ᓗᒃ 17
17
ᒋᓴᔅ ᑲ ᐃᔭᔨᒺᐛᐃᑯᑦ ᐅᓂᑐᑎᒧᐅᓂᔪᐤ
ᒪᑎᔪᐤ 18.6,7,21,22; ᒪᕐᒃ 9.42
1ᒋᓴᔅ ᒋ ᐃᑕᐤ ᐅᒋᔅᒋᓄᐊᒧᐛᑭᓇ, “ᒧᔅ ᑕᑈ ᒋᑭ ᑎᑯᓂᔪᐤ ᒐᒂᔪᐤ ᒐ ᐃᑐᑕᑯᒡ ᐃᔪᒡ ᒐᒋ ᒥᒋᑐᑕᒡ᙮ ᒥᒄ ᒪᒃ ᒋᑭ ᒋ ᒥᒋᐱᔪᒡ ᐊᓐᒡ ᑲ ᐃᑐᑐᐛᒡ ᐊᐛᔪᐛ ᒐᒋ ᒥᒋᑐᑎᒥᔨᒋ᙮ 2ᐃᐛᒃ ᒋᐸ ᒥᔽᔪᐤ ᐊᓐ ᐊᐛᓐ ᒐᒋ ᐳᓂᓯᓇᐸᑕᑭᓄᐅᑦ ᐊᓐᑕ ᐎᓂᐸᑯᒡ, ᑲ ᐃᑐᑐᐛᒂ ᒐᒋ ᒥᒋᑐᑎᒥᔨᒡ ᐊᐛᔪᐛ ᒧᔭᒻ ᐊᓂᔭ ᐊᑲ ᓇᔅᒡ ᑲ ᓱᒋᑲᐳᔨᒋ ᑕᑈᑎᒧᐅᓂᒡ, ᒥᒄ ᒪᒃ ᐊᔅᒄ ᐊᑐᐎᔅ ᒋᑭ ᒋ ᒥᒋᐱᔪᐤ ᑕᓐ ᒐ ᐃᓯ ᐛᐛᓯᐊᑭᓄᐅᑦ᙮ 3ᐃᔭᒂᒥᒄ ᒐ ᐊᑲ ᒋ ᐃᑐᑐᐛᒄ ᐊᐛᓐ ᒐᒋ ᒥᒋᑐᑕᐧᒃ᙮”
“ᒋᐧᑲᓂᔅ ᐅᓂᑐᑕᔅᒐ ᐎᑎᒧᐤ ᑕᓐ ᐊ ᐃᓯ ᐅᓂᑐᑕᔅᒃ᙮ ᒥᑕᒋᔨᐛᓯᒐ ᒪᒃ, ᒐ ᐛᐸᔨᑎᒧᑦ᙮ 4ᒧᔭᒻ ᒪᒃ ᓂᔄᐅᑕᒡ ᑕᑥᐤ ᒥᒋᑐᑕᔅᒐ ᐸᐃᒄ ᒋᓯᑲᐛ, ᑭᔭ ᑕᑥᐤ ᐸᒋ ᓂᑐᐛᐱᒥᔅᒐ ᐊ ᐃᑎᔅᒃ, ‘ᓂ ᒥᑕᒋᔨᐛᓯᓐ ᑕᓐ ᑲ ᐃᓯ ᒥᒋᑐᑕᑕᓐ,’ ᐃᔭᐱᒡ ᐛᐸᔨᑎᒧᐤ᙮”
ᒋᓴᔅ ᑲ ᐊᔨᒧᑎᒧᐛᑦ ᐅᒋᔅᒋᓄᐊᒧᐛᑭᓇ ᐅᑕᑈᑎᒧᐅᓂᔪᐤ
Luke 17.5-10 (Proper-22 Year C)
5ᒋᓴᔅ ᐅᑦ ᐊᑈᔅᑕᓂᒪ ᒋ ᐃᑎᑯᐤ, “ᐅᑎᐸᔨᒋᒐᐤ, ᑐᑕ ᒪ ᓂᑕᑈᑎᒧᐅᓇᓇ ᐊᑐᐎᔅ ᒐᒋ ᓱᒐᔨᑕᒂᒋ᙮”
6ᐊᑯ ᐅᑎᐸᔨᒋᒐᐤ ᒂ ᐃᑕᑦ, “ᐊᑎ ᓇᔅᒡ ᐊᐱᓴᓯᒐ ᒋᑕᑈᑎᒧᐅᓄᐛᐛ ᒧᔭᒻ ᓇᔅᒡ ᐊ ᐃᔅᐱᔅ ᐊᐱᓯᓯᑦ ᓂᑕᐅᒋᑕᑭᓐ ᒪᔅᑎᕐᑦ ᑲ ᐃᓯᓂᐧᑲᓱᑦ ᑲ ᐃᔅᐱᑎᑦ ᐃᔅᐱᓴᒐ, ᒥᔅᑎᒄ ᒋᑭ ᒋ ᐃᑕᐤ, ‘ᐱᐧᑯᒋᐱᑎᓂᑎᓱᐤ ᐊᓐᑕ ᑲ ᓂᑕᐅᒋᔨᓐ ᐊᑯ ᐊᓐᑕ ᒐ ᐃᓯ ᐛᐱᓂᓱᔨᓐ ᐎᓂᐸᑯᒡ,’ ᒋᑭ ᑕᑈᑕᒄ᙮”
7ᒋᓴᔅ ᒥᓐ ᒂ ᐊᑎ ᐃᔅᒋᔄᑦ, “ᒧᔭᒻ ᐊᓐ ᐊᓐᑕ ᐊᑐᔅᒐᔭᑭᓐ ᐊ ᓂᑕᐅᒋᑕᑦ ᒐᒂᔪᐤ ᒪᒃ ᒪᔭᑕᓂᓴ ᓂᓇᑭᑐᐛᔨᒪᑦ, ᐃᔅᐱ ᒪᒃ ᒋ ᒋᐛᒐ ᐊᒋ ᐃᓯ ᐊᑐᔅᒐᑦ ᒋᑭ ᐃᑎᑯᐤ ᐊ ᐅᒋᒪᒪ, ‘ᐊᔅᑎᒻ, ᐸᒋ ᐱᒐ, ᐸᒋ ᒥᒋᓱᐤ’ ? 8ᓇᒪ, ᒋᑭ ᐃᑎᑯᐤ, ‘ᐸᒋ ᐎᔅᑐᐎ ᑭᔭ ᒋ ᐃᓯ ᒥᒋᓱᔭᓇ, ᐊᑯ ᒋᔾ ᒐ ᒥᒋᓱᔨᓐ᙮’ 9ᓇᒪ ᐊ ᒋᑭ ᐅᒋ ᓂᓇᔅᑯᒪᐤ ᐊᓂᔭ ᐅᑦ ᐊᐱᒋᐊᑭᓇ ᐊᒋ ᐃᑐᑎᒥᔨᒋ ᑕᓐ ᐊᓂᔭ ᑲ ᐎ ᐃᑕᐱᒋᐊᑦ ?”
10“ᒋᔨᐛᐤ ᒪᒃ ᐃᔅᐱ ᑲ ᒋᔅᑕᔭᒄ ᒥᓯᐛ ᒐᒂᓐ ᑲ ᐃᑎᓱᒥᑯᐅᔭᒄ ᒐᒋ ᐃᑐᑎᒪᒄ, ᒋᐸ ᐃᔅᒋᔄᓇᐛᐤ, ‘ᐛᔅ ᒥᒄ ᐊᐱᒋᐊᑭᓐᒡ ᓂᔭᓐ᙮ ᓂᒋ ᐃᑐᑕᓇᓐ ᑕᓐ ᐊᓐ ᑲ ᐃᑎᓱᒥᑯᐅᔭᒡ ᒐᒋ ᐃᑐᑎᒪᒡ᙮’ ”
ᒋᓴᔅ ᒂ ᓂᒋᔅᑯᐛᑦ ᐸᐃᑯᔪᐤ ᓇᐸᐛ ᐊ ᐅᒥᒋᔨᒋ
Luke 17.11-19 (Proper-23 Year C)
11ᒪᒂᒡ ᒋᓴᔅ ᑲ ᐃᑐᑕᑦ ᐊᓐᑕ ᒋᕈᓯᓕᒥᒡ ᒋ ᐱᒧᑕᐤ ᐊᓐᑕ ᐊ ᐅᒋ ᑕᒋᔅᑲᑐᒥᑲᓂᔨᒋ ᓴᒪᕆᔭ ᐊᔅᒋᔪᐤ ᑭᔭ ᑲᓕᓕ ᐊᔅᒋᔪᐤ᙮ 12ᒧᔭᒻ ᒪᒃ ᐊ ᐊᑎ ᐅᑎᑕᐧᒃ ᐅᑕᓇᔪᐤ ᐸᐃᑯᔪᐤ ᓇᐸᐛ ᒋ ᓂᒋᐃᑯᐤ ᓇᔅᒡ ᐊ ᒪᔭᑎᓂᔨᒡ ᐅᒥᒋᐛᔅᐱᓇᐅᓂᔪᐤ ᐊ ᐊᔭᔨᒋ᙮ 13ᐊᑲ ᒪᒃ ᐅᒋ ᐸᓱᒋᑲᐳᔅᑕᑯᑦ᙮ ᐊᑯ ᒂ ᑕᑈᑕᒡ ᒋᓴᓴ ᐊ ᐃᔅᒋᔄᒡ, “ᒋᔅᑯᑎᒪᒐᓱᐤ, ᐸᒋ ᒋᔅᑎᒪᒐᔨᒥᓇᓐ ᐅ ᐊ ᐃᓯᓇᑯᓯᔭᒡ᙮” 14ᒋᓴᔅ ᒪᒃ ᐃᔅᐱ ᐎᔭᐱᒪᑦ ᒋ ᐃᑕᐤ, “ᒪᒋᒄ, ᓂᑐᐛᐱᒪᐧᒄ ᐊᔭᒥᐊᐅᒋᒪᐤ, ᒐᒋ ᒋᔅᒐᔨᒥᑕᒄ ᑕᑈ ᐊ ᒥᓏᑎᓯᔭᒄ᙮” ᒪᒂᒡ ᒪᒃ ᐊ ᐃᔅᐱᓯᐱᔨᒡ ᐊ ᓂᑐᐛᐱᒪᒡ ᐊᔭᒥᐊᐅᒋᒪᐛ, ᒋ ᒥᓏᑎᓯᐅᒡ᙮
15ᐃᔅᐱ ᒪᒃ ᐊᓐ ᐸᐃᒄ ᓇᐸᐤ ᒐᔅᒐᔨᑕᐧᒃ ᐊᒋ ᒥᓏᒋᐊᑭᓄᐅᑦ, ᒋ ᒋᐛᐤ ᒂ ᓂᑐᐛᐱᒪᑦ ᒋᓴᓴ, ᐊ ᒋᔄᐛᑦ ᐊ ᒪᒥᒋᒪᑦ ᒋᓴᒪᓂᑐᐛ᙮ 16ᐃᔅᐱ ᒪᒃ ᑕᑯᓯᐧᒃ ᒋ ᐅᒋᒋᐧᑯᓂᐱᔪᐤ ᐅᑎᔅᑯᐤ ᒋᓴᓴ ᐊ ᑕᔨᒋ ᐊ ᓂᓇᔅᑯᒪᑦ᙮ ᐅ ᒪᒃ ᓇᐸᐤ ᓴᒪᕆᔭ ᐊᔅᒋᒡ ᒋ ᐅᒋᐤ᙮
17ᒋᓴᔅ ᒪᒃ ᒋ ᐃᑕᐤ, “ᒋ ᐸᐃᑯᔪᐛᓱᒡ ᐊᓐᒡ ᑲ ᒥᓏᒋᐊᑭᓄᐎᒡ ? ᑕᓐᑕ ᐊᓂᔭᐧᑲ ᐸᐃᑯᔅᑕᐤ ? 18ᒥᒄ ᐅ ᐸᐃᒄ ᓇᐸᐤ ᐊᑲ ᒍᐤ ᐃᑎᔅᑲᓇᓯᑦ ᐊ ᐸᒋ ᓂᓇᔅᑯᒪᑦ ᒋᓴᒪᓂᑐᐛ ?” 19ᐊᑯ ᒋᓴᔅ ᒂ ᐃᑕᑦ ᐊᓂᔭ ᓇᐸᐛ, “ᐱᓯᑯ, ᑭᔭ ᒐ ᒋᐛᔨᓐ, ᐛᔅ ᒋᑕᑈᑎᒧᐅᓐ ᒋ ᒥᓏᒋᐃᑯᓐ᙮”
ᒋᓴᔅ ᑲ ᐊᔨᒧᑕᐧᒃ ᒐ ᐅᑎᒋᐱᔨᒡ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ
ᒪᑎᔪᐤ 24.23-28,37-41
20ᐸᐃᒂᐤ ᐸᕆᓯᔨᒡ ᒋ ᑯᒂᒋᒪᐅᒡ ᒋᓴᓴ ᐊ ᐃᑕᒡ, “ᑕᐃᔅᐱ ᒐ ᓄᑯᓂᔨᒡ ᒋᓴᒪᓂᑐᐤ ᐅᒋᓴᐅᒋᒪᐅᓐ ?” ᐊᑯ ᒋᓴᔅ ᐊᑕᑦ, “ᒋᓴᒪᓂᑐᐤ ᐅᒋᓴᐅᒋᒪᐅᓐ ᓇᒪ ᒧᓴ ᓄᑯᓂᔪᐤ᙮ 21ᓇᒪ ᐊᐛᓐ ᒋᑭ ᒋ ᐃᔅᒋᔄᐤ, ᐸᒋ ᑭᓄᐛᐸᑕ ᒪ᙮ ᒪᐅᑕ ᒋᓴᒪᓂᑐᐤ ᐅᒋᓴᐅᒋᒪᐅᓐ ᐊ ᑎᑯᓂᔨᒡ᙮ ᐛᔅ ᒋᓴᒪᓂᑐᐤ ᐅᒋᓴᐅᒋᒪᐅᓐ ᓴᔅ ᑎᑯᓂᔪᐤ ᐅᑕ ᒪᒂᒡ ᐊ ᑕᔭᒄ᙮”
22ᐊᑯ ᒪᒃ ᒂ ᐃᑕᑦ ᐅᒋᔅᒋᓄᐊᒧᐛᑭᓇ, “ᐊᔅᒄ ᐊᓐᑕ ᓂᔅᑕᒥᒡ ᒋᑭ ᐅᑎᒋᐱᔪᐤ ᓇᔅᒡ ᒐ ᐃᑕᔨᑎᒥᐃᑯᔭᒄ ᒥᓐ ᑲᐤ ᒐᒋ ᐛᐱᒪᒄ ᐃᔪᐤ ᐅᑯᓯᓴᓐ, ᓇᒪ ᒪᒃ ᒋᑭ ᒋ ᐛᐱᒪᐛᐤ ᐊᓐᑕ ᐊᓐ ᒪᒂᒡ ᐎ ᐛᐱᒪᒂ᙮ 23ᒋᑭ ᑕᐅᒡ ᒪᒃ ᐊᐛᓐᒋ ᒐ ᐃᑎᑕᑯᒡ, ‘ᒪᐅᑦ ᐊ ᑕᑦ ᐃᔪᐤ ᐅᑯᓯᓴᓐ,’ ᒪᒃ, ‘ᒪ ᓇᑕ ᐊ ᑕᑦ ᐃᔪᐤ ᐅᑯᓯᓴᓐ᙮’ ᒥᒄ ᒪᒃ ᐊᑲᐎᔾ ᒋᑭ ᐅᒋ ᓇᓂᑐᐛᐱᒥᓇᐛᐤ ᐊᓐᑕ᙮ 24ᐛᔅ ᐃᔪᐤ ᐅᑯᓯᓴᓐ ᐊᓐ ᒋᓯᑲᒐ ᑲᐤ ᒐ ᑎᑯᓯᓂᔨᒋ ᑕᐱᔅᑯᓐ ᐊ ᐛᔅᑕᐱᔨᒡ ᑲᒋ ᐃᓯᓇᒂᒡ ᒥᓯᐛ ᑲᒋ ᐛᔅᑐᐛᒡ ᒋᓯᒄ, ᐊᐅᑯᓐ ᒧᔭᒻ ᒐ ᐃᓯᓇᒂᒡ᙮ 25ᒥᒄ ᒪᒃ ᐊᔅᒄ ᐊᑲ ᐅᑎᒋᐱᔨᒐ ᐅ ᐊᓐᒡ ᐊᐛᓐᒋ ᒪᒂᒡ ᐊᓄᒡ ᑲ ᐱᒪᑎᓯᒡ ᓇᔅᒡ ᓂᑭ ᐎᓯᒐᔨᑎᒥᐃᑯᒡ ᑭᔭ ᓂᑭ ᐊᑐᐛᔨᒥᑯᒡ᙮”
26“ᒧᔭᒻ ᒪᒃ ᑕᓐ ᑲ ᐃᑕᔨᑕᑯᓂᔨᒡ ᐊᓐᑕ ᒪᒂᒡ ᑲ ᐱᒪᑎᓯᑦ ᐊᓂᔭᐧᑲ ᓄᐛ, ᐊᐅᑯᓐ ᒐ ᐃᑕᔨᑕᒂᒡ ᒥᓐ ᑎᑯᓯᒐ ᐃᔪᐤ ᐅᑯᓯᓴᓐ᙮ 27ᒥᒄ ᐛ ᐃᑎᒡ ᒋ ᐃᑐᐅᒡ ᐊᓂᔭᐧᑲ ᐃᔪᒡ, ᒋ ᒥᒋᓱᐅᒡ, ᒋ ᒥᓂᐅᒡ, ᒋ ᓂᐳᐎᒡ ᐱᐃᒻ ᑲ ᐅᑎᒋᐱᔨᒡ ᒐ ᐱᒐᑦ ᓄᐛ ᐅᑦ ᐅᐤᑦ᙮ ᐊᑯ ᑲ ᐃᔅᒋᐳᑕᒡ ᐊᔅᒋᔾ, ᒥᓯᐛ ᒂ ᓂᓱᐅᓇᑎᓯᒡ ᐊ ᑎᓯᒡ ᐊᓐᒡ ᐃᔪᒡ᙮”
28“ᐊᐅᑯᓐ ᒪᒃ ᑕᐱᔅᑯᓐ ᑲ ᐃᑕᔨᑕᑯᓂᔨᒡ ᑭᔭ ᐊᔅᒄ ᐊᓂᔭ ᓗᑦ ᐊᒋ ᐱᒪᑎᓯᑦ᙮ ᒥᓯᐛ ᐊᐛᓐᒋ ᒥᒄ ᐛ ᐃᑎᒡ ᒋ ᐃᑐᐅᒡ᙮ ᐊ ᒥᒋᓱᒡ, ᐊ ᒥᓂᒡ, ᐊ ᐅᑎᓐᒐᒡ, ᐊ ᐊᑕᐛᒡ, ᐊ ᓂᑕᐅᒋᑕᒡ, ᐊᔪᐤ ᐊ ᒪᓂᒐᒡ᙮ 29ᐊᓂᔭᔪᐤ ᐊ ᒋᓯᑲᔨᒡ ᒐ ᓂᑭᑕᐧᒃ ᓗᑦ ᐊᓂᔭᔪᐤ ᐅᑕᓇᔪᐤ ᓱᑕᒻ ᑲ ᐃᓯᓂᐧᑲᑕᔨᒡ, ᒋ ᒋᒧᓂᐸᒋᑎᓐ ᐃᔅᑯᑕᐤ ᑭᔭ ᐊ ᐃᔅᑯᑕᐅᒡ ᐊᓯᓂᔨᒡ ᒋ ᐸᐸᒋᓯᓄᒡ᙮ ᐊᑯ ᒪᒃ ᒥᓯᐛ ᐊᐛᓐᒋ ᐊᓐᑕ ᐊᓂᔭ ᐅᑕᓇᔪᐤ ᑲ ᑕᒡ ᒋ ᓂᓱᐅᓇᒋᐃᑯᐅᒡ ᐅᔭᔪᐤ ᑲ ᐃᔅᐱᔨᒡ᙮”
30ᐊᑯ ᒋᓴᔅ ᒂ ᐃᔅᒋᔄᑦ, “ᐊᐅᑯᓐ ᒧᔭᒻ ᒐ ᐃᑕᑎᓯᓇᓄᐅᒡ ᐊᓐ ᐊ ᒋᓯᑲᒡ ᐸᒋ ᓄᑯᓯᒐ ᐃᔪᐤ ᐅᑯᓯᓴᓐ᙮”
31“ᐅ ᒪᒃ ᐊ ᒋᓯᑲᒡ ᐅᑎᒋᐱᔨᒐ ᐊᓐ ᐊᐛᓐ ᐎᐎᑎᒥᒡ ᑲ ᑕᑦ ᐊᑲᐎᔾ ᒋᑭ ᐅᒋ ᐱᒐᐤ ᐎᒋᒡ, ᒪᒃ ᐊᐛᓐ ᐊᓐᑕ ᓄᒋᒥᒡ ᑲ ᑕᑦ ᐊᑲᐎᔾ ᒋᑭ ᐅᒋ ᒋᐛᐤ ᒐᒋ ᒪᒧᓴᒋᓇᐧᒃ ᐅᑦ ᐊᐱᒋᑕᐅᓇ᙮ 32ᒋᔅᒋᓯ ᒪᒃ ᑕᓐ ᑲ ᐃᔅᐱᔨᒋ ᓗᑦ ᐎᐛ, ᐊᒋ ᒋᐛᐊᐱᓴᐱᔨᒋ, ᐊᑯᑕ ᑲ ᐊᑎ ᓂᓱᐅᓇᑎᓯᔨᒋ᙮ 33ᐊᐛᓐ ᐊ ᐎ ᑭᓄᐛᔨᑕᐧᒃ ᐅᐱᒪᑎᓯᐅᓐ ᒋᑭ ᐅᓂᑕᐤ᙮ ᐊᓐ ᒪᒃ ᐊᐛᓐ ᑲ ᐱᔅᑕᔨᑕᐧᒃ ᐅᐱᒪᑎᓯᐅᓐ ᐊᐅᑯᓐ ᐊᓐ ᒐ ᑭᓄᐛᔨᑕᑭᓄᐎᒡ ᐅᐱᒪᑎᓯᐅᓐ᙮ 34ᒋ ᐎᑎᒪᑎᓇᐛᐤ ᑕᓐ ᒐ ᐃᔅᐱᔨᒡ ᒥᓐ ᑎᑯᓯᓂᒐ ᐃᔪᐤ ᐅᑯᓯᓴᓐ᙮ ᐊᓐ ᑎᐱᔅᑲᒐ ᑎᑯᓯᓂᔭᓇ ᒋᑭ ᓂᓱᓯᓄᐅᒡ ᐊᐛᓐᒋ ᓂᐸᐅᓂᒡ᙮ ᐸᐃᒄ ᒪᒃ ᒋᓴᒪᓂᑐᐛ ᒋᑭ ᐅᑎᓂᑯᐤ ᐊᑯ ᐊᓐ ᑯᑎᒃ ᒐ ᓂᑭᑕᑭᓄᐅᑦ᙮ 35ᑭᔭ ᒋᑭ ᓂᓱᐅᒡ ᐃᔎᐅᒡ ᐊ ᐱᒥᓄᐛᒡ᙮ ᐸᐃᒄ ᐊᓐ ᒋᑭ ᐅᑎᓇᑭᓄᐤ ᐊᑯ ᐊᓐ ᑯᑎᒃ ᒐ ᓂᑭᑕᑭᓄᐅᑦ᙮ 36ᑭᔭ ᓂᓱ ᓇᐸᐅᒡ ᒋᑭ ᑕᐅᒡ ᓄᒋᒥᒡ᙮ ᐸᐃᒄ ᐊᓐ ᒋᑭ ᐅᑎᓇᑭᓄᐤ ᐊᑯ ᐊᓐ ᑯᑎᒃ ᒐ ᓂᑭᑕᑭᓄᐅᑦ᙮”
37ᒋᓴᔅ ᐅᒋᔅᒋᓄᐊᒧᐛᑭᓇ ᒋ ᑯᒂᒋᒥᑯᐤ ᐊ ᐃᑎᑯᑦ, “ᐅᑎᐸᔨᒋᒐᐤ, ᑕᓐᑕ ᐅ ᒐ ᐃᔅᐱᔨᒡ ?” ᒋ ᐃᑕᐤ ᒪᒃ ᒋᓴᔅ, “ᓇᔅᒡ ᒋᑭ ᒋᔅᒐᔨᑕᓇᐛᐤ ᐃᔅᐱᔨᒐ ᐅ᙮ ᒧᔭᒻ ᐊᓐᑕ ᐊ ᓄᑯᓯᒡ ᒥᒋᓱᐅᒡ ᐊ ᒥᒐᑎᒡ ᒋᔅᒐᔨᑕᑯᓂᔪᐤ ᐊ ᑎᑯᓂᔨᒡ ᒐᒂᔪᐤ ᐊ ᓂᐱᒥᑭᓂᔨᒡ ᐊᓐᑕ᙮”
Currently Selected:
ᓗᒃ 17: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
