ᒐᓂᓯᔅ 17
17
ᐊᑉᕋᒻ ᑭᔭ ᒋᓴᒪᓂᑐᐤ ᑲ ᑐᑕᒡ ᓂᓇᔅᑯᒧᐅᓂᔪᐤ
Genesis 17.1-7, 15-16 (Lent-2 Year B)
1ᐸᐃᑯᔅᑕᐤ ᑕᑐᔪᐤ ᐊᓱ ᐸᐃᑯᔅᑕᐤ ᒋ ᐃᑕᑐᐳᓇᓱᐤ ᐊᑉᕋᒻ ᒥᓐ ᑲ ᓄᑯᓯᔅᑕᑯᑦ ᑎᐸᔨᒋᒐᓱᐛ ᑭᔭ ᒂ ᐃᑎᑯᑦ, “ᓂᔾ ᐅ ᒋᓴᒪᓂᑐᐤ ᒥᓯᐛ ᐊ ᐃᓯ ᓱᐧᑲᑎᓯᑦ᙮ ᓂᑐᑐᐎᓇ ᑭᔭ ᓇᓂᑎᒻ ᑯᐃᔅᒄ ᐃᑐᑎᒥᓇ, 2ᓂᑭ ᑐᑕᓐ ᓂᓇᔅᑯᒧᐅᓐ ᑭᔭ ᒋᑭ ᒥᔨᑎᓐ ᒥᒐᑦ ᐊᓂᔅᑯᑕᐸᓐᒡ ᒐ ᐊᑲ ᒋ ᒋᒪᑭᓄᐎᒡ᙮”
3ᒋ ᓂᐱᔅᑯᐱᔅᑐᐛᐤ ᐊᑉᕋᒻ ᒋᓴᒪᓂᑐᐛ ᐊ ᒋᔅᑕᔨᒪᑦ ᑭᔭ ᒋᓴᒪᓂᑐᐤ ᒂ ᐃᑕᑦ, 4“ᐊᐅᑯᐤ ᐊ ᐃᓯ ᐊᓱᑎᒪᒐᔭᓐ, ᒋᔾ ᒋᑭ ᐅᑕᐎᒪᐅᓐ ᒥᒐᑦ ᒐ ᑕᑐᔅᑲᓇᓯᒡ ᐃᔪᒡ, 5ᓂ ᒥᔅᑯᑐᓇᓐ ᒋᑦ ᐃᓯᓂᐧᑲᓱᐅᓐ᙮ ᓇᒪ ᒋᑭ ᒋ ᓴᔅ ᐃᓯᓂᐧᑲᓱᓐ ‘ᐊᑉᕋᒻ’, ᒥᒄ ‘ᐊᑉᕋᐊᒻ’ ᒋᑭ ᐃᓯᓂᐧᑲᑎᑯᐅᓐ᙮ 6ᒋᑭ ᒥᔨᑎᓐ ᒥᒐᑦ ᐊᓂᔅᑯᑕᐸᓐᒡ ᑭᔭ ᓂᑲᓄᒡ ᐊᓐᑕ ᒋᑭ ᒥᒐᑐᔅᑲᓇᓱᐅᒡ᙮ ᐱᔅᒐ ᒋᑭ ᒋᓴᐅᒋᒪᐅᒡ᙮ 7ᒧᔅ ᑲᒋᒡ ᓂᑭ ᑭᓄᐛᔨᑕᓐ ᑲ ᐊᓱᑎᒪᑕᓐ ᑭᔭ ᒋᑦ ᐊᓂᔅᑯᑕᐸᓐᒡ ᓂᑲᓐ ᒐ ᐊᑎ ᐊᓂᔅᒐ ᐱᒪᑎᓯᒡ ᒧᔭᒻ ᑲᒋᒡ ᓂᓇᔅᑯᒧᐅᓐ, ᓂᔾ ᒋᑭ ᐅᒋᓴᒪᓂᑐᒥᑐᐅᓐ ᑭᔭ ᒋᑦ ᐊᓂᔅᑯᑕᐸᓐᒡ ᒐ ᐅᒋᓴᒪᓂᑐᒥᒡ᙮ 8ᒋᑭ ᒥᔨᑎᓐ ᑭᔭ ᒋᑦ ᐊᓂᔅᑯᑕᐸᓐᒡ ᒐ ᐊᓂᔅᒐ ᐱᒪᑎᓯᒡ ᒥᓯᐛ ᐊᓐ ᑲᐃᓇᓐ ᐊᔅᒋᔾ ᐊᓐᑕ ᐊᓄᒡ ᒥᔭᓂᑕᐎᔭᒄ, ᒋᔨᐛᐤ ᒧᔅ ᑲᒋᒡ ᒋᑭ ᑎᐸᔨᑕᓇᐛᐤ ᑭᔭ ᓂᔾ ᒋᑭ ᐅᒋᓴᒪᓂᑐᒥᑐᓇᐛᐤ᙮”
9ᐊᑯ ᒋᓴᒪᓂᑐᐤ ᐃᔭᐱᒡ ᐊᑕᑦ ᐊᑉᕋᐊᒪ, “ᒋᔾ ᐊᑉᕋᐊᒻ, ᒋᑭ ᐎ ᑕᑈᑕᓐ ᒐᒂᓐ ᐊᑎᑕᓐ ᒐ ᐃᑐᑎᒥᓐ᙮ ᒋᔾ ᑭᔭ ᒋᑦ ᐊᓂᔅᑯᑕᐸᓐᒡ ᒐ ᐊᑎ ᐊᓂᔅᒐ ᐱᒪᑎᓯᒡ᙮ 10ᒪᐅ ᒐ ᐎ ᐃᓯ ᑭᓄᐛᔨᑎᒪᒄ ᓂᓂᔅᑭᒧᐅᓐ, ᑕᐱᔅᑯᓐ ᒋᔾ ᑭᔭ ᒋᑦ ᐊᓂᔅᑯᑕᐸᓐᒡ᙮ ᒪᐅ ᐊ ᐃᓯ ᓂᑐᐛᔨᒥᑕᓐ ᒐᒋ ᐃᑐᑎᒥᓐ, ᒐ ᒋᔅᒋᓄᐛᒋᔄᑥᐤ ᒥᓯᐛ ᐊ ᓇᐸᓯᐅᒡ ᐊᐛᓯᒡ᙮ 11ᒋᑭ ᐎ ᒋᔅᒋᓄᐛᒋᔄᐅᒡ ᒥᓯᐛ ᓇᐸᐅᒡ ᐊᓐᑕ ᐊ ᐸᐃᑯᐎᔅᒋᔨᓐ᙮ 12ᒥᓯᐛ ᓂᔭᐸᐅᒡ ᐊᐛᓯᒡ ᐊ ᐃᔪᐅᒡ ᑲᒋ ᔭᓇᐤ ᑕᑐᐤ ᒋᓯᑲᓯᑥᐎ ᒋᑭ ᒋᔅᒋᓄᐛᒋᔄᑭᓄᐎᒡ, ᒋᒡ ᑭᔭ ᒋᓇᐸᐤ-ᐊᐱᒋᐊᑭᓐᒡ, ᒋᒡ ᐊᓐᒡ ᑲ ᐃᔪᐅᒡ ᐊᓐᑕ ᒋᑦ ᐊᔅᒋᒡ ᑭᔭ ᐊᓐᒡ ᓂᔭᐸᐅᒡ ᒪᓐᑕᐛ ᑲ ᐅᒋ ᐃᔭᐅᑥᐤ᙮ 13ᒥᓯᐛ ᓂᔭᐸᐅᑦ ᐊᐛᔅ ᒋᑭ ᐎ ᒋᔅᒋᓄᐛᒋᔄᐤ, ᐊᐅᑯᓐ ᒋᔅᒋᓄᐛᒡ ᐛᐸᑎᔨᐛᐅᓐ ᐊᓐ ᓂᓇᔅᑯᒧᐅᓐ ᑲ ᐃᑐᑎᒪᑕᓐ, ᐊᓐ ᒧᔅ ᑲᒋᒡ ᒐ ᑎᒂᒡ᙮ 14ᒥᒄ ᐊᓐ ᓇᐸᐤ ᐊ ᐊᑲ ᐎ ᒋᔅᒋᓄᐛᒋᐃᑯᓯᑦ ᐱᑯᓂᒻ ᓂᓇᔅᑯᒧᐅᓂᔪᐤ ᑭᔭ ᓇᒪ ᒋᑭ ᒋ ᐃᑎᒋᑕᑯᓱᐤ ᒧᔭᒻ ᐸᐃᒄ ᓂᑦ ᐃᔨᒻ᙮”
Genesis 17.1-7, 15-16 (Lent-2 Year B)
15ᐊᑯ ᒥᓐ ᒋᓴᒪᓂᑐᐤ ᐊᑕᑦ ᐊᑉᕋᐊᒪ, “ᒋᐅ ᓴᕋᐃ, ᒐ ᐊᑲ ᐃᓯᓂᐧᑲᑎᑦ ‘ᓴᕋᐃ’, ᒥᒄ ‘ᓴᕋ’ ᒋᑭ ᐃᓯᓂᐧᑲᓱᐤ᙮ 16ᓂᑭ ᓱᐛᔨᑕᑯᐛᐤ ᓴᕋ ᑭᔭ ᒋᑭ ᐅᑯᓱᐤ ᒋᔾ ᐅᒡ᙮ ᓂᑭ ᓱᐛᔨᑕᑯᐛᐅ ᑭᔭ ᐎᔾ ᒋᑭ ᐅᑲᐎᒪᐤ ᒐ ᑕᑐᔅᑲᓇᓯᓇᓄᐎᒡ; ᐱᔅᒐ ᐅᑦ ᐊᓂᔅᑯᑕᐸᓇ ᒋᑭ ᒋᓴᐅᒋᒪᐎᔪᐛ᙮”
17ᒥᓐ ᒋ ᓂᐱᔅᑯᐱᔅᑐᐛᐤ ᐊᑉᕋᐊᒻ ᒋᓴᒪᓂᑐᐛ ᐊ ᒋᔅᑕᔨᒪᑦ, ᒂ ᐸᐱᑦ ᑭᔭ ᒂ ᐃᑎᓱᑦ, “ᒐᑲᑦ ᓂ ᐸᐃᑯ ᒥᑕᓯᒥᑎᓄᐛᐳᓇᓯᓐ, ᑕᓐᑕ ᓂᐸ ᐅᒋ ᐅᑕᐎᒪᐅᓐ ? ᑭᔭ ᓴᕋ ᐸᐃᑯᔅᑕᐤ ᑕᑐᔪᐛᐳᓇᓱᐤ᙮ ᑕᓐᑕ ᒋᐸ ᐅᒋ ᐅᑦ ᐊᐛᓯᒧᐤ ?” 18ᐊᑯ ᐊᑉᕋᐊᒻ ᐊᑕᑦ ᒋᓴᒪᓂᑐᐛ, “ᑭᒪ ᒋᓴᐛᑐᑐᐅᑦ ᓂᑯᔅ ᐃᔅᒪᐃᓪ᙮”
19ᐊᑯ ᒋᓴᒪᓂᑐᐤ ᐊᑕᑦ, “ᓂᐦᐃ, ᒥᒄ ᒋᐅ ᓴᕋ ᒋᑭ ᒥᔨᒄ ᐅᑯᓯᒪᐛ ᑭᔭ ᐊᐃᓯᒃ ᒋᑭ ᐃᓯᓂᐧᑲᑕᐤ᙮ ᓂᑭ ᐊᔨᒋᑎᒧᐛᐤ ᓂᓇᔅᑯᒧᐅᓂᔪᐤ, ᐊᐅᒄ ᐅᒪ ᓂᓇᔅᑯᒧᐅᓐ ᒐ ᐊᑲ ᓂᑕ ᐃᔎᐱᔨᒡ, ᐎᔾ ᐅᒡ ᑭᔭ ᐅᑦ ᐊᓂᔅᑯᑕᐸᓇ᙮ 20ᒥᒄ ᒋᑯᔅ ᐃᔅᒪᐃᓪ, ᒋᑭ ᒥᔨᑎᓐ ᐊ ᐃᓯ ᓂᑐᐛᔨᑎᒥᓐ, ᓂᑭ ᓱᐛᔨᑕᑯᐛᐤ᙮ ᒥᒐᑦ ᐊᐛᓴ ᓂᑭ ᒥᔭᐤ ᑭᔭ ᒥᒐᑦ ᐊᓂᔅᑯᑕᐸᓇ ᓂᑭ ᒥᔭᐤ᙮ ᐎᔾ ᒋᑭ ᐅᑕᐎᒪᐅ ᐊ ᓂᓱᓴᐳᔨᒋ ᒋᓴᐅᒋᒪᓴ, ᓂᑭ ᑐᑐᒪᐛ ᐅᑦ ᐊᓂᔅᑯᑕᐸᓇ ᒐᒋ ᒥᒐᑐᔅᑲᓇᓯᔨᒋ᙮ 21ᒥᒄ ᓂᑭ ᒥᔭᐤ ᓂᓂᔅᑯᒧᐅᓂᔪᐤ ᐊᐃᓯᒃ, ᐊᓂᔭ ᒐ ᓂᑕᐅᒋᔭᑦ ᓴᕋ ᒋ ᐸᐃᑯᐳᓂᔨᒐ᙮”
22ᒋᓴᒪᓂᑐᐤ ᒋ ᓂᑭᑕᐤ ᐊᑉᕋᐊᒪ ᐃᔅᐱ ᑲᒋ ᐃᓯ ᐃᔨᒪᐊᑦ᙮
23ᐊᓂᔭ ᐸᐃᑯᑕᐤ ᒋᓯᑯᔪᐤ, ᐊᑉᕋᐊᒻ ᒋ ᓂᓇᐃᑐᐛᐤ ᑲ ᐃᑎᑯᑦ ᒋᓴᒪᓂᑐᐛ ᑭᔭ ᒂ ᒋᔅᒋᓄᐛᒋᔄᑦ ᐅᑯᓴ ᐃᔅᒪᐃᓚ ᑭᔭ ᒥᓯᐛ ᑯᑎᑲ ᓇᐸᐤ ᐊᐱᒋᐊᑭᓇ ᑲ ᑕᔨᒋ ᐊᓐᑕ ᐎᒋᒡ᙮ ᒋᒡ ᒥᓯᐛ ᐊᐱᒋᐊᑭᓇ ᑲ ᐃᔪᔨᒋ ᐊᓐᑕ ᐅᑦ ᐃᑕᐅᓂᒡ ᑭᔭ ᐊᓂᔭ ᒥᓯᐛ ᑲ ᐃᔭᐛᑦ᙮ 24ᐸᐃᑯᔅᑕᐤ ᑕᑐᔪᐤ ᐊᓱ ᐸᐃᑯᔅᑕᐤ ᒋ ᐃᑕᑐᐳᓇᓱᐤ ᑲ ᒋᔅᒋᓄᐛᒋᔄᑭᓄᐅᑦ ᐊᑉᕋᐊᒻ, 25ᒋ ᓂᔅᑎᓴᐳᓇᓯᔪᐛ ᐅᑯᓴ ᐃᔅᒪᐃᓚ᙮ 26ᐸᐃᑯᑕᐤ ᒋᓯᑯᔪᐤ ᑕᐱᔅᑯᓐ ᐊᑉᕋᐊᒻ ᑭᔭ ᐃᔅᒪᐃᓪ ᒋ ᒋᔅᒋᓄᐛᒋᔄᑭᓄᐛᒡ᙮ 27ᒥᓯᐛ ᓂᔭᐸᐅᑦ ᒋ ᒋᔅᒋᓄᐛᒋᔄᑭᓄᐤ, ᐊᓐ ᑲ ᐃᔪᐅᑦ ᐊᑉᕋᐊᒪ ᐅᑦ ᐃᑕᐅᓂᔨᒡ ᑭᔭ ᒪᒃ ᒪᓐᑕᐛ ᑲ ᐅᒋ ᐃᔭᐛᑭᓄᐅᑦ᙮
Currently Selected:
ᒐᓂᓯᔅ 17: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
