ᒐᓂᓯᔅ 30
30
ᑲ ᓂᓯᔨᒋ ᐅᑯᓴ ᕋᐃᒍᓪ ᐱᓚᔨᒋ ᐅᒡ
1ᐃᔅᐱ ᒐᔅᒐᔨᑕᐧᒃ ᕋᐃᒍᓪ ᐊᑲ ᒋ ᓂᑕᐅᒋᐃᒪᑦ ᒐᑭᐸ ᐅᑦ ᐊᐛᓯᒥᔪᐛ, ᒋ ᐅᑕᔨᒪᐤ ᐎᐧᑲᓂᓴ ᓕᐊᔨᒋ᙮ ᒂ ᐃᑕᑦ ᒐᑭᐸ᙮ “ᐸᒋ ᒥᔾ ᐊᐛᓯᒡ ᑭᔭ ᒪᒃ ᓂᑭ ᐳᓂᐱᒪᑎᓯᓐ !”
2ᒐᑭᑉ ᒋ ᐃᑕᐤ ᐊᒋᓯᒧᑦ, “ᒐᒂᓐ ᓂᐸ ᒋ ᐃᑐᑕᓐ ? ᒋᓴᒪᓂᑐᐤ ᒥᒄ ᒋ ᒥᔨᐛᐤ ᐊᐛᓴ᙮ ᐎᔾ ᓇᒪ ᒋ ᓇᐃᒥᒄ ᒐᒋ ᐅᑦ ᐊᐛᓯᒧᐅᑦ᙮”
3ᕋᐃᒍᓪ ᒂ ᐃᑕᑦ, “ᒋᑭ ᒥᔨᑎᓐ ᐱᓚ ᓂᑯᐸᓇᔎᒻ, ᒐ ᐎᐸᒥᑦ ᐊᑯ ᒐᒋ ᑭᓄᐛᔨᒥᒄ ᐊᐛᔅ ᐎᔾ ᐅᒡ᙮”
4ᐊᑯ ᕋᐃᒍᓪ ᒂ ᒥᔭᑦ ᒐᑭᐸ ᐅᑯᐸᓇᔎᒪ ᐱᓚᔨᒋ ᒧᔭᒻ ᐎᐛ ᑭᔭ ᒂ ᐎᐸᒪᑦ ᒐᑭᑉ ᐱᓚᔨᒋ᙮ 5ᒋ ᐊᓱᐛᐱᒪᐅᓱᐤ ᐱᓚ ᑭᔭ ᒂ ᓂᑕᐅᒋᐊᑦ ᐅᑯᓯᒪᐛ᙮ 6ᕋᐃᒍᓪ ᒂ ᐃᔅᒋᔄᑦ, “ᒋ ᐛᐸᑎᔨᐛᐤ ᒋᓴᒪᓂᑐᐤ ᑲ ᑕᑈᐅᒡ᙮ ᒋᔅᒐᔨᑎᒻ ᑲ ᐃᓯ ᐱᑯᓴᔨᒧᐅᒡ ᑭᔭ ᓂᒋ ᒥᔨᒄ ᐅᑯᓯᒪᐛ᙮” ᐊᑯ ᑕᐊᓐ ᒂ ᐃᓯᓂᐧᑲᑕᑦ ᐊᓂᔭ ᓇᐸᓴ᙮
7ᓇᓇᒐ ᐱᓚ ᒥᓐ ᒋ ᐊᓱᐛᐱᒪᐅᓱᐤ ᑭᔭ ᒋ ᓂᑕᐅᒋᐃᒪᐤ ᑯᑎᑲ ᒐᑭᐸ ᐅᑯᓯᔪᐛ᙮ 8ᐊᑯ ᒂ ᐃᔅᒋᔄᑦ ᕋᐃᒍᓪ, “ᓂᒋ ᒪᓯᐊᐤ ᓂᐧᑲᓂᔅ ᒐᒋ ᐅᑎᑎᒧᒡ ᒋᓴᒪᓂᑐᐤ ᐅᐎᒋᐃᐛᐅᓐ ᑭᔭ ᓂᒋ ᑲᓂᔪᓐ᙮” ᐊᑯ ᓇᑉᑕᓕ ᒂ ᐃᓯᓂᐧᑲᑕᑦ ᐊᐛᓴ᙮
ᑲ ᓂᓯᔨᒋ ᐅᑯᓴ ᓕᐊ ᓯᓪᐸ ᐅᒡ
9ᑲᒋ ᓇᐅᔨᒋ ᓕᐊ ᐅᑦ ᐊᐛᓯᒪ, ᒋ ᐳᓂᐱᔪᐤ ᐊ ᐅᑦ ᐊᐛᓯᒥᑦ᙮ ᐊᑯ ᒂ ᒥᔭᑦ ᒐᑭᐸ ᐅᑯᐸᓇᔎᒪ ᓯᓪᐸᔨᒋ ᒧᔭᒻ ᐎᐛ᙮ 10ᐊᑯ ᓯᓪᐸ ᒂ ᓂᑕᐅᒋᐊᑦ ᐅᑯᓯᒪᐛ ᒐᑭᑉ ᐊ ᐅᑕᐎᒪᐅᑦ᙮ 11ᒂ ᐃᔅᒋᔄᑦ ᓕᐊ, “ᓂᒋ ᒥᔪᐱᔨᓐ” ᐊᑯ ᑲᑦ ᒂ ᐃᓯᓂᐧᑲᑕᑦ ᐅᑯᓴ᙮ “ᒥᔪᐱᔪᐤ” ᐊ ᐃᑥᒥᑲᒡ᙮
12ᓇᓇᒐ ᑯᑎᑲ ᒋ ᑕᔪᐛ ᐅᑯᓴ ᓯᓪᐸ ᒐᑭᑉ ᐊ ᐅᑕᐎᒪᐅᑦ᙮ 13ᐊᓱᕐ ᒂ ᐃᓯᓂᐧᑲᑕᑦ ᐊᐛᓴ ᓕᐊ᙮ “ᒥᔽᔨᑎᒻ” ᐊ ᐃᑥᒥᑲᒡ᙮ ᒂ ᐃᔅᒋᔄᑦ, “ᒋᒋᐛ ᓂ ᒥᔽᔨᑕᓐ᙮ ᑯᑎᑭᒡ ᐃᔎᐅᒡ ᒋᑭ ᑎᐸᒋᒧᐅᒡ ᐊᔅᐱᔅ ᒥᔽᔨᑎᒧᒡ᙮”
ᓕᐊ ᑲ ᓂᓯᔨᒋ ᐅᑯᓴ ᑭᔭ ᑲ ᐅᑕᓂᓯᑦ
14ᐸᐃᒂᐤ ᒐᓯᑲᔨᒡ, ᐃᔅᐱ ᐛᑎᒋᐱᒡ ᐃᔪᒡ ᑲ ᒪᐅᑕᒡ ᐸᒂᓯᑭᓂᒥᓇ, ᕈᐱᓐ ᒋ ᐃᑐᑕᐤ ᓂᑕᐅᒋᑕᑭᓂᒡ ᑭᔭ ᒋ ᒥᔅᑭᒻ ᓂᑕᐅᒋᑕᑭᓇ ᐊᓂᔭ ᐃᔎᐅᒡ ᒪᒋᒡ ᒐᒋ ᐎᒋᐃᑯᒡ ᒐᒋ ᐊᓱᐛᐱᒪᐅᓱᐅᒡ᙮ ᒂ ᐃᑐᑐᐛᑦ ᐅᑲᐎᔭ ᓕᐊᔨᒋ᙮ ᒋ ᐛᐸᑎᒺᐤ ᕋᐃᒍᓪ ᑭᔭ ᒋ ᐃᑕᐤ, “ᐸᒋ ᒥᔾ ᐊᓂᔭ ᐱᔅᒐ ᒋᑯᔅ ᑲ ᒥᔅᑲᐧᒃ ᓂᑕᐅᒋᑕᑭᓇ᙮”
15ᓕᐊ ᒋ ᐃᑕᐤ, “ᓇᒪ ᓇ ᐃᔅᐱᔪᐤ ᓴᔅ ᑲᒋ ᐅᑎᓂᑦ ᓂᐎᒋᒪᑭᓐ ? ᐊᓄᒡ ᐃᔭᐱᒡ ᒋ ᐎ ᐅᑎᓂᒺᓐ ᓂᑯᔅ ᐅᓂᑕᐅᒋᑕᑭᓇ᙮” ᕋᐃᒍᓪ ᐃᑕᐤ, “ᒥᔨᓇ ᒋᑯᔅ ᐅᓂᑕᐅᒋᑕᑭᓇ, ᒐ ᐎᐸᒥᑦ ᒐᑭᑉ ᐊᓄᒡ ᒐ ᑎᐱᔅᑲᔨᒡ᙮” ᐊᑯ ᓕᐊ ᒂ ᓇᐃᑕᐧᒃ᙮
16ᓇᓇᒐ ᐛᑕᑯᓯᔨᒡ, ᐃᔅᐱ ᒐᑭᑉ ᑕᑯᓯᐧᒃ ᑲ ᐊᑐᔅᒐᑦ ᓂᑕᐅᒋᑕᑭᓂᒡ ᐅᒡ, ᒋ ᓇᒋᓂᒋᔅᑯᐛᐤ ᓕᐊ ᑭᔭ ᒋ ᐃᑕᐤ, “ᒋᑭ ᐎᐸᒥᓐ ᐊᓄᒡ ᒐ ᑎᐱᔅᑲᒡ, ᐛᔅ ᓂᑯᔅ ᐅᓂᑕᐅᒋᑕᑭᓇ ᓂᒋ ᒋᓯᐧᑲᓱᐛᒐᐛᓐ ᒐᒋ ᐎᐸᒥᔨᓐ᙮” ᐊᑯ ᒐᑭᑉ ᒂ ᐎᐸᒪᑦ ᓕᐊᔨᒋ ᑕᐱᔅᑲᔨᒡ᙮
17ᒋᔅᒐᔨᒪᐤ ᒋᓴᒪᓂᑐᐤ ᐊᑲ ᐅᒋ ᒥᔽᔨᑎᒥᔨᒋ ᓕᐊᔨᒋ ᐊᑯ ᒂ ᐃᑐᑐᐛᑦ ᒐᒋ ᓂᑕᐅᒋᐊᔨᒋ ᐊᐛᓴ, ᒂ ᐊᓱᐛᐱᒪᐅᓱᑦ ᑭᔭ ᒋᓄᑯᐃᒪᐤ ᒪᒃ ᒐᑭᐸ ᐅᑯᓯᔪᐛ᙮ 18ᓕᐊ ᒋ ᐃᔅᒋᔄᐤ, “ᓂᒋ ᑎᐸᐊᒪᒄ ᒋᓴᒪᓂᑐᐤ ᑲᒋ ᒥᔨᒃ ᓂᐎᒋᒪᑭᓐ ᓂᑯᐸᓇᔎᒪ᙮” ᐊᑯ ᐃᓴᑲᕐ ᒂ ᐃᓯᓂᐧᑲᑕᑦ ᐅᑯᓴ᙮
19ᓇᓇᒐ ᒥᓐ ᒋ ᐊᓱᐛᐱᒪᐅᓱᐤ ᓕᐊ ᑭᔭ ᒂ ᓂᑕᐅᒋᐃᒪᑦ ᒐᑭᐸ ᐊᓱᑕᒡ ᐅᑯᓯᔪᐛ᙮ 20ᒂ ᐃᔅᒋᔄᑦ ᓕᐊ, “ᓂᒋ ᒥᔨᒄ ᒋᓴᒪᓂᑐᐤ ᒥᔪ ᒥᔨᐛᐅᓂᔪᐤ᙮ ᐊᓄᒡ ᓂᑭ ᐅᑎᓄᒄ ᓂᐎᒋᒪᑭᓐ ᐛᔅ ᐊᓱᑕᒡ ᐅᑯᓯᒪᐛ ᓂᒋ ᒥᔭᐤ,” ᐊᑯ ᓴᐳᓕᓐ ᒂ ᐃᓯᓂᐧᑲᑕᑦ ᐅᑯᓴ᙮
21ᓇᓇᒐ ᒋ ᓂᑕᐅᒋᐊᐤ ᐅᑕᓂᓯᒪᐛ ᓕᐊ, ᑕᐃᓇ ᒋ ᐃᓯᓂᐧᑲᑕᐤ᙮
ᐅᑯᓱᐤ ᕋᐃᒍᓪ
22ᐊᑯ ᒋᓴᒪᓂᑐᐤ ᒂ ᒋᔅᒋᑐᐛᑦ ᕋᐃᒍᓚ; ᒋ ᒥᔭᐤ ᑲ ᐃᓯ ᓂᑐᑎᒪᔨᒋ ᑭᔭ ᒋ ᐃᑐᑐᐛᐤ ᒐᒋ ᓂᑕᐅᒋᐊᔨᒋ ᐊᐛᓴ᙮ 23ᒋ ᐊᓱᐛᐱᒪᐅᓱᐤ ᑭᔭ ᒋ ᓂᑕᐅᒋᐊᐤ ᐅᑯᓯᒪᐛ᙮ ᒂ ᐃᔅᒋᔄᑦ, “ᓂᒋ ᒥᒋᐛᐎᑯᒡ ᐃᔪᒡ ᐛᔅ ᐊᑲ ᐅᒋ ᐅᑦ ᐊᐛᓯᒧᐅᒡ᙮ ᐊᓄᒡ ᑲᒋ ᒥᔨᑦ ᒋᓴᒪᓂᑐᐤ ᐅᑯᓯᒪᐛ, ᓂᑭ ᒋᔅᑕᔨᒥᑯᒡ ᐃᔪᒡ᙮” 24ᒍᓯᑉ ᒋ ᐃᓯᓂᐧᑲᑕᐤ ᐅᑯᓴ ᕋᐃᒍᓪ ᑭᔭ ᒂ ᐃᔅᒋᔄᑦ, “ᑭᒪ ᒥᔨᑦ ᐅᑎᐸᔨᒋᒐᐤ ᑯᑎᑲ ᐅᑯᓯᒪᐛ᙮”
ᑲ ᒥᒐᑎᔨᒋ ᒐᑭᑉ ᐅᑦ ᐊᐛᓯᓯᒪ
25ᑲᒋ ᐃᔪᑦ ᒍᓯᑉ, ᒐᑭᑉ ᒋ ᐃᑕᐤ ᓚᐸᓇ, “ᓇᐃᒥ ᒐᒋ ᔅᑐᑕᔭᓐ, ᐊᑯ ᒪᒃ ᒐᒋ ᑲᐤ ᒋᐛᔭᓐ᙮” 26ᑭᔭ ᒋ ᐃᑕᐤ, “ᒋᔅᒐᔨᑕᓐ ᑲ ᐃᔅᐱᔅ ᒥᔪ ᐊᑐᔅᒐᔅᑕᑕᓐ᙮ ᓂᒋ ᒋᔅᑕᓐ ᒥᓯᐛ ᐊᑐᔅᒐᐅᓐ ᑲ ᓂᔅᑯᒧᔭᓐ ᒐᒋ ᐃᑐᑎᒪᓐ ᓂᐅᒡ ᑭᔭ ᓂᑦ ᐊᐛᓯᒥᒡ ᐅᒡ᙮ ᐊᓄᒡ ᒋ ᑯᒂᒋᒥᑎᓐ, ᓇᐃᒥ ᒐᒋ ᐅᑎᓂᒂᐤ ᑭᔭ ᒐ ᒋᐛᔭᓐ᙮”
27ᓚᐸᓐ ᐃᑕᐤ, “ᐊᑕ ᐅᑕ ᐊ ᑕᔭᓐ, ᓂᒋ ᓂᔅᑐᑎᒺᓐ ᐅᒋᔅᒋᓄᐛᒡ ᐛᐸᑎᔨᐛᐅᓇ ᑭᔭ ᓂᒋ ᒥᔅᑭᒺᓐ ᐊᒋ ᐸᑐᐅᑦ ᒥᔪᐱᐅᓂᔪᐤ ᐅᑎᐸᔨᒋᒐᐤ ᒋᔭ ᐅᒡ, 28ᐊᑯ ᐎᑎᒧᐎ ᑕᓐ ᒋᐸ ᐃᔅᐱᔅ ᒋᓯᐧᑲᑎᓐ ᑕᐃᓇ ᐅᑕ ᐊ ᑕᔭᓐ ?”
29ᐊᑯ ᒐᑭᑉ ᐊᑕᑦ, “ᒋᔅᒐᔨᑕᓐ ᑲ ᒥᔪ ᐊᑐᔅᒐᔅᑕᑕᓐ᙮ ᒂ ᒥᒐᑎᒡ ᒋᑦ ᐊᐛᓯᓯᒥᒡ ᒪᒂᒡ ᑲ ᑭᓄᐛᔨᒥᒂᐤ᙮ 30ᓇᒪ ᐅᒋ ᒥᒐᑐᐅᒡ ᒋᑦ ᐊᐛᓯᓯᒥᒡ ᐊᒺᔭ ᐅᒋ ᑎᑯᓯᓂᔭᓐ᙮ ᐊᓄᒡ ᒥᒐᑦ ᒋ ᑭᓄᐛᔨᒪᐅᒡ ᐊᐛᓯᓯᒡ ᑭᔭ ᔅᒋ ᒥᔪᑐᑕᒄ ᐅᑎᐸᔨᒋᒐᐤ ᑕᓐᑕ ᒥᒄ ᐊᑎ ᐃᑕᐅᒡ᙮ ᔅᒋ ᐊᑐᔅᒐᔅᑕᑎᓐ ᐊᓐᑕ ᐸᒡ ᐅᑕᒡ, ᐊᓄᒡ ᓂ ᐎ ᐅᑎᓂᒧᐛᐅᒡ ᓂᐅᒡ ᑭᔭ ᓂᑦ ᐊᐛᓯᒥᒡ᙮”
31ᐊᑯ ᓚᐸᓐ ᑲ ᑯᒂᒋᒪᑦ, “ᑕᓐ ᒐ ᐃᔅᐱᔅ ᒋᓯᐧᑲᑕᓐ ?” ᒐᑭᑉ ᒋ ᐃᑕᐤ, “ᐊᑲ ᒋᓯᐧᑯᐎ ᒐᒂᓐ᙮ ᒥᒄ ᐅ ᐃᑐᑎᒧᐎᓇ ᐸᐃᒄ ᒐᒂᓐ᙮ ᒥᓐ ᓂᑭ ᓯᒪᐅᒡ ᑭᔭ ᓂᑭ ᑭᓄᐛᔨᒪᐅᒡ ᒋᑦ ᐊᐛᓯᓯᒥᒡ᙮ 32ᓇᐃᒥ ᒐᒋ ᐛᐛᐱᒥᒂᐤ ᒥᓯᐛ ᒋᑦ ᐊᐛᓯᓯᒥᒡ ᐊᓄᒡ ᑭᔭ ᓂᑭ ᐅᑎᓇᐅᒡ ᒥᓯᐛ ᑲ ᐎᐱᓯᒡ ᒪᔭᑕᓂᓯᒡ ᑭᔭ ᒥᓯᐛ ᐊ ᐸᐸᑕᐅᓯᒡ ᒥᔅᑐᓯᒡ᙮ ᒐ ᒥᔨᓐ ᐊᓐᒡ ᒧᔭᒻ ᒋᓯᐧᑲᑐᐅᓐ᙮ 33ᓂᑲᓄᒡ ᐛᓂᔅᒐ ᒋᑭ ᒋᔅᒐᔨᑕᓐ ᑲ ᒥᔪᐃᑕᑎᓯᐛᓇ᙮ ᒥᔅᑯᐅᑥᐛ ᒥᔅᑐᓯᒡ ᐊᑲ ᐸᐸᑕᐅᓯᒡ ᑭᔭ ᒪᒃ ᐊᑲ ᐎᐱᓯᒡ ᒪᔭᑕᓂᓯᒡ, ᒋᑭ ᒋᔅᒐᔨᑕᓐ ᐊᓐᒡ ᑲᒋ ᒋᒧᑎᒪᑕᓐ᙮” 34ᓚᐸᓐ ᒋ ᐃᑕᐤ, “ᓂᓂᔅᑯᒧᓐ, ᑐᑕ ᐊᔅᒋᔄᔨᓐ᙮”
35ᒥᒄ ᐊᓂᔭ ᐸᐃᑯᑕᐤ ᒋᓯᑯᔪᐤ ᓚᐸᓐ ᒋ ᐅᑎᓇᐤ ᒥᓯᐛ ᑲ ᐸᐸᑕᐅᓯᔨᒋ ᓇᐸ ᒥᔅᑐᓴ ᑭᔭ ᒥᓯᐛ ᑲ ᐸᐸᑕᐅᓯᔨᒋ ᓄᓴ ᒥᔅᑐᓴ, ᑭᔭ ᒪᒃ ᒥᓯᐛ ᑲ ᐎᐱᓯᔨᒋ ᒪᔭᑕᓂᓴ ᑭᔭ ᒂ ᐃᑕᑦ ᐅᑯᓴ ᒐᒋ ᑭᓄᐛᔨᒪᔨᒋ᙮ 36ᒋ ᒥᔭᐤ ᐅᑯᓴ ᐊᐛᓯᓴ ᓂᔅᑐ ᒋᓯᑲᐛ ᐊᔅᐱᓴᔨᒡ ᒐᒋ ᐃᑐᑕᔨᒋ ᑭᔭ ᒋ ᓂᑭᑕᑭᓄᐤ ᒐᑭᑉ ᒐᒋ ᑭᓄᐛᔨᒪᑦ ᐊᔅᑯᐱᔨᒋ ᓚᐸᓇ ᐅᑦ ᐊᐛᓯᓯᒥᔪᐛ᙮
37ᒋ ᒋᑲᑐᐛᐛᐤ ᒐᑭᑉ ᓂᔅᑐᐎᒡ ᐊᓯᓇᑯᓯᔨᒋ ᒥᔅᑎᒂ ᑭᔭ ᐱᔅᒐ ᒋ ᐳᓯᒋᐱᑕᐤ ᓯᑕᑯᓇ ᒐᒋ ᒋᐧᑲᓇᑯᓯᔨᒋ᙮ 38ᐊᑯ ᒐᑭᑉ ᒂ ᐊᔭᑦ ᐊᓂᔭ ᑲ ᐳᓯᒋᐱᑕᑦ ᓯᑕᑯᓇ ᐅᐱᒪ ᐊᓐᑕ ᐊᐛᓯᓴ ᐅᓂᐱᔾ ᐎᔭᑭᓂᔨᒡ ᒐᒋ ᐛᐱᒪᔨᒋ ᓚᐸᓇ ᐅᑦ ᐊᐛᓯᓯᒥᔪᐛ ᐃᔅᐱ ᓇᒋᒥᓂᔨᒐᓂ, ᐛᔅ ᒋ ᐎᓴᑯᐅᒡ ᒥᔅᑐᓯᒡ ᓂᔭᒋᒥᓂᑥᐎ᙮ 39ᐊᑯ ᐃᔅᐱ ᑲ ᐎᓴᑯᒡ ᒥᔅᑐᓯᒡ ᐊᓐᑕ ᓂᑲᓐ ᑲ ᐱᔨᒋ ᓯᑕᑯᓇ, ᒋ ᐸᐸᑕᐅᓯᐅᒡ ᐊᓐᒡ ᑲ ᐃᔪᐅᒡ ᒥᔅᑐᓯᓯᒡ᙮
40ᒋ ᑎᐸᓇᐊᐤ ᒐᑭᑉ ᒪᔭᑕᓂᓴ ᑭᔭ ᒥᔅᑐᓴ ᑭᔭ ᒂ ᐃᑐᑐᐛᑦ ᐊᐛᓯᓴ ᒐᒋ ᐃᓯᑲᐳᐎᔨᒋ ᐊᓐᑕ ᐃᑕᒐ ᑲ ᐎᐱᓯᔨᒋ ᑭᔭ ᑲ ᐸᐸᑕᐅᓯᔨᒋ ᓚᐸᓇ ᐅᑦ ᐊᐛᓯᓯᒥᔪᐛ ᐊ ᑕᔨᒋ, ᑎᐸᓐ ᒂ ᑎᔭᑦ ᐅᑦ ᐊᐛᓯᓯᒪ᙮
41ᐃᔅᐱ ᐛᐎᓴᑯᑥᐎ ᐊ ᐎᔪᐅᒡ ᐊᐛᓯᓯᒡ, ᒐᑭᑉ ᓂᑲᓐ ᐊᐛᓯᓴ ᐊ ᐃᑕᔨᒋ ᒋ ᐊᔨᒪᐤ ᓯᑕᑯᓇ᙮ 42ᒥᒄ ᓇᒪ ᐅᒋ ᐃᑐᑐᐛᐤ ᐊᑲ ᐎᔪᔨᒋ ᐊᐛᓯᓴ, ᐊᑯ ᐊᑲ ᐎᔪᔨᒋ ᓚᐸᓐ ᒋ ᑎᐸᔨᒪᐤ ᑭᔭ ᐊ ᐎᔪᔨᒋ ᒐᑭᑉ ᒋ ᑎᐸᔨᒪᐤ᙮ 43ᒋ ᐛᔪᑎᓯᐤ ᒐᑭᑉ, ᒥᒐᑦ ᒋ ᑭᓄᐛᔨᒪᐤ ᒪᔭᑕᓂᓴ ᑭᔭ ᒥᔅᑐᓴ, ᑲᐱᔎᐅᑭᓂᔨᒋ, ᑲᓂᐧᑲᑎᓯᔨᒋ ᑲᐸᐃᑭᔎᐛ, ᐃᔎᐤ ᐊᑐᔅᒐᔭᑭᓇ ᑭᔭ ᓇᐸᐤ ᐊᑐᔅᒐᔭᑭᓇ᙮
Currently Selected:
ᒐᓂᓯᔅ 30: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
