ᒐᓂᓯᔅ 24
24
ᐊᐃᓯᒃ ᑭᔭ ᕋᐸᑲ ᑲ ᓂᐳᐅᒡ
1ᐊᑉᕋᐊᒻ ᓴᔅ ᒋ ᒋᓴᐃᔪᐤ ᑭᔭ ᒥᓯᐛ ᒋ ᐃᓯ ᒥᔪᑐᑕᑯᐤ ᑎᐸᔨᒋᒐᓱᐛ᙮ 2ᐸᐃᒂᐤ ᒐᓯᑲᔨᒡ, ᐊᑉᕋᐊᒻ ᒋ ᓂᑐᒪᐤ ᐅᑦ ᐊᐱᒋᐊᑭᓇ ᓇᑲᓂᔅᑭᒥᔨᒋ ᐊᓐᑕ ᐎᒋᒡ, ᐊᓂᔭ ᑲᓄᐛᔨᑎᒥᔨᒋ ᒥᓯᐛ ᐅᑎᐱᔨᐛᐅᓯᐅᓇ ᑭᔭ ᒂ ᐃᑕᑦ, “ᓴᒄ ᓂᑈᒥᒡ ᐊᔅᑕ ᔅᑎᒋᔾ, 3ᒋ ᓂᑐᐛᔨᒥᑎᓐ ᒐ ᐊᓱᑎᒪᒐᔨᓐ ᐅᑎᐸᔨᒋᒐᐤ ᐅᑦ ᐃᓯᓂᐧᑲᓱᐅᓂᒡ ᐅᒡ, ᒋᒋᒋᓯᑯᒡ ᑭᔭ ᐊᔅᒋᒡ ᒐ ᒋᓴᒪᓂᑐᐅᑦ, ᐊᓱᑎᒪᒐ ᒐ ᐊᑲ ᐅᑎᓂᒧᐅᑦ ᓂᑯᔅ ᐅᔅᒋᓂᒋᔎᐛ ᒐ ᐎᔪᑦ ᐅᑕ ᐅᒡ ᑲᐃᓇᓐ ᐃᔪᐛ ᐊ ᑕᔨᒋ᙮ 4ᒥᔅᑯᒡ ᒐ ᐃᑐᑕᔨᓐ ᐊᓐᑕ ᐊᔅᒋᒡ ᑲ ᐃᔪᐅᔭᓐ ᑭᔭ ᐊᑯᑕ ᓂᐧᑲᓂᓴ ᐅᒡ ᒐ ᐅᑎᓂᒧᐅᑦ ᓂᑯᔅ ᐃᔎᐛ ᒐ ᐎᔪᑦ᙮”
5ᐊᐱᒋᐊᑭᓐ ᒋ ᑯᒂᒋᒪᐤ ᐊᑉᕋᐊᒪ, “ᑕᓐ ᒐ ᐃᑎᔭᓐ ᑲ ᐎᓂᑭᑕᒐ ᐅᔅᒋᓂᒋᔎᔅ ᐅᑦ ᐃᑕᐅᓐ ᒐᒋ ᐎᒐᐅᑦ ᐅᑕ ᐊᔅᒋᒡ ? ᓂᑭ ᐃᑐᑕᐊᐤ ᐊ ᒋᑯᔅ ᐊᓐᑕ ᐊᔅᒋᒡ ᑲ ᐅᒋᔨᓐ ?”
6ᐊᑉᕋᐊᒻ ᒋ ᐃᑕᐤ, “ᔭᐃᑕᔾ ᒐ ᐊᑲ ᓂᑕ ᐊᓐᑕ ᐃᑐᑕᐃᑦ ᓂᑯᔅ᙮ 7ᑎᐸᔨᒋᒐᓱᐤ ᒋᒋᒋᓯᑯᒡ ᒋᓴᒪᓂᑐᐤ, ᐊᓐ ᓄᑕᐎᔭ ᐎᒋᔨᒡ ᑲ ᐅᒋ ᐅᑎᓂᑦ ᑭᔭ ᓂᐧᑲᓂᓴ ᐅᑦ ᐊᔅᒋᔨᒡ ᐅᒡ, ᓂᒋ ᐃᔨᒥᐃᒄ ᑭᔭ ᓂᒋ ᐊᓱᑎᒪᒄ, ᐊ ᐃᔅᒋᔄᑦ, ‘ᒋᑦ ᐊᓂᔅᑯᑕᐸᓐᒡ ᐅᔭ ᓂᑭ ᒥᔭᐅᒡ ᐊᔅᒋᔪᐤ᙮’ ᒋᑭ ᐃᑎᓴᐛᐤ ᐅᑦ ᐊᓐᒋᓂᒪ ᒐᔅᒋᓄᑕᐃᔅᒋᔨᔅᒋ ᑭᔭ ᐊᑯᑕ ᒐ ᐅᑎᓂᒧᐅᑦ ᓂᑯᔅ ᐅᔅᒋᓂᒋᔎᐛ ᒐ ᐎᔪᑦ᙮ 8ᐊᑲ ᓇᐊᔨᑕᒐ ᐊᓐ ᐅᔅᒋᓂᒋᔎᐤ ᒐᒋ ᐎᒐᐅᔅᒃ, ᒋᑭ ᐱᐧᑯᐅᓐ ᐊᓐ ᑲ ᐊᓱᑎᒪᒐᔨᓐ᙮ ᒥᒄ ᒐᒂᓐ ᒐ ᐃᔅᐱᔨᒂ, ᒐ ᐊᑲ ᓂᑕ ᐊᓐᑕ ᐃᑐᑕᐃᑦ ᓂᑯᔅ᙮” 9ᐊᑯ ᐊᐱᒋᐊᑭᓐ ᒂ ᔅᑕᐛᑦ ᐅᑎᒋᔾ ᐊᓐᑕ ᓴᒄ ᐅᒋᒪᒪ ᐊᑉᕋᐊᒪ ᐅᑈᒥᔨᒡ ᑭᔭ ᒋ ᐊᓱᑎᒪᒐᐤ ᒐᒋ ᐃᑐᑕᐧᒃ ᒐᒂᔪᐤ ᑲ ᐃᑎᓱᒥᑯᑦ ᐊᑉᕋᐊᒪ᙮
10ᐸᐃᑯᔪᐤ ᐅᒋᒪᒪ ᐅᑲᐱᔎᐅᑯᒥᔪᐛ ᒋ ᐅᑎᓂᒺᐤ ᑭᔭ ᒂ ᔅᑐᑕᑦ, ᒥᓯᐛ ᑕᑐᐎᒡ ᐊᓯᓇᑯᓂᔨᒋ ᐅᒋᒪᒪ ᐅᒥᔨᐛᐅᓂᔪᐛ ᒋ ᔅᑐᑐᐛᐤ ᑭᔭ ᒋ ᐃᑐᑕᐤ ᐊᓐᑕ ᐅᑕᓇᔪᐤ ᓇᐅᕋ ᑲ ᐎᒋᔨᒋ ᒋᐛᑎᓄᒡ ᐊᓐᑕ ᒥᓱᐸᑕᒥᐊ ᐊ ᐃᓯᓂᐧᑲᑕᔨᒡ᙮ 11ᐃᔅᐱ ᑲᒋ ᑎᑯᓯᐧᒃ ᓇᑕ, ᐊᑯᑕ ᑲ ᐃᑐᑐᐛᑦ ᑲᐱᔎᐅᑯᔨᒋ ᒐᒋ ᓇᐃᐱᔨᒋ ᐅᐱᒪ ᒧᓇᐃᐸᓂᒡ ᐎᐎᑎᒥᒡ ᐅᑕᓇᔪᐤ᙮ ᒋ ᐅᑕᑯᓯᔪᐤ ᑭᔭ ᒧᔭᒻ ᒋ ᓇᒋᒂᐱᒐᔪᐛ ᐃᔎᐛ᙮
12ᐊᑯ ᒂ ᐊᔭᒥᐊᑦ, “ᐅ ᑎᐸᔨᒋᒐᓱᐤ, ᓄᒋᒪᒻ ᐊᑉᕋᐊᒻ ᐅᒋᓴᒪᓂᑐᒪ ! ᐸᒋ ᒥᔨᔾ ᑭᔅᒋᐅᓐ ᒐᒋ ᒥᔅᑭᒥᒋ ᒐ ᐎᔪᑦ ᐊᐃᓯᒃ ᐊᑯ ᑭᔭ ᒐ ᑎᐱᐱᔨᒡ ᐅᓂᑐᐛᔨᑎᒧᐅᓐ ᓄᒋᒪᒻ ᐊᑉᕋᐊᒻ᙮ 13ᐸᒋ ᐎᐎᔪᒡ ᐅᔅᒋᓂᒋᔎᐅᒡ ᐅᑕᓇᔪᐤ ᒐᒋ ᒂᐸᐊᒡ ᓂᐱᔪᐤ ᐅᑕ ᒧᓇᐃᐸᓂᒡ᙮ 14ᓂᑭ ᑯᒂᒋᒪᐤ ᐸᐃᒄ ᐃᔎᔅ ᒐᒋ ᒥᓇᐃᑦ ᓂᐱᔪᐤ᙮ ᓂᔅᑯᒧᒐ ᒪᒃ ᑭᔭ ᐊᓯᒡ ᒥᔭᒐ ᒐᒋ ᒥᓂᔨᒋ ᑲᐱᔎᐅᑯᔨᒋ᙮ ᐊᑯ ᒐᔅᒐᔨᒥᒋ ᐊᓂᔭ ᑲ ᐛᔭᐱᒥᑎ ᒐ ᐎᔪᑦ ᐊᐃᓯᒃ᙮ ᐊᐅᑯᐤ ᒐᒋ ᐅᒋ ᒋᔅᒐᔨᑎᒪᓐ ᑲᒋ ᒥᔨᑦ ᑲ ᐃᓯ ᓂᑐᐛᔨᑕᐧᒃ ᓄᒋᒪᒻ᙮”
15ᒪᒂᒡ ᐊᔅᒄ ᐊᔭᒥᐊᑦ ᐊᐱᒋᐊᑭᓐ, ᒋ ᐸᒋ ᐎᐎᔪᐛ ᐅᔅᒋᓂᒋᔎᐛ ᐅᑕᓇᔪᐤ ᐛᐱᑎᓂᔅᒋᐳᑕᔪᐤ ᐅᑎᑎᒥᓂᔨᒡ ᐊ ᐎᐅᓱᔨᒋ᙮ ᕋᐸᑲ ᒋ ᐃᓯᓂᐧᑲᓱᔪᐛ, ᐸᑎᐅᐊᓚ ᐅᑕᓂᓯᔪᐛ, ᐊᓐ ᑲ ᐅᑯᓯᒪᐅᑦ ᐊᑉᕋᐊᒪ ᐎᐧᑲᓂᓯᔪᐛ ᓇᐅᕐ ᑭᔭ ᐎᐛ ᒥᓪᑲᔨᒋ᙮ 16ᒋᒋᐛ ᒋ ᒥᔪᔎᐤ ᕋᐸᑲ ᑭᔭ ᓴᔅ ᒋ ᐃᔅᐱᑎᓯᔪᐤ ᒐᒋ ᓂᐳᐅᑦ ᑭᔭ ᐊᔅᒄ ᒋ ᐅᔅᒋᓂᒋᔎᐤ᙮ ᒋ ᐃᑐᑕᐤ ᒧᓇᐃᐸᓂᒡ, ᒋ ᓴᑭᔅᒋᓇᐱᑕᐤ ᐛᐱᑎᓂᔅᒋᐳᑕᔪᐤ ᑭᔭ ᒥᓐ ᒂ ᒋᐸᐊᐧᒃ᙮ 17ᐊᑉᕋᐊᒻ ᐅᑦ ᐊᐱᒋᐊᑭᓇ ᒋ ᒋᒋᓇᐤ ᒐᒋ ᓂᒋᔅᑯᐛᑦ ᑭᔭ ᒋ ᐃᑕᐤ᙮ “ᒪ ᒋᑭ ᒋ ᒥᔨᓐ ᐱᔅᒐ ᓂᐱᔾ ᒐᒋ ᒥᓂᔭᓐ ?”
18“ᒥᓂᔾ ᓄᒋᒪᒻ,” ᐃᑕᐤ ᕋᐸᑲ ᑭᔭ ᒋ ᐱᔅᑎᓂᒧᐛᐤ ᐅᐛᐱᑎᓂᔅᒋᐳᑕᒻ ᐅᑎᑎᒥᓂᒡ ᐅᒡ ᑭᔭ ᒋ ᑕᐧᑯᓂᒧᐛᐤ ᒪᒂᒡ ᒪᓂᔨᒋ᙮
19ᐃᔅᐱ ᑲᒋ ᒥᓂᔨᒋ ᐊᐱᒋᐊᑭᓇ ᒂ ᐃᑕᑦ, “ᒋᒡ ᓂᑭ ᒥᓇᐅᒡ ᒋᑲᐱᔎᐅᑯᒥᒡ ᓂᐱᔪᐤ ᐸᑐᔅ ᐃᔅᐱᔨᑥᐛ᙮” 20ᐊᑯ ᒋᔅᑎᑉ ᒂ ᐳᓇᐧᒃ ᓂᐱᔪᐤ ᐛᐱᔅᒋᐳᑕᒡ ᑲ ᐃᔅᑯᐱᔨᒡ ᐊᓐᑕ ᐊᐛᓯᓴ ᓂᐱᔾ ᐅᐎᔭᑭᓂᔨᒡ᙮ ᒪᒃ ᑲᐤ ᒋ ᐃᔅᐸᑕᐤ ᒧᓇᐃᐸᓂᒡ ᑭᔭ ᑲᐱᔎᐅᑯᔨᒋ ᒋ ᒂᐸᒧᐛᐤ ᓂᐱᔪᐤ᙮ 21ᒋᔭᒻ ᒋ ᑭᓄᐛᐱᒪᐤ ᐊᐱᒋᐊᑭᓐ ᑭᔭ ᒋ ᒪᒥᑐᓇᔨᒪᐤ ᐊ ᔭᐅᒂᓂ ᐃᔎᓴ ᑎᐸᔨᒋᒐᓱᐤ ᑲ ᐎᔭᐱᒪᑦ ᒐ ᐎᒋᒪᑭᓂᔨᒋ ᐊᐃᓯᑲ᙮
22ᐃᔅᐱ ᑲᒋ ᐃᓯ ᒥᓂᒡ ᑲᐱᔎᐅᑭᓇᒡ, ᒋ ᒧᔅᒋᓇᐤ ᐊᐱᒋᐊᑭᓐ ᐊ ᐃᔨᒥᓯᔨᒋ ᐎᔄᐅᓱᓇᔭᐤ ᒥᔅᑯᑦ ᑕᐱᒋᒐᐱᓱᓇ ᑭᔭ ᒂ ᒋᑭᒧᑕᑎᔭᑦ ᐅᔅᑯᑎᔨᒡ ᑭᔭ ᐅᔅᐱᑐᓂᔨᒡ ᒋ ᒋᑭᒧᑕᑎᔭᐤ ᓂᓱ ᒥᔅᐱᑐᓇᐱᔅᑯᓴ᙮ 23ᐊᑯ ᒂ ᐃᑕᑦ, “ᐎᑎᒧᐎ ᐊᐛᓐ ᐛᑕᐎᔨᓐ ? ᒪᑎᑎᒻ ᐊᐳᓂᔪᐤ ᐊᓐᑕ ᐎᒋᒡ ᒐᒋ ᑕᐅᒋᒡ ᒐ ᑎᐱᔅᑲᔨᒡ ?”
24ᕋᐸᑲ ᒂ ᐃᑕᑦ, “ᐸᑎᐅᓪ ᓄᑕᐎᔾ, ᓇᐅᕐ ᑭᔭ ᒥᓪᑲ ᐅᑯᓱᐛᐛ᙮ 25ᑎᑯᓐ ᐊᐳᐅᓐ ᒐᒋ ᑕᔭᒄ ᐊᑕᔭᒡ ᑭᔭ ᐛᔪᑎᓂᔪᐤ ᐊᐛᓯᓯᒡ ᐅᒥᒋᒧᐛᐤ᙮”
26ᒂ ᓂᐱᔅᑯᐱᑦ ᐊᐱᒋᐊᑭᓐ ᑭᔭ ᒋ ᐊᔭᒥᐊᐤ᙮ 27ᐊ ᐃᔅᒋᔄᑦ, “ᒋ ᓂᔅᑯᒥᑎᓐ ᑎᐸᔨᒋᒐᓱᐤ, ᓄᒋᒪᒻ ᐊᑉᕋᐊᒻ ᐅᒋᓴᒪᓂᑐᒪ, ᔅᒋ ᑭᓄᐛᔨᑕᓐ ᒋᑦ ᐊᓱᑎᒪᒐᐅᓐ ᑭᔭ ᔅᒋ ᒥᔭᐤ ᑲ ᐃᓯ ᓂᑐᐛᔨᑕᐧᒄ ᓄᒋᒪᒻ ᐊᑉᕋᐊᒻ᙮ ᑯᐃᔅᒄ ᔅᒋ ᐃᑐᑕᔨᓐ ᐊ ᑕᔨᒋ ᓄᒋᒪᒻ ᐎᐧᑲᓂᓴ᙮”
ᐊᐱᒋᐊᑭᓐ ᑲ ᑕᐛᑦ ᕋᐸᑲᔨᒋ ᐅᑐᑕᒥᐎᐛ ᐎᒋᐛᔨᒡ
28ᒪᒂᒡ ᑲ ᐊᔭᒥᐊᔨᒋ ᐊᐱᒋᐊᑭᓇ, ᒋ ᒋᐛᐸᑕᐤ ᕋᐸᑲ ᑭᔭ ᐛᑎᒧᐛᑦ ᐊᓂᔭ ᐎᐧᑲᓂᓴ ᒥᓯᐛ ᒐᒂᔪᐤ ᑲ ᐃᔅᐱᔨᒡ ᓇᑕ ᒧᓇᐃᐸᓂᒡ᙮ 29ᒋ ᑕᔪᐛ ᐅᔅᑕᓴ ᕋᐸᑲ ᓚᐸᓐ ᐊ ᐃᓯᓂᐧᑲᓱᔨᒋ ᑭᔭ ᒋ ᐎᐎᐸᑕᐤ ᒧᓇᐃᐸᓂᒡ ᐊ ᐃᔅᐸᑕᑦ ᐊᓐᑕ ᐊᑉᕋᐊᒪ ᐅᑦ ᐊᐱᒋᐊᑭᓂᔪᐛ ᑲ ᑕᔨᒋ᙮ 30ᐛᔅ ᐃᔅᐱ ᓚᐸᓐ ᑲᒋ ᐛᐱᒥᒪᑦ ᒥᔅᑯᑦ ᑕᐱᒋᒐᐱᓱᓇ ᑭᔭ ᒥᔅᐱᑐᓇᐱᔅᑯᓴ ᐊᓐᑕ ᐅᓯᒪ ᐅᐧᑯᓂᑎᒋᒡ ᑲ ᒋᑭᒧᑕᔨᒋ ᑭᔭ ᑲ ᐸᑐᐛᑦ ᕋᐸᑲᔨᒋ ᑲ ᐎᑎᒥᔨᒋ ᒐᒂᓂᔪᐤ ᑲ ᐃᑎᑯᔨᒋ ᓇᐸᐛ᙮ ᓚᐸᓐ ᒋ ᐃᔅᐸᑕᐤ ᒧᓇᐃᐸᓂᒡ᙮ ᐃᔅᐱ ᑲ ᑎᑯᓯᐸᑕᑦ ᓇᑕ ᒧᓇᐃᐸᓂᒡ, ᒋ ᐛᐱᒥᒪᐤ ᐊᑉᕋᐊᒪ ᐅᑦ ᐊᐱᒋᐊᑭᓂᔪᐛ ᐊ ᐎᒋᑲᐳᔅᑕᐛᔨᒋ ᑲᐱᔎᐅᑭᓇᔨᒋ᙮ 31ᒂ ᐃᑕᑦ, “ᐸᒋ ᐎᒐᐎ ᓂᒋᓇᒡ᙮ ᒋᔾ ᐅ ᓇᐸᐤ ᑲ ᓱᐛᔨᑕᑯᐎᑯᑦ ᑎᐸᔨᒋᒐᓱᐛ᙮ ᒐᒂᓐ ᐅᑕ ᐛᒋ ᐃᓯᑲᐳᐎᓐ ᐎᐎᑎᒥᒡ ? ᐛᔅ ᒋ ᐊᔭᔅᑯᔅᑐᐛᑎᓐ ᐊᐳᐅᓐ ᓂᒋᓇᒡ ᑭᔭ ᑎᑯᓂᔪᐤ ᐊᓐᑕ ᒐ ᑕᒡ ᒋᑲᐱᔎᐅᑯᒥᒡ᙮”
32ᐊᑯ ᓇᐸᐅᒡ ᒂ ᐃᑐᑕᒡ ᒥᒋᐛᐱᒡ ᑭᔭ ᓚᐸᓐ ᒋᓂᑎᓂᒺᐤ ᑲ ᐎᐅᔄᐛᑭᓄᔨᒋ ᑲᐱᔎᐅᑭᓇᔨᒋ᙮ ᒥᒋᒥᔪᐤ ᒋ ᒥᔭᐤ ᑲᐱᔎᐅᑭᓇᔨᒋ ᑭᔭ ᒋ ᐃᑐᑕᐊᐤ ᐊᓐᑕ ᒐ ᓂᐸᔨᒋ᙮ ᒂ ᐸᑐᐛᑦ ᓂᐱᔪᐤ ᐊᑉᕋᐊᒪ ᐅᑦ ᐊᐱᒋᐊᑭᓂᔪᐛ ᑭᔭ ᐊᓂᔭ ᓇᐸᐛ ᑲ ᐎᒐᐅᑯᔨᒋ ᒐᒋ ᒋᔅᑕᐸᐅᓯᑕᔨᒋ᙮ 33ᐃᔅᐱ ᑲ ᐸᑐᐛᑭᓄᐅᒡ ᒥᒋᒥᔪᐤ ᒐ ᒥᒋᒡ, ᐊᐱᒋᐊᑭᓐ ᒋ ᐃᔅᒋᔄᐤ᙮ “ᓇᒪ ᓂᑭ ᒥᒋᓱᓐ ᐸᑎᒪ ᒋ ᐎᑎᒪᑎᑯᒐ ᒐᒂᓐ ᐛᒋ ᑎᑯᓯᓂᔭᓐ᙮”
ᓚᐸᓐ ᒂ ᐃᑕᑦ, “ᐎᑎᒧᐅᓇᓐ ᒐᒂᓐ ᐛᒋ ᑎᑯᓯᓂᔨᓐ᙮”
Genesis 24.34-38, 42-49, 58-67 (Proper-9 Year A)
34ᐊᑯ ᐊᐱᒋᐊᑭᓐ ᒂ ᐃᔅᒋᔄᑦ, “ᓂᔾ ᐅ ᐊᑉᕋᐊᒻ ᐅᑦ ᐊᐱᒋᐊᑭᓇ, 35ᑎᐸᔨᒋᒐᓱᐤ ᒋ ᒥᔪᑐᑐᐛᐤ ᓄᒋᒪᒪ ᑭᔭ ᐃᑐᑐᐛᐤ ᒐᒋ ᐛᔪᑎᓯᔨᒋ᙮ ᒋ ᒥᔭᐤ ᒪᔭᑕᓂᓴ ᑭᔭ ᒥᔅᑐᓴ, ᐛᐱᓯᐅᓱᓇᔭᔪᐤ ᑭᔭ ᐎᔄᐅᓱᓇᔭᔪᐤ, ᓇᐸᐤ ᐊᑐᔅᒐᔭᑭᓇ ᑭᔭ ᐃᔎᐤ ᐊᑐᔅᒐᔭᑭᓇ, ᑲᐱᔎᐅᑭᓇᔨᒋ ᑭᔭ ᑲᓂᐧᑲᑎᓯᔨᒋ ᑲᐸᐃᑭᔎᐛ᙮ 36ᐃᔅᐱ ᓴᕋ, ᓄᒋᒪᒻ ᐎᐛ, ᐊ ᒋᓴᐃᔎᐅᑦ ᒋ ᓄᑯᓯᔨᐛ ᐅᑯᓴ ᑭᔭ ᓄᒋᒪᒻ ᐊᑉᕋᐊᒻ ᒋ ᒥᔭᐤ ᐅᑯᓴ ᒥᓯᐛ ᐅᐛᔪᑎᓯᐅᓐ᙮ 37ᓂᒋ ᑐᑕᒄ ᓄᒋᒪᒻ ᒐᒋ ᐊᓱᑎᒪᒐᐅᒡ ᒋᒋᐃᑥᐅᓂᔪᐤ ᒐᒋ ᑕᑈᑐᐅᒃ ᑲ ᐃᑎᓴᐛᑦ, ᒋ ᐃᔅᒋᔄᐤ, ‘ᒐ ᐊᑲ ᐅᑎᓂᒧᐅᑦ ᐅᑕ ᑲᐃᓇᓐ ᐊᔅᒋᒡ ᓂᑯᔅ ᐅᔅᒋᓂᒋᔎᐛ ᒐ ᐎᔪᑦ᙮ 38ᒥᔅᑯᒡ ᒐ ᓂᑐᐛᐱᒥᑥᐤ ᓄᑕᐎᔾ ᐅᑦ ᐃᔨᒪ, ᓂᐧᑲᓂᓯᒡ ᑭᔭ ᐊᑯᑕ ᒐ ᐅᑎᓂᒧᐅᑦ ᓂᑯᔅ ᒐ ᐎᔪᑦ᙮’
39ᑭᔭ ᓂᒋ ᑯᒂᒋᒪᐤ ᓄᒋᒪᒻ, ‘ᑕᓐ ᒐ ᐃᑎᔭᓐ ᐊᑲ ᐎᐎᒐᐅᒐ ᐊᓐ ᐃᔎᔅ ?’
40ᐊᑉᕋᐊᒻ ᒋ ᐃᔅᒋᔄᐤ ‘ᐊᓐ ᑎᐸᔨᒋᒐᓱᐤ ᒋᓴᒪᓂᑐᐤ ᐊᔭᒥᐊᔅᑐᐅᒃ, ᒋᑭ ᐃᑎᓴᐛᐤ ᐅᑦ ᐊᓐᒋᓂᒪ ᒐᔅᒋᓄᑕᐃᔅᒋᔨᔅᒋ, ᒐ ᒥᔨᔅᒃ ᑭᔅᒋᐅᓂᔪᐤ᙮ ᐊᑯ ᒪᒃ ᒐ ᐅᑎᓂᒥᑎ ᒐ ᐎᐅᑦ ᓂᑯᔅ ᓂᐧᑲᓂᓴ ᐅᒡ ᑭᔭ ᓄᑕᐎᔾ ᐅᑐᑕᒪ ᐅᒡ᙮ 41ᒥᒄ ᒪ ᐃᓯᓇᒂᒐ ᒐ ᐊᑲ ᒥᔨᒡ ᓂᐧᑲᓂᓯᒡ ᒐ ᐎᐎᔨᒋ ᓂᑯᓴ, ᐊᑯ ᒐ ᐱᐧᑯᐃᔨᓐ ᒋᑦ ᐊᓱᑎᒪᒐᐅᓂᒡ ᐅᒡ᙮’
Genesis 24.34-38, 42-49, 58-67 (Proper-9 Year A)
42ᐃᔅᐱ ᐊᓄᒡ ᑲ ᑎᑯᓯᓂᔭᓐ ᒧᓇᐃᐸᓂᒡ, ᓂᒋ ᓂᑐᑎᒪᓐ, ‘ᑎᐸᔨᒋᒐᓱᐤ ᓄᒋᒪᒻ ᐊᑉᕋᐊᒻ ᐅᒋᓴᒪᓂᑐᒪ, ᐸᒋ ᒥᔨᔾ ᑭᔅᒋᐅᓐ ᐊᓐ ᒐᒂᓐ ᐊ ᐃᑐᑎᒪᓐ᙮ 43ᒪᐅᑕ ᐊ ᑕᔭᓐ ᒧᓇᐃᐸᓂᒡ, ᐃᔅᐱ ᓇᒋ ᒂᐱᒐᒐ ᐅᔅᒋᓂᒋᔎᐤ ᓇᒋᒂᐸᐊᒐ ᒪᒃ ᓂᐱᔪᐤ, ᓂᑭ ᑯᒂᒋᒪᐤ ᒐᒋ ᒥᓇᐃᑦ ᓂᐱᔪᐤ ᐅᐛᐱᑎᓂᔅᒋᐳᑕᒥᒡ ᐅᒡ᙮ 44ᓂᔅᑯᒧᒐ ᑭᔭ ᐃᔭᐱᒡ ᐎᒥᓇᐊᒐ ᓂᑲᐱᔎᐅᑭᓂᒪ᙮ ᐊᑯ ᒐᔅᒐᔨᑎᒪᓐ ᐊᓐ ᑎᐸᔨᒋᒐᓱᐤ ᑲ ᐛᔭᐱᒥᒪᑦ ᐊᓂᔭ ᐃᔎᓴ ᒐ ᐎᒋᒪᑭᓂᔨᒋ ᐊᑉᕋᐊᒻ ᐅᑯᓴ᙮’
45ᐊᒺᔭ ᒋᔅᑕᔭᓐ ᐊᔭᒥᐊᔭᓐ ᓂᑕᐃᒡ ᐅᒡ, ᕋᐸᑲ ᒋ ᑎᑯᓯᓐ ᐅᑎᑎᒥᓂᒡ ᐊ ᐎᐅᓯᑦ ᐛᐱᑎᓂᔅᒋᐳᑕᔪᐤ ᑭᔭ ᒂ ᓂᑎᒋᐛᑦ ᒐᒋ ᒂᐸᐧᒃ ᓂᐱᔪᐤ᙮ ᓂᒋ ᐃᑕᐤ ᒪᒃ, ‘ᐸᒋᒥᓇᐃ ᒪ ᓂᐱᔾ᙮’
46ᒋᔅᑕᑉ ᒋ ᓂᑎᓂᒻ ᐅᐛᐱᑎᓂᔅᒋᐳᑕᒻ ᐅᑎᑎᒥᓂᒡ ᐅᒡ ᑭᔭ ᒂ ᐃᓯᑦ, ‘ᒥᓂᔾ ᑭᔭ ᓯᒡ ᓂᑭ ᒥᓇᐅᒡ ᒋᑲᐱᔎᐅᑭᓂᒥᒡ’ ᐊᑯ ᒂ ᒥᓄᐅᒡ ᑭᔭ ᒋ ᒥᓇᐤ ᑲᐱᔎᐅᑭᓂᔨᒋ᙮
47ᒪᒃ ᓂᒋ ᑯᒂᒋᒪᐤ, ‘ᐊᐛᔪᐛ ᐛᓂᒋᐃᑯᑦ ?’
ᓂᒋ ᐎᑎᒪᒄ, ‘ᐸᑎᐅᓪ ᓄᑕᐎᔾ, ᓇᐅᕐ ᑭᔭ ᒥᓪᑲ ᐅᑯᓱᐛᐛ᙮’
ᐃᔅᐱ ᐱᔭᑎᒪᓐ ᐅ, ᓂᒋ ᒋᑭᒧᑕᑎᔭᐤ ᑕᐱᒋᒐᐱᓱᓇ ᐅᔅᑯᑎᒡ ᑭᔭ ᒥᔅᐱᑐᓇᐱᔅᑯᓴ ᐅᔅᐱᑐᓂᒡ᙮ 48ᒂ ᓂᐱᔅᑯᐱᔭᓐ ᑭᔭ ᓇᑐᑎᒧᐅᒃ ᑎᐸᔨᒋᒐᓱᐤ᙮ ᓂᒋ ᒪᒥᒋᒪᐤ ᑎᐸᔨᒋᒐᓱᐤ, ᓄᒋᒪᒻ ᐊᑉᕋᐊᒻ ᐅᒋᓴᒪᓂᑐᒪ ᐛᔅ ᑯᐃᔅᒄ ᓂᒋ ᐃᑐᑕᐃᒄ ᓄᒋᒪᒪ ᐎᐧᑲᓂᓯᔪᐛ ᐎᒋᔨᒡ, ᐊᓐᑕ ᑲ ᒥᔅᑯᐅᒥᒋ ᐅᑕᓂᓯᔪᐛ ᒐ ᐎᒋᒪᔨᒋ ᓄᒋᒪᒻ ᐅᑯᓴ᙮ 49ᐊᑯ ᐎᔭᐸᑎᔭᐛᐛᒂ ᓄᒋᒪᒻ ᒋᓴᐛᑎᓯᐅᓂᔪᐤ ᑭᔭ ᑕᑈᔭᔨᑎᒧᐅᓂᔪᐤ ᐸᒋ ᐎᑎᒧᐅᒃ ᑭᔭ ᐊᑲ ᐃᓯᓇᑯᓂᒂ ᐸᒋ ᐎᑎᒧᐅᒄ, ᐊᑯ ᒪᒃ ᒐ ᐎᔭᔨᑎᒪᓐ ᒐᒂᓐ ᒐ ᐃᑐᑎᒪᓐ᙮”
50ᒋ ᐎᑎᒪᑯᐤ ᓚᐸᓇ ᑭᔭ ᐸᑎᐅᓚ, “ᑕᑈ, ᑎᐸᔨᒋᒐᓱᐤ ᐅᑕ ᔅᒋ ᐃᓯ ᒋᔅᒋᓄᑕᔨᒄ᙮ ᓂᑭ ᒋ ᐃᑐᑎᒺᓇᓐ ᒥᒄ ᒐᒂᔪᐤ ᑲ ᐃᔅᒋᔄᑦ ᑎᐸᔨᒋᒐᓱᐤ᙮ 51ᒪᐅ ᕋᐸᑲ, ᒐ ᐎᒐᐅᑦ, ᐛᔅ ᓂᑕᑈᑐᐛᓇᓐ ᒐᒋ ᐎᒋᒪᑦ ᒋᐅᒋᒪᒪ ᐅᑯᓯᔪᐛ, ᒧᔭᒻ ᑲ ᐃᓯ ᐎᔭᔨᑎᒥᒂ ᑎᐸᔨᒋᒐᓱᐤ᙮”
52ᐃᔅᐱ ᐊᑉᕋᐊᒻ ᐅᑦ ᐊᐱᒋᐊᑭᓇ ᑲ ᐸᑐᐛᑦ ᑲ ᐃᔅᒋᔄᔨᒋ, ᒋ ᓄᐛᑲᐳᔅᑐᐛᐤ ᑭᔭ ᒋ ᓂᓇᔅᑯᒪᐤ ᑎᐸᔨᒋᒐᓱᐛ᙮ 53ᒂ ᐸᑕᑦ ᐛᐱᓯᐤ ᑭᔭ ᐎᔄᐅᓱᓇᔭᔪᐤ ᐊᓯᓂᓴ ᑭᔭ ᐊᐱᒋᑕᐅᓇ ᑭᔭ ᒂ ᒥᔭᑦ ᕋᐸᑲᔨᒋ᙮ ᐃᔭᐱᒡ ᒋ ᒥᔭᐤ ᐎᐧᑲᓂᓯᔪᐛ ᑭᔭ ᐅᑲᐎᔪᐛ ᐊ ᓱᓇᔭᐎᔨᒋ ᒥᔨᐛᐅᓇ᙮ 54ᐊᑉᕋᐊᒻ ᐅᑦ ᐊᐱᒋᐊᑭᓇ ᑭᔭ ᐊᓂᔭ ᓇᐸᐛ ᑲ ᐸᒋ ᐎᒐᐅᑯᑦ ᒋ ᒥᒋᓱᐅᒡ ᑭᔭ ᐸᐃᒄ ᑎᐱᔅᑲᐛ ᒋ ᓂᐸᐅᒡ ᐊᓐᑕ᙮
ᕋᐸᑲ ᑲ ᐎᒐᐛᑦ ᐊᑉᕋᐊᒪ ᐅᑦ ᐊᐱᒋᐊᑭᓂᔪᐛ ᑲᐃᓇᓐ ᐃᔅ
ᒥᓐ ᒋᔭᒋᓴᐸᔭᔨᒡ, ᐊᑉᕋᐊᒻ ᐅᑦ ᐊᐱᒋᐊᑭᓇ ᒋ ᑯᒂᒋᒪᐤ ᕋᐸᑲᔨᒋ ᐎᐧᑲᓂᓯᔪᐛ ᑭᔭ ᐅᑲᐎᔪᐛ, “ᓇᐊᔨᒥᓇᓐ ᒐᒋ ᑲᐤ ᓂᑐᐛᐱᒥᒋᒡ ᓄᒋᒪᒻ᙮”
55ᒪᒃ ᒋ ᐃᑎᑯᐤ, “ᓂᐸ ᒥᔽᔨᑕᓇᓐ ᐊᑐᐎᔅ ᐸᐃᑯᔪᐛ ᒋᓯᑲᐛ ᒐᒋ ᑕᑦ ᕋᐸᑲ ᐊᑕᐅᒋᒡ, ᐊᑯ ᐸᑐᔅ ᒋᐸ ᐎᒐᐅᒃ᙮”
56ᒥᒄ ᒋ ᐃᑕᐤ, “ᐊᑲ ᑐᑐᐅᒄ ᒐᒋ ᑕᔭᓐ ᐅᑕ, ᒋ ᒥᔪᐱᔨᑕᐤ ᓂᑦ ᐊᑐᔅᒐᐅᓂᔪᐤ ᑎᐸᔨᒋᒐᓱᐤ, ᓇᐃᒥᒄ ᑲᐤ ᒐᒋ ᓂᑐᐛᐱᒥᒃ ᓄᒋᒪᒻ᙮”
57ᒋ ᐎᑎᒧᐛᐅᒡ ᐊ ᐃᑕᒡ᙮ “ᑯᒂᒋᒪᑕᐤ ᐃᔎᔅ ᑕᓐ ᒐ ᑎᒂ᙮”
Genesis 24.34-38, 42-49, 58-67 (Proper-9 Year A)
58ᐊᑯ ᒂ ᑕᑈᑕᒡ ᕋᐸᑲᔨᒋ ᑭᔭ ᒋ ᑯᒂᒋᒪᐅᒡ ᓇᐊᔨᑎᒥᔨᒂᓂ ᒐᒋ ᔅᑐᑕᔨᒋ, ᑭᔭ ᒂ ᐃᔅᒋᔄᑦ ᕋᐸᑲ, “ᓂᐦᐃ, ᓂᑦ ᐊᔭᔅᑯᐎᓐ ᒐᒋ ᔅᑐᑕᔭᓐ᙮”
59ᐊᑯ ᒋ ᓇᐃᒥᑯᐤ ᕋᐸᑲ ᐅᑐᑕᒪ ᑭᔭ ᐊᓂᔭ ᐃᔎᐤ ᐊᐱᒋᐊᑭᓇ ᑲ ᓂᑕᐅᒋᓂᑯᑦ ᒐᒋ ᐎᒐᐛᒡ ᐊᑉᕋᐊᒪ ᐅᑦ ᐊᐱᒋᐊᑭᓂᔪᐛ ᑭᔭ ᐅᑦ ᐃᔨᒥᔪᐛ᙮ 60ᒪᒂᒡ ᑲ ᐛᒋᔭᒪᒡ ᕋᐸᑲᔨᒋ, ᒋ ᐃᔅᒋᔄᐅᒡ ᐅᔭ ᐊᔭᒥᐊᐅᓂᔪᐤ,
“ᑭᒪ ᐃᑐᑐᐛᑦ ᒋᓴᒪᓂᑐᐤ ᕋᐸᑲᔨᒋ ᒐᒋ ᐅᑲᐎᒪᐅᔨᒋ ᒋᓴᒥᑕᓯᒥᑎᓄᐤ ᐊᓂᔅᑯᑕᐸᓇ᙮
ᑭᒪ ᒋᓴᒪᓂᑐᐤ ᒥᔭᑦ ᒋᑦ ᐊᓂᔅᑯᑕᐸᓇ ᒐᒋ ᓴᒂᐊᔨᒋ ᐊᓂᔭ ᑲ ᐛᐧᑲᑎᑯᔨᒋ᙮”
61ᐊᑯ ᕋᐸᑲ ᑭᔭ ᓯᒡ ᒥᒐᑦ ᐃᔎᐤ ᐊᐱᒋᐊᑭᓇ ᐛᒐᐅᑯᑦ ᒂ ᐳᓯᒡ ᑲᐱᔎᐅᑭᓇᔨᒋ ᒐ ᐎᒐᐛᒡ ᐊᑉᕋᐊᒪ ᐅᑦ ᐊᐱᒋᐊᑭᓂᔪᐛ ᑭᔭ ᒥᓯᐛ ᒂ ᔅᑐᑕᒡ᙮
ᑲ ᐛᐱᒪᑦ ᐊᐃᓯᒃ ᕋᐸᑲᔨᒋ
62ᐊᑯ ᐊᐃᓯᒃ ᒋ ᓂᑭᑎᒻ ᐱᕐ-ᓚᐊᐃ-ᕈᐃ, ᑭᔭ ᓇᒐᑉ ᒂ ᐎᒋᑦ᙮ 63ᐸᐃᒂᐤ ᐛᑕᑯᓯᔨᒡ, ᒋ ᐃᑐᑕᐤ ᓂᑕᐅᒋᑕᑭᓂᒡ ᒐᒋ ᐱᐸᒧᑕᑦ ᑭᔭ ᒋ ᐛᐱᒪᐤ ᑲᐱᔎᐅᑭᓇᔨᒋ ᐱᔭᒋ ᓄᑯᓯᔨᒋ᙮ 64ᐃᔅᐱ ᕋᐸᑲ ᐎᐊᐱᒪᑦ ᐊᐃᓯᑲ᙮ ᒋ ᐊᒥᐤ ᑲᐱᔎᐅᑭᓇᔨᒋ ᐅᒋ 65ᑭᔭ ᒋ ᑯᒂᒋᒪᐤ ᐊᐱᒋᐊᑭᓇ, “ᐊᐛᓐ ᒪᓐ ᓇᐸᐤ ᑭᐸᑐᑕᑎᑲ ᓂᑕᐅᒋᑕᑭᓂᒡ ᒐᒋ ᓂᒋᔅᑲᑕᐧᒄ ?” ᐊᐱᒋᐊᑭᓐ ᒋ ᐃᑕᐤ, “ᓄᒋᒪᒻ ᐊᓐ ᐊᐃᓯᒃ᙮” ᒂ ᐅᑎᓇᐧᒃ ᐅᑦ ᐊᑯᐛᐱᒂᐅᓐ ᑭᔭ ᒋ ᐊᑯᓇᐊᒻ ᐅᑕᔅᑎᒥᐧᒄ᙮
66ᐊᐱᒋᐊᑭᓐ ᒋ ᐎᑎᒧᐛᐤ ᐊᐃᓯᑲ ᒥᓯᐛ ᑲ ᐃᓯ ᐃᑐᑕᐧᒃ᙮ 67ᐊᑯ ᐊᐃᓯᒃ ᒋ ᐃᑐᑕᐊᐤ ᕋᐸᑲᔨᒋ ᐱᒍᐎᔭᓂᒋᐛᐱᒡ ᐊᓐᑕ ᑲᒋ ᐎᒋᔨᒋ ᐅᑲᐎᔭ ᓴᕋᔨᒋ᙮ ᐊᐃᓯᒃ ᒋ ᐎᒋᒪᐤ ᕋᐸᑲᔨᒋ᙮ ᒋᒋᐛ ᒋ ᓴᒋᐊᐤ ᑭᔭ ᒂ ᒥᔅᑲᐧᒃ ᐊᐃᓯᒃ ᒥᔽᔨᒧᐅᓂᔪᐤ ᑲᒋ ᐳᓂᐱᒪᑎᓯᔨᒋ ᐅᑲᐎᔭ᙮
Currently Selected:
ᒐᓂᓯᔅ 24: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
