ᒐᓂᓯᔅ 27
27
ᒐᑭᑉ ᑲ ᒥᔨᑯᑦ ᐊᐃᓯᑲ ᐅᓱᐛᔨᒋᒐᐅᓂᔪᐤ
1ᐃᔅᐱ ᑲ ᒋᓴᐃᔪᑦ ᐊᐃᓯᒃ ᑭᔭ ᓴᔅ ᐊᑲ ᐅᒋ ᐛᐸᑕᒄ᙮ ᐸᐃᒂᐤ ᒐᓯᑲᔨᒡ ᒋ ᓂᑐᒪᐤ ᒐᓴᐃᔪᔨᒋ ᐅᑯᓴ ᐃᓴᐅᐛ ᒐᒋ ᑎᑯᓯᓂᔨᒋ ᐅᐱᒍᐎᔭᓂᒋᐛᐱᒡ᙮ ᐃᔅᐱ ᑕᑯᓯᓂᔨᒋ ᒂ ᐃᑕᑦ, “ᒋᔾ ᐊ ᓂᑯᔅ ᐃᓴᐅ ?” ᐃᓴᐅ ᒂ ᐃᑕᑦ, “ᒐᒂᓐ ᓄᑕ, ᓂᔾ ᐅ ᐃᓴᐅ ᒋᑯᔅ᙮ ᒐᒂᓐ ᓇᑐᐛᔨᑎᒥᓐ ?”
2ᐊᐃᓯᒃ ᐃᑕᐤ, “ᓴᔅ ᓂ ᒋᓴᐃᔪᐅᓐ ᑭᔭ ᓇᒪ ᓂ ᒋᔅᒐᔨᑕᓐ ᒐ ᐃᔅᐱᔅ ᐳᓂᐱᒪᑎᓯᔭᓐ᙮ 3ᐅᑎᓐ ᒋᑦ ᐊᒐᐱᔾ ᑭᔭ ᒋᑭᔅᑯᒡ ᑭᔭ ᒐ ᓂᑐᐅᐎᓐ᙮ ᐃᔅᐱ ᑎᑯᓯᓂᓇ, ᒐ ᐱᒥᓄᐛᔨᓐ ᒪᒃ ᐊᐎᑭᓯᒡ ᒥᒋᒻ ᒧᔭᒻ ᐊ ᐃᓯ ᒥᔽᔨᑎᒪᓐ ᑭᔭ ᒐ ᐸᑐᐎᓐ ᒐᒋ ᒥᒋᔭᓐ᙮ 4ᐊᑯ ᒪᒃ ᒐ ᒥᔨᑕᓐ ᓂᓱᐛᔨᒋᒐᐅᓐ ᐊᒺᔭ ᐳᓂᐱᒪᑎᓯᔭᓐ᙮”
5ᒪᒃ ᕋᐸᑲ ᒋ ᐸᑐᐛᐤ ᒐᒂᓂᔪᐤ ᐊᐃᓯᑲ ᑲ ᐃᑕᔨᒋ ᐃᓴᐅᐛ᙮ ᐃᔅᐱ ᑲᒋ ᐃᔨᒥᑦ ᐊᐃᓯᒃ, ᐃᓴᐅ ᒋ ᔅᑐᑕᐤ ᒐᒋ ᓂᑐᐛᐊᑦ ᐅᑕᐎᔭ᙮ 6ᕋᐸᑲ ᒂ ᐃᑕᑦ ᐅᑯᓴ ᒐᑭᐸ, “ᓂᐸᑐᐛᐤ ᒍᑕᐎᔾ ᐊᑕᑦ ᒋᔅᑕᓴ ᐃᓴᐅᐛ, 7‘ᒐ ᐸᑐᐎᓐ ᒥᒋᒻ ᑭᔭ ᒐ ᐱᒥᓄᐛᔨᓐ ᒪᒃ ᐊᐎᑭᓯᒡ ᒥᒋᒻ ᒐᒋ ᒥᒋᔭᓐ, ᐊᑯ ᒪᒃ ᒐ ᒥᔨᑕᓐ ᓂᓱᐛᔨᒋᒐᐅᓐ ᑎᐸᔨᒋᒐᓱᐤ ᐊ ᐛᐱᒥᑕᐧᒄ ᐊᒺᔭ ᐳᓂᐱᒪᑎᓯᔭᓐ᙮’ 8ᐊᑯ ᓂᑯᓴ, ᓂᑐᑐᐎ ᑭᔭ ᒐ ᐃᑐᑎᒥᓐ ᒐ ᐃᑕᓐ, 9ᐃᑐᑕᒪ ᒥᔅᑐᓯᒡ ᐊᑕᒡ ᑭᔭ ᒐ ᐸᓱᐅᑥᐤ ᓂᓱ ᐊ ᐎᔪᐅᒡ ᒥᔅᑐᓯᓯᒡ, ᐊᑯ ᒐ ᐱᒥᓄᑎᒃ ᒍᑕᐎᔾ ᐊᐎᑭᓂᔨᒡ ᒥᒋᒥᔪᐤ ᒧᔭᒻ ᐊᓯ ᐎᔅᑕᐧᒃ᙮ 10ᐊᑯ ᒐ ᐃᑐᑐᐅᑦ ᒐ ᒥᒋᑦ ᒍᑕᐎᔾ, ᐊᑯ ᒪᒃ ᒐ ᒥᔨᔅᒃ ᐅᓱᐛᔨᒋᒐᐅᓐ ᐊᒺᔭ ᐳᓂᐱᒪᑎᓯᑦ᙮”
11ᒪᒃ ᒐᑭᑉ ᒂ ᐃᑕᑦ ᐅᑲᐎᔭ, “ᒋᔅᒐᔨᒪᐤ ᒥᓯᐛ ᐎᔭᒡ ᐛᐱᐛᐅᑦ ᐃᓴᐅ, ᒥᒄ ᓱᓱᓯᐤ ᓂᔾ ᓂᓯᑭᔾ᙮ 12ᒂᔄᓐ ᓂᑭ ᑕᒋᓂᒄ ᓄᑕᐎᔾ ᑭᔭ ᓂᑭ ᒋᔅᒐᔨᒥᒄ ᐊ ᐎ ᐎᔭᓯᒥᒃ, ᒋᑭ ᐃᑕᐤ ᒋᓴᒪᓂᑐᐛ ᒐᒋ ᐅᓯᑯᐃᔨᒋ ᑭᔭ ᓇᒪ ᓂᑭ ᒋ ᒥᔨᑯᐅᓐ ᓱᐛᔨᒋᒐᐅᓐ᙮”
13ᒂ ᐃᑎᑯᑦ ᐅᑲᐎᔭ, “ᓂᑯᓴ, ᑭᒪ ᓂᔾ ᐱᑎᔅᑕᐅᑯᔭᓐ ᐅᓯᑯᐃᐛᐅᓐ᙮ ᑯᐃᔅᒄ ᐃᑐᑕ ᒐᒂᓐ ᐊ ᐃᑕᓐ, ᒪᒋᔾ ᓂᑐᐛᐱᒪᒋᓐᒡ ᓂᓱ ᒥᔅᑐᓯᓯᒡ᙮”
14ᒐᑭᑉ ᒂ ᓂᑐᐛᐱᒪᑦ ᓂᓱ ᒥᔅᑐᓯᓴ, ᒂᓂᐸᐊᑦ ᑭᔭ ᐱᔭᑐᐛᑦ ᐅᑲᐎᔭ᙮ ᐊᑯ ᕋᐸᑲ ᒂ ᐱᒥᓄᐛᑦ ᒧᔭᒻ ᐅᑕᐎᔪᐛ ᐊᓯᐎᔅᑎᒥᔨᒋ᙮ 15ᐊᑯ ᕋᐸᑲ ᐛᑎᓂᒺᑦ ᐊ ᒥᔽᔨᒋ ᐃᓴᐅᐛ ᐅᑦ ᐊᐱᒋᑕᐅᓂᔪᐛ, ᐊᓐᑕ ᐎᒋᐛᒡ ᑲ ᑎᑯᓂᔨᒋ ᑭᔭ ᒂ ᐃᑐᑐᐛᑦ ᒐᑭᐸ ᒐᒋ ᒋᔅᑭᒥᔨᒋ᙮ 16ᒋ ᒋᔅᑯᒧᑎᔭᐤ ᒥᔅᑐᓱᔭᓇ ᐅᔅᐱᑐᓂᔨᒡ ᑭᔭ ᐅᑯᔭᔨᒡ ᐊᓐᑕ ᐊ ᐊᑲ ᐅᐱᐛᐎᔨᒋ᙮ 17ᒪᒃ ᒂ ᒥᔭᑦ ᐎᔭᓯᔪᐤ ᑲ ᐱᒥᓄᐛᑦ ᒋᒡ ᐱᔅᒐ ᐸᒂᓯᑭᓇ ᒐᒋ ᐃᑐᑐᐛᔨᒋ ᐅᑕᐎᔪᐛ᙮
18ᒋ ᓂᑐᐛᐱᒪᐤ ᐅᑕᐎᔭ ᑭᔭ ᒂ ᐃᑕᑦ, “ᓄᑕ᙮”
ᐊᐃᓯᒃ ᐃᑕᐤ, “ᒐᒂᓐ, ᐊᐛᓐ ᐅ, ᒐᑭᑉ ᑭᔭ ᒪᒃ ᐃᓴᐅ ?”
19ᒐᑭᑉ ᐃᑕᐤ ᐅᑕᐎᔭ, “ᓂᔾ ᐅ ᐃᓴᐅ ᒋᓂᔅᑎᒧᓴᓂᒻ᙮ ᓂᒋ ᐃᑐᑕᓐ ᑲ ᐃᑎᓱᒥᔨᓐ᙮ ᓯᒥᑎᐱᔾ ᑭᔭ ᒐ ᒥᒋᔨᓐ ᐱᔅᒐ ᐎᔭᔅ ᑲ ᐱᒥᓄᐛᔭᓐ ᐊᑯ ᒪᒃ ᒐ ᒥᔨᓐ ᒋᓱᐛᔨᒋᒐᐅᓐ᙮”
20ᐊᐃᓯᒃ ᐃᑕᐤ, “ᑕᓐᑕ ᐛᒋ ᒥᔅᑯᐅᑦ ᑭᔭ ᐎᐱᒡ ᓂᐸᐃᑦ ᐊᐛᓯᔅ, ᓂᑯᓴ ?”
ᒐᑭᑉ ᐃᑕᐤ ᐅᑕᐎᔭ, “ᑎᐸᔨᒋᒐᓱᐤ ᒋᒋᓴᒪᓂᑐᒻ ᓂᒋ ᒥᔨᒄ ᑭᔅᒋᐅᓂᔪᐤ᙮”
21ᐊᑯ ᐊᐃᓯᒃ ᐊᑕᑦ ᒐᑭᐸ, “ᒥᒋᒪ ᐸᒋ ᓇᓯ ᐊᑯ ᒪᒃ ᒐᒋ ᑯᑎᓂᑕᓐ ᓂᑯᓴ, ᒐᒋ ᑕᑈ ᒋᔅᒐᔨᒥᑕᓐ ᐃᔭᐅᓇ ᐃᓴᐅ ᓂᑯᔅ᙮”
22ᒥᒋᒪ ᒋ ᓇᑕᐤ ᒐᑭᑉ ᐊᐃᓯᑲ ᐅᑕᐎᔭ, ᒋ ᑯᑎᓂᑯᐤ ᑭᔭ ᒂ ᐃᑎᑯᑦ, “ᒧᔭᒻ ᒐᑭᑉ ᐅᐸᑕᑯᓱᐅᓐ ᒂ ᑎᑕᒂᒡ ᒋᐸᑕᑯᓱᐅᓐ ᒥᒄ ᐃᓴᐅ ᐅᔅᐱᑐᓇ ᐊᒂᑕᔨᑕᒂᒋ ᒋᔅᐱᑐᓇ᙮” 23ᓇᒪ ᒋᒋᐛ ᐅᒋ ᒋᔅᒐᔨᒪᐤ ᐊᐃᓯᒃ ᐊ ᔭᐅᒂᓂ ᐃᓴᐅᐛ, 24ᐊᑯ ᒥᓐ ᑲ ᑯᒂᒋᒪᑦ, “ᐊᐛᓐ ᐅ ᒋᔾ ?”
ᒐᑭᑉ ᐃᑕᐤ ᐅᑕᐎᔭ, “ᓂᔾ ᐅ, ᐃᓴᐅ ᒋᑯᔅ᙮”
25ᐊᑯ ᐊᐃᓯᒃ ᐊᑕᑦ, “ᐸᑐᐎ ᐎᔭᔅ, ᒋ ᒥᒋᓱᔭᓇ ᐊᑯ ᒐ ᐛᑕᐱᒥᑕᓐ ᒧᔭᒻ ᐊᓐ ᐊᐛᓐ ᒐ ᑎᐸᐊᒪᑯᑦ ᒋᓴᒪᓂᑐᐛ᙮”
ᒪᒃ ᒐᑭᑉ ᐊ ᐃᑐᑐᐛᑦ ᐅᑕᐎᔭ ᒥᒋᒥᔪᐤ᙮ ᑲᒋ ᐃᓯ ᒥᒋᓱᔨᒋ, ᒐᑭᑉ ᒋ ᒥᔭᐤ ᐃᔭᐱᒡ ᓱᒥᓇᐳᔪᐤ ᒐ ᒥᓂᔨᒋ᙮ 26ᐊᑯ ᐊᑎᑯᑦ ᐅᑕᐎᔭ, “ᐸᑐᑕ ᐅᑕ ᑭᔭ ᓱᐛᔨᒥ, ᓂᑯᓴ᙮”
27ᐊᑯ ᓂᔭᑕᑦ ᐅᑕᐎᔭ ᑭᔭ ᓴᐛᔨᒪᑦ᙮ ᐃᔅᐱ ᐊᐃᓯᒃ ᒪᔭᑎᒺᑦ ᐅᑦ ᐊᐱᒋᑕᐅᓂᔪᐛ, ᒂ ᒥᔭᑦ ᐅᓱᐛᔨᒋᒐᐅᓐ ᑭᔭ ᐊᑕᑦ,
“ᐊᓯᒪᑯᔅᑦ ᓂᑯᔅ ᐊᐅᑯᓐ ᒧᔭᒻ ᐊᓯᒪᑯᓂᔨᒡ ᓄᒋᒥᔪᐤ ᐊᔅᒋᔪᐤ ᑎᐸᔨᒋᒐᓱᐛ ᑲ ᓱᐛᔨᑕᑯᑕᔨᒋ᙮
28ᒋᓴᒪᓂᑐᐤ ᒋᑭ ᒥᔨᒄ ᓂᐱᔪᐤ ᐊᑯ ᒪᒃ ᒐ ᓂᑕᐅᒋᒋ ᒋᓂᑕᐅᒋᑕᑭᓇ ᒪᒃ ᐊ ᒥᓴᒡ ᐸᒂᓯᑭᓂᒥᓐ ᑭᔭ ᐅᔅᒋ ᓱᒥᓇᐳᔾ᙮
29ᒋᓴᒪᓂᑐᐤ ᒋᑭ ᐃᑐᑐᐛᐤ ᐊ ᐃᑎᔅᑲᓇᓯᔨᒋ ᒐᒋ ᐊᑐᔅᒐᔅᑕᔅᒋᔨᔅᒋ ᑭᔭ ᒐ ᑐᑕᒡ ᐊ ᐃᑎᓱᒥᑥᐤ᙮
ᒋᔾ ᑭᔭ ᒋᑦ ᐊᓂᔅᑯᑕᐸᓐᒡ ᒋᑭ ᑎᐸᔨᒪᐛᐅᒡ ᒋᐧᑲᓂᓱᐛᐅᒡ ᑭᔭ ᒋᑭ ᐅᒋᒋᐧᑯᓂᐱᔨᔅᑕᑯᐛᐅᒡ ᐊ ᒋᔅᑕᔨᒥᑕᑯᒡ᙮
ᒋᓴᒪᓂᑐᐤ ᒋᑭ ᐊᓏᔨᒪᐤ ᐊᓂᔭ ᑲ ᒥᒐᒋᒥᐃᔅᒋᔨᔅᒋ, ᑭᔭ ᒋᑭ ᒥᔪᑐᑐᐛᐤ ᐊᓂᔭ ᑲ ᒥᔪᑐᑕᔅᒋᔨᔅᒋ᙮”
30ᐃᔅᐱ ᐊᐃᓯᒃ ᑲᒋ ᓱᐛᔨᑕᑯᐛᐊᑦ ᒐᑭᐸ ᑭᔭ ᑲᒋ ᔅᑐᑕᑦ ᒐᑭᑉ, ᐃᓴᐅ ᒋ ᑎᑯᓯᓐ ᑲᒋ ᓂᑐᐅᑦ᙮ 31ᒋ ᐱᒥᓄᐛᐤ ᐃᓴᐅ ᓄᒋᒥᔪᐤ ᒥᒋᒥᔪᐤ ᑲ ᓂᐸᑕᑦ ᑭᔭ ᒂ ᐃᑐᑐᐛᑦ ᐅᑕᐎᔭ᙮ ᒂ ᐃᑕᑦ, “ᓯᒥᑎᐱᔾ ᓄᑕ ᑭᔭ ᒐ ᒥᒋᔨᓐ ᓄᒋᒥᔪᐤ ᒥᒋᒻ ᑲ ᐱᒥᓄᑎᑕᓐ᙮ ᐊᑯ ᒪᒃ ᒐ ᒥᔨᓐ ᒋᓱᐛᔨᒋᒐᐅᓐ᙮”
32ᐅᑕᐎᔭ ᒋ ᑯᒂᒋᒥᑯᐤ, “ᐊᐛᓐ ᐅ ᒋᔾ ?”
ᐃᓴᐅ ᐃᑕᐤ ᐅᑕᐎᔭ, “ᓂᔾ ᐅ ᐃᓴᐅ, ᒐᓴᐃᔪᐅᑦ ᒋᑯᔅ᙮”
33ᐃᔅᐱ ᐊᐃᓯᒃ ᐱᔭᑕᐧᒃ ᐅᔭ, ᒋ ᑯᔅᑯᐱᔪᐤ ᐊᐃᓯᒃ᙮ ᐊ ᒥᔅᑎ ᓂᓇᒥᐱᔨᑦ ᒂ ᐃᔅᒋᔄᑦ, “ᐊᐛᓐ ᒪᒃ ᐊᓂᔭ ᑲ ᓂᑐᐎᔪᑦ ᑭᔭ ᑲ ᐸᑐᐅᑦ ᓄᒋᒥᔪᐤ ᒥᒋᒥᔪᐤ ? ᓂᒋ ᒥᒍᐛᓐ ᐊᒺᔭ ᑎᑯᓯᓂᔨᓐ ᑭᔭ ᓂᒋ ᓱᐛᔨᑕᑯᐛᐤ ᑭᔭ ᑕᑈ, ᒋᑭ ᓱᐛᔨᑕᑯᐊᑭᓄᐤ᙮”
34ᑲᒋ ᐸᑐᐛᑦ ᐅᑕᐎᔭ ᒐᒂᓂᔪᐤ ᑲ ᐃᔅᒋᔄᔨᒋ, ᒂ ᒪᑦ ᐊ ᒋᔄᐛᑦ ᑭᔭ ᒂ ᓂᓇᐧᑲᒋᒧᑦ ᐛᔅ ᒋᒋᐛ ᒋ ᐅᔅᑐᐛᔨᑎᒻ ᑭᔭ ᒂ ᐃᑕᑦ ᐅᑕᐎᔭ, “ᓄᑕ, ᓂᔾ ᑭᔭ ᐸᒋ ᒥᔨᔾ ᒋᓱᐛᔨᒋᒐᐅᓐ !”
35ᐊᐃᓯᒃ ᒪᒃ ᐃᑕᐤ, “ᓇᒪ ᓂᑭ ᒋ ᑲᐤ ᒋ ᐅᑎᓂᒺᓐ ᒐᒂᓂᔪᐤ ᑲ ᐃᑎᒃ, ᓂᒋ ᐎᔭᓯᒥᒄ ᒋᓯᒻ ᑭᔭ ᒋ ᐅᑎᓂᒻ ᒋᓱᐛᔨᒋᒐᐅᓂᔪᐤ᙮”
36ᐊᑯ ᐃᓴᐅ ᐊᑕᑦ ᐅᑕᐎᔭ, “ᒧᔭᒻ ᐊ ᐃᓯᓂᐧᑲᓱᐤ, ᒐᑭᑉ ? ᐊᐅᑯᔪᐤ ᐅᔭ ᓂᔄᐤ ᐛᔭᓯᒥᑦ᙮ ᓂᔅᑎᒻ ᒋ ᐅᑎᓂᒻ ᓂᑎᐸᔨᑎᒧᐅᓂᔪᐤ ᐊᓂᔅᑕᒧᓴᓄᐎᒡ᙮ ᐊᑯ ᐊᓄᒡ ᐅᑎᓂᒻ ᐊᓂᔭ ᓂᓱᐛᔨᒋᒐᐅᓂᔪᐤ᙮ ᒪᒋ ᐅᒋ ᐃᔅᑯᓂᒧᐅᓐ ᓱᐛᔨᒋᒐᐅᓐ ?”
37ᐊᐃᓯᒃ ᐃᑕᐤ, “ᓂᒋ ᐎᑎᒺᓐ ᒋᐧᑲᓂᔅ ᒐ ᑎᐸᔨᒥᔅᒃ᙮ ᒥᓯᐛ ᐃᔭᐱᒡ ᒋᑭ ᐎᑐᔅᒐᔅᑕᑯᐤ ᐎᐧᑲᓂᓴ᙮ ᓂᒋ ᐃᔅᒋᔄᐛᓐ ᒋᓴᒪᓂᑐᐛ ᒐ ᒥᔨᑯᑦ ᐊ ᐛᔪᑎᓂᔨᒡ ᐸᒂᓯᑭᓂᒥᓇ ᑭᔭ ᐅᔅᒋ ᓱᒥᓇᐳᔪᐤ᙮ ᓇᒪ ᓂ ᒋᔅᒐᔨᑕᓐ ᒐᒂᓐ ᓂᑯᓴ ᐊᓄᒡ ᒐ ᐃᓯ ᐃᑐᑕᑕᓐ᙮”
38ᐃᓴᐅ ᒋ ᐱᑯᓴᔨᒧᑐᐛᐤ ᐅᑕᐎᔭ, “ᓇᒪ ᑎᑯᓐ ᐊ ᒐᒂᓐ ᒐᒋ ᐊᓱᒥᔨᓐ ? ᐸᒋ ᒥᔨᔾ ᒐᒂᓐ,” ᐊᑯ ᐊᔭᔅᒃ ᒂ ᒋᐧᑲᐛᑦ ᐊ ᒪᑦ ᐃᓴᐅ᙮
39ᐅᑕᐎᔭ ᐊᐃᓯᑲ ᐊᑎᑯᑦ,
“ᐛᔪᐤ ᒋᑭ ᐎᒋᓐ ᐊ ᒥᔽᒡ ᐊᔅᒋᔾ ᐅᒡ,
ᐊᒥᓄᐛᑕᒡ ᒥᒄ ᒋᑭ ᐸᒋᑎᓐ ᒋᓂᑕᐅᒋᑕᑭᓂᒡ᙮
40ᓇᓂᑎᒻ ᒋᑭ ᒪᓯᐧᑯᐛᐅᒡ ᐃᔭᒡ ᐃᔪᒡ ᑭᔭ ᒋᑭ ᐎ ᒥᔅᑎᑐᔅᒐᔅᑐᐛᐤ ᒋᐧᑲᓂᔅ᙮
ᓇᓇᒐ ᒋᑭ ᓱᐧᑲᑎᓯᓐ ᑭᔭ ᒋᑭ ᐱᐧᑯᐅᓐ᙮ ᓇᒪ ᒋᑭ ᒋ ᓴᔅ ᑎᐸᔨᒥᒄ᙮”
41ᒋ ᐛᐧᑲᑕᐤ ᒐᑭᐸ ᐃᓴᐅᐛ, ᐛᔅ ᐅᑕᐎᔭ ᒋ ᒥᔭᔪᐛ ᐅᓱᐛᔨᒋᒐᐅᓂᔪᐤ᙮ ᐃᓴᐅ ᒋ ᐛᑕᔨᑎᒻ ᒐ ᐃᑎᑦ, “ᐎᐱᒡ ᒋ ᐳᓂᐱᒪᑎᓯᒐ ᓄᑕᐎᔾ, ᓂᑭ ᓂᐸᐊᐤ ᓂᐧᑲᓂᔅ᙮”
42ᐃᔪᒡ ᒋ ᐸᑎᒧᒡ ᐃᓴᐅᐛ ᐊ ᐎ ᓂᐸᐃᔨᒋ ᒐᑭᐸ, ᐊᑯ ᒂ ᓂᑐᐛᐱᒪᒡ ᑭᔭ ᐛᑎᒧᐛᒡ ᕋᐸᑲᔨᒋ᙮ ᕋᐸᑲ ᒋ ᐎᓴᒪᐤ ᒐᑭᐸ ᑭᔭ ᒂ ᐃᑕᑦ, “ᒋᒧᑦ ᐎᑎᐸᒪᓱᐤ ᒋᐧᑲᓂᔅ ᑭᔭ ᒋ ᐎ ᓂᐸᐃᒄ᙮ 43ᐊᑯ ᒐ ᐃᑐᑎᒥᓐ ᒐᒂᓐ ᒐ ᐃᑎᑕᓐ᙮ ᐦᐊᕋᓐ ᐅᑕᓇᔪᐤ ᐊᑯᑕ ᐛᒋᑦ ᓂᐧᑲᓂᔅ᙮ ᒋᔅᑎᑉ ᔅᑐᑕᒪ ᑭᔭ ᒐ ᑕᐅᑦ ᐊ ᑕᑦ᙮ 44ᒐ ᑕᔨᓐ ᓚᐸᓐ ᐊ ᑕᑦ ᐸᑎᒪ ᐳᓂᒐ ᐊ ᐛᐧᑲᑎᔅᒃ ᐃᓴᐅ᙮ 45ᐅᓂᒋᔅᒋᒐ ᑲ ᐃᑐᑐᐅᑦ, ᓂᑭ ᐃᑎᓴᐛᐤ ᒐᒋ ᐎᑎᒪᔅᒃ ᐊᐛᓐ ᒐᒋ ᐸᒋ ᒋᐛᔨᓐ᙮ ᓇᒪ ᓂᑐᐛᔨᑕᓐ ᑕᐱᔅᑯᓐ ᐸᐃᑯᑕᐤ ᒋᓯᒄ ᒐᒋ ᐳᓂᐱᒪᑎᓯᔭᒄ᙮”
ᐊᐃᓯᒃ ᒋ ᐃᑎᓴᐛᐤ ᒐᑭᐸ ᐊᓐᑕ ᓚᐸᓇ ᐎᒋᔨᒡ
46ᐊᑯ ᕋᐸᑲ ᓇᑐᐛᐱᒪᑦ ᐊᐃᓯᑲ ᑭᔭ ᐊᑕᑦ, “ᓇᒪ ᓂ ᒥᔽᔨᑎᒪᐛ ᐃᓴᐅ ᐎᐛ, ᐊᓐᒡ ᐃᑕᐃᑦ ᐃᔎᐅᒡ ᑲᐃᓇᓐ ᐅᒡ᙮ ᐃᑐᑎᒧᒡ ᒐ ᐊᑲ ᓴᐸᔨᑕᑯᓂᔨᒡ ᓂᐱᒪᑎᓯᐅᓂᔪᐤ᙮ ᓇᒪ ᓂᑐᐛᔨᒪᐤ ᒐᑭᑉ ᒐᒋ ᐅᑎᓇᑦ ᐅᑕ ᐃᔎᐛ ᒐ ᐎᔪᑦ, ᒧᔭᒻ ᑲ ᐃᑎᑦ ᐃᓴᐅ᙮ ᐃᐛᒃ ᓂᑐᐛᔨᑕᓐ ᒐᒋ ᐳᓂᐱᒪᑎᓯᔭᓐ ᐃᔅᐱᔅ ᒐᒋ ᒥᔨᒃ ᒐ ᐎᒋᒪᑦ ᐃᑕᐃᑦ ᐃᔎᐛ᙮”
Currently Selected:
ᒐᓂᓯᔅ 27: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
