ᒐᓂᓯᔅ 26
26
ᐊᐃᓯᒃ ᑭᔭ ᕋᐸᑲ ᑭᕋᕐ ᑲ ᑕᒡ
1ᒪᒂᒡ ᐊᐃᓯᒃ ᑲ ᐎᒋᑦ ᐱᕐ-ᓚᐊᐃ-ᕈᐃ, ᒋ ᑎᑯᓐ ᐊᑲ ᐅᒋ ᒥᓴᒡ ᒥᒋᒻ ᒧᔭᒻ ᑲ ᐃᔅᐱᔨᒡ ᐊᑉᕋᐊᒻ ᑲ ᐎᒋᑦ ᐊᓐᑕ ᐊᔅᒋᒡ᙮ ᐊᑯ ᑭᕋᕐ ᒂ ᐃᓯ ᐊᑐᒐᑦ ᐊᐃᓯᒃ, ᐊᓐᑕ ᐊᐱᒪᓕᒃ ᑲ ᒋᓴᐅᒋᒪᐅᑦ ᐱᓕᔅᑕᐃᓐ ᐃᔪᐛ᙮ 2ᑎᐸᔨᒋᒐᓱᐤ ᒋ ᓄᑯᓯᔅᑐᐛᐤ ᐊᐃᓯᑲ ᑭᔭ ᒂ ᐃᑕᑦ, “ᒐ ᐊᑲ ᐃᑐᑕᔨᓐ ᐊᓐᑕ ᐃᒋᑉᑦ ᐊᔅᒋᒡ ᒐᒋ ᐎᒋᔨᓐ᙮ ᒋᑭ ᐛᐸᑎᔨᑎᓐ ᐊᓐᑕ ᒐ ᐎᒋᔨᓐ᙮ 3ᒐ ᑕᔨᓐ ᐅᑕ ᐊᔅᒋᒡ ᑭᔭ ᓂᑭ ᑕᓐ ᐊ ᑕᔨᓐ ᑭᔭ ᒋᑭ ᒥᔪᑐᑕᑎᓐ᙮ ᐛᔅ ᒋᔾ ᑭᔭ ᒋᑦ ᐊᓂᔅᑯᑕᐸᓐᒡ ᓂᑭ ᒥᔭᐅᒡ ᐅᔭ ᒥᓯᐛ ᐊᔅᒋᔪᐤ᙮ ᓂᑭ ᑭᓄᐛᔨᑎᒺᓐ ᓂᔅᑯᒥᑐᐅᓂᔪᐤ ᑲ ᐃᑐᑎᒧᐅᒃ ᒍᑕᐎᔾ ᐊᑉᕋᐊᒻ᙮ 4ᓂᑭ ᒥᒐᑐᐛᐅᒡ ᒋᑦ ᐊᓂᔅᑯᑕᐸᓐᒡ ᒧᔭᒻ ᒋᓯᑯᒡ ᐊᔅᐱᒐᑎᒡ ᐅᒐᑭᑕᐧᑯᒡ ᑭᔭ ᓂᑭ ᒥᔭᐅᒡ ᐅᔭ ᒥᓯᐛ ᐊᔅᒋᔭ᙮ ᒋᑦ ᐊᓂᔅᑯᑕᐸᓐᒡ ᐅᒡ ᓂᑭ ᒥᔪᑐᑐᐛᐅᒡ ᒥᓯᐛ ᐊ ᑕᑐᔅᑲᓇᓯᒡ ᐃᔪᒡ ᐅᑕ ᐊᔅᒋᒡ᙮ 5ᒥᓯᐛ ᐅ ᓂᑭ ᑐᑕᓐ ᐛᔅ ᐊᒋ ᑕᑈᑐᐅᑦ ᐊᑉᕋᐊᒻ ᑭᔭ ᒥᓯᐛ ᒐᒂᓂᔪᐤ ᑲ ᐃᑐᑕᐧᒃ ᑲ ᐃᑎᓱᒥᒃ᙮” 6ᐊᑯ ᐊᐃᓯᒃ ᒋ ᑕᑈᑐᐛᐤ ᑎᐸᔨᒋᒐᓱᐛ ᑲ ᐃᑎᑯᑦ ᑭᔭ ᒂ ᑕᑦ ᐊᓐᑕ ᑭᕋᕐ᙮
ᐊᐃᓯᒃ ᑲ ᐎᔭᓯᒪᑦ ᐊᐱᒪᓕᑲ
7ᐃᔅᐱ ᑭᕋᕐ ᓇᐸᐛ ᑲ ᑯᒂᒋᒥᑯᑦ ᐊᐃᓯᒃ ᒐᒄ ᐊᐛᔪᐛ ᐊᓂᔭ ᕋᐸᑲᔨᒋ, ᒋ ᑯᔅᑕᒍᐤ ᒐᒋ ᐎᑎᒧᐛᑦ ᑕᑈᐅᓂᔪᐤ᙮ ᐛᔅ ᒋ ᐃᑕᔨᑎᒻ, “ᒋᒋᐛ ᒥᔪᔎᐤ ᕋᐸᑲ᙮ ᓂᐅ ᐊᓐ ᐃᑎᒂᐛ, ᓂᑭ ᐎ ᓂᐸᐃᑯᒡ ᑭᔭ ᐎᔨᐛᐤ ᒐ ᐅᑎᓂᒪᑎᓱᒡ ᕋᐸᑲᔨᒋ᙮” ᐊᑯ ᒂ ᐎᔭᓯᒪᑦ ᐊᐃᓯᒃ ᑭᔭ ᒂ ᐃᔅᒋᔄᑦ ᐊ ᐅᓯᒥᑦ ᐊᓂᔭ ᕋᐸᑲᔨᒋ᙮
8ᐃᔅᐱ ᓇᐅᔅ ᑲᒋ ᐎᒋᑦ ᐊᓐᑕ ᐊᐃᓯᒃ, ᒋᓴᐅᒋᒪᐤ ᐊᐱᒪᓕᒃ ᒋ ᐅᒋ ᐃᑕᐳᐤ ᐊᓐᑕ ᐛᒋᓴᒋᐛᐱᓇᓄᐎᒡ ᑭᔭ ᒂ ᐛᐱᒪᑦ ᐊᐃᓯᑲ ᐊᐛᐅᒋᓇᔨᒋ ᐎᐎᐛ ᕋᐸᑲᔨᒋ᙮ 9ᑎᐛᒡ ᒋ ᐃᑎᓴᐛᐤ ᐅᑦ ᐊᐱᒋᐊᑭᓇ ᐊᐱᒪᓕᒃ ᒐᒋ ᓂᑐᐛᐱᒪᔨᒋ ᐊᐃᓯᑲ᙮ ᐃᔅᐱ ᑕᑯᓯᓂᔨᒋ ᒋᓴᐅᒋᒪᐤ ᒋ ᐃᑕᐤ, “ᐛᐸᑕ ! ᓇᒪ ᑎᑯᓐ ᐊᓏᑎᒧᐅᓐ ᐊ ᐎᒋᒪᑭᓂᔨᓐ ᐊᓐ ᐃᔎᐤ᙮ ᒐᒂᓐ ᒪᒃ ᑲ ᐅᒋ ᐃᔅᒋᔄᔨᓐ ᐊ ᐅᓯᒥᔨᓐ ?”
ᐊᐃᓯᑲ ᒋ ᐃᑎᑯᐤ, “ᐅᓴᒻ ᓂᑭ ᓂᐸᐃᑯᓐ ᓂᐅ ᐃᔅᒋᔄᔭᓇ ᓂᒋ ᐃᑕᔨᑕᓐ᙮”
10ᐊᑯ ᐊᐱᒪᓕᒃ ᐃᑕᐤ, “ᒐᒂᓐ ᐅ ᑲ ᐃᑐᑐᐎᔭᒡ ? ᐛᓂᔅᒐ ᐸᐃᒄ ᓂᑦ ᐃᔨᒻ ᒋᐸ ᒋ ᐅᑎᓇᐱᓐ ᒐᒋ ᐎᐸᒪᑦ ᒋᐎᒋᒪᑭᓇ ᑭᔭ ᓂᐸ ᐊᓏᔨᒪᑯᓇᓇᐱᓐ ᓂᒋᓴᒪᓂᑐᒥᓇᓐ ᐛᔅ ᑲ ᐃᓯ ᐃᑐᑎᒥᓐ᙮” 11ᐊᐱᒪᓕᒃ ᒋ ᐃᔭᒂᒥᒪᐤ ᒥᓯᐛ ᐃᔪᐛ, “ᒥᒄ ᐊᐛᓐ ᒐ ᐅᓂᑐᑐᐛᒂ ᐅᔭ ᓇᐸᐛ ᑭᔭ ᒪᒃ ᐅᐎᒋᒪᑭᓂᔪᐛ ᒋᑭ ᓂᐸᐊᑭᓄᐤ᙮”
ᐊᐃᓯᒃ ᑲ ᐛᔪᑎᓯᑦ
12ᒪᒂᒡ ᑲ ᐎᒋᑦ ᐊᐃᓯᒃ ᐊᓐᑕ ᑭᕋᕐ ᑭᔭ ᑲ ᐛᓴᔄᐱᓂᒐᑦ ᒐᒋ ᓂᑕᐅᒋᑕᑦ ᒥᒋᒥᔪᐤ᙮ ᒋ ᐃᑐᑕᑯᐤ ᑎᐸᔨᒋᒐᓱᐛ ᒐᒋ ᒥᓯᐛ ᒐᒂᔪᐤ ᐃᓯ ᒥᔪᐱᔨᑦ᙮ ᐊᐃᓯᒃ ᒋ ᒪᒧᓴᒋᓂᒻ ᐸᐃᑯ ᒥᑕᓯᒥᑎᓄᐤ ᑕᑥᐤ ᐃᔅᐱᔅ ᐊᓂᔭ ᑲ ᐛᓴᔄᐱᓂᒐᑦ᙮ 13ᒋ ᐛᔪᑎᓯᐤ ᐊᐃᓯᒃ ᑭᔭ ᒥᒄ ᐊᔭᔅᒃ ᒋ ᒥᓴᔪᐤ ᐅᐛᔪᑎᓯᐅᓐ᙮ 14ᒥᒐᑦ ᒋ ᑭᓄᐛᔨᒪᐤ ᒪᔭᑕᓂᓴ, ᒥᒋᑎᒂ ᑭᔭ ᐊᐱᒋᐊᑭᓇ, ᒂ ᐅᑕᔨᒥᑯᑦ ᐱᓕᔅᑕᐃᓐ ᐃᔪᐛ᙮ 15ᐃᔅᐱ ᐅᑕᐎᔭ ᐊᑉᕋᐊᒪ ᐊᔅᒄ ᐊᒋ ᐱᒪᑎᓯᔨᒋ᙮ ᒋ ᒧᓇᐊᒥᔪᐛ ᐱᔅᒐ ᒧᓇᐃᐸᓇ ᐊᑉᕋᐊᒻ ᐅᑦ ᐊᐱᒋᐊᑭᓇ, ᒥᒄ ᓇᓇᒐ ᐱᓕᔅᑕᐃᓐ ᐃᔪᐛ ᒋ ᐃᑲᑎᒥᔪᐛ ᒥᓯᐛ ᒧᓇᐃᐸᓇ᙮
16ᒪᒃ ᐊᐱᒪᓕᒃ ᒂ ᐃᑕᑦ ᐊᐃᓯᑲ, “ᓂᑭᑕ ᓂᑦ ᐊᔅᒋᓇᓐ, ᐅᔅᑕ ᒋᔾ ᒋ ᓱᐧᑲᑎᓯᓐ ᐃᔅᐱᔅ ᓂᔭᓐ᙮”
17ᐊᑯ ᐊᐃᓯᒃ ᐊ ᐱᓴᔨᒡ ᑭᕋᕐ ᒋ ᐃᓯ ᐊᑐᒐᐤ ᑭᔭ ᐊᑯᑕ ᑲ ᐎᒋᑦ᙮
ᐅᔅᒋ ᒧᓇᐃᐸᓇ ᑲ ᒧᓇᐊᐧᒃ ᐊᐃᓯᒃ
18ᐊᑯᑕ ᐊᓂᔭ ᐃᑕᐅᓂᔪᐤ ᐅᑕᐎᔭ ᐊᑉᕋᐊᒪ ᑲ ᒧᓇᐊᒥᔨᒋ ᒧᓇᐃᐸᓇ᙮ ᒥᒄ ᐃᔅᐱ ᑲ ᐳᓂᐱᒪᑎᓯᑦ ᐊᑉᕋᐊᒻ, ᐱᓕᔅᑕᐃᓐ ᐃᔪᒡ ᒋ ᐃᑲᑎᒧᒡ ᒧᓇᐃᐸᓇ᙮ ᐊᑯ ᐊᐃᓯᒃ ᑲᐤ ᒋ ᒧᓇᐊᒻ ᑭᔭ ᐸᐃᑯᑕᐤ ᒋ ᐃᓯᓂᐧᑲᑎᒻ ᑲ ᐃᓯᓂᐧᑲᑎᒥᔨᒋ ᐅᑕᐎᔭ᙮
19ᐊ ᐱᓴᔨᒡ ᒋ ᒧᓇᐊᒥᔪᐛ ᒧᓇᐃᐸᓇ ᐊᐃᓯᒃ ᐅᑦ ᐊᐱᒋᐊᑭᓇ ᑭᔭ ᒋ ᒥᔅᑭᒥᔪᐛ ᐊᓐᑕ ᐊ ᐱᒥᐱᔨᒡ ᓂᐱᔪᐤ᙮ 20ᑭᕋᕐ ᒪᔭᑕᓂᓯᐅ-ᐃᔪᒡ ᒋ ᒋᐧᑲᒪᐅᒡ ᐊᐃᓯᑲ ᐅᒪᔭᑕᓂᓯᐅ-ᐃᔨᒥᔪᐛ ᐊ ᐃᑕᒡ, “ᓂᔭᓐ ᐅ ᓂ ᑎᐱᔨᐛᐅᓯᓇᓐ ᓂᐱᔾ᙮” ᐊᑯ ᐊᐃᓯᒃ “ᒋᐧᑲᒥᑐᐅᓐ” ᒋ ᐃᓯᓂᐧᑲᑎᒻ ᐊᓂᔭ ᒧᓇᐃᐸᓂᔪᐤ, ᐛᔅ ᑲᒋ ᒋᐧᑲᒥᑯᑦ᙮ 21ᓇᓇᒐ ᑯᑎᒋᔪᐤ ᒧᓇᐃᐸᓂᔪᐤ ᒋ ᒧᓇᐊᒥᔪᐛ ᐊᐃᓯᒃ ᐅᑦ ᐊᐱᒋᐊᑭᓇ, ᒥᒄ ᐃᔭᐱᒡ ᒋ ᒋᐧᑲᒥᑐᐅᒡ ᐊᓂᔭ ᐅᒡ᙮ ᐊᑯ ᐊᐃᓯᒃ “ᐊᔨᒥᓯᐅᓐ” ᒋ ᐃᓯᓂᐧᑲᑎᒻ ᐊᓂᔭ ᒧᓇᐃᐸᓂᔪᐤ᙮ 22ᐛᔪᐎᔅ ᐊᓐᑕ ᐅᒡ ᒋ ᐃᓯ ᐊᑐᒐᐤ ᐊᐃᓯᒃ᙮ ᒥᓐ ᐸᐃᒂᐤ ᒧᓇᐊᐧᒃ ᒧᓇᐃᐸᓂᔪᐤ ᐊᐅᑯᔪᐤ ᒪᒃ ᓇᒪ ᐊᐛᔪᐛ ᒋᑭ ᒋ ᑕᔪᐛ ᒐᒋ ᒥᔅᑭᒥᑯᑦ᙮ ᕋᐅᐳᑦ, “ᑎᐸᔨᒥᓱᐅᓐ” ᒋ ᐃᓯᓂᐧᑲᑎᒻ ᐊ ᐃᔅᒋᔄᑦ, “ᐊᓄᒡ ᐅᑎᐸᔨᒋᒐᐤ ᒋ ᒥᔨᑯᓄᐤ ᑎᐸᔨᒥᓱᐅᓂᔪᐤ ᒐᒋ ᐎᒋᔭᐧᒄ ᐅᑕ ᐊᔅᒋᒡ ᑭᔭ ᒋᑭ ᒥᒐᑎᓇᓐ ᐅᑕ᙮”
23ᒋ ᔅᑐᑕᐤ ᐊᐃᓯᒃ ᑭᔭ ᐱᕐ-ᓯᐸ ᒂ ᐃᑐᑕᑦ᙮ 24ᐊᓂᔭ ᑕᐱᔅᑲᔨᒡ ᒋ ᓄᑯᓯᔅᑕᑯᐤ ᑎᐸᔨᒋᒐᓱᐛ ᑭᔭ ᒂ ᐃᑎᑯᑦ, “ᓂᔾ ᐅ ᒍᑕᐎᔾ ᐊᑉᕋᐊᒻ ᐅᒋᓴᒪᓂᑐᒪ᙮ ᐊᑲ ᑯᔅᑕᒋ, ᓂᔾ ᓂᑦ ᐃᑕᓐ ᐊ ᑕᔨᓐ᙮ ᒋᑭ ᒥᔪᑐᑕᑎᓐ ᑭᔭ ᒋᑭ ᒥᔨᑎᓐ ᒥᒐᑦ ᐊᓂᔅᑯᑕᐸᓐᒡ ᐛᔅ ᑲ ᐃᓯ ᐊᓱᑎᒧᐅᒃ ᐊᑉᕋᐊᒻ ᓂᑦ ᐊᐱᒋᐊᑭᓐ᙮”
25ᒋ ᐅᓯᑕᐤ ᐊᓐᑕ ᐊᐃᓯᒃ ᐱᔅᑎᓂᒐᐅᓇᐱᔅᑯᔪᐤ ᑭᔭ ᒋ ᓂᑐᑎᒧᐛᐤ ᑎᐸᔨᒋᒐᓱᐛ᙮ ᐊᑯᑕ ᑲ ᒪᓂᑲᓱᒡ ᑭᔭ ᐅᑦ ᐊᐱᒋᐊᑭᓇ ᑲ ᒧᓇᐊᒥᔨᒋ ᒧᓇᐃᐸᓂᔪᐤ᙮
26ᒪᒂᒡ ᐊᐃᓯᒃ ᑲ ᐎᒋᑦ ᐊᓐᑕ ᐱᕐ-ᓯᐸ, ᐊᐱᒪᓕᒃ ᒋᓴᐅᒋᒪᐤ ᑭᕋᕐ ᐅᒡ ᒋ ᐅᑐᑕᐤ ᐊ ᐎᒐᐅᑯᑦ ᐊᐅᓴᑕ ᐅᑲᐛᐎᒐᐛᐅᓯᒥᔪᐛ ᑭᔭ ᐱᑯᓪ ᓂᑐᐱᔪᐅ-ᐅᒋᒪᐛ ᒐᒋ ᓇᒋ ᐛᐱᒪᒡ ᐊᐃᓯᑲ᙮ 27ᐊᐃᓯᒃ ᒋ ᑯᒂᒋᒪᐤ, “ᒐᒂᓐ ᐛᒋ ᑎᑯᓯᓂᔭᒄ ᐊᓄᒡ ᒐᒋ ᐛᐱᒥᔭᒄ, ᐃᔅᐱ ᐅᔅᑭᒡ ᑲ ᒥᒋᐎᒐᐎᔭᒄ ᑭᔭ ᑲ ᐃᑐᑐᐎᔭᒄ ᒐᒋ ᓂᑭᑎᒪᓐ ᒋᑦ ᐊᔅᒋᐛᐤ ?”
28ᐊᐱᒪᓕᒃ ᒋᓴᐅᒋᒪᐤ ᒋ ᐃᑕᐤ, “ᓂ ᒋᔅᒐᔨᑕᓇᓐ ᐊᓄᒡ ᑎᐸᔨᒋᒐᓱᐤ ᐊ ᐎᒋᐃᔅᒃ ᑭᔭ ᓂᑦ ᐃᑕᔨᑕᓇᓐ ᒐᒋ ᐃᑐᑎᒪᐧᒄ ᓂᔅᑯᒥᑐᐅᓐ ᐊᓯᒡ ᒋᔨᐛᐤ᙮ ᒋ ᓂᑐᐛᔨᒥᑎᓇᓐ ᒐᒋ ᐊᓱᑎᒪᒐᔨᓐ᙮ 29ᒐ ᐊᑲ ᐅᓂᑐᑐᐅᔭᒡ, ᒧᔭᒻ ᐊᑲ ᐅᒋ ᐅᓂᑐᑕᑕᒡ᙮ ᔅᒋ ᒥᔪᑐᑕᑎᓇᓐ ᑭᔭ ᔅᒋ ᒥᔨᑎᓇᓐ ᒋᔭᒻ ᒐᒋ ᔅᑐᑕᔨᓐ᙮ ᐊᓄᒡ ᐅᑎᐸᔨᒋᒐᐤ ᒋ ᒥᔪ ᑐᑕᒄ᙮”
30ᐊᐃᓯᒃ ᒋ ᐃᑐᑐᐛᐤ ᐅᑦ ᐊᐱᒋᐊᑭᓇ ᒐ ᐊᔭᔅᑯᔅᑕᔨᒋ ᒐ ᒥᒋᓱᓇᓄᐎᒡ, ᐊᑯ ᐎᔾ ᑭᔭ ᐅᒪᓐᑕᒪ ᒂ ᒥᒋᓱᒡ᙮ 31ᒥᓐ ᒋᔭᒋᓴᐸᔭᒡ ᒋ ᐊᓱᑎᒪᑐᐅᒡ ᒋᒋᐃᑥᐅᓂᔪᐤ ᒐ ᐊᑲ ᓂᑕ ᐊᐧᑯᐎᔨᑐᒡ, ᐛᒋᔭ ᒂ ᐃᑕᑦ ᐊᐃᓯᒃ ᑭᔭ ᒂ ᔅᑐᑕᔨᒋ ᐊ ᒥᔪ ᐎᒐᐅᑯᑦ᙮
32ᐸᐃᑯᑕᐤ ᒋᓯᑯᔪᐤ ᐊᐃᓯᒃ ᐅᑦ ᐊᐱᒋᐊᑭᓇ ᒋ ᑎᑯᓯᓂᔨᐛ ᑭᔭ ᒋ ᐎᑎᒪᑯᐤ ᒧᓇᐃᐸᓂᔪᐤ ᑲ ᒧᓇᐊᒥᔨᒋ ᑭᔭ ᒋ ᐃᑎᑯᐤ, “ᓂᒥᔅᑲᓇᓐ ᓂᐱᔾ᙮” 33ᐊᐃᓯᒃ “ᓯᐸ” ᒋ ᐃᓯᓂᐧᑲᑎᒻ ᐊᓂᔭ ᒧᓇᐃᐸᓂᔪᐤ, “ᒋᒋᐃᑥᐅᓐ” ᐊ ᐃᑥᒥᑲᒡ, ᐊᐅᑯᔪᐤ ᐊᓄᒡ ᐛᒋ ᐃᓯᓂᐧᑲᑕᒡ ᐃᔪᒡ ᒥᒋᒪ ᐅᑕᓇᔪᐤ ᐊ ᑎᑯᓂᔨᒡ ᐱᕐ-ᓯᐸ, “ᒋᒋᐃᑥᐤ ᒧᓇᐃᐸᓐ” ᐊ ᐃᑥᒥᑲᒡ᙮
ᐃᓴᐅ ᑲ ᐎᒋᒪᑦ ᓂᓱ ᐊᑦ ᐃᔪᐛ ᐃᔎᐛ
34ᐃᔅᐱ ᑲ ᓇᐎᔪᐛᐳᓇᓯᑦ ᐃᓴᐅ, ᓂᓱ ᐊᑦ ᐃᔪᐛ ᐃᔎᐛ ᒋ ᐎᒋᒪᐤ, ᒍᑎᑦ ᐸᕆ ᐅᑕᓂᓯᔪᐛ ᑭᔭ ᐸᓴᒪᑦ ᐃᓚᓐ ᐅᑕᓂᓯᔪᐛ᙮ 35ᒋᒋᐛ ᓇᒪ ᐅᒋ ᒥᔽᔨᑎᒥᑯᐅᒡ ᐊᐃᓯᒃ ᑭᔭ ᕋᐸᑲ᙮
Currently Selected:
ᒐᓂᓯᔅ 26: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
