ᐊᒃᓱᑕᔅ 40
40
ᐊ ᐎ ᑲᐳᑕᑭᓄᐅᒡ ᐸᔭᒋ-ᐱᒍᐎᔭᓂᒋᐛᑉ
1ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, 2“ᐅᔅᑭᒡ ᒋᓯᒄ ᐊᓐᑕ ᐅᔅᑭᒡ ᐱᓱᒻ ᒥᓐ ᑯᑎᒃ ᐱᐳᓐ ᒐ ᐎᑎᒧᐅᑥᐤ ᐃᔪᒡ ᒐᒋ ᐎᑲᐳᐅᑕᒡ ᐸᔭᒋ-ᐱᒍᐎᔭᓂᒋᐛᐱᔪᐤ᙮ 3ᒐ ᐱᑕᐊᒪᒄ ᐊᓐᑕ ᒥᐅᑎᒡ ᐊᓯᓂᔭ ᐸᐃᑯᔪᐤ ᐎᓱᐛᐅᓇ ᑲ ᒥᓯᓇᑕᔨᒋ, ᐊᑯᐛᑲᐃᑭᓐ ᒐ ᒋᑭᒧᑕᔭᒄ ᐊᓐᑕ ᓂᑲᓄᒡ᙮ 4ᒐ ᐱᑎᑭᑕᔭᒄ ᒥᒋᓱᐛᑭᓇᑎᒄ ᑭᔭ ᒐ ᑕᐧᑯᑎᔅᑕᔭᒄ ᐊᓐᑕ ᒐᒂᓐ ᒐ ᐃᑕᐱᑎᒡ ᑭᔭ ᐊᓯᒡ ᒐ ᐱᑎᑭᑕᔭᒄ ᐛᔅᑕᓂᐱᒪᑭᑕᓂᑎᒂ ᑭᔭ ᐊᔭᔅᑯᔭᑯᒡ ᐛᔅᑕᓂᐱᒪᑭᓐᒡ᙮ 5ᐊᑯ ᐊᓐ ᐱᔅᑎᓂᒐᐅᓇᐱᔅᒄ ᐊᓐᑕ ᑲ ᓯᔅᑲᐃᑭᓄᐎᒋ ᑲᐎᒋᒪᑯᓯᔨᒋ ᒐ ᐊᔅᑕᔭᒄ ᐊᓐᑕ ᓂᑲᓐ ᐸᔭᒋ-ᒥᐅᑎᒡ, ᑭᔭ ᒐ ᐊᑯᑕᔭᒄ ᐊᑯᐛᑲᐃᑭᓐ ᐊᓐᑕ ᐛᒋ ᐱᔨᒐᓄᐅᒡ ᐸᔭᒋ-ᐱᒍᐎᔭᓂᒋᐛᑉ᙮
6ᒐ ᐊᔅᑕᔭᒄ ᐊᓐᑕ ᐱᔅᑎᓂᒐᐅᓇᐱᔅᒄ ᐊᓐᑕ ᒪᑐᔅᑕᐊᒪᒐᓄᐎᔨᒋ ᐊᐛᓯᓯᒡ ᐊᓐᑕ ᓂᑲᓄᒡ ᐸᔭᒋ-ᐱᒍᐎᔭᓂᒋᐛᐱᒡ᙮ 7ᒐ ᐊᔅᑕᔭᒄ ᐛᑲᐸᐅᓱᐎᔭᑭᓐ ᑎᔅᑐᐎᒡ ᐸᔭᒋ-ᐱᒍᐎᔭᓂᒋᐛᐱᒡ ᑭᔭ ᐱᔅᑎᓂᒐᐅᓇᐱᔅᑯᒡ ᑭᔭ ᒐ ᓴᑭᔅᒋᓇᐱᑕᔭᒄ ᓂᐱᔾ᙮ 8ᒐ ᐊᑯᑕᔭᒄ ᐊᑯᐛᑲᐃᑭᓇ ᒥᓯᐛ ᐊᓐᑕ ᐛᔅᑲ ᐊᑐᐛᒡ ᑭᔭ ᒐ ᐊᑯᑕᔭᒄ ᐊᑯᐛᑲᐃᑭᓐ ᐊᓐᑕ ᐛᒋ ᐱᒐᓄᐅᒡ᙮
9ᐊᑯ ᒐ ᐅᑎᓇᒃ ᑐᒥᓂᒐᐅ-ᐱᒥᔾ ᑭᔭ ᒐ ᑐᒥᓂᒪᒄ ᐸᔭᒋ-ᐱᒍᐎᔭᓂᒋᐛᑉ ᑭᔭ ᒥᓯᐛ ᒐᒂᓐ ᐊ ᐃᑕᐱᑎᒡ ᐊᑯ ᒐ ᐸᔭᒋᓇᒂᒡ᙮ 10ᐃᔭᐱᒡ ᒐ ᑐᒥᓂᒪᒄ ᐱᔅᑎᓂᒐᐅᓇᐱᔅᒄ ᐊᓐᑕ ᑲ ᒥᑐᔅᑕᐊᒪᒐᓄᐅᒡ ᐊᐛᓯᓯᒡ ᑭᔭ ᒥᓯᐛ ᒐᒂᓐ ᐊ ᐃᑕᐱᑎᒡ ᐊᑯ ᒋᒋᐛ ᒐ ᐸᔭᒋᓇᒂᒡ᙮ 11ᐃᔭᐱᒡ ᐸᐃᑯᑕᐤ ᒐ ᐃᓯ ᑐᒥᓂᒪᒄ ᐛᑲᐸᐅᓱᐎᔭᑭᓐ ᑭᔭ ᐊᓐᑕ ᐊᑕᐧᑯᑎᔅᑕᒡ᙮
12ᐊᑯ ᒐ ᐸᓱᐛᑯᒡ ᐊᕋᓐ ᑭᔭ ᐅᑯᓴ ᐊᓐᑕ ᓂᑲᓐ ᐸᔭᒋ-ᐱᒍᐎᔭᓂᒋᐛᐱᒡ ᑭᔭ ᒐ ᒋᔅᑕᐸᐅᔭᑯᒡ ᓂᐱᔪᐤ᙮ 13ᐊᑯ ᒐ ᐳᔅᑭᒧᑎᔭᒄ ᐊᕋᓐ ᐊᔭᒥᐊᐅ-ᐊᐱᒋᑕᐅᓇ ᐊᑯ ᒐ ᑐᒥᓇᒄ ᒐᒋ ᐊᑐᔅᑯᐅᑦ ᐊᔭᒥᐊᐅᒋᒪᐅᑦ᙮ 14ᑭᔭ ᒐ ᐸᓱᐛᑯᒡ ᐊᕋᓐ ᐅᑯᓴ ᑭᔭ ᒐ ᒋᔅᑯᒧᑎᔭᑯᒡ ᐊᔭᒥᐊᐅ-ᐊᐱᒋᑕᐅᓇ᙮ 15ᐊᑯ ᒐ ᑐᒥᓇᑯᒡ ᒧᔭᒻ ᑲ ᐃᓯ ᑐᒥᓂᒪᑯᐤ ᐅᑕᐎᐛᐛ, ᐊᑯ ᒪᒃ ᒐᒋ ᐊᑐᔅᑯᐅᒡ ᐊᔭᒥᐊᐅᒋᒪᐅᒡ ᒥᓯᐛ ᒐ ᐊᑎ ᐊᔭᓂᔅᒐ ᐱᒪᑎᓯᓇᓄᐎᒡ᙮” 16ᒥᓯᐛ ᒋ ᐃᑐᑎᒺᐤ ᒧᓱᔅ ᑲ ᐃᑎᓱᒥᑯᑦ ᑎᐸᔨᒋᒐᓱᐛ᙮
17ᐊᑯ ᐊᓂᔭ ᓂᔅᑎᒻ ᒋᓯᑯᔪᐤ ᐊᓐᑕ ᓂᔅᑎᒻ ᐱᓯᒺ ᓂᓱ ᐱᐳᓂᔪᐤ ᒂ ᔅᑐᑕᒡ ᐃᒋᑉᑎᒡ ᐅᒡ, ᒂ ᒋᒥᑕᒡ ᐸᔭᒋ-ᐱᒍᐎᔭᓂᒋᐛᐱᔪᐤ᙮ 18ᐊᑐᑎᒺᒡ ᐊ ᐃᑎᓱᐛᔨᒋ ᒧᓱᓴ᙮ ᒂ ᒋᒥᑕᒡ ᐸᔭᒋ-ᐱᒍᐎᔭᓂᒋᐛᐱᔪᐤ ᑭᔭ ᑕᑕᐃᑭᓇ, ᒂ ᒋᒥᔭᒡ ᐛᔅᑲᔭᔅᑯᓂᑭᓇ᙮ ᒂ ᒋᑭᒺᐊᒡ ᓯᐸᔅᑯᓂᑭᓇ ᑭᔭ ᒂ ᒋᒥᔭᒡ ᓯᑥᔎᐃᑭᓇ ᐊᓐᑕ ᒐ ᐊᑯᑕᔨᒋ ᐊᑯᐛᑲᐃᑭᓇ᙮ 19ᒂ ᓴᑥᑭᔅᑕᒡ ᐊᑯᓇᐃᑭᓇ ᑕᑯᒡ ᐸᔭᒋ-ᐱᒍᐎᔭᓂᒋᐛᐱᒡ ᒧᔭᒻ ᒂ ᐃᑎᓱᐛᔨᒋ ᑎᐸᔨᒋᒐᓱᐛ᙮
20ᐊᑯ ᒧᓱᔅ ᒂ ᐅᑎᓇᐧᒃ ᐊᓂᔭ ᓂᓱ ᐊᓯᓂᔭ ᑲ ᒥᓯᓇᐃᑭᓄᔨᒋ ᐸᐃᑯᔪᐤ ᐎᓱᐛᐅᓇ, ᒂ ᐱᑕᐊᐧᒃ ᐸᔭᒋ-ᒥᐅᑎᒡ᙮ ᒂ ᓴᒂᐛᑦ ᒥᔅᑎᒂ ᐛᐎᔭᐱᔅᑯᒡ ᒐ ᐅᒋ ᑕᐧᑯᓇᑭᓂᐎᔨᒡ ᒥᐅᑎᔪᐤ ᑭᔭ ᒂ ᒋᐸᐊᐧᒃ ᒥᐅᑎᔪᐤ᙮ 21ᒂ ᐱᑎᑭᑕᑦ ᒥᐅᑎᔪᐤ ᐊᓐᑕ ᒪᐅᒡ ᐊ ᐸᔭᒋᓯᒥᑭᓂᔨᒡ ᐸᔭᒋ-ᐱᒍᐎᔭᓂᒋᐛᐱᒡ ᑭᔭ ᒂ ᐊᑯᑕᑦ ᐊᓐᑕ ᐊᑯᐛᑲᐃᑭᓂᔪᐤ, ᐊ ᐊᑲ ᓇᐊᔨᒪᑦ ᐃᔪᐛ ᒐᒋ ᐛᐸᑎᒥᔨᒋ ᐸᔭᒋ-ᒥᐅᑎᔪᐤ, ᒥᓯᐛ ᐅᔭ ᒋ ᐃᑐᑎᒻ ᒧᔭᒻ ᑲ ᐃᑎᓱᒥᑯᑦ ᑎᐸᔨᒋᒐᓱᐛ᙮
22ᒧᓱᔅ ᒂ ᐱᑎᑭᑕᑦ ᒥᒋᓱᐛᑭᓇᑎᑯᔪᐤ ᒋᐛᑎᓄᒡ ᐃᑕᒐ ᐸᔭᒋ-ᐱᒍᐎᔭᓂᒋᐛᐱᒡ, ᐎᐎᑎᒥᒡ ᐊᑯᑕᔨᒡ ᐊᑯᐛᑲᐃᑭᓂᔪᐤ᙮ 23ᒥᒋᓱᐛᑭᓇᑎᑯᒡ ᒂ ᐊᔭᑦ ᐸᒂᓯᑭᓇ ᐊᓂᔭ ᑎᐸᔨᒋᒐᓱᐛ ᑲ ᐱᔅᑎᓂᒧᐛᑭᓄᐎᒋ, ᒧᔭᒻ ᑲ ᐃᑎᓱᒥᑯᑦ ᑎᐸᔨᒋᒐᓱᐛ᙮
24ᒂ ᐊᔅᑕᑦ ᐛᔅᑕᓂᐱᒪᑭᓇᑎᑯᔪᐤ ᐊᓐᑕ ᐸᔭᒋ-ᐱᒍᐎᔭᓂᒋᐛᐱᒡ ᓴᐅᓄᒡ ᐃᑕᒐ, ᒂᔅᑕᒐ ᐊ ᑎᑯᓂᔨᒡ ᒥᒋᓱᐛᑭᓇᑎᑯᔪᐤ᙮ 25ᒂ ᓯᔅᑲᐛᑦ ᐛᔅᑕᓂᐱᒪᑭᓇ ᐅᑎᔅᑯᐤ ᑎᐸᔨᒋᒐᓱᐛ, ᒧᔭᒻ ᓇᐊᐤ ᑲ ᐃᑎᓱᐛᔨᒋ ᑎᐸᔨᒋᒐᓱᐛ᙮
26ᒂ ᐊᔅᑕᑦ ᑲ ᐎᔄᐅᓱᓇᔭᐅᔨᒡ ᐱᔅᑎᓂᒐᐅᓇᐱᔅᑯᔪᐤ ᐊᓐᑕ ᑲ ᓯᔅᑲᐃᑭᓄᐎᒋ ᑲᐎᒋᒪᑯᓯᔨᒋ ᐊᓐᑕ ᓂᑲᓐ ᐊᑯᐛᑲᐃᑭᓂᒡ᙮ 27ᑭᔭ ᒂ ᓯᔅᑲᐊᐧᒃ ᐱᔅᒐ ᑲᐎᒋᒪᑯᓯᔨᒋ, ᒧᔭᒻ ᓇᐊᐤ ᑲ ᐃᑎᓱᐛᔨᒋ ᑎᐸᔨᒋᒐᓱᐛ᙮ 28ᐊᑯ ᒂ ᐊᑯᑕᑦ ᐊᑯᐛᑲᐃᑭᓂᔪᐤ ᐊᓐᑕ ᐛᒋ ᐱᔨᒐᓄᐎᒡ ᐸᔭᒋ-ᐱᒍᐎᔭᓂᒋᐛᐱᔪᐤ᙮
29ᒂ ᐊᔅᑕᑦ ᐱᔅᑎᓂᒐᐅᓇᐱᔅᑯᔪᐤ ᐊᓐᑕ ᒥᒪᑐᔅᑕᐊᒪᒐᓂᐎᔨᒋ ᐊᐛᓯᓴ ᒥᒋᒪ ᐛᒋ ᐱᒐᓄᐎᔨᒡ ᐸᔭᒋ-ᐱᒍᐎᔭᓂᒋᐛᐱᔪᐤ, ᑭᔭ ᒂ ᒥᑐᔅᑕᐊᒪᑦ ᐎᔭᓯᔪᐤ ᑭᔭ ᐸᒂᓯᑭᓂᒥᓇ, ᒧᔭᒻ ᑲ ᐃᑎᓱᒥᑯᑦ ᒧᓱᔅ ᑎᐸᔨᒋᒐᓱᐛ᙮
30ᒂ ᐊᔅᑕᑦ ᐛᑲᐸᐅᓱᐎᔭᑭᓂᔪᐤ ᑎᔅᑐᐎᒡ ᐱᔅᑎᓂᒐᐅᓇᐱᔅᑯᒡ ᑭᔭ ᐸᔭᒋ-ᐱᒍᐎᔭᓂᒋᐛᐱᒡ ᑭᔭ ᒂ ᓴᑭᔅᒋᓇᐱᑕᑦ ᓂᐱᔪᐤ᙮ 31ᐊᑯᑕ ᒧᓱᔅ ᑭᔭ ᐊᕋᓐ ᑭᔭ ᐅᑯᓯᔪᐛ ᒂ ᒋᔅᑕᐸᐅᑕᒡ ᐅᑎᒋᔨᐛᐛ ᑭᔭ ᐅᓯᑎᐛᐛ, 32ᑕᑥᐤ ᐛᐱᒐᑥᐎ ᐸᔭᒋ-ᐱᒍᐎᔭᓂᒋᐛᐱᔪᐤ ᑭᔭ ᒪᒃ ᐛᓇᑕᑥᐎ ᐱᔅᑎᓂᒐᐅᓇᐱᔅᑯᔪᐤ᙮ ᒧᔭᒻ ᑲ ᐃᑎᓱᒥᑯᑦ ᒧᓱᔅ ᑎᐸᔨᒋᒐᓱᐛ᙮
33ᒧᓱᔅ ᒂ ᐊᑯᑕᑦ ᐊᑯᐛᑲᐃᑭᓇ ᒥᓯᐛ ᐊᓐᑕ ᐛᔅᑲ ᐊᑐᐛᔨᒡ ᑭᔭ ᒋ ᐊᑯᑕᐤ ᐊᑯᐛᑲᐃᑭᓂᔪᐤ ᐊᓐᑕ ᐛᒋ ᐱᒐᓄᐎᔨᒡ᙮ ᐊᑯ ᒧᓱᔅ ᒂ ᒋᔅᑕᑦ ᒥᓯᐛ ᐊᑐᔅᒐᐅᓂᔪᐤ᙮
ᑭᔅᑯᐅᓐ ᑭᔭ ᒋᔅᑕᔨᑕᑯᓱᐅᓐ
34ᐊᑯ ᑭᔅᑯᐅᓐ ᒂ ᐊᑯᓇᐧᒃ ᐊᓂᔭ ᐸᔭᒋ-ᐱᒍᐎᔭᓂᒋᐛᐱᔪᐤ ᑭᔭ ᒂ ᓴᑭᔅᒋᓇᔨᒡ ᐊᓐᑕ ᑎᐸᔨᒋᒐᓱᐤ ᐅᒋᔅᑕᔨᑕᑯᓱᐅᓐ᙮ 35ᐅᔭ ᐅᒡ, ᒧᓱᔅ ᓇᒪ ᐅᒋ ᐱᒐᐤ ᐊᓂᔭ ᐸᔭᒋ-ᐱᒍᐎᔭᓂᒋᐛᐱᔪᐤ᙮
36ᐊᑯ ᑕᑥᐤ ᐛᐱᔨᒋ ᑭᔅᑯᐅᓐ ᐸᔭᒋ-ᐱᒍᐎᔭᓂᒋᐛᐱᒡ ᐅᒡ, ᒂ ᐊᑐᒐᒡ ᐃᔅᕋᐃᓪ ᐃᔪᒡ᙮ 37ᒥᒄ ᐊᑲ ᐅᐱᔨᒋ ᑭᔅᑯᐅᓐ, ᓇᒪ ᐅᒋ ᐊᑐᒐᐅᒡ ᐃᔅᕋᐃᓪ ᐃᔪᒡ᙮ 38ᒪᒂᒡ ᑕᑥᐤ ᐃᔭᑐᒐᑥᐎ ᐃᔅᕋᐃᓪ ᐃᔪᒡ ᒋ ᐛᐱᒪᐅᒡ ᑭᔅᑯᐅᓇ ᐊᓐᑕ ᐊ ᑕᔨᒋ ᑎᐸᔨᒋᒐᓱᐛ ᐊᓐᑕ ᑕᐧᑯᒡ ᐸᔭᒋ-ᐱᒍᐎᔭᓂᒋᐛᐱᒡ ᒐᓯᑲᔨᒋ ᑭᔭ ᑕᐱᔅᑲᔨᒋ ᐃᔅᑯᑕᔪᐤ ᒋ ᐛᐸᑎᒧᒡ᙮
Currently Selected:
ᐊᒃᓱᑕᔅ 40: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
