄ᙮ ᐛᔅ ᐊᑯᑕ ᑲ ᐅᒋ ᒂᔅᑲᑎᓯᒡ ᐃᔅᐱ ᑲ ᐸᑐᐛᒡ ᒍᓇᔨᒋ ᐊ ᑭᒐᔅᒋᒧᔨᒋ, ᑕᐤ ᒪᒃ ᐊᐛᓐ ᐅᑕ ᐅᔅᑕ ᐊ ᐃᑕᔨᑕᑯᓯᑦ ᐃᔅᐱᔅ ᒍᓇᔨᒋ, ᐃᔭᐱᒡ ᒪᒃ ᓇᒪ ᒋ ᐅᒋ ᒂᔅᑲᑎᓯᓇᐛᐤ᙮ 42ᐃᔅᐱ ᒪᒃ ᑎᐸᔅᑯᓂᒐᐅ ᒋᓯᑲᐤ ᐅᑎᒋᐱᔨᒐ, ᐊᓂᔭ ᒋᓴᐅᒋᒪᔎᐤ ᓴᐅᓄᑕᒡ ᑲ ᑎᐸᔨᒋᒐᑯᐱᓇ ᒋᑭ ᐅᒋ ᐱᓯᑯᐤ ᒐ ᓂᓱᐅᓇᒋᒪᑦ ᐊᓂᔭ ᐊᐛᔪᐛ ᐊᓄᒡ ᑲ ᐱᒪᑎᓯᔨᒋ᙮ ᐛᔅ ᐎᔾ ᓇᔅᒡ ᑕᑈ ᐛᔪᐤ ᒋ ᐅᑐᑕᐤ ᒥᒄ ᒐᒋ ᓂᑐᑎᒺᑦ ᐊᓂᔭ ᒋᓴᐅᒋᒪᐛ ᓴᓚᒥᓇ ᐅᑭᒐᑕᐛᔨᑎᒧᐅᓂᔪᐤ᙮ ᑕᐤ ᒪᒃ ᐅᑕ ᐊᐛᓐ ᐅᔅᑕ ᐊ ᐃᑕᔨᑕᑯᓯᑦ ᐃᔅᐱᔅ ᓴᓚᒥᓇ, ᓇᒪ ᒪᒃ ᐊᐱᓯᑐᐛᑭᓄᐤ᙮”
ᑲᐤ ᑲ ᑎᑯᓯᐧᒃ ᒥᒋ ᐊᒐᐧᒄ ᐊᓐᑕ ᑲ ᐅᒋ ᐎᐎᐛᐱᓇᑭᓄᐅᑦ
ᓗᒃ 11.24-26
43ᐊᑯ ᒋᓴᔅ ᒥᓐ ᑲ ᐊᑎ ᐃᔅᒋᔄᑦ, “ᐃᔅᐱ ᐊᒋ ᐎᐎᑦ ᒥᒋ ᐊᒐᐧᒄ ᐱᒡ ᐊᐛᔪᐛ ᐊ ᑕᔨᒋ ᐅᒋ ᐊᓐᑕ ᐊ ᐸᒂᔨᒡ ᐱᐸᒧᑕᐤ ᐊ ᓇᓂᑐᐛᐸᑕᐧᒃ ᑕᓐᑕ ᒐᒋ ᐊᔅᑕᔭᔅᑯᓯᑦ᙮ ᐊᑲ ᒪᒃ ᒪᔅᑲᐧᒃ, 44ᐊᑯ ᐊ ᐃᑎᓱᑦ, ‘ᑲᐤ ᓂᑭ ᓇᓂᑐᐛᐱᒪᐤ ᐊᓐ ᓇᐸᐤ ᑲ ᓂᑭᑎᒃ᙮’ ᐊᓐ ᒪᒃ ᓇᐸᐤ ᒧᔭᒻ ᒥᒋᐛᑉ ᐃᓯᓇᑯᓱᐤ᙮ ᑭᑈ ᑲᐤ ᐊ ᐃᓯ ᒋᐛᑦ ᐊᓐ ᒥᒋ ᐊᒐᐧᒄ ᐊ ᓇᓂᑐᐛᔨᑕᐧᒃ ᐊᓐᑕ ᑲ ᐅᒋ ᐎᐎᑦ ᒥᒋᐛᐱᔪᐤ᙮ ᐃᔅᐱ ᒪᒃ ᑲ ᐱᒐᑦ, ᒪᔅᑲᐧᒃ ᐊᓂᔭ ᒥᒋᐛᐱᔪᐤ ᐊᑲ ᐃᑕᓄᐎᒡ ᑭᔭ ᐊᒋ ᐛᔭᓴᐃᒐᓄᔨᒂ ᑭᔭ ᓇᔅᒡ ᐊ ᐸᔭᒋᓇᑯᓂᔨᒡ᙮ 45ᐅᔭ ᒪᒃ ᐎᔭᐸᑕᐧᒃ ᐊ ᐃᓯᓇᑯᓂᔨᒡ ᐊᑯ ᒐ ᑐᑕᑦ, ᓂᔭᓂᑐᐛᔨᒪᑦ ᓂᔄᐅᑕᒡ ᒥᒋ ᐊᒐᒂ ᐅᔅᑕ ᐊ ᐃᑕᔨᑕᑯᓯᔨᒋ ᐃᔅᐱᔅ ᐎᔾ ᐊ ᐃᑕᔨᑕᑯᓯᑦ, ᒐᒋ ᐎᒋᒥᑯᑦ ᐊᓐᑕ ᐊᓂᔭ ᓇᐸᐛ ᐱᒡ ᐊ ᑕᔨᒋ᙮ ᐊᑯ ᒪᒃ ᐊᓐ ᓇᐸᐤ ᐊᑐᐎᔅ ᒋᑭ ᐃᑕᔨᑕᑯᐃᑯᐤ ᐊᓂᔭ ᓂᔄᐅᑕᒡ ᒥᒋ ᐊᒐᒂ ᑕᓐ ᑲ ᐃᑕᔨᑕᑯᓯᑦ ᓂᔅᑎᒻ, ᒥᒄ ᐊᒋ ᐸᐃᑯᓯᔨᒋ᙮ ᐊᐅᑯᓐ ᒪᒃ ᒐ ᐃᔅᐱᔨᒡ ᐊᓐᒡ ᐊᓄᒡ ᐊᐛᓐᒋ ᑲ ᒥᒐᑎᓯᒡ᙮”
ᒋᓴᔅ ᐅᑲᐎᔭ ᑭᔭ ᐎᐧᑲᓂᓴ
ᒪᕐᒃ 3.31-35; ᓗᒃ 8.19-21
46ᐊᔅᒄ ᒪᒂᒡ ᒋᓴᔅ ᒋ ᐃᔨᒪᐊᐤ ᐊᓂᔭ ᐃᔪᐛ, ᒂ ᐅᒋ ᑎᑯᓯᓂᔨᒋ ᐅᑲᐎᔭ ᑭᔭ ᐎᐧᑲᓂᓴ᙮ ᐎᐎᑎᒥᒡ ᐊᓐᑕ ᒋ ᓂᐳᐅᔪᐛ ᐊ ᐎ ᐃᔨᒥᐃᑯᑦ᙮ 47ᐊᑯ ᐸᐃᒄ ᐊᓐᑕ ᐊᐛᔪᐛ ᒂ ᐃᑎᑯᑦ, “ᒋᑲᐎᔾ ᑭᔭ ᒋᐧᑲᓂᓯᒡ ᐎᐎᑎᒥᒡ ᐊᓐᑕ ᓂᐳᐅᒡ ᐊ ᐎ ᐃᔨᒥᐃᔅᒡ᙮”
48ᐊᑯ ᒋᓴᔅ ᐊᑕᑦ, “ᐊᐛᓐ ᒪᒃ ᓂᑲᐎᔾ ᑭᔭ ᐊᐛᓐᒋ ᓂᐧᑲᓂᓯᒡ ?” 49ᐊᑯ ᒂ ᐊᑥᐛᑦ ᐊᓂᔭ ᐅᒋᔅᒋᓄᐊᒧᐛᑭᓇ ᐊᑯ ᒂ ᐃᔅᒋᔄᑦ, “ᒪᐅᒋ ᓂᐧᑲᓂᓯᒡ ᑭᔭ ᐊᐅᒄ ᓂᑲᐎᔾ᙮ 50ᒧᔭᒻ ᓂᑲᐎᔾ ᑭᔭ ᓂᐧᑲᓂᓯᒡ ᓂᑦ ᐃᑕᔨᒪᐅᒡ ᐊᓐᒡ ᑲ ᑐᑕᒡ ᓄᑕᐎᔭ ᒋᒋᒋᓯᑯᒡ ᐊ ᑕᔨᒋ ᐅᑦ ᐃᑕᔨᑎᒧᐅᓂᔪᐤ᙮”
Currently Selected:
ᒪᑎᔪᐤ 12: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
