ᒠᓐ 21
21
ᒋᓴᔅ ᑲ ᓄᑯᓯᔅᑐᐛᑦ ᓂᔄᐅᑕᒡ ᐅᒋᔅᒋᓄᐊᒧᐛᑭᓇ
John 21.1-19 (Easter-3 Year C)
1ᐸᑎᒪ ᒪᒃ ᐊᑯ ᒥᓐ ᒋᓴᔅ ᑲ ᓄᑯᓯᔅᑐᐛᑦ ᐅᒋᔅᒋᓄᐊᒧᐛᑭᓇ ᐊᓐᑕ ᐊᓂᔭ ᓴᑲᐃᑭᓂᔪᐤ ᑕᐃᐱᕆᔭᔅ ᑲ ᐃᓯᓂᐧᑲᑕᔨᒡ᙮ ᒪᐅᑕ ᒪᒃ ᑲ ᐃᓯ ᓄᑯᓯᔅᑐᐛᑦ᙮ 2ᒪᒧᐤ ᒋ ᑕᐅᒡ ᐅᒡ ᒥᓯᐛ, ᓴᐃᒥᓐ ᐱᑕᕐ, ᑥᒥᔅ, ᐊᓐ ᑲ ᓂᓯᒡ ᑲ ᐃᓯᓂᐧᑲᑕᑭᓄᐅᑦ, ᓇᑕᓂᔭᓪ, ᐊᓐ ᑲᐃᓇᒡ ᑲ ᐅᒋᑦ ᐊᓐᑕ ᑲᓕᓕ ᐊᔅᒋᒡ ᑲ ᑎᑯᓂᔨᒡ, ᑭᔭ ᐊᓂᔭ ᓂᓱ ᓴᐱᑎ ᐅᑯᓴ ᑭᔭ ᓂᓱ ᑯᑎᑭᒡ ᒋᔅᒋᓄᐊᒧᐛᑭᓐᒡ᙮ 3ᐊᑯ ᓴᐃᒥᓐ ᐱᑕᕐ ᒂ ᐃᑕᑦ ᐊᓂᔭ ᒋᔅᒋᓄᐊᒧᐛᑭᓐᒡ “ᓂᑭ ᓂᑐᓂᒪᓴᓐ᙮” ᒂ ᐃᑎᑯᑦ, “ᒋᑭ ᐎᒐᐅᑎᓇᓐ᙮” ᒂ ᐳᓯᒡ᙮ ᐃᔅᑭᓐ ᑎᐱᔅᑲᐛ ᒪᒃ ᒋ ᑕᐅᒡ ᐊᑲ ᐅᒋ ᐱᑕᐅᔭᒡ᙮
4ᐃᔅᐱ ᒪᒃ ᐊ ᐊᑎ ᐸᑕᐱᓂᔨᒡ, ᒋᓴᔅ ᒋ ᓂᐳᐅᐤ ᐊᓐᑕ ᓯᓱᒡ, ᒥᒄ ᓇᒪ ᐅᒋ ᒋᔅᒐᔨᒪᐅᒡ ᐊᓐᒡ ᒋᔅᒋᓄᐊᒧᐛᑭᓐᒡ ᒋᓴᓴ ᐊᓂᔭᔪᐛ᙮
5ᒋ ᐃᑎᑯᐅᒡ ᒪᒃ, “ᐊᔅᒄ ᐊ ᓇᒪ ᒋ ᐱᑕᐅᔭᓇᐛᐤ ?” “ᓇᒪ,” ᒋ ᐃᑕᐅᒡ᙮
6ᐊᑯ ᒂ ᐃᑕᑦ, “ᒋᑭ ᐱᑕᐅᔭᓇᐛᐤ ᐊᓐᑕ ᒋᒥᔪᓂᐛᒡ ᐃᑕᒐ ᐃᓯ ᐱᑭᔅᑐᐛᐊᒂ ᐊᓐ ᒋᑦ ᐊᐃᐱᐛᐤ᙮” ᑭᑈ ᑲ ᐱᑭᔅᑐᐛᐛᒡ ᐊᓂᔭ ᐅᑦ ᐊᐃᐱᐛᐛ᙮ ᓇᒪ ᐅᒋ ᓱᐱᑕᐅᒡ ᐊᓂᔭᔪᐛ ᐅᑦ ᐊᐃᐱᐛᐤ ᐃᔅᐱ ᐛᒋᐱᑕᒡ ᐊ ᐃᔅᐱᔅ ᒋ ᒥᒐᑎᔨᒋ ᐅᓂᒪᓯᒧᐛᐛ᙮
7ᐊᓂᔭᔪᐛ ᒪᒃ ᒋᔅᒋᓄᐊᒧᐛᑭᓐ ᒋᓴᔅ ᑲ ᓴᒋᐊᑦ, ᒋ ᐃᑕᐤ ᐊᓂᔭ ᐱᑕᕋ, “ᐅᑎᐸᔨᒋᒐᐤ ᐊᓐ᙮” ᐃᔅᐱ ᒪᒃ ᓴᐃᒥᓐ ᐱᑕᕐ ᐱᔭᑕᐧᒃ ᐅᑎᐸᔨᒋᒐᐛ ᐊ ᐊᐎᔨᒋ ᐊᓂᔭᔪᐛ ᒋ ᐳᔅᑎᔅᑭᒻ ᐅᑦ ᐊᑯᑉ ᐊᓂᔭ ᑲ ᒥᓇᐧᒃ ᒐ ᐊᑐᔅᒐᑦ, ᐊᑯ ᑲ ᐱᑭᔅᑐᐛᒂᔅᑯᑎᑦ᙮ 8ᐊᑯ ᐊᓐᒡ ᑯᑎᑭᒡ ᒋᔅᒋᓄᐊᒧᐛᑭᓐᒡ ᑲ ᐸᒋ ᓇᑎᑭᒪᐱᔨᒡ, ᐊ ᐅᑕᐸᒡ ᐊᓂᔭ ᐅᑦ ᐊᐃᐱᐛᐛ ᐊ ᓴᑭᔅᒋᓇᔨᒋ ᓂᒪᓴ᙮ ᓇᒪ ᒪᒃ ᓇᔅᒡ ᑕᐅᒡ ᐅᒋ ᐃᑕᐅᒡ, ᓴᓯᑲᓐ ᓂᔅᑐ ᒥᑕᓯᒥᑎᓄᐤ ᒥᓯᑦ ᒋ ᐃᔅᐱᓯᓇᑯᓂᔨᒐ ᐊᓐᑕ ᐅᒋ ᓯᓱᒡ᙮ 9ᐃᔅᐱ ᒪᒃ ᑲ ᑭᐸᒡ ᒋ ᐛᐸᑎᒧᒡ ᐃᔅᑯᑕᔪᐤ ᓂᒪᓴ ᐊ ᑎᑭᔄᑭᓄᔨᒋ ᐊᓐᑕ ᑭᔭ ᐸᒂᓯᑭᓇ᙮
10ᐊᑯ ᒋᓴᓴ ᒂ ᐃᑎᑯᒡ, “ᐸᓱᐛᐧᑯᒡ ᐊᓐᒡ ᐱᔅᒐ ᓂᒪᓯᒡ ᑲ ᐱᑕᐅᔭᔭᒄ᙮”
11ᐊᑯ ᓴᐃᒥᓐ ᐱᑕᕐ ᒂ ᐊᒂᓯᐱᑕᑦ ᐊᓂᔭ ᐊᐃᐱᔭ᙮ ᓴᓯᑲᓐ ᐸᐃᑯ ᒥᑕᓯᒥᑎᓄᐤ ᒥᓐ ᐱᑕᑕᒡ ᑕᑐᔪᐤ ᐊᓱ ᓂᔅᑐ ᒋ ᑕᑎᓯᒐᓂᐃ ᐊᓂᔭᔪᐛ ᓂᒪᓴ᙮ ᐊᑎ ᒪᒃ ᐊᓂᔭ ᐊᒋ ᐃᔅᐱᔅ ᓴᑭᔅᒋᓇᔨᒋ ᓂᒪᓴ ᓇᒪ ᐃᔭᐱᒡ ᐅᒋ ᐱᑯᐱᔪᐛ ᐊᓂᔭ ᐅᑦ ᐊᐃᐱᐛᐛ᙮ 12ᐊᑯ ᑲ ᐃᑎᑯᒡ ᒋᓴᓴ, “ᐊᔅᑎᒧᒄ, ᐸᒋ ᒥᒋᓱᒄ᙮” ᓇᒪ ᒪᒃ ᐛᐛᒡ ᐸᐃᒄ ᐊᓐᒡ ᒋᔅᒋᓄᐊᒧᐛᑭᓐᒡ ᐅᒋ ᐎ ᐃᑕᐅᒡ, “ᐊᐛᓐ ᒋᔾ ?” ᐛᔅ ᒋ ᒋᔅᒐᔨᒪᐅᒡ ᐅᑎᐸᔨᒋᒐᐛ ᐊᓂᔭᔪᐛ᙮ 13ᒋᓴᔅ ᒪᒃ ᒋ ᓇᑕᐤ, ᒂ ᐅᑎᓇᑦ ᐊᓂᔭ ᐸᒂᓯᑭᓇ ᐊᑯ ᒂ ᒪᒪᑎᓂᒧᐛᑦ, ᑭᔭ ᐊᓂᔭ ᓂᒪᓴ ᐊᐅᑯᓐ ᑲ ᐃᑐᑐᐛᑦ᙮
14ᐊᐅᒄ ᒪᒃ ᐅᔭ ᓂᔍᐤ ᑲ ᓄᑯᓯᔅᑐᐛᑦ ᒋᓴᔅ ᐊᓂᔭᔪᐛ ᐅᒋᔅᒋᓄᐊᒧᐛᑭᓇ ᑲ ᐃᔅᐱᔅ ᐅᓂᔅᑲᑦ ᓂᐳᐅᓂᒡ ᐅᒡ᙮
ᒋᓴᔅ ᑭᔭ ᐱᑕᕐ
15ᐃᔅᐱ ᒪᒃ ᑲᒋ ᐃᓯ ᒥᒋᓱᒡ, ᒋᓴᔅ ᒋ ᐃᑕᐤ ᓴᐃᒥᓐ ᐱᑕᕋ, “ᓴᐃᒥᓐ, ᒋᔾ ᑲ ᐅᑯᓯᑐᑕᔅᒃ ᒠᓐ, ᐅᔅᑕ ᐊ ᓂᔾ ᒋ ᓴᒋᐃᓐ ᐃᔅᐱᔅ ᐅᒡ ?”
ᐊᑯ ᓴᐃᒥᓐ ᐱᑕᕐ ᒂ ᐃᓯ ᐎᑎᒧᐛᑦ, “ᓂᐦᐃ, ᐅᑎᐸᔨᒋᒐᐤ, ᒋ ᒋᔅᒐᔨᑕᓐ ᐊ ᓴᒋᐃᑕᓐ᙮”
ᒋᓴᔅ ᒪᒃ ᒋ ᐃᑕᐤ, “ᓂᓇᑭᑐᐛᔨᒥᒡ ᓂᒪᔭᑕᓂᓯᒥᒡ᙮”
16ᓂᔄᐤ ᒪᒃ ᒥᓐ ᒋᓴᔅ ᒋ ᐃᑕᐤ ᐊᓂᔭ ᓴᐃᒥᓐ ᐱᑕᕋ, “ᓴᐃᒥᓐ, ᒠᓐ ᑲ ᐅᑯᓯᑐᑕᔅᒃ, ᒋ ᓴᒋᐃᓐ ᐊ ?”
ᐊᑯ ᑲ ᐃᓯ ᐎᑎᒧᐛᑦ, “ᓂᐦᐃ, ᐅᑎᐸᔨᒋᒐᐤ, ᒋ ᒋᔅᒐᔨᑕᓐ ᐊ ᓴᒋᐃᑎᓐ᙮”
ᒋᓴᔅ ᒪᒃ ᒋ ᐃᑕᐤ, “ᓂᓇᑭᑐᐛᔨᒥᒡ ᓂᒪᔭᑕᓂᓯᒥᒡ᙮”
17ᓂᔍᐤ ᒪᒃ ᒥᓐ ᒋᓴᔅ ᒋ ᐃᑕᐤ, “ᓴᐃᒥᓐ, ᒠᓐ ᑲ ᐅᑯᓯᑐᑕᔅᒃ, ᒋ ᓴᒋᐃᓐ ᐊ ?”
ᐊᑯ ᐱᑕᕐ ᓇᔅᒡ ᑲ ᒥᒐᔨᑕᐧᒃ ᐛᔅ ᐊᑯ ᓂᔍᐤ ᑲ ᑯᒂᒋᒥᑯᑦ ᒋᓴᓴ ᐊ ᐃᑎᑯᑦ, “ᒋ ᓴᒋᐃᓐ ᐊ ?” ᐊᑯ ᑲ ᐃᑕᑦ, “ᐅᑎᐸᔨᒋᒐᐤ, ᒥᓯᐛ ᒐᒂᓐ ᒋ ᒋᔅᒐᔨᑕᓐ, ᒋ ᒋᔅᒐᔨᑕᓐ ᐊ ᓴᒋᐃᑕᓐ᙮”
ᒋᓴᓴ ᒪᒃ ᒋ ᐃᑎᑯᐤ, “ᓂᓇᑭᑐᐛᔨᒥᒡ ᓂᒪᔭᑕᓂᓯᒥᒡ᙮ 18ᑯᐃᔅᒄ ᒋ ᐎᑎᒪᑎᓐ, ᐊᔅᒄ ᐊᒋ ᐅᔅᒋᓂᒋᓱᐎᓐ ᒥᒄ ᑕᓐ ᐛ ᐊᐃᑎᔨᓐ ᔅᒋ ᐃᑎᓐ ᑭᔭ ᒥᒄ ᑕᓐᑕ ᐛ ᐃᑐᑕᔨᓐ ᐊᑯᑕ ᑲ ᐃᑐᑕᔨᓐ᙮ ᐃᔅᐱ ᒪᒃ ᒋᓴᐃᔪᔨᓇ, ᓱᐅᓂᔅᒐᔨᓇ ᒪᒃ ᒋᑭ ᒪᑯᐱᑕᑭᓄᐛ ᔅᑎᒋᔭ ᐊᑯ ᒐ ᐃᑐᑕᐃᑯᔨᓐ ᐊᓐᑕ ᐊᑲ ᐎ ᐃᑐᑕᔨᓐ᙮” 19ᐅᔭ ᒪᒃ ᒋᓴᔅ ᑲ ᐃᔅᒋᔄᑦ ᒋ ᓂᑐᐛᔨᒪᐤ ᒐᒋ ᒋᔅᒐᔨᑎᒥᔨᒋ ᑕᓐᑕ ᒐ ᐃᓯ ᓂᐱᔨᒋ ᒐᒋ ᐅᒋ ᒋᔅᑕᔨᒪᑭᓄᔨᒋ ᒋᓴᒪᓂᑐᐛ᙮ ᐊᑯ ᒋᓴᔅ ᐊᑕᑦ, “ᐸᒋ ᐱᐸᐎᒐᐎ᙮”
ᒋᓴᔅ ᑭᔭ ᐊᓐ ᑯᑎᒃ ᒋᔅᒋᓄᐊᒧᐛᑭᓐ
20ᐱᑕᕐ ᒋ ᒂᔅᒋᑲᐳᐤ ᒂ ᐛᐱᒪᑦ ᐊᓂᔭ ᑯᑎᑲ ᒋᔅᒋᓄᐊᒧᐛᑭᓇ, ᐊᓂᔭ ᒋᓴᓴ ᑲ ᓴᒋᐊᔨᒋ᙮ ᐊᐅᑯᓐ ᐊᓂᔭ ᑲ ᐊᔅᐱᒋᓯᒧᔨᒋ ᒋᓴᓴ ᐊ ᑕᔨᒋ ᒪᒂᒡ ᑲ ᒥᒋᓱᒡ ᑭᔭ ᑲ ᐃᓯ ᑯᒂᒋᒪᑦ, “ᐅᑎᐸᔨᒋᒐᐤ, ᐊᐛᓐ ᒐ ᐎᔭᓯᐱᔅᑎᓂᔅᒃ ?” 21ᐃᔅᐱ ᐎᔭᐱᒪᑦ ᐱᑕᕐ ᐅᔭ ᓇᐸᐛ ᒋ ᑯᒂᒋᒪᐤ ᒋᓴᓴ, “ᐅᑎᐸᔨᒋᒐᐤ, ᐅ ᒪᒃ ᐎᔾ ᓇᐸᐤ ?”
22ᒋᓴᓴ ᒋ ᐃᑎᑯᐤ, “ᓂᑐᐛᔨᒥᑲ ᒐᒋ ᐱᒪᑎᓯᑦ ᐸᑐᔅ ᒥᓐ ᑎᑯᓯᓄᒐ, ᑕᓐ ᒪᒃ ᒐ ᐃᑎᔨᓐ ᒋᔾ ? ᐸᒋ ᓇᓴᐎ ᒋᔾ᙮”
23ᐊᑯ ᒂ ᒥᓯᑕᐱᔨᒡ ᑎᐸᒋᒧᐅᓐ ᐊᓐᑕ ᒥᓯᑕ ᐎᐧᑲᓂᓯᒪᐅᒡ ᐊ ᑕᒡ ᐊᓂᔭ ᒐ ᐊᑲ ᐅᒋ ᓂᐱᑦ ᐅ ᒋᔅᒋᓄᐊᒧᐛᑭᓐ᙮ ᒥᒄ ᒪᒃ ᓇᒪ ᐅᒋ ᐃᔅᒋᔄᑯᐱᓇ ᒋᓴᔅ ᒐ ᐊᑲ ᐅᒋ ᓂᐱᔨᒋ᙮ ᒋ ᐃᑕᐤ, “ᓇᑐᐛᔨᒪᐅᑕ ᐊᔅᒄ ᒐᒋ ᐱᒪᑎᓯᑦ ᑎᑯᓯᓄᒐ, ᑕᓐ ᒪᒃ ᒐ ᐃᑎᔨᓐ ᒋᔾ ?”
24ᐊᐅᑯᓐ ᐅ ᒋᔅᒋᓄᐊᒧᐛᑭᓐ ᑲ ᑎᐸᑕᐧᒃ ᐅᔭ ᒐᒂᔪᐛ, ᑭᔭ ᑲ ᒥᓯᓇᐊᐧᒃ ᐅᔭ ᒐᒂᔪᐛ᙮ ᒋ ᒋᔅᒐᔨᒪᓄᐤ ᒪᒃ ᐊ ᑕᑈᒥᑭᓂᔨᒡ ᒥᓯᐛ ᑕᓐ ᑲ ᐃᓯ ᐎᑕᐧᒃ᙮
ᐊ ᐊᑎ ᒋᓯᐱᔨᒡ ᐅ ᒥᔽᒋᒧᐅᓐ
25ᒥᒐᓂᔪᐤ ᒪᒃ ᐃᔭᐱᒡ ᑯᑎᒃ ᒐᒂᔪᐤ ᒋᓴᔅ ᐊᒋ ᐃᑐᑕᐧᒃ᙮ ᒥᓯᐛ ᐸᐸᐃᒄ ᐛᐎᑕᑭᓄᐅᒋ ᒐᒂᔪᐛ ᑕᓐ ᑲ ᐃᑎᑦ, ᓇᒪ ᒋᐸ ᐅᒋ ᑕᐱᔅᑕᐛ ᐅᑕ ᐊᔅᒋᒡ ᐅᓯᑕᑭᓄᐅᒋ ᒥᓯᓇᐃᑭᓇ᙮
Currently Selected:
ᒠᓐ 21: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
