ᒐᓂᓯᔅ 16
16
ᐦᐊᐃᑲᕐ ᑭᔭ ᐃᔅᒪᐃᓪ
1ᓴᕋᐃ, ᐊᑉᕋᒻ ᐎᐛ, ᓇᒪ ᐅᒋ ᐅᑦ ᐊᐛᓯᒧᐤ, ᒥᒄ ᒋ ᑭᓄᐛᔨᒪᐤ ᑯᐸᓇᔎᐛ ᐃᒋᑉᑦ ᐊᔅᒋᒡ ᑲ ᐅᒋᔨᒋ᙮ ᐦᐊᐃᑲᕐ ᒋ ᐃᓯᓂᐧᑲᓱᔪᐛ, 2ᐊᑯ ᓴᕋᐃ ᐊᑕᑦ ᐊᑉᕋᒪ, “ᑎᐸᔨᒋᒐᓱᐤ ᓇᒪ ᓂ ᒥᔨᒄ ᒐᒋ ᐅᑦ ᐊᐛᓯᒧᐅᒡ, ᒐ ᐎᐸᒥᑦ ᓂᑯᐸᓇᔎᒻ, ᒂᔄᓐ ᓂ ᐸᒋ ᐅᑦ ᐊᐛᓯᒥᓐ ᐎᔾ ᐅᒡ᙮”
ᐊᑉᕋᒻ ᒋ ᑕᑈᑎᑐᐛᐤ ᑲ ᐃᔅᒋᔄᔨᒋ ᓴᕋᐃᔨᒋ᙮ 3ᐊᐅᑯᐤ ᑲ ᐃᔅᐱᔨᒡ ᐸᐃᑯᔪᐛᐳᓇ ᑲᒋ ᐎᒋᒡ ᐊᓐᑕ ᑲᐃᓇᓐ ᐊᔅᒋᒡ, ᓴᕋᐃ ᒋ ᒥᔭᐤ ᐊᑉᕋᒪ ᐊᓂᔭ ᐅᑯᐸᓇᔎᒪ ᐦᐊᐃᑲᕋ᙮ 4ᐊᑉᕋᒻ ᒋ ᐎᐸᒪᐤ ᐦᐊᐃᑲᕋ ᑭᔭ ᐦᐊᐃᑲᕐ ᒂ ᐊᓱᐛᐱᒪᐅᓱᑦ᙮
ᐃᔅᐱ ᑲ ᒋᔅᒐᔨᑕᐧᒃ ᐦᐊᐃᑲᕐ ᐊ ᐊᓱᐛᐱᒪᐅᓱᑦ, ᒋᔅᑕᔨᒥᓱᐤ ᑭᔭ ᓇᒪ ᐅᒋ ᒋᔅᑕᔨᒪᐤ ᓴᕋᐃᔨᒋ᙮ 5ᐊᑯ ᓴᕋᐃ ᒂ ᐃᑕᑦ ᐊᑉᕋᒪ, “ᒋᔾ ᐅ ᑲ ᐃᑐᑎᒥᓐ ᐸᐛᔨᒥᑦ ᐦᐊᐃᑲᕐ, ᓂᔾ ᐊᓐ ᔅᒋ ᒥᔨᑎᓐ ᐃᔎᔅ ᒧᔭᒻ ᒋᐅ ᑭᔭ ᐊᓄᒡ ᒐᔅᒐᔨᑕᐧᒃ ᐊ ᐊᓱᐛᐱᒪᐅᓱᑦ, ᒋᔅᑕᔨᒥᓱᐤ ᑭᔭ ᓂᔾ ᐊᑲ ᒋᔅᑕᔨᒥᑦ᙮ ᑭᒪ ᐊᓏᔨᒥᔅᒃ ᑎᐸᔨᒋᒐᓱᐤ ᑲ ᐃᓯ ᐃᑐᑎᒥᓐ᙮”
6ᐊᑉᕋᒻ ᒂ ᐃᑕᑦ, “ᓂᑐᑕ, ᒋᔾ ᒋ ᑎᐸᔨᒪᐤ ᐊᓐ ᑯᐸᓇᔎᐤ, ᑐᑐᐤ ᐛᑐᑐᐅᑦ᙮” ᐊᑯ ᓴᕋᐃ ᓇᒪ ᐅᒋ ᒥᔪᑐᑐᐛᐤ ᐦᐊᐃᑲᕋ, ᒂ ᒋᑎᓯᒧᑦ ᐦᐊᐃᑲᕐ᙮
7ᑎᐸᔨᒋᒐᓱᐤ ᐅᑦ ᐊᓐᒋᓂᒪ ᒋ ᒥᔅᑯᐛᐤ ᐦᐊᐃᑲᕋ ᒥᒋᒪ ᒧᓇᐃᐸᓂᒡ ᐅᐱᒪ ᒪᔅᑭᓇᒡ ᓱᕐ ᐊᑎᒧᐎᒡ᙮ 8ᐊᑯ ᐊᑕᑦ, “ᐦᐊᐃᑲᕐ, ᓴᕋᐃ ᐅᑯᐸᓇᔎᒪ, ᑕᓐᑕ ᑲ ᐅᑐᑕᔨᓐ ᑭᔭ ᑕᓐᑕ ᐛ ᐃᑐᑕᔨᓐ ?”
ᐦᐊᐃᑲᕐ ᐃᑕᐤ, “ᓂᒋ ᒋᑎᓯᒪᐤ ᓄᐅᒋᒪᔎᒻ᙮”
9ᐊᑯ ᑎᐸᔨᒋᒐᓱᐛ ᐅᑦ ᐊᓐᒋᓂᒥᔪᐛ ᐊᑎᑯᑦ, “ᓂᑐᐛᐱᒻ ᑲᐤ ᒋᐅᒋᒪᔎᒻ ᑭᔭ ᒐ ᑕᑈᑐᐅᑦ᙮ 10ᒥᒐᑦ ᒋᑭ ᒥᔨᑎᓐ ᐊᓂᔅᑯᑕᐸᓐᒡ ᒐ ᐊᑲ ᒋ ᐊᒋᒪᑭᓄᐅᒡ ᒐ ᐃᔅᐱᒐᑎᒡ᙮”
11ᑎᐸᔨᒋᒐᓱᐛ ᐅᑦ ᐊᓐᒋᓂᒥᔪᐛ ᐃᔭᐱᒡ ᒂ ᐃᑎᑯᑦ,
“ᓂᑐᑐᐎ, ᒋᑭ ᐅᑯᓯᓐ᙮
ᐃᔅᒪᐃᓪ ᒐ ᐃᓯᓂᐧᑲᑎᑦ, ᐅᓴᒻ ᑎᐸᔨᒋᒐᓱᐤ ᒋ ᐸᑎᒻ ᑲ ᐃᔅᐱᔅ ᓂᓇᐧᑲᑕᔨᑎᒥᓐ᙮
12ᒥᓯᐛ ᐊᐛᔪᐛ ᒋᑭ ᒪᓯᐧᑯᐛᐤ ᑭᔭ ᒥᓯᐛ ᐊᐛᔪᐛ ᒋᑭ ᒪᓯᐧᑲᑯᐤ,
ᑭᔭ ᐊ ᐛᐧᑲᑕᑦ ᐎᐧᑲᓂᓴ ᒋᑭ ᐃᓯ ᐱᒪᑎᓯᔪᐤ᙮”
13ᐊᑯ ᐦᐊᐃᑲᕐ ᒂ ᐃᔅᒋᔄᑦ, “ᒋᔾ ᐅ ᒋᓴᒪᓂᑐᐤ ᐎᔭᐸᑕᐧᒃ ᑕᓐᑕ ᐊ ᑕᐅᒡ᙮” ᒂ ᐃᔅᒋᔄᑦ, “ᐛᔅ ᓂᒋ ᐛᐱᒪᐤ ᐊᓐ ᐊᐛᓐ ᑲᓄᐛᔨᒥᑦ ᑭᔭ ᐊᔅᒄ ᓂ ᐱᒪᑎᓯᓐ᙮” 14ᐊᐅᑯᓐ ᑲ ᐅᒋ ᐃᓯᓂᐧᑲᑕᒡ ᒧᓇᐃᐸᓐ ᐱᕐ-ᓚᐊᐃ-ᕈᐃ, “ᐊᓐ ᐊᐛᓐ ᑲ ᐛᐱᒥᑦ”; ᐊᔅᒄ ᐊᓐᑕ ᑎᒂᓐ ᑕᑕᐅᒡ ᑲᑎᔅ ᑭᔭ ᐸᕋᑦ ᐅᑕᓇᐛ᙮
ᐃᔅᒪᐃᓪ ᑲ ᐃᔪᐅᑦ
15ᑲᐤ ᒋ ᓂᑐᐛᐱᒪᐤ ᐦᐊᐃᑲᕐ ᐅᒋᒪᔎᒪ᙮ ᐊᑯ ᐦᐊᐃᑲᕐ ᒋ ᓄᑯᐃᒪᐤ ᐊᑉᕋᒪ ᐅᑯᓯᔪᐛ ᑭᔭ ᐃᔅᒪᐃᓪ ᒋ ᐃᓯᓂᐧᑲᑕᐤ ᐊᑉᕋᒻ ᐅᑯᓴ᙮ 16ᔭᓇᐤ ᑕᑐᔪᐤ ᐊᓱ ᐊᓱᑕᒡ ᒋ ᐃᑕᑐᐱᓇᓱᐤ ᐊᑉᕋᒻ ᑲ ᐃᔪᔨᒋ ᐃᔅᒪᐃᓚ᙮
Currently Selected:
ᒐᓂᓯᔅ 16: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
