ᒪᑎᔪᐤ 10
10
ᒋᓴᔅ ᑲ ᐃᑎᓱᒪᑦ ᑲ ᓂᓱᓴᐳᔨᒋ ᐅᒋᔅᒋᓄᐊᒧᐛᑭᓇ
ᒪᕐᒃ 3.13-19; 6.7-13; ᓗᒃ 6.12-16; 9.1-6
Matthew 9.35-10.8 (Proper-6 Year A)
1ᓇᓇᒐ ᒋᓴᔅ ᒋ ᐎᓴᒪᐤ ᑲ ᓂᓱᓴᐳᔨᒋ ᐅᒋᔅᒋᓄᐊᒧᐛᑭᓇ, ᒋ ᒥᔭᐤ ᑎᐸᔨᒋᒐᐅᓂᔪᐤ ᒐᒋ ᐎᐎᑎᓴᐛᔨᒋ ᒥᒋ ᐊᒐᒂ, ᑭᔭ ᒐᒋ ᒥᓏᒋᐊᔨᒋ ᐊᓂᔭ ᐊᐛᔪᐛ ᓂᓇᐧᑯᐤ ᑲ ᐃᑕᔅᐱᓇᔨᒋ ᑭᔭ ᑲ ᐊᐧᑯᓯᔨᒋ᙮ 2ᒪᐅ ᒪᒃ ᑲ ᐃᓯᓂᐧᑲᓱᔨᒋ ᐊᓂᔭ ᓂᓱᓴᑉ ᐊᑈᔅᑕᓇ, ᓴᐃᒥᓐ, ᐊᐅᒄ ᐱᑕᕐ ᑲ ᐃᓯᓂᐧᑲᑕᑭᓄᐅᑦ, ᑭᔭ ᐊᓐᑎᕈᐛ ᐱᑕᕐ ᐅᓯᒪ, ᒋᒥᔅ ᑭᔭ ᐊᓂᔭ ᐎᐧᑲᓂᓴ ᒠᓇ, ᐊᐅᒄ ᐅᔭ ᓴᐱᑎ ᐅᑯᓴ, 3ᐱᓕᑉ, ᑭᔭ ᐸᕐᑥᓚᒥᔪ, ᑥᒥᔅ, ᑭᔭ ᒪᑎᔪᐤ, ᐊᓐ ᑲᒋ ᒪᒧᓴᒋᓇᐧᒃ ᒋᓴᐅᒋᒪᐤ ᓱᓇᔭᔪᐤ, ᑭᔭ ᒋᒥᔅ, ᐊᓪᐱᔭᔅ ᑭᔭ ᑕᑎᔭᔅ ᐅᑯᓱᐛᐛ᙮ 4ᑭᔭ ᓴᐃᒥᓐ ᑲ ᐊᔭᒥᐊᐛᑎᓯᑦ ᑲ ᐃᓯᓂᐧᑲᑕᑭᓄᐅᑦ, ᑭᔭ ᒍᑎᔅ ᐃᔅᑲᕆᔭᑦ, ᐊᐅᑯᐤ ᑲ ᐎᔭᓯᐱᔅᑎᓇᑦ ᒋᓴᓴ᙮
5ᐊᐅᑯᓐᒡ ᐅᒡ ᓂᓱᓴᑉ ᑲ ᒋᑎᓴᐅᑯᒡ ᒋᓴᓴ ᐊ ᐃᑎᑯᒡ, “ᐊᑲᐎᔾ ᐃᑐᑕᒄ ᐊᓐᑕ ᐃᔪᒡ ᐊᑲ ᒍᐤ ᐃᔪᒡ ᐃᑎᔅᑲᓇᓯᒡ ᐊ ᑕᒡ ᑭᔭ ᐊᑲᐎᔾ ᐃᑐᑕᒄ ᐊᓐᑕ ᐅᑕᓇᐛ ᓴᒪᕆᔭ ᐊᔅᒋᒡ ᑲ ᑎᒂᒋ᙮ 6ᒥᒄ ᐊᓐᑕ ᐃᑐᑕᒄ ᐃᔅᕋᐃᓪ ᐊᔅᒋᒡ ᐊᓐᑕ ᒍᐤ ᐃᔪᒡ ᐊᑕᒡ ᐛᔅ ᒧᔭᒻ ᒪᔭᑕᓂᓯᒡ ᐊ ᐅᓂᓯᓂᒡ ᐃᓯᓇᑯᓱᐅᒡ᙮ 7ᒐ ᑭᒐᔅᒋᒧᔭᒄ ᐊ ᐎᑎᒪᒄ ᓴᔅ ᐊ ᐸᓱᓇᒂᒡ ᒋᒋᒋᓯᒄ ᒋᓴᐅᒋᒪᐅᓐ᙮ 8ᒥᓏᒋᐊᐧᑯᒡ ᑲ ᐊᐧᑯᓯᒡ, ᑭᔭ ᐅᓂᔅᑲᓇᐧᑯᒡ ᐊᓐᒡ ᑲ ᓂᐱᒡ, ᒥᓏᒋᐊᐧᑯᒡ ᒐᒋ ᐸᔭᒋᓯᒡ ᐊᓐᒡ ᑲ ᒪᔭᑎᓂᔨᒡ ᐅᒥᒋᐅᓂᔪᐤ ᑲ ᐊᔭᒡ ᑭᔭ ᐎᐎᑎᓴᐛᐧᑯᒡ ᒥᒋ ᐊᒐᐧᑯᒡ᙮ ᓴᒐᔾ ᔅᒋ ᒥᔨᑯᐅᓇᐛᐤ ᐅ ᓱᐧᑲᑎᓯᐅᓐ, ᓇᒪ ᒪᒃ ᒋᐸ ᐅᒋ ᒋᓯᐧᑲᑯᐅᓇᐛᐤ ᐅ ᐊ ᐃᑐᑎᒪᒄ᙮ 9ᐊᑲᐎᔾ ᑭᔭ ᐛᐛᒡ ᓂᒥᓱᓇᔭᐛᒄ᙮ 10ᐊᑲᐎᔾ ᑕᐧᑯᓂᒥᒄ ᑭᔭ ᓂᒪᐅᑦ, ᐊᑲ ᑭᔭ ᒋᑦ ᐊᐱᒋᑕᐅᓄᐛᐛ, ᒪᒃ ᑭᔭ ᒥᔅᒋᓯᓇ ᒪᒃ ᓯᔅᑲᐅᓐ᙮ ᐛᔅ ᐊᑐᔅᒐᑦ ᐊᐛᓐ ᒋᐸ ᒥᔭᑭᓄᐤ ᑕᓐ ᐊ ᐃᓯ ᓄᑕᐱᔨᑦ᙮”
11“ᐃᔅᐱ ᒪᒃ ᐅᑎᑎᒪᒂ ᐅᑕᓇᐤ ᑭᔭ ᒪᒃ ᐃᑕᐅᓂᔅ, ᓇᓂᑐᐛᐱᒪᒄ ᐊᐛᓐ ᐊ ᒋᔅᑕᔨᑕᑯᓯᑦ ᒐᒋ ᐱᑎᑲᐃᑕᒄ᙮ ᐊᓐ ᒪᒃ ᒐ ᐃᔅᐱᔅ ᑕᔭᒄ ᐊᑯᑕ ᐊᓐᑕ ᒐ ᑕᔭᒄ ᐸᑐᔅ ᒥᓐ ᔅᑐᑕᔭᒂ᙮ 12ᐃᔅᐱ ᒪᒃ ᐊ ᐊᑎ ᐱᒐᔭᒂ ᐊᓐ ᒥᒋᐛᑉ ᒐ ᐛᒋᔭᒪᑯᒡ ᒋᔭᒪᔨᑎᒧᐅᓂᒡ ᐃᔅ ᐊ ᓱᐛᔨᒪᑯᒡ᙮ 13ᐊᓐᒡ ᒪᒃ ᐊᐛᓐᒋ ᑲ ᑕᒡ ᐊᓐᑕ ᒥᒋᐛᐱᒡ ᓇᐊᔨᒥᑕᒂᐛ, ᑕᑈ ᒋᑭ ᓱᐛᔨᒪᑭᓄᐎᒡ ᑭᔭ ᐊᑲ ᓇᐊᔨᒥᑕᒂᐛ, ᓇᒪ ᒋᑭ ᐅᒋ ᓱᐛᔨᒪᑭᓄᐎᒡ᙮ 14ᐊᑯ ᒪᒃ ᐅᑎᑎᒪᒂ ᐅᑕᓇᐤ ᑭᔭ ᒪᒃ ᒥᒋᐛᑉ ᐊᑲ ᒪᒃ ᐎ ᐱᑎᑲᐃᑯᔭᒂ ᑭᔭ ᒪᒃ ᐊᑲ ᐎ ᓂᑐᑕᑯᐅᔭᒂ, ᓂᑭᑎᒥᒄ ᐊᓐ ᐅᑕᓇᐤ ᑭᔭ ᒪᒃ ᐊᓐ ᒥᒋᐛᑉ ᐊᑯ ᒐ ᐸᐳᓯᑕᓯᒧᔭᒄ᙮ 15ᑕᑈ ᒋᑦ ᐃᑎᓇᐛᐤ, ᐃᔅᐱ ᑎᐸᔅᑯᓂᒐᐅ ᒋᓯᑲᒐ ᒋᓴᒪᓂᑐᐤ ᐅᔅᑕ ᒋᑭ ᒋᔅᑎᒪᒐᔨᒪᐤ ᐊᓂᔭ ᑲ ᒥᒐᑎᓯᔨᒋ ᐊᓐᑕ ᑲ ᑕᔨᒋ ᓱᑕᒻ ᑭᔭ ᑯᒧᕋ ᐃᔅᐱᔅ ᐊᓂᔭᔪᐛ ᐊᐛᔪᐛ ᐊᑲ ᓇᐊᔨᒥᑎᑕᑯ᙮”
ᑕᓐ ᒐ ᐃᓯ ᐊᔨᒥᐅᒡ ᐊᓐᒡ ᒐ ᒋᔅᒋᓄᐊᒧᐛᑭᓂᑐᑕᑯᒡ ᒋᓴᓴ
ᒪᕐᒃ 13.9-13; ᓗᒃ 21.12-17
16“ᓂᑐᑎᒧᒄ, ᔅᒋ ᐃᑎᓴᐅᑎᓇᐛᐤ ᒧᔭᒻ ᒪᔭᑕᓂᓯᒡ ᐊ ᐃᑎᓴᐛᑭᓄᐎᒡ ᐊᓐᑕ ᐊ ᒥᒐᑎᔨᒋ ᒥᐃᐧᑭᓇ ᐊ ᑕᔨᒋ᙮ ᐃᔭᒂ ᐃᑎᒄ ᒧᔭᒻ ᒋᓇᐱᑯᒡ ᐊ ᐃᓯ ᐃᔭᒂ ᐃᑎᒡ, ᑭᔭ ᔪᔅᐱᓯᒄ ᒧᔭᒻ ᐅᒥᒥᐅᒡ ᐊ ᐃᔅᐱᔅ ᔪᔅᐱᓯᒡ᙮ 17ᐃᔭᒂᒥᒄ ᒪᒃ, ᐛᔅ ᒋᑭ ᑕᐅᒡ ᐊᐛᓐᒋ ᒐ ᒪᑯᓂᑕᑯᒡ ᐊᑯ ᐊᓐᑕ ᑲ ᓂᑲᓂᔅᑲᒐᔨᒋ ᐊ ᑕᔨᒋ ᒐ ᐃᑐᑕᐃᑕᑯᒡ ᒐᒋ ᑎᐸᔅᑯᓂᑯᔭᒄ᙮ ᑭᔭ ᐊᑯᑕ ᒐ ᐸᐱᓯᔅᑕᐅᑕᑯᒡ ᐅᑦ ᐊᔭᒥᐊᐅᒋᐛᐳᐛᒡ᙮ 18ᒋᑭ ᐃᑐᑕᐃᑯᐅᓇᐛᐤ ᑎᐸᔨᒋᒐᓱᐅᒡ ᑭᔭ ᒋᓴᐅᒋᒪᐅᒡ ᐊᑕᒡ ᒐᒋ ᐅᑎᔅᑯᑲᐳᔅᑎᐛᑯᒡ ᓂᔾ ᐅᒡ᙮ ᒋᑭ ᓂᑐᐛᔨᑕᑯᓯᓇᐛᐤ ᑯᐃᔅᒄ ᒐᒋ ᐃᓯ ᐊᔨᒧᒥᔭᒄ ᐊᓐᑕ ᐅᑎᔅᑯᐤ ᐊᑕᒡ ᑭᔭ ᐅᑎᔅᑯᐤ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ᙮ 19ᐃᔅᐱ ᒪᒃ ᐱᑎᑲᐃᑯᔭᒂ ᐊᓐᑕ, ᐊᑲᐎᔾ ᐊᔨᒪᔨᑎᒧᒄ ᑕᓐ ᒐ ᐃᔅᒋᔄᔭᒄ, ᐛᔅ ᐃᔅᐱ ᐅᑎᒋᐱᔨᒐ ᐊᓐ ᒐ ᐃᑐᑕᑯᔭᒄ ᒋᑭ ᒥᔨᑯᓇᐛᐤ ᑕᓐ ᒐ ᐃᔅᒋᔄᔭᒄ᙮ 20ᐛᔅ ᐊᓐ ᒐ ᐃᔅᒋᔄᔭᒄ, ᓇᒪᔭᐤ ᒋᔨᐛᐤ ᐊᓐ ᒋᑦ ᐃᔨᒧᐅᓄᐛᐤ ᒥᒄ ᒪᒃ ᐊᓐ ᒐ ᐃᔅᒋᔄᔭᒄ ᐊᒐᐧᒄ ᒍᑕᐎᓄᐤ ᐊ ᑕᑦ ᑲ ᐅᒋᑦ ᐊᐅᒄ ᐊᓐ ᒐ ᒥᔨᑕᒄ ᑕᓐ ᐊᓐ ᒐ ᐃᔅᒋᔄᐛᒄ᙮”
21“ᐎᐧᑲᓂᓯᒪᐅᒡ ᒋᑭ ᐱᔅᑎᓇᐅᒡ ᐎᐧᑲᓂᓱᐛᐛ ᒐᒋ ᓂᐸᐊᑭᓄᔨᒋ ᑭᔭ ᐅᑕᐎᒪᐅᒡ ᐊᐅᑯᓐ ᒐ ᐃᑐᑐᐛᒡ ᐅᑦ ᐊᐛᓯᒧᐛᐛ, ᑭᔭ ᐊᐛᓯᒡ ᒋᑭ ᐃᑐᑐᐛᐅᒡ ᐅᓂᒋᐃᑯᐛᐛ ᒐᒋ ᓂᐸᐊᑭᓄᔨᒋ᙮ 22ᒥᓯᐛ ᐊᐛᓐᒋ ᒋᑭ ᐛᐧᑲᑎᑯᐛᐅᒡ ᐊ ᓇᓴᐅᐎᔭᒄ᙮ ᐊᓐ ᒪᒃ ᐊᐛᓐ ᐊᑲ ᓴᐧᑯᒋᐊᑭᓄᐅᑦ ᐊ ᐸᒋ ᓇᓴᐅᑦ ᐊᐅᒄ ᐊᓐ ᒐ ᐱᒪᒋᐊᑭᓄᐅᑦ᙮ 23ᓂᓇᐧᑲᒋᐃᑯᔭᒂ ᐸᐃᒄ ᐅᑕᓇᐤ, ᒋᑎᓯᒧᒄ ᐊᑯ ᐊᓐᑕ ᑯᑎᒃ ᐅᑕᓇᐤ ᒐ ᐃᑐᑕᔭᒄ᙮ ᑕᑈ ᒋᑦ ᐃᑎᓇᐛᐤ, ᓇᒪ ᐊᔅᒄ ᒥᓯᐛ ᒋᑭ ᐅᒋ ᐃᓯ ᐛᐎᑕᓇᐛᐤ ᒥᔽᒋᒧᐅᓐ ᐊᓐᑕ ᐅᑕᓇᐛ ᐃᔅᕋᐃᓕᒡ ᑲ ᑎᒂᒋ, ᓴᔅ ᒐ ᑎᑯᓯᐧᒃ ᐃᔪᐤ ᐅᑯᓯᓴᓐ᙮”
Matthew 10.24-39 (Proper-7 Year A)
24“ᑲ ᒋᔅᑯᑎᒧᐛᑭᓄᐅᑦ ᓇᒪ ᐅᔅᑕ ᒋᔅᑕᔨᑕᑯᓱᐤ ᐊ ᐃᑕᔨᑕᑯᓯᔨᒋ ᐊᓂᔭ ᑲ ᒋᔅᑯᑎᒪᑯᑦ᙮ ᑭᔭ ᐊᐱᒋᐊᑭᓐ ᓇᒪ ᐎ ᐅᔅᑕ ᐃᑕᔨᑕᑯᓱᐤ ᐊ ᐃᑕᔨᑕᑯᓯᔨᒋ ᐅᒋᒪᒪ᙮ 25ᒋᐸ ᒥᔽᔨᑎᒻ ᒪᒃ ᐊᓐ ᑲ ᒋᔅᑯᑎᒧᐛᑭᓄᐅᑦ, ᐃᑕᔨᑕᑯᓯᑦ ᐊ ᐃᑕᔨᑕᑯᓯᔨᒋ ᐊᓂᔭ ᑲ ᒋᔅᑯᑎᒪᑯᑦ, ᑭᔭ ᐊᓐ ᐊᐱᒋᐊᑭᓐ ᐃᑕᔨᑕᑯᓯᑦ ᐊ ᐃᑕᔨᑕᑯᓯᔨᒋ ᐅᒋᒪᒪ᙮ ᓂᔾ ᒪᒃ ᐊᑎ ᐊ ᐅᒋᒪᐎᔭᓐ ᒋᔅᒋᒄ ᒪ ᑕᓐ ᑲ ᐃᓯ ᒪᔭᔨᒥᒡ ᐊᒋ ᐃᔅᒋᔄᒡ ᐊᓐ ᒥᒋ ᐊᒐᐧᒄ ᐅᒋᒪᐤ ᐸᐃᓪᓯᐳᓪ ᐊ ᐊᐎᔭᓐ᙮ ᒋᔨᐛᐤ ᒪᒃ ᐊᑐᐎᔅ ᒋᑭ ᒪᔭᔨᒥᑯᐛᐅᒡ᙮”
ᐊᐛᓐ ᐊᓐ ᒋᐸ ᑯᔅᑕᑭᓄᐤ
ᓗᒃ 12.2-7
26“ᒥᒄ ᒪᒃ ᐊᑲᐎᔾ ᑯᔅᑕᐧᑯᒡ ᐊᐛᓐᒋ᙮ ᐛᔅ ᐊᓐ ᒐᒂᓐ ᐊᑲ ᓄᒂᒡ ᒋᑭ ᓄᑯᑕᑭᓄᐤ ᐊᓐᑕ ᐊ ᐛᔅᑕᒡ᙮ ᒥᓯᐛ ᒐᒂᓐ ᒋᒧᑦ ᑲ ᐃᑐᑕᑭᓄᐅᒡ ᒋᑭ ᒋᔅᒐᔨᑕᑯᓐ᙮ 27ᐊᓐ ᑕᓐ ᐊ ᐃᓯ ᐎᑎᒪᑎᑯᒡ ᐊ ᑎᐱᔅᑲᒡ ᐎᑎᒧᒄ ᒪᒂᒡ ᐊ ᒋᓯᑲᒡ᙮ ᑭᔭ ᐊᓐ ᑕᓐ ᑲ ᐃᓯ ᒋᒧᑦ ᐎᑎᒪᑯᐅᔭᒄ ᐎᑎᒧᐛᐧᑯᒡ ᒥᓯᐛ ᐊᐛᓐᒋ ᒐᒋ ᒋᔅᒐᔨᑕᒡ᙮ 28ᐊᑲᐎᔾ ᑯᔅᑕᐧᑯᒡ ᐊᐛᓐᒋ ᑲ ᓂᐸᐊᒡ ᐊᐛᔪᐛ᙮ ᒋᑭ ᒋ ᓂᐸᐊᐅᒡ ᐊᐛᔪᐛ ᑭᔭ ᒋᑭ ᒋ ᓂᓱᐅᓇᒋᑕᐅᒡ ᒥᔭᔪᐤ ᒥᒄ ᒪᒃ ᓇᒪ ᒋᑭ ᒋ ᓂᓱᐅᓇᒋᐊᐅᒡ ᐊᒐᒂ᙮ ᒋᓴᒪᓂᑐᐤ ᒪᒃ ᐊᐅᒄ ᑯᔅᐱᓂᔅᑐᐛᐧᒄ ᐊᓐ ᒐᒋ ᓂᓱᐅᓇᒋᑕᑦ ᒥᔭᔪᐤ ᑭᔭ ᐊᒐᒂ ᒐᒋ ᔭᔪᐅᑕᑦ ᒥᒋ ᐃᔅᑯᑕᒡ᙮ 29ᒥᒄ ᐊ ᐸᐃᒄ ᓱᓇᔭᐱᔅᒄ ᐃᔅᐱᑕᔨᑕᑯᓱᐅᒡ ᓂᓱ ᐱᔭᓯᓯᒡ ? ᓇᒪ ᒪᒃ ᐛᐛᒡ ᐸᐃᒄ ᒋᑭ ᐅᒋ ᐸᒋᓯᓄᐅᒡ ᒧᔅᑎᔅᑭᒥᒡ ᒐ ᐊᑲ ᒋᔅᒐᔨᑕᐧᒃ ᒍᑕᐎᐛᐤ᙮ 30ᑭᔭ ᒋᔨᐛᐤ ᒪᒃ ᐛᐛᒡ ᒋᐱᔎᐅᓄᐛᐛ ᒥᓯᐛ ᒋ ᐊᒋᑕᑭᓄᐛ ᐊ ᑕᑥᐸᑲᒋ᙮ 31ᐊᑲᐎᔾ ᒪᒃ ᑯᔅᑕᒋᒄ ᐛᔅ ᒋᔨᐛᐤ ᐅᔅᑕ ᒋᑦ ᐃᑕᔨᒥᑯᐛᐤ ᒋᓴᒪᓂᑐᐤ ᐃᔅᐱᔅ ᒥᒐᑦ ᐱᔭᓯᓴ ᐊ ᐃᑕᔨᒪᑦ᙮”
ᐊ ᐛᐎᑎᒥᒄ ᐊ ᒋᔅᒐᔨᒪᒄ ᒋᓴᔅ ᙭
ᓗᒃ 12.8,9
32“ᐊᐛᓐ ᐎᑎᒧᐛᒐ ᑯᑎᑲ ᐊᐛᔪᐛ ᐊ ᑕᑈᔭᔨᒥᑦ, ᑭᔭ ᓂᔾ ᓂᑭ ᐎᑎᒧᒪᐛ ᓄᑕᐎᔭ ᒋᒋᒋᓯᑯᒡ ᐊ ᑕᔨᒋ ᐊ ᒋᔅᒐᔨᒥᒃ᙮ 33ᐊᑯ ᒪᒃ ᐊᐛᓐ ᐊ ᐃᑕᑦ ᐊᐛᔪᐛ ᐊᑲ ᑕᑈᔭᔨᒥᑦ ᓂᑭ ᐃᑕᐤ ᑭᔭ ᓂᔾ ᓄᑕᐎᔾ ᒋᒋᒋᓯᑯᒡ ᐊ ᑕᑦ, ᓇᒪ ᓂ ᒋᔅᒐᔨᒪᐤ᙮”
ᒋᓴᔅ ᓇᒪ ᐅᒋ ᑎᑯᓯᓄᐤ ᒧᔅ ᒐᒋ ᒥᔪᐱᔨᓇᓄᐎᒡ
ᓗᒃ 12.51-53; 14.26,27
34“ᐊᑲᐎᔾ ᐃᑕᔨᑎᒧᒄ ᐊᒋ ᑎᑯᓯᓂᔭᓐ ᐅᑕ ᐊᔅᒋᒡ ᒐᒋ ᐸᑕᔭᓐ ᒋᔭᒪᔨᑎᒧᐅᓐ᙮ ᓇᒪ ᓂ ᐅᒋ ᑎᑯᓯᓐ ᒐᒋ ᐸᑕᔭᓐ ᒋᔭᒪᔨᑎᒧᐅᓐ, ᓂᒋ ᑎᑯᓯᓐ ᒐ ᐊᑲ ᒋ ᓇᐊᔨᒥᑐᓇᓄᐅᒡ᙮
35ᓂᒋ ᑎᑯᓯᓐ,
ᒐ ᐊᑲ ᒋ ᓇᐊᔨᒪᑦ ᐃᔪᐤ ᐅᑕᐎᔭ, ᑭᔭ ᐅᑲᐎᒪᐤ ᒐ ᐊᑲ ᒋ ᓇᐊᔨᒥᑯᑦ ᐅᑕᓂᓴ,
ᑭᔭ ᐃᔎᐤ ᒐ ᐊᑲ ᒋ ᓇᐊᔨᒥᑯᑦ ᐅᓇᐊᑭᓂᔎᒪ᙮
36ᐊᐅᒄ ᐊᓂᔭ ᒪᐅᒡ ᒐ ᐅᐧᑲᑎᑯᑦ ᐊᐛᓐ ᐊᓂᔭ ᓇᓂᑎᒻ ᐊᐛᔪᐛ ᑲ ᐎᒋᒥᑯᑦ᙮”
37“ᐊᐛᓐ ᐅᔅᑕ ᐅᑕᐎᔭ ᑭᔭ ᒪᒃ ᐅᑲᐎᔭ ᓴᒋᐊᒐ ᐃᔅᐱᔅ ᓂᔾ, ᓇᒪ ᑕᐱᒐᔨᑕᑯᓱᐤ ᒐᒋ ᐸᒋ ᓇᓴᐅᑦ᙮ ᑭᔭ ᐊᐛᓐ ᐅᔅᑕ ᓴᒋᐊᒐ ᐅᑯᓴ ᑭᔭ ᒪᒃ ᐅᑕᓂᓴ ᐃᔅᐱᔅ ᓂᔾ, ᓇᒪ ᑕᐱᒐᔨᑕᑯᓱᐤ ᒐᒋ ᐸᒋ ᓇᓴᐅᑦ᙮ 38ᐊᓐ ᐊᐛᓐ ᐊᑲ ᐎ ᐱᒧᑕᐊᑦ ᐅᒋᐱᔭᑎᑯᒪ ᓇᒪ ᑕᐱᒐᔨᑕᑯᓱᐤ ᒐᒋ ᐅᒋᔅᒋᓄᐊᒧᐛᑭᓂᔭᓐ᙮ 39ᐊᓐ ᐊᐛᓐ ᑲ ᐎ ᑭᓄᐛᔨᑕᐧᒃ ᐅᐱᒪᑎᓯᐅᓐ ᒥᒄ ᐎᔾ ᐊ ᐎ ᓂᓇᐊᔨᑎᒥᐃᓱᑦ ᒋᑭ ᐅᓂᑕᐤ ᑭᔭ ᐊᓐ ᐊᐛᓐ ᑲ ᐅᓂᑕᑦ ᐅᐱᒪᑎᓯᐅᓐ ᓂᔾ ᐅᒋ ᒋᑭ ᒥᔅᑭᒻ᙮”
ᐊᓐ ᐊᐛᓐ ᑲ ᒥᔪᐧᑯᐛᑦ ᒋᓴᒪᓂᑐᐛ ᐅᑦ ᐊᐱᒋᐊᑭᓂᔪᐛ ᒋᑭ ᒥᔅᑭᒻ ᐅᑎᐸᐊᒪᑯᓯᐅᓐ
ᒪᕐᒃ 9.41
Matthew 10.40-42 (Proper-8 Year A)
40“ᐊᐛᓐ ᐊ ᐱᑎᑲᐃᑕᒄ ᓂᔾ ᑭᔭ ᓂᐱᑎᑲᐃᒄ, ᐊ ᐱᑎᑲᐃᑦ ᒪᒃ ᐅᑎᓇᐤ ᐊᓂᔭ ᐊᐛᔪᐛ ᑲ ᐸᒋ ᐃᑎᓴᐅᔨᒋ᙮ 41ᐊᓐ ᒪᒃ ᐊᐛᓐ ᑲ ᐱᑎᑲᐊᑦ ᐅᒋᔅᒋᐛᐃᒐᓱᐛ ᐊᓂᔭ ᐅᒋ ᐊ ᐅᒋᔅᒋᐛᐃᒐᓱᔨᒋ, ᐊᓂᔭ ᒐ ᐃᓯ ᑎᐸᐊᒧᐛᑭᓄᔨᒋ ᐅᔭ ᐅᒋᔅᒋᐛᐃᒐᓱᐛ ᐊᐅᑯᓐ ᑭᔭ ᐎᔾ ᒧᔭᒻ ᒐ ᐃᓯ ᑎᐸᐊᒧᐛᑭᓄᐅᑦ᙮ ᑭᔭ ᐊᐛᓐ ᑲ ᐱᑎᑲᐊᑦ ᐊ ᑯᐃᔅᑯᑕᑎᓯᔨᒋ ᐃᔪᐛ, ᐊᓂᔭ ᐅᒋ ᐊ ᑯᐃᔅᑯᑕᑎᓯᔨᒋ, ᐊᓂᔭ ᐊ ᐃᓯ ᑎᐸᐊᒧᐛᑭᓄᔨᒋ ᐊᐅᑯᓐ ᒧᔭᒻ ᑭᔭ ᐎᔾ ᒐ ᐃᓯ ᑎᐸᐊᒧᐛᑭᓄᐅᑦ᙮ 42ᑕᑈ ᒋᑦ ᐃᑎᓇᐛᐤ, ᐊᑎ ᒥᒄ ᒥᓇᐊᒐ ᐊᐛᓐ ᐊ ᑕᒋᑭᒥᔨᒡ ᓂᐱᔪᐤ ᐅᔭ ᐸᐃᒄ ᐊᐛᓴ ᐊᓂᔭ ᐅᒋ ᐊ ᐸᒋ ᓇᓴᐅᔨᒋ, ᑕᑈ ᒋᑦ ᐃᑎᓇᐛᐤ ᒐᔅᑎᓇᔅ ᒋᑭ ᒥᔅᑭᒻ ᐅᑎᐸᐊᒪᑯᓯᐅᓐ᙮”
Currently Selected:
ᒪᑎᔪᐤ 10: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
