ᓗᒃ 13
13
ᐳᓂ ᐊ ᒥᒋᑐᑎᒥᓐ
Luke 13.1-9 (Lent-3 Year C)
1ᐊᓐᑕ ᒪᒃ ᒪᒂᒡ ᒋ ᑕᐅᒡ ᐊᓐᑕ ᐃᔪᒡ ᐊᒋ ᐎᑎᒧᐛᒡ ᒋᓴᓴ ᑕᓐ ᑲ ᐃᑐᑐᐛᑭᓄᔨᒋ ᐱᔅᒐ ᐃᔪᐛ ᑲᓕᓕ ᐊᔅᒋᒡ ᑲ ᐅᒋᔨᒋ᙮ ᒋᓴᐅᒋᒪᐅᑯᐸᓇᐛ ᑈᓚᑦ ᐊ ᐃᓯᓂᐧᑲᓱᔨᒋ ᐊᒋ ᓂᐸᐊᔨᒋ ᐊᓂᔭ ᐃᔪᐛ ᒪᒂᒡ ᐊᒋ ᐎ ᒥᑐᔅᑕᐊᒧᐛᒡ ᒋᓴᒪᓂᑐᐛ ᐊᓐᒡ ᐃᔪᒡ ᐊᓂᔭ ᐊᐛᓯᓴ ᑲ ᓂᐸᐊᒡ᙮ 2ᐊᑯ ᒋᓴᔅ ᒂ ᐃᑕᑦ, “ᒋᑦ ᐃᑕᔨᑕᓇᐛᐤ ᐊ ᐊᓂᔭ ᐊᒋ ᓂᐸᐊᑭᓄᐎᒡ ᐊ ᓄᑯᓂᔨᒡ ᐅᔅᑕ ᐎᔨᐛᐤ ᐊᒋ ᒥᒋᑐᑎᒧᐛᑯᐱᓇ ᐃᔅᐱᔅ ᑯᑎᑭᒡ ᐃᔪᒡ ᐅᑕ ᑲᓕᓕᒡ ? 3ᓇᒪ, ᓂᑐᑎᒧᒄ ᒪ ᒐ ᐃᑎᑎᑯᒡ, ᒧᔭᒻ ᐊᑲ ᒂᔅᑲᑎᓯᔭᒂ ᐊᐅᑯᓐ ᒧᔭᒻ ᑭᔭ ᒋᔨᐛᐤ ᒐ ᐃᓯ ᓂᓱᐅᓇᒋᐃᑯᐅᔭᒄ᙮ 4ᒋ ᒋᔅᒋᓯᓇᐛᐤ ᐊ ᔭᓇᐤ ᑕᑐᓴᑉ ᐃᔪᒡ ᐊᓐᑕ ᐅᑕᓇᒡ ᓴᐃᓗᐊᒻ ᑲ ᐃᓯᓂᐧᑲᑕᔨᒡ ᑲ ᓂᐱᒡ ᐊᒋ ᐱᑎᔅᑕᐅᑯᒡ ᑲ ᐃᔅᐸᓇᔨᒡ ᐊᓱᐛᐳᐅᒋᐛᐱᔪᐤ ? ᒋᑦ ᐃᑕᔨᑕᓇᐛᐤ ᐊ ᐊᒋ ᓄᑯᓂᔨᒡ ᐎᔨᐛᐤ ᐅᔅᑕ ᐊᒋ ᒥᒐᑎᓯᒡ ᐃᔅᐱᔅ ᑯᑎᑭᒡ ᐊᐛᓐᒋ ᐊᓐᑕ ᒋᕈᓯᓕᒥᒡ ᑲ ᑕᒡ᙮ 5ᓇᒪ, ᓂᑐᑎᒧᒄ ᒪ, ᒧᔭᒻ ᐊᑲ ᒂᔅᑲᑎᓯᔭᒂ ᑭᔭ ᒋᔨᐛᐤ ᒋᑭ ᓂᓱᐅᓇᑎᓯᓇᐛᐤ᙮”
ᒥᔅᑎᒄ ᐊᑲ ᒥᓂᓱᐅᑦ
6ᐊᑯ ᒋᓴᔅ ᒂ ᐎᑎᒧᐛᑦ ᐅᔭ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ᙮ ᒋ ᐃᑕᐤ, “ᒋ ᑕᐤ ᓇᐸᐤ ᐊᒋ ᐊᔭᐛᑦ ᒥᓯᓱᒥᓇᑎᒂ ᐊ ᓂᑕᐅᒋᔨᒋ ᐊᓐᑕ ᐅᓱᒥᓇᑎᒄ ᓂᑕᐅᒋᑕᑭᓐ ᐊᔅᒋᒡ᙮ ᐊᑯ ᐸᐃᒂᐤ ᐊ ᒋᓯᑲᔨᒡ ᒋ ᓂᑐ ᒋᔅᒐᔨᒪᐤ ᒐ ᒥᓂᓱᐎᒂᓂ ᐊᓂᔭ ᒥᔅᑎᒂ᙮ ᓇᒪ ᒪᒃ ᒐᒂᔪᐤ ᐅᒋ ᒥᓂᓱᐅᔪᐤ᙮ 7ᐊᑯ ᐊᑕᑦ ᐊᓂᔭ ᓇᐸᐛ ᑲ ᓂᓇᑭᑐᐛᐸᑎᒥᔨᒋ ᐊᓂᔭᔪᐤ ᐅᓂᑕᐅᒋᑕᑭᓇ, ‘ᑭᓄᐛᐸᑕ ᒪ, ᐊᓯᑯᒻ ᐱᐳᓇ ᓂᒋ ᑎᑯᓯᓐ ᐅᑕ, ᓂᔅᑐ ᐱᐳᓇ ᐃᔅᐱᔅ, ᒐᒋ ᓂᑐ ᒋᔅᒐᔨᒥᒃ ᐅ ᒥᓯᓱᒥᓇᑎᒄ ᐊ ᒥᓂᓱᐅᒂ᙮ ᓇᒪ ᒪᒃ ᒐᒂᓐ ᓂ ᒥᔅᑲᓐ ᒐᒋ ᓂᑕᐅᒋᒡ ᐊᓐᑕ, ᓇᑥᑲᐅᐤ ᐊᑯᔅ, ᒐᔅᑲ ᑲ ᒋᒥᓱᑦ ᐊᓐᑕ ᐊᔅᒋᒡ ?’ ”
8“ᐊᑯ ᒪᒃ ᐊᓐ ᑲ ᓂᓇᑭᑐᐛᔨᑕᐧᒃ ᐊᓂᔭᔪᐤ ᓂᑕᐅᒋᑕᑭᓇ ᒋ ᐃᑕᐤ, ‘ᐊᑲᐎᔾ ᐸᑎᒪ ᐱᔅᒐᔨᒻ, ᒥᓐ ᐸᐃᒄ ᐱᐳᓇ ᒋᑭ ᐃᓯᑲᐳᐤ᙮ ᓂᑭ ᒧᓇᐛᐤ ᐊᓐᑕ ᐛᔅᑲ, ᐊᑯ ᒐ ᐊᔅᑕᔭᓐ ᐊᓐᑕ ᒐᒂᓐ ᒐᒋ ᐅᒋ ᒥᔪ ᓂᑕᐅᒋᑦ᙮ 9ᒐᒃ ᒪᒃ ᒥᓂᓱᐅᒐ ᒥᓐ ᐱᐳᓂᔨᒐ ᒋᑭ ᒥᔽᔨᑕᓇᓄᐤ᙮ ᐊᑲ ᒪᒃ ᒥᓂᓱᐅᒐ, ᐊᑯᔅ ᒋᑭ ᓇᑥᑲᐛᑭᓄᐤ᙮’ ”
ᒋᓴᔅ ᑲ ᒥᓏᒋᐊᑦ ᑲ ᒪᔅᒋᓯᔨᒋ ᐃᔎᐛ ᐊ ᐊᔭᒥᐊᐅᒋᓯᑲᔨᒡ
Luke 13.10-17 (Proper-16 Year C)
10ᐸᐃᒂᐤ ᐊ ᒍᐤ ᐊᔭᒥᐊᐅᒋᓯᑲᔨᒡ, ᒋᓴᔅ ᒋ ᒋᔅᑯᑎᒪᒐᐤ ᐊᓐᑕ ᐊᔭᒥᐊᐅᒋᐛᐱᒡ᙮ 11ᐃᔎᐤ ᒪᒃ ᐊᓐᑕ ᒋ ᑕᐤ ᒥᒋ ᐊᒐᒂ ᐊᒋ ᐱᒋᔅᑲᑯᑦ ᐊᒋ ᐃᑐᑕᑯᑦ ᔭᓇᐤ ᑕᑐᓴᑉ ᐱᐳᓇ ᒐᒋ ᐃᔅᐱᔅ ᐊᐧᑯᓯᑦ ᐊᒋ ᒪᔅᑲᒋᐱᔅᑯᓇᑦ ᐊᑲ ᐅᒋ ᑯᐃᔅᑯᑲᐳᐅᑦ᙮ 12ᐃᔅᐱ ᒋᓴᔅ ᐎᔭᐱᒪᑦ ᐊᓂᔭ ᐃᔎᐛ ᒋ ᐎᓴᒪᐤ ᐊᑯ ᒂ ᐃᑕᑦ, “ᐃᔎᐤ, ᓴᔅ ᓇᔅᒡ ᒋ ᒥᓏᒋᐃᑯᓐ ᑕᓐ ᑲ ᐃᑕᔅᐱᓇᔨᓐ᙮” 13ᒂ ᑕᒋᓇᑦ᙮ ᑎᐛᒡ ᒪᒃ ᒋ ᐅᒋ ᑯᐃᔅᑯᑲᐳᐤ ᐊᓐ ᐃᔎᐤ ᐊ ᒪᒥᒋᒪᑦ ᒋᓴᒪᓂᑐᐛ᙮
14ᐊᑯ ᒪᒃ ᐊᓐ ᑲᓂᑲᓂᔅᑲᐧᒃ ᐊᓂᔭ ᐊᔭᒥᐊᐅᒋᐛᐱᔪᐤ ᓇᔅᒡ ᑕᑈ ᒋ ᒋᔄᓱᐤ ᒋᓴᓴ ᐊᒋ ᒥᓏᒋᐊᔨᒋ ᐊᐛᔪᐛ ᒪᒂᒡ ᐊ ᒍᐤ ᐊᔭᒥᐊᐅᒋᓯᑲᔨᒡ᙮ ᐊᑯ ᒂ ᐃᑕᑦ ᐊᓂᔭ ᑯᑎᑲ ᐃᔪᐛ ᐊᓐᑕ ᑲ ᑕᔨᒋ, “ᐊᓱᑕᒡ ᑕᑐᐤ ᒋᓯᑲᐛ ᑎᑯᓇ ᒐᒋ ᐊᑐᔅᒐᓇᓄᐅᒡ, ᐊᑯᑕ ᒋᐸ ᐸᒋ ᑎᑯᓯᓇᐛᐤ ᒪᒂᒡ ᐊᓂᔭ ᐊ ᒋᓯᑲᔨᒋ ᒐᒋ ᒥᓏᒋᐃᑯᐅᔭᒄ ᓇᒪ ᐎ ᒪᒂᒡ ᐊ ᒍᐤ ᐊᔭᒥᐊᐅᒋᓯᑲᒡ᙮”
15ᐅᑎᐸᔨᒋᒐᐤ ᒂ ᐎᑎᒧᐛᑦ ᐊᓂᔭ ᑲ ᓂᑲᓂᔅᑭᒥᔨᒡ ᐊᓂᔭ ᐊᔭᒥᐊᐅᒋᐛᐱᔪᐤ ᐊ ᐃᑕᑦ, “ᒋᔾ ᑲ ᐊᔭᒥᐊᐧᑲᓱᔨᓐ, ᐊᑎ ᐊ ᒍᐤ ᐊᔭᒥᐊᐅᒋᓯᑲᒡ ᓇᒪᐎᔾ ᐊ ᐃᔭᐱᒡ ᒋᑦ ᐊᐱᐧᑯᓇᐤ ᒋᑦ ᐊᐛᓯᓯᒻ ᒪᒃ ᒋᒥᔅᑐᓯᒻ ᒐᒋ ᐃᑐᑕᐃᑦ ᐊᓐᑕ ᒐ ᒥᓐᑦ ? 16ᐊᑯ ᒪᒃ ᐅ ᒍᐤ ᐃᔎᐤ ᔭᓇᐤ ᑕᑐᓴᑉ ᐱᐳᓇ ᒋᑦ ᐃᔅᐱᔅ ᒪᑯᐱᑎᑯᐤ ᒥᒋᒥᓂᑐᐛ, ᓇᒪᐎᔾ ᐊ ᐃᓯᓇᑯᓂᔪᐤ ᒐᒋ ᐊᐱᐧᑯᓇᑭᓄᐅᑦ ᐊᑎ ᐊ ᒍᐤ ᐊᔭᒥᐊᐅᒋᓯᑲᔨᒡ ?”
17ᐊᑯ ᒪᒃ ᒥᓯᐛ ᐊᓂᔭ ᑲ ᐊᓏᔨᒥᑯᑦ ᐊᒋ ᒥᓏᒋᐊᑦ ᐊᓂᔭ ᐃᔎᐛ ᒪᒂᒡ ᐊ ᐊᔭᒥᐊᐅᒋᓯᑲᔨᒡ ᓇᔅᒡ ᑕᑈ ᒋ ᓯᓴᒂᔨᒧᔪᐛ᙮ ᐊᑯ ᐊᓐᒡ ᑯᑎᑭᒡ ᐃᔪᒡ ᒋ ᒥᔽᔨᑎᒧᒡ ᒥᓯᐛ ᐊᓂᔭ ᑲ ᐃᓯ ᒪᒥᔅᑲᒡ ᐃᑐᑎᒥᔨᒋ ᒋᓴᓴ᙮
ᑲ ᐊᐱᓯᓯᑦ ᓂᑕᐅᒋᑕᑭᓐ ᑭᔭ ᑲᐅᐱᔨᒡ
ᒪᑎᔪᐤ 13.31-33; ᒪᕐᒃ 4.30-32
18ᐊᑯ ᒋᓴᔅ ᑲ ᑯᒂᒋᒪᑦ ᐊᓂᔭ ᐊᓐᑕ ᑲ ᑕᔨᒋ, “ᑕᓐ ᐊ ᐃᑕᔨᑕᑯᓂᔨᒡ ᒋᓴᒪᓂᑐᐤ ᐅᒋᓴᐅᒋᒪᐅᓐ ? ᑕᓐᑕ ᒐᒋ ᐅᒋ ᐎᑎᒪᑎᑯᒡ ᑕᓐ ᐊᓐ ᐊ ᐃᑕᔨᑕᑯᓂᔨᒡ ? 19ᒧᔭᒻ ᐊᓐ ᓂᑕᐅᒋᑕᑭᓐ ᑲ ᐊᐱᓯᓯᑦ ᒪᔅᑎᕐᑦ ᑲ ᐃᓯᓂᐧᑲᑕᑭᓄᐅᑦ ᐊᐅᑯᓐ ᐊ ᐃᓯᓇᒂᒡ ᒋᓴᒪᓂᑐᐤ ᐅᒋᓴᐅᒋᒪᐅᓐ᙮ ᐊᐅᒄ ᐅᔭ ᓂᑕᐅᒋᑕᑭᓇ ᐛᑎᓇᑦ ᓇᐸᐤ ᐊ ᓂᑕᐅᒋᑕᑦ ᐊᓐᑕ ᐅᓂᑕᐅᒋᑕᑭᓐ ᐊᔅᒋᒡ᙮ ᒐᒃ ᓇᑕᐅᒋᔨᒋ, ᒥᔅᑎᒄ ᓇᓂᑯᑎᓂᔾ ᐊᔪᐛᒡ ᐱᐱᔅᒐᓂᑕᐅᒋᔪᐛ ᐊᓐᑕ ᐊᓐ ᓂᑕᐅᒋᑕᑭᓐ ᐅᒡ᙮ ᐱᔭᓯᓯᒡ ᒪᒃ ᐊᑯᑕ ᐛᒋᔅᑐᓂᐧᑲᓱᒡ ᐊᓐᑕ ᐊ ᐎᑎᐧᑯᓄᔨᒋ ᐊᓂᔭ ᒥᔅᑎᒂ᙮”
20ᒥᓐ ᒪᒃ ᒋ ᐃᓯ ᑯᒂᒋᒪᐤ, “ᑕᓐ ᐊ ᐃᑕᔨᑕᒂᒡ ᒋᓴᒪᓂᑐᐤ ᐅᒋᓴᐅᒋᒪᐅᓐ ? 21ᒧᔭᒻ ᐸᒂᓯᑭᓐ ᑲᐅᐱᔨᒡ ᐊᐅᑯᓐ ᐊ ᐃᑕᔨᑕᒂᒡ, ᐊ ᒪᒧᐱᔭᑦ ᐃᔎᐤ ᐸᒂᓯᑭᓇ ᑲᐅᐱᔨᒋ ᒥᔅᑎ ᐸᒂᓯᑭᓂᒡ, ᒥᓯᐛ ᒪᒃ ᐅᐱᔪᐛ ᐊᓂᔭᔪᐛ ᐸᒂᓯᑭᓇ᙮”
ᑲ ᓴᑯᐊᒡ ᐃᔎᑕᒻ
ᒪᑎᔪᐤ 7.13,14,21-23
22ᒋᓴᔅ ᒋ ᐊᑎ ᒋᔅᑯᑎᒪᒐᐤ ᐊᓐᑕ ᑲ ᐊᑎ ᐛᐅᑎᑕᐧᒃ ᐊ ᐅᑕᓇᐅᓂᔨᒡ ᑭᔭ ᐊ ᐊᑎ ᑎᑯᓂᔨᒋ ᐅᑕᓇᓴ ᐊᔅᒄ ᐊᑲ ᐅᒋ ᐅᑎᑕᐧᒃ ᒋᕈᓯᓕᒥᔪᐤ ᐊᓐᑕ ᑲ ᐎ ᐃᑐᑕᑦ᙮ 23ᒋ ᑯᒂᒋᒥᑯᐤ ᒪᒃ ᒋᓴᔅ ᐊᐛᔪᐛ ᐊ ᐃᑎᑯᑦ, “ᐅᑎᐸᔨᒋᒐᐤ, ᒥᒄ ᐊ ᐱᔅᒐ ᐊᐛᓐᒋ ᒋᑭ ᐱᒪᒋᐊᑭᓄᐅᒡ ?”
ᒋ ᐃᑕᐤ ᒪᒃ ᒋᓴᔅ, 24“ᒥᒐᑦ ᐊᐛᓐᒋ ᒋᑭ ᑯᒋᑕᐅᒡ ᒐᒋ ᐱᒐᒡ ᐊᓐᑕ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ, ᓇᒪ ᒪᒃ ᒋᑭ ᒋ ᐃᑐᐅᒡ᙮ ᒋᔨᐛᐤ ᒪᒃ ᓱᒃ ᑯᒋᑕᒄ ᒐᒋ ᐱᒐᔭᒄ ᐊᓐᑕ ᐅᒋ ᐊᓐ ᑲ ᓴᑯᐛᒡ ᒋᐱᔎᐤ᙮ 25ᐊᑲ ᒪᒃ ᐛᒋ ᐱᒐᐛᐛᒂ, ᐃᔅᐱ ᒋᐸᐊᒐ ᒋᐱᔎᔪᐤ ᐊᓐ ᑲ ᑎᐸᔨᑕᐧᒃ ᐊᓂᔭ ᒥᒋᐛᐱᔪᐤ, ᐎᐎᑎᒥᒡ ᓂᐳᔭᒂ ᐊ ᑎᑥᐛᐃᒐᔭᒄ ᒋᑭ ᐃᔅᒋᔄᓇᐛᐤ, ‘ᐅᑎᐸᔨᒋᒐᐤ, ᐸᒋ ᔪᑕᓂᒧᐅᓇᓐ᙮’ ᑭᔭ ᒐ ᐃᓯ ᐎᑎᒪᑕᒄ, ‘ᓇᒪ ᒋᑭ ᐅᒋ ᓴᓂᒪᑎᓇᐛᐤ ᐛᔅ ᓇᒪ ᒋ ᒋᔅᒐᔨᒥᑎᓇᐛᐤ, ᓇᒪ ᑭᔭ ᓂ ᒋᔅᒐᔨᑕᓐ ᑕᓐᑕ ᐛᒋᔭᒄ᙮’ ”
26“ᐊᑯ ᒪᒃ ᒐ ᐃᓯ ᓂᔎᐅᓯᐊᒄ, ‘ᔅᒋ ᐎᒋᒥᒋᓱᒥᑎᓇᓐ, ᔅᒋ ᐎᒋᒥᓂᒥᑎᓇᓐ ᑭᔭ ᔅᒋ ᑕᓐ ᓂᑦ ᐃᑕᐅᓇᒡ ᐊ ᒋᔅᑯᑎᒪᒐᔨᓐ᙮’ ”
27“ᒥᓐ ᒪᒃ ᐃᔭᐱᒡ ᒋᑭ ᐃᑎᑯᐛᐤ, ‘ᓇᒪ ᓂ ᒋᔅᒐᔨᑕᓐ ᑕᓐᑕ ᐛᒋᔭᒄ, ᐃᒐᑕᒄ ᓇᑕ ᒥᓯᐛ, ᒋᔨᐛᐤ ᑲ ᒥᒋᑐᑎᒪᒄ᙮’ ”
28“ᓇᔅᒡ ᑕᑈ ᓱᒃ ᒋᑭ ᒪᓇᐛᐤ ᑭᔭ ᒋᑭ ᒪᒥᑥᔭᐱᑕᓯᓇᐛᐤ ᐃᔅᐱ ᐛᐱᒪᒂᐛ ᐊᑉᕋᐊᒻ, ᐊᐃᓯᒃ, ᒐᑭᑉ, ᑭᔭ ᒥᓯᐛ ᐊᓂᔭᐧᑲ ᐅᒋᔅᒋᐛᐃᒐᓱᒡ ᐊ ᑕᒡ ᐎᔨᐛᐤ ᐊᓐᑕ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ, ᒋᔨᐛᐤ ᒪᒃ ᐎᐎᐛᐱᓂᑯᐅᔭᒂ᙮ 29ᒋᑭ ᑎᑯᓯᓄᐅᒡ ᐊᐛᓐᒋ ᐛᐱᓄᑕᒡ, ᐊᑎᒪᐱᓯᒧᒡ, ᒋᐛᑎᓄᒡ ᑭᔭ ᓴᐅᓄᒡ ᐊ ᐅᒋᒡ ᒐ ᐸᒋ ᒥᒋᓱᒡ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ᙮ 30ᐛᔅ ᐊᓐᒡ ᑲ ᐃᑕᔨᒪᑭᓄᐎᒡ ᐊᑲ ᒋᔅᑕᔨᑕᑯᓯᒡ ᒋᑭ ᒋᔅᑕᔨᑕᑯᓱᐅᒡ ᐊᓐᑕ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ, ᑭᔭ, ᐊᓐᒡ ᐊ ᒋᔅᑕᔨᑕᑯᓯᒡ ᑲ ᐃᑕᔨᒪᑭᓄᐎᒡ ᓇᒪ ᒋᑭ ᐅᒋ ᒋᔅᑕᔨᑕᑯᓱᐅᒡ ᐊᓐᑕ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ᙮”
ᒋᓴᔅ ᑕᓐ ᑲ ᐃᔅᐱᔅ ᓴᒋᑕᑦ ᒋᕈᓯᓕᒥᔪᐤ
ᒪᑎᔪᐤ 23.37-39
Luke 13.31-35 (Lent-2 Year C)
31ᐊᓂᔭ ᒪᒃ ᒪᒂᒡ ᒋ ᑕᐅᒡ ᐸᕆᓯᔨᒡ ᐊ ᐸᒋ ᓂᑐᐛᐱᒪᒡ ᒋᓴᓴ᙮ ᒋ ᐃᑕᐅᒡ ᒪᒃ, “ᒪᒋ ᐃᒐᑕ ᐅᑕ ᐅᑕᓇᒡ, ᐃᔭᒡ ᓇᑕ ᐃᑐᑕ, ᐛᔅ ᐊᓐ ᒋᓴᐅᒋᒪᐤ ᐊᕈᑦ ᒋ ᐎ ᓂᐸᐃᒄ᙮” 32ᒋ ᐃᑕᐤ ᒪᒃ ᒋᓴᔅ, “ᐎᑎᒧᐛᐧᒄ ᐊᓐ ᒪᒐᓱᐤ ᐊᕈᑦ, ᓂ ᐎᐎᑎᓴᐅᒪᐛ ᒥᒋ ᐊᒐᒂ ᑭᔭ ᓂ ᒥᓏᒋᐃᒪᐛ ᐃᔪᐛ ᐊᓄᒡ ᒐᓯᑲᔨᒡ ᑭᔭ ᐛᐸᒐ ᐊᐅᑯᓐ ᒐ ᐃᑎᔭᓐ᙮ ᒋ ᓂᔅᑐ ᒋᓯᑲᒐ, ᐊᑯ ᒐ ᒋᔅᑕᔭᓐ᙮”
33“ᐃᔭᐱᒡ ᓂᑭ ᐃᑐᑕᓐ ᑕᓐᑕ ᐛ ᐃᑐᑕᔭᓐ ᐊᓄᒡ ᒐᓯᑲᒡ ᒥᓐ ᐛᐸᒐ ᑭᔭ ᐅᓱᐛᐸᒐ ᓴᔅ ᓂᑭ ᑕᓐ ᐊᓐᑕ ᐛ ᐃᑐᑕᔭᓐ᙮ ᐛᔅ ᒥᓯᐛ ᐊᓂᔭᐧᑲ ᐅᒋᔅᒋᐛᐃᒐᓱᒡ ᑲ ᓂᐸᐊᑭᓄᐎᒡ ᐊᑯᑕ ᐊᓐᑕ ᒋᕈᓯᓕᒥᒡ ᑲ ᓂᓱᐅᓇᒋᐊᑭᓄᐎᒡ᙮ ᐊᐅᒄ ᒪᒃ ᐅ ᒐ ᐅᒋ ᐃᑐᑕᔭᓐ ᒋᕈᓯᓕᒥᒡ᙮”
34“ᒋᔨᐛᐤ ᒋᕈᓯᓕᒥᒡ ᑲ ᑕᔭᒄ, ᑲ ᓂᐸᐊᑯᒡ ᐊᓐᒡ ᐅᒋᔅᒋᐛᐃᒐᓱᒡ ᑭᔭ ᑲ ᐸᐱᐳᒧᓯᓇᑕᐛᑯᒡ ᐊᓂᔭᔪᐛ ᒋᓴᒪᓂᑐᐤ ᑲ ᐸᒋ ᐃᑎᓴᐊᒪᑕᒄ, ᑕᓐ ᑕᑥᐤ ᑲ ᐎ ᒪᐅᓯᑯᐱᑎᑎᑯᒡ ᐊᓐᑕ ᐃᔅ ᐊ ᑕᔭᓐ, ᒧᔭᒻ ᐱᑲᒂᓐ ᐊ ᐃᑐᑐᐛᑦ ᐅᐱᑲᒂᓂᓯᒪ, ᓯᐸ ᐅᑎᑎᑭᓂᒡ ᐊ ᐃᓯ ᒪᐅᓯᑯᓇᑦ ᐊ ᐎ ᓂᓇᑭᑐᐛᔨᒪᑦ᙮ ᐊᐅᑯᓐ ᒪᒃ ᒧᔭᒻ ᑲ ᐎ ᐃᑐᑕᑎᑯᒡ᙮ ᒥᒄ ᓇᒪ ᒋ ᐅᒋ ᐱᔅᑎᓇᐛᐤ ᐅ ᒐᒋ ᐃᑐᑕᑎᑯᒡ᙮ 35ᒋᑭ ᓂᑭᑎᒪᑯᓇᐛᐤ ᒋᒋᐛᐛ ᓇᔅᒡ ᐊ ᓂᓱᐅᓇᑎᔨᒋ᙮ ᒋ ᐎᑎᒪᑎᓇᐛᐤ ᓇᒪ ᒋᑭ ᐅᒋ ᐛᐱᒥᓇᐛᐤ ᐸᑐᔅ ᐅᑎᒋᐱᔨᒐ ᒐᒋ ᐃᔅᒋᔄᔭᒄ,
ᓱᐛᔨᑕᑯᓱᐤ ᐊᓐ ᑲ ᐸᒋ ᐃᑐᑕᑦ ᐅᑎᐸᔨᒋᒐᐛ ᐅᑦ ᐃᓯᓂᐧᑲᓱᓂᔨᒡ᙮”
Currently Selected:
ᓗᒃ 13: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
