ᒐᓂᓯᔅ 31
31
ᒐᑭᑉ ᑲ ᓂᑭᑕᑦ ᓚᐸᓇ
1ᒐᑭᑉ ᒋ ᐸᑎᒻ ᑲ ᐃᔅᒋᔄᔨᒋ ᓚᐸᓇ ᐅᑯᓯᔪᐛ, “ᒥᓯᐛ ᒐᒂᓂᔪᐤ ᒐᑭᑉ ᒋ ᐅᑎᓂᒺᐤ ᒍᑕᐎᓄᐛ ᑲ ᑎᐸᔨᑎᒥᔨᒋ᙮ ᒋ ᐛᔪᑎᓯᐛᒐᐛᐤ ᒍᑕᐎᓄᐛ ᑲ ᑎᐸᔨᑎᒥᔨᒋ᙮” 2ᒋ ᒋᔅᒐᔨᒪᐤ ᒐᑭᑉ ᐊᑲ ᒥᔪᐃᑕᔨᒥᑯᑦ ᓚᐸᓇ ᒧᔭᒻ ᐅᔅᑭᒡ ᑲ ᐃᑐᑕᑯᑦ᙮
3ᐊᑯ ᐅᑎᐸᔨᒋᒐᐛ ᒂ ᐃᑎᑯᑦ, “ᑲᐤ ᐊᓐᑕ ᒐ ᐃᑐᑕᔨᓐ ᑲ ᐎᒋᒡ ᒋᑦ ᐊᓂᔅᑯᑕᐸᓐᒡ, ᐊᓐᑕ ᐊᓄᒡ ᐛᒋᒡ ᒋᐧᑲᓂᓯᒡ᙮ ᓂᑦ ᐊᓱᑎᒪᒐᓐ ᒐ ᑭᓄᐛᔨᒥᑕᓐ᙮”
4ᐊᑯ ᒐᑭᑉ ᒋ ᐃᑎᓴᐛᐤ ᐅᑦ ᐊᐱᒋᐊᑭᓇ ᒐᒋ ᐎᑎᒧᐛᔨᒋ ᕋᐃᒍᓚ ᑭᔭ ᓕᐊᔨᒋ ᒐᒋ ᑎᑯᓯᓂᔨᒋ ᓂᑕᐅᒋᑕᑭᓂᒡ ᐊᓐᑕ ᑲ ᒥᒋᓱᔨᒋ ᐅᑦ ᐊᐛᓯᓯᒪ᙮ 5ᐃᔅᐱ ᑕᑯᓯᓂᔨᒋ ᒂ ᐃᑕᑦ, “ᓂ ᒋᔅᒐᔨᒪᐤ ᐊᑲ ᒥᔪ ᐃᑕᔨᒥᑦ ᒍᑕᐎᐛᐤ ᒧᔭᒻ ᐅᔅᑭᒡ ᑲ ᑐᑐᐅᑦ᙮ ᒥᒄ ᓇᒪ ᓂ ᑯᔅᑕᒋᓐ, ᐛᔅ ᐊᓂᔭ ᑲ ᐊᑐᔅᒐᔅᑐᐛᑦ ᒋᓴᒪᓂᑐᐛ ᓄᑕᐎᔾ, ᓇᒪ ᓂ ᐅᒋ ᓂᑭᑎᑯᔪᐛ᙮ ᓇᓂᑎᒻ ᐊ ᑕᐤ ᐊ ᑕᐅᒡ᙮ 6ᑕᐱᔅᑯᓐ ᒋ ᒋᔅᒐᔨᑕᓇᐛᐤ ᑲ ᐃᔅᐱᔅ ᒥᔅᑎ ᐊᑐᔅᒐᔅᑐᐅᒃ ᒍᑕᐎᐛᐤ᙮ 7ᒥᒄ ᓇᒪ ᐅᒋ ᒥᔪᐃᑕᑎᓯᐤ, ᐸᐃᑯᔪᐛᐤ ᑕᑥᐤ ᒋ ᒥᔅᑯᑐᓂᒻ ᓂᑲᓂᔪᐅᓂᔪᐤ᙮ ᒥᒄ ᓇᒪ ᐅᒋ ᒥᔨᑯᐤ ᒋᓴᒪᓂᑐᐛ ᒐᒋ ᐊᐧᑯᐃᑦ᙮ 8ᐃᔅᐱ ᐊᔅᒋᔄᒋ ᓚᐸᓐ ᒐᒋ ᑎᐸᔨᒥᒋ ᑲ ᐸᐸᑕᐅᓯᔨᒋ ᐊᐛᓯᓴ ᒧᔭᒻ ᓂᑲᓂᔪᐅᓂᔪᐤ, ᐊᑯ ᒥᒄ ᐊ ᐸᐸᑕᐅᓯᔨᒋ ᐊᐛᓯᓴ ᒋ ᐃᔪᔪᐛ᙮ ᐃᔅᐱ ᐊᔅᒋᔄᒋ ᒐᒋ ᑎᐸᔨᒥᒋ ᑲ ᐸᐱᓯᓇᓯᔨᒋ ᐊᐛᓯᓴ ᒧᔭᒻ ᓂᑲᓂᔪᐅᓂᔪᐤ, ᐊᑯ ᒥᒄ ᐊ ᐸᐱᓯᓇᓯᔨᒋ ᐊᐛᓯᓴ ᒋ ᐃᔪᔪᐛ᙮ 9ᐊᑯ ᒋ ᐛᐸᑕᓇᐛᐤ ᐎᔾ ᐊᓂᔭ ᒋᓴᒪᓂᑐᐤ ᒂ ᐅᑎᓂᒺᑦ ᒍᑕᐎᐛᐛ ᐅᑦ ᐊᐛᓯᓯᒥᔪᐛ ᑭᔭ ᓂᔾ ᒂ ᒥᔨᑦ᙮
10ᒪᒂᒡ ᑲ ᐎᓴᑯᒡ ᐊᐛᓯᓯᒡ ᓂᒋ ᐳᐛᒧᓐ ᑭᔭ ᓂᒋ ᐛᐱᒪᐅᒡ ᐊ ᐸᐸᑕᐅᓯᒡ ᑭᔭ ᐊ ᐸᐱᒥᓯᓇᓱᒡ ᓇᐸ ᒥᔅᑐᓯᒡ ᐊ ᐎᓴᑯᒡ, 11ᐊᑯ ᒋᓴᒪᓂᑐᐤ ᐅᑦ ᐊᓐᒋᓂᒪ ᓂᒋ ᐃᔨᒥᑯᔪᐛ ᓂᐳᐛᒧᐅᓂᒡ ᑭᔭ ᓂᒋ ᐃᑎᑯᔪᐛ, ‘ᒐᑭᑉ,’ ᑭᔭ ᒂ ᐃᑎᒃ, ‘ᒐᒂᓐ ?’ 12ᒂ ᐃᔅᒋᔄᑦ, ‘ᒋ ᑕᐱᒥᒡ ᐊᐛᓯᓯᒡ, ᒥᓯᐛ ᐊᓐᒡ ᒥᔅᑐᓯᒡ ᐛᓴᑯᐅᒡ ᐸᐸᑕᐅᓯᐅᒡ ᑭᔭ ᐸᐱᒥᓯᓇᓱᐅᒡ᙮ ᓂ ᑐᑕᓐ ᐅ ᒐᒋ ᐃᓯᓇᒂᒡ ᐛᔅ ᓂᒋ ᐛᐸᑎᒺᓐ ᐊᓯ ᐎᔭᓯᒥᔅᒃ ᓚᐸᓐ᙮ 13ᓂᔾ ᐅ ᒋᓴᒪᓂᑐᐤ ᐊᓐᑕ ᐸᑕᓪ ᑲ ᓄᑯᓯᔅᑕᑕᓐ, ᐊᑯᑕ ᑲ ᐳᐅᓐᑦ ᐱᒥᔾ ᐊᓐᑕ ᐊᓯᓂᒡ ᒐ ᒋᔅᑕᔨᒥᔨᓐ᙮ ᐊᑯᑕ ᐃᔭᐱᒡ ᑲ ᐊᓱᑎᒧᔨᓐ ᒐᒋ ᐊᔭᒥᐊᔅᑐᐎᓐ᙮ ᐊᑯ ᓇᐊᐎᔾ ᑭᔭ ᑲᐤ ᐊᓐᑕ ᒐ ᐃᑐᑕᔨᓐ ᐊᔅᒋᒡ ᑲ ᐅᒋ ᐃᔪᐎᔨᓐ᙮’ ”
14ᕋᐃᒍᓪ ᑭᔭ ᓕᐊ ᒂ ᐃᑕᒡ, “ᓇᒪ ᓂᐸᓱᐛᔨᑕᓇᓐ ᒐᒋ ᒥᔨᒥᑦ ᓄᑕᐎᓇᓐ ᒐᒂᓂᔪᐤ᙮ 15ᒧᔭᒻ ᒪᓐᑕᐛ ᓂᑦ ᐃᓱᑎᓂᑯᓇᓐ᙮ ᒋ ᑕᐛᒐᐤ ᓂᔭᓇᓇ ᑭᔭ ᒥᓯᐛ ᒋ ᒪᔅᑎᓂᒻ ᓱᓇᔭᔪᐤ ᑲ ᒋᓯᐧᑯᐛᑭᓄᐅᑦ ᓂᔭᓐ ᐅᒡ᙮ 16ᐊᑯ ᒥᓯᐛ ᐊᓂᔭ ᑲ ᐅᑎᓂᒺᑦ ᒋᓴᒪᓂᑐᐤ ᓄᑕᐎᓇᓇ ᐅᐛᔪᑎᓯᐅᓂᔪᐤ, ᓂᑦ ᐊᐛᓯᒥᓇᓐᒡ ᑭᔭ ᓂᔭᓐ ᓂ ᑎᐱᔨᐛᐅᓯᓇᓐ᙮ ᐊᑯ ᐃᑐᑎᒻ ᒥᒄ ᒐᒂᓂᔪᐤ ᑲ ᐃᑎᓱᒥᔅᒃ ᒋᓴᒪᓂᑐᐤ ᒐᒋ ᐃᑐᑎᒧᑦ, ᒋᑭ ᐎᒐᐅᑎᓇᓐ᙮”
17ᐊᑯ ᒐᑭᑉ ᓂᔭᐎᑦ, ᒂ ᐳᓴᐊᑦ ᐊ ᓂᓯᔨᒋ ᐎᐛ ᑭᔭ ᐅᑦ ᐊᐛᓯᒧᐛᐛ ᐊᓐᑕ ᑲᐱᔎᐅᑭᓂᔨᒋ, 18ᒋ ᔅᑐᑕᐊᐤ ᒥᓯᐛ ᐅᑦ ᐊᐛᓯᓯᒪ ᑭᔭ ᒥᓯᐛ ᐅᐛᔪᑎᓯᐅᓐ ᑲ ᑲᓂᔪᐅᑦ ᑭᔭ ᒥᓯᐛ ᐊᐛᓯᓴ ᑲ ᐅᑎᓇᑦ ᐊᓐᑕ ᐸᑕᓐ ᐊᕋᒻ, ᒂ ᔅᑐᑕᑦ ᒐ ᓂᑐᐛᐱᒪᑦ ᐅᑕᐎᔭ ᐊᐃᓯᑲ ᐊᓐᑕ ᑲᐃᓇᓐ ᐊᔅᒋᒡ᙮
19ᒥᒄ ᐊᒺᔭ ᒐᑭᑉ ᑭᔭ ᐊ ᐸᐃᑯᔅᑲᓇᓯᑦ ᑲᐃᓇᓐ ᐃᔅ ᐃᑐᑕᒡ, ᕋᐃᒍᓪ ᐅᑕᐎᔭ ᐎᒋᔨᒡ ᒋ ᐱᒐᐛᐤ ᑭᔭ ᒂ ᒋᒧᑎᑦ ᒪᓂᑐᐛ ᐅᑕᐎᔭ ᑲ ᑎᐸᔨᒪᔨᒋ᙮ ᒧᔭᒻ ᓇᒪ ᐅᒋ ᑕᐤ ᐎᒋᒡ ᓚᐸᓐ, ᒋ ᓇᒋ ᐱᔅᑯᔄᐤ ᐅᒪᔭᑕᓂᓴᒪ᙮ 20ᓇᒪ ᐅᒋ ᐎᑎᒧᐛᐤ ᓚᐸᓇ ᐛ ᔅᑐᑕᑦ ᒐᑭᑉ, ᒥᒄ ᒋ ᐎᔭᓯᒪᐤ᙮ ᒋᒧᑦ ᒐ ᐃᑐᑕᑦ ᒪᒂᒡ ᐊᑲ ᐅᒋ ᑕᔨᒋ ᓚᐸᓇ᙮ 21ᒋ ᐅᑎᓂᒻ ᒥᓯᐛ ᒐᒂᔪᐤ ᑲ ᑎᐱᔨᐛᐅᓯᑦ ᑭᔭ ᒋ ᐃᔭᓯᒋᐤ ᒐ ᐃᑐᑕᑦ᙮ ᒋ ᐊᓱᐛᐤ ᔪᑉᕆᑎᔅ ᓯᐱᔪᐤ ᑭᔭ ᑭᓕᐊᑦ ᐱᔅᑯᑎᓇᐛ ᒋ ᐃᓯ ᔅᑐᑕᐤ᙮
ᓚᐸᓐ ᓇᓴᐛᐤ ᒐᑭᐸ
22ᑲᒋ ᓂᔅᑐ ᒋᓯᑲᔨᒡ, ᒋ ᐎᑎᒧᐛᑭᓄᐤ ᓚᐸᓐ ᒐᑭᐸ ᑲ ᔅᑐᑕᔨᒋ᙮ 23ᐊᑯ ᓚᐸᓐ ᒂ ᐎᓴᒪᑦ ᐎᐧᑲᓂᓴ ᑭᔭ ᒪᒧᐤ ᒋ ᓇᓴᐛᐅᒡ ᒐᑭᐸ ᐃᔅᐱᔅ ᓂᔄᐅᑕᒡ ᑕᑐᐤ ᒋᓯᑲᐛ᙮ ᑭᓕᐊᑦ ᐱᔅᑯᑎᓇᐛ ᐊᑯᑕ ᑲ ᐸᔄᐱᒪᑦ᙮ 24ᒥᒄ ᒪᒂᒡ ᑕᐱᔅᑲᔨᒡ ᒋ ᐃᔭᒂᒥᑯᐤ ᒋᓴᒪᓂᑐᐛ ᐅᐳᐛᒧᐅᓂᒡ ᒐ ᐊᑲ ᒐᒂᔪᐤ ᒥᒋ ᐃᑕᑦ ᒐᑭᐸ᙮
25ᑭᓕᐊᑦ ᐱᔅᑯᑎᓇᒡ ᓚᐸᓐ ᒋ ᐅᑎ ᑕᐤ ᒐᑭᐸ ᐊᓐᑕ ᑲ ᐎᒋᔨᒋ᙮ ᓚᐸᓐ ᐃᔭᐱᒡ ᐊᑯᑕ ᑲ ᐎᒋᑦ ᐊᓯᒡ ᐎᐧᑲᓂᓴ᙮ 26ᐎᔭᐱᓂᔨᒡ ᓚᐸᓐ ᒋ ᓂᑐᐛᐱᒪᐤ ᒐᑭᐸ ᑭᔭ ᒂ ᐃᑕᑦ, “ᒐᒂᓐ ᐛᒋ ᐎᔭᓯᒥᔨᓐ ᑭᔭ ᐛᒋ ᔅᑐᑕᐃᑥᐤ ᓂᑕᓂᓯᒡ ? 27ᒐᒂᓐ ᐛᒋ ᒋᒧᑦ ᐅᒋ ᔅᑐᑕᔨᓐ ᑭᔭ ᐛᒋ ᐎᔭᓯᒥᔨᓐ ? ᒐᒂᓐ ᐛᒋ ᐊᑲ ᐎᑎᒧᐎᔨᓐ ? ᐎᑎᒧᐎᓇᒂ ᐛ ᔅᑐᑕᔨᓐ, ᓂᐸ ᑐᑕᓇᐱᓐ ᒐᒋ ᒥᔽᔨᑕᑭᓄᐅᒡ, ᒋᐸ ᓂᑭᒧᐱᓐᒡ ᓂᑭᒧᐅᓇ ᐃᔪᒡ᙮ ᑯᑎᑭᒡ ᒋᐸᒪᑥᒐᐱᓐᒡ ᑕᐛᐃᑭᓇ ᑭᔭ ᒋᔍᐛᐱᒋᑭᓇ᙮ 28ᓇᒪ ᒋ ᐅᒋ ᒥᔨᓐ ᒐᒋ ᐛᒋᐊᒥᒂᐤ ᓂᑕᓂᓯᒡ ᑭᔭ ᓄᔅᒋᒥᒡ ᐃᔅᐱ ᑲ ᔅᑐᑕᒡ᙮ ᓇᒪ ᐃᑈᐧᑲᐅᓐ ᐅ ᑲ ᐃᓯ ᐃᑐᑎᒥᓐ᙮ 29ᓂ ᑭᓄᐛᔨᑕᓐ ᓱᐧᑲᑎᓯᐅᓐ ᒐᒋ ᐊᐧᑯᐃᑕᓐ, ᒥᒄ ᑕᐱᔅᑲᔨᒡ ᓂᒋ ᐃᔭᒂᒥᒄ ᒍᑕᐎᔾ ᐅᒋᓴᒪᓂᑐᒪ ᒐ ᐊᑲ ᐊᐧᑯᐎᑕᓐ᙮ 30ᓂ ᒋᔅᒐᔨᑕᓐ ᐊᓐ ᐛᒋ ᔅᑐᑕᔨᓐ ᐛᔅ ᒋᒋᐛ ᒋ ᐱᒂᐃᑕᓐ ᒐᒋ ᒋᐛᔨᓐ, ᒥᒄ ᒐᒂᓐ ᐛᒋ ᒋᒧᑎᔨᓐ ᓂᒪᓂᑐᒥᒡ ?”
31ᒐᑭᑉ ᐛᑎᒧᐛᑦ ᓚᐸᓇ, “ᓂᒋ ᑯᔅᑕᒋᓐ, ᐊᐅᑯᓐ ᐛᒡ ᐊᑲ ᐎᑎᒪᑕᓐ᙮ ᑲᐤ ᒋᑭ ᐅᑎᓇᐤ ᐅᑕᓂᓴ ᔅᒋ ᐃᑕᔨᒥᑎᓐ᙮ 32ᒥᒄ ᓇᒪ ᓂ ᐅᒋ ᐅᑎᓇᐅᒡ ᒋᒪᓂᑐᒥᒡ᙮ ᒥᔅᑯᐅᑕ ᐅᑕ ᐊᐛᓐ ᑲᓄᐛᔨᒪᑦ, ᒋᑭ ᓂᐸᐊᑭᓄᐤ᙮ ᐊ ᑭᓄᐛᐱᒥᔅᑭᒡ ᒋᐧᑲᓂᓯᓄᐅᒡ, ᓇᓂᑐᐛᐸᑕ ᒥᒄ ᒐᒂᓐ ᑕᐱᔨᐛᐅᓯᓐ ᑭᔭ ᒐ ᐅᑎᓂᒥᓐ ᑕᐸᔨᑎᒥᓐ᙮” ᓇᒪ ᐅᒋ ᒋᔅᒐᔨᒪᐤ ᒐᑭᑉ ᐊᓂᔭ ᕋᐃᒍᓚ ᑲ ᒋᒧᑎᔨᒋ ᓚᐸᓇ ᐅᒪᓂᑐᒥᔪᐛ᙮
33ᐊᑯ ᓚᐸᓐ ᒂ ᐃᑐᑕᐛᑦ ᑭᔭ ᓂᔭᓂᑐᐛᐸᒐᐛᑦ ᒐᑭᐸ ᐅᐱᒍᐎᔭᓂᒋᐛᐱᒡ᙮ ᓕᐊᔨᒋ ᒥᓐ ᐅᐱᒍᐎᔭᓂᒋᐛᐱᒡ ᐊᑐᑕᐛᑦ ᑭᔭ ᐊ ᓂᓯᔨᒋ ᑯᐸᓇᔎᐛ ᐅᐱᒍᐎᔭᓂᒋᐛᐱᒡ, ᒥᒄ ᓇᒪ ᐅᒋ ᒥᔅᑯᐛᐤ ᐅᒪᓂᑐᒪ᙮ ᕋᐃᒍᓚ ᒥᓐ ᐅᐱᒍᐎᔭᓂᒋᐛᐱᒡ ᐊᑐᑕᐛᑦ᙮ 34ᐊᒺᔭ ᐱᒐᔨᒋ ᓚᐸᓇ, ᕋᐃᒍᓪ ᒋ ᐅᑎᓇᐤ ᒪᓂᑐᐛ ᑭᔭ ᒋᐱᑕᐛᐤ ᐊᓐᑕ ᑲᐱᔎᐅᑭᓂᔨᒋ ᐅᐱᓴᑭᓂᒥᐅᑎᔨᒡ ᑭᔭ ᒂ ᐱᑎᑯᔅᑯᐅᒪᑦ᙮ ᒋ ᓇᓂᑐᐛᐸᒐᐛᐤ ᓚᐸᓐ ᐊᓐᑕ ᒥᓯᐛ ᐱᒍᐎᔭᓂᒋᐛᐱᒡ, ᒥᒄ ᓇᒪ ᐅᒋ ᒥᔅᑯᐛᐤ ᐅᒪᓂᑐᒪ᙮
35ᕋᐃᒍᓪ ᒋ ᐃᑕᐤ ᐅᑕᐎᔭ, “ᓄᑕ, ᐊᑲ ᒋᔄᐱᔅᑐᐎ ᐊᑲ ᒋ ᐱᓯᑯᔭᓐ ᒐᒋ ᐛᐸᑎᔨᑕᓐ ᐊ ᒋᔅᑕᔨᒥᑕᓐ, ᐛᔅ ᐅ ᓂᑭᑎᑯᓐ ᓂᒥᐧᒄ᙮”
36ᐊᑯ ᒐᑭᑉ ᒐᔄᐱᑦ ᑭᔭ ᒐᐧᑲᓇᒂᐊᑦ ᓚᐸᓇ ᑭᔭ ᒂ ᐃᑕᑦ, “ᒐᒂᓐ ᑲ ᐅᓂᑐᑎᒥᓐ ? ᒐᒄ ᐎᓱᐛᐅᓐ ᑲ ᐱᑯᓂᒪᓐ ᑲ ᐅᒋ ᓇᓴᐎᔨᓐ ? 37ᐛᔅ ᒥᓯᐛ ᔅᒋ ᓇᓂᑐᐛᔨᒐᓐ ᓂᑦ ᐊᐱᒋᑕᐅᓂᒡ ᑭᔭ ᓇᒪ ᒋ ᐅᒋ ᒥᔅᑲᓐ ᒐᒂᓐ ᒋᒋᒡ ᑲ ᐅᒋ ᒋᒧᑎᒪᑯᔨᓐ᙮ ᑲᒋ ᒋᒧᑎᒪᑯᐅᓇ ᒐᒂᓐ, ᐛᐸᑎᔨᒡ ᒋᐧᑲᓂᓯᓄᐅᒡ ᐊᓐᒡ ᐛᒐᐅᔅᒡ ᑭᔭ ᓂᔾ ᐛᒐᐅᒡ ᑭᔭ ᐎᔨᐛᐤ ᒋᑭ ᐎᔭᔨᑎᒧᒡ ᐊᐛᓐ ᐊᓂᓯᔭᐧᒄ ᑎᔭᑈᒂ᙮
38ᒪᒂᒡ ᓂᓱᔪᐛᐳᓇ ᑲ ᑕᔭᓐ ᐊ ᑕᔨᓐ, ᓂᒋ ᒥᔪ ᑭᓄᐛᔨᒪᐅᒡ ᒋᒪᔭᑕᓂᓯᒥᒡ ᑭᔭ ᒋᒥᔅᑐᓯᒥᒡ᙮ ᓇᓂᑎᒻ ᒋ ᒥᔪᐱᔪᐅᒡ ᐊᓂᑕᐅᓴᒡ ᐊᐛᓯᓯᒡ᙮ ᓇᒪ ᐅᒋ ᐅᓇᐅᒡ ᒪᔭᑕᓂᓴ ᑭᔭ ᒪᒃ ᒥᔅᑐᓯᓴ ᐊ ᐃᔪᔨᒋ᙮ ᓇᒪ ᓂᑕ ᐛᐛᒡ ᓂᐸᐊᐤ ᓇᐸ ᒥᔅᑐᔅ ᒐᒋ ᐅᑎᓂᒪᓱᔭᓐ ᒥᒋᒻ᙮ 39ᓇᒪ ᒋ ᐅᒋ ᐸᑥᑎᓐ ᐊᓐᒡ ᑲ ᓂᐸᐃᑯᒡ ᑯᑎᑲ ᐊᐛᓯᓴ᙮ ᓂᔾ ᓂᒋ ᐱᑎᔅᑕᐅᓱᓐ ᐊᓐ ᑲ ᐅᓂᐃᑦ᙮ ᔅᒋ ᓂᑐᐛᔨᒥᓐ ᒐᒋ ᒋᓯᐧᑲᓱᔭᓐ ᐊᓐ ᑲ ᒋᒧᑎᓇᓄᐎᒡ ᒪᒂᒡ ᒐᓯᑲᒋ ᑭᔭ ᒪᒃ ᑕᐱᔅᑲᒋ᙮ 40ᓂᒋ ᐛᓂᐧᑭᓱᓐ ᒐᓯᑲᒋ ᑭᔭ ᓂᒋ ᓯᑭᒋᓐ ᑕᐱᔅᑲᒋ ᑭᔭ ᓇᒪ ᓂ ᐅᒋ ᓂᐸᓐ᙮ 41ᓂᓱᔪᐛᐳᓇ ᐃᔅᐱᔅ ᓂᒋ ᑕᓐ ᒋᒋᒡ, ᓇᐅᓴᐱᐳᓇ ᔅᒋ ᐊᑐᔅᒐᔅᑕᑎᓐ ᐊᑯ ᒪᒃ ᒐᒋ ᐎᒋᒥᒂᐤ ᐊ ᓂᓯᒡ ᒋᑕᓂᓯᒡ ᑭᔭ ᐊᓱᑕᒡ ᑕᑐᐳᓇ ᐊᐛᓯᓯᒡ ᐅᒡ ᐊᓐᒡ ᑲ ᒥᔨᓐ ᒧᔭᒻ ᒋᓯᐧᑲᑐᐅᓐ᙮ ᐸᐃᑯᔪᐤ ᑕᑥᐤ ᔅᒋ ᒥᔅᑯᑐᓇᓐ ᓂᑲᓂᔪᐅᓐ᙮ 42ᐊᑲ ᐅᒋ ᑭᓄᐛᔨᒥᑕᒂ ᐊᐃᓯᒃ ᑭᔭ ᐊᑉᕋᐊᒻ ᐅᒋᓴᒪᓂᑐᒧᐛᐛ, ᒐᔅᑎᓇᔅ ᐱᓯᒄ ᒋᐸ ᒋᑎᓴᐅᓇᐱᓐ᙮ ᒋ ᐛᐸᑎᒻ ᒋᓴᒪᓂᑐᐤ ᑲ ᐃᓯ ᐎᓯᒐᔨᑎᒧᒡ ᑭᔭ ᑲ ᐃᓯ ᐅᔅᑯᐎᔭᓐ ᐊ ᐊᑐᔅᒐᔭᓐ᙮ ᐊᐅᑯᓐ ᑲ ᐅᒋ ᐛᐸᑎᔨᔅᒃ ᐅᑎᐸᔅᑯᓂᒐᐅᓐ᙮”
ᐅᓂᔅᑯᒥᑐᐅᓄᐛᐤ ᒐᑭᑉ ᑭᔭ ᓚᐸᓐ
43ᐊᑯ ᓚᐸᓐ ᐊᑕᑦ ᒐᑭᐸ, “ᓂᔾ ᐊᓐᒡ ᓂᑕᓂᓯᒡ ᐅᔅᒋᓂᒋᔎᐅᒡ ᑭᔭ ᓂᔾ ᐊᓐᒡ ᓄᔅᒋᒥᒡ ᐊᐛᓯᒡ, ᐃᔭᐱᒡ ᓂᔾ ᒥᓯᐛ ᓂ ᑎᐱᔨᐛᐅᓯᓐ ᐊᓐᒡ ᐊᐛᓯᓯᒡ, ᒥᓯᐛ ᐅᑕ ᒐᒂᓐ ᐎᔭᐸᑎᒥᓐ ᓂᔾ ᓂ ᑎᐱᔨᐛᐅᓯᓐ᙮ ᒥᒄ ᐊᓄᒡ ᓇᒪ ᒐᒂᓐ ᓂᒋ ᑐᑕᓐ ᒐᒋ ᑲᐤ ᑲᔅᑎᓂᒂᐤ ᓂᑕᓂᓯᒡ ᑭᔭ ᐅᑦ ᐊᐛᓯᒧᐛᐛ᙮ 44ᐊᓂᓯᔭᐧᒄ ᑐᑕᑕᐤ ᓂᔅᑯᒥᑐᐅᓐ, ᒋᐱᑕᐱᔅᒋᓂᒐᑕᐤ ᒐᒋ ᒋᔅᒋᑎᒪᐧᒄ ᒋᓂᔅᑯᒥᑐᐅᓄᐤ᙮”
45ᒋ ᓂᔅᑯᒪᐤ ᓚᐸᓇ ᒐᑭᑉ, ᒂ ᐅᑎᓇᑦ ᐊᓯᓂᔭ ᑭᔭ ᒐ ᒥᔭᑦ ᒐᒋ ᒋᔅᑕᔨᑕᒡ ᐅᓂᔅᑯᒥᑐᐅᓄᐛᐤ᙮ 46ᐊᑯ ᒐᑭᑉ ᒂ ᐃᑕᑦ ᐎᐧᑲᓂᓴ ᒐᒋ ᒪᒧᓴᒋᓇᔨᒋ ᐊᓯᓂᔭ ᑭᔭ ᒐᒋ ᒋᐱᑕᐱᔅᒋᓂᒐᔨᒋ᙮ ᑲᒋ ᒋ ᔅᑐᑕᑭᓄᔨᒋ, ᓚᐸᓐ ᑭᔭ ᒐᑭᑉ ᑭᔭ ᐎᐧᑲᓂᓱᐛᐛ ᒋ ᐎᒋᒥᒋᓱᒥᑐᐅᒡ ᐊᓐᑕ ᒥᒋᒪ ᒋᐱᑕᐱᔅᒋᓂᑭᓂᒡ᙮ 47ᐊᕋᒥᒃ ᐃᔨᒧᐅᓐ ᐊ ᐃᓯ ᐃᔨᒥᑦ ᓚᐸᓐ, “ᒋᑲᕐ-ᓴᐊᑐᑕ” ᒋ ᐃᓯᓂᐧᑲᑎᒻ ᐊᓂᔭ ᒋᐱᑕᐱᔅᒋᓂᑭᓇ, “ᑲ ᐱᔅᑯᔅᑕᒋ ᒐᒋ ᒋᔅᒋᑎᒪᐧᒄ” ᐊ ᐃᑥᒥᑲᒡ᙮ ᐊᑯ ᒐᑭᑉ ᒋ ᐃᑉᕈᐅ-ᐃᔅᒋᓱᑎᒻ “ᑲᓕᑦ”, ᐊ ᐃᓯᓂᐧᑲᑎᐧᒃ, “ᑲ ᐱᔅᑯᔅᑕᒋ ᒐᒋ ᒋᔅᒋᑎᒪᐧᒄ” ᐃᔭᐱᒡ ᐊ ᐃᑥᒥᑲᒡ᙮ 48ᐊᑯ ᓚᐸᓐ ᐊᔅᒋᔄᑦ, “ᐅ ᒋᐱᑕᐱᔅᒋᓂᑭᓐ ᐊᐅᑯᐤ ᒋᔅᒋᓄᐛᒋᑕᑭᓐ ᓂᔅᑯᒥᑐᐅᓐ ᐊᓄᒡ ᑲ ᐃᑐᑎᒪᐧᒄ᙮” ᐊᐅᑯᓐ ᑲᓕᑦ ᑲ ᐅᒋ ᐃᓯᓂᐧᑲᑕᑭᓄᐅᒡ ᐊᓐ ᐃᑕᐅᓐ᙮ 49ᒥᔅᐸ ᐃᔭᐱᒡ ᒋ ᐃᓯᓂᐧᑲᑎᒻ, “ᑲ ᓂᑐᐛᐱᓇᓄᐅᒡ” ᐊ ᐃᑥᒥᑲᒡ᙮ ᐛᔅ ᒋ ᐃᔅᒋᔄᐤ ᓚᐸᓐ, “ᑭᒪ ᑭᓄᐛᐱᒥᑕᐧᒄ ᐅᑎᐸᔨᒋᒐᐤ ᒪᒂᒡ ᑕᑎᐸᓐ ᑕᔭᒂ᙮ 50ᐊᐧᑯᐃᑥᐛ ᓂᑕᓂᓯᒡ ᑭᔭ ᒪᒃ ᐎᒋᒥᑥᐛ ᑯᑎᑭᒡ ᐃᔎᐅᒡ, ᐊᑎᓱᐧᒄ ᐊᑲ ᒋᔅᒐᔨᑎᒪᓐ, ᒐ ᒋᔅᒋᔨᓐ ᐊᓐ ᑲᓄᐛᐱᒥᑕᐧᒄ ᒋᓴᒪᓂᑐᐤ᙮”
51ᓇᓇᒐ ᓚᐸᓐ ᒋ ᐃᑕᐤ ᒐᑭᐸ, “ᒪᐅ ᒋᐱᑕᐱᔅᒋᓂᑭᓐ ᑭᔭ ᒋᔅᒋᓄᐛᒋᑕᑭᓐ᙮ ᒋᑭ ᒋᔅᒋᑯᓇᓄᐤ ᒋᓂᔅᑯᒥᑐᐅᓄᐤ ᐊᓐ ᑲ ᐃᑐᑎᒪᐧᒄ᙮ 52ᒋᑭ ᒋᔅᒋᑯᓇᓄᐤ ᐅᔭ ᒐ ᐊᑲ ᐊᓱᑕᔭᐧᒄ ᐊᐱᒥᓯᓇᑕᒡ ᒐᒋ ᐊᐧᑯᐎᑐᔭᐧᒄ᙮ 53ᑭᒪ ᐊᑉᕋᐊᒻ ᐅᒋᓴᒪᓂᑐᒪ ᑭᔭ ᓇᐃᐅᕐ ᐅᒋᓴᒪᓂᑐᒪ ᑐᑕᑕᐧᒄ ᔭᐃᑕᔾ ᒐᒋ ᑭᓄᐛᔨᑎᒪᐧᒄ ᑲ ᐃᓯ ᓂᔅᑯᒥᑐᔭᐧᒄ᙮”
ᐊᑯ ᐊᓂᔭ ᐅᑕᐎᔭ ᐊᐃᓯᑲ ᒋᓴᒪᓂᑐᐛ ᑲ ᐊᔭᒥᐊᔅᑐᐛᔨᒋ ᐅᑦ ᐃᓯᓂᐧᑲᓱᓂᔨᒡ ᐅᒡ, ᒋ ᐊᓱᑎᒪᒐᐤ ᒐᑭᑉ ᒐᒋ ᑭᓄᐛᔨᑕᐧᒃ ᐅᒋᓴᓂᔅᑯᒧᐅᓐ᙮ 54ᐊᑯ ᒐᑭᑉ ᒂᓂᐸᐊᑦ ᐊᐛᓯᓴ ᑭᔭ ᒂ ᒥᑐᔅᑕᐊᒪᒐᑦ ᐊᓐᑕ ᐱᔅᑯᑎᓇᒡ, ᐊᑯ ᒂ ᓂᑐᒪᑦ ᐎᐧᑲᓂᓴ ᒐᒋ ᒥᒋᓱᔨᒋ᙮ ᑲᒋ ᒥᒋᓱᐅᒡ, ᒋ ᐸᐃᑯᑎᐱᔎᐅᒡ ᐊᓐᑕ ᐱᔅᑯᑎᓇᒡ᙮
55ᐎᐱᒡ ᒋ ᐅᓂᔪᐤ ᓚᐸᓐ ᒥᓐ ᒋᔭᒋᓴᐸᔭᔨᒡ ᒐᒋ ᔅᑐᑕᑦ᙮ ᒋ ᐅᒐᒪᐤ ᐅᑕᓂᓴ ᑭᔭ ᐅᔅᒋᒪ, ᐊᑯ ᒂ ᔅᑐᑕᑦ ᑭᔭ ᒐᐛᑦ᙮
Currently Selected:
ᒐᓂᓯᔅ 31: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
