ᐊᒃᓱᑕᔅ 26
26
ᒐ ᐃᓯᓇᑯᑕᓄᐅᒡ ᐸᔭᒋ-ᐱᒍᐎᔭᓂᒋᐛᑉ
1ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒐ ᐎᑎᒧᐅᑥᐤ ᐃᔪᒡ ᒐᒋ ᐅᓯᑕᒡ ᐸᔭᒋ-ᐱᒍᐎᔭᓂᒋᐛᐱᔪᐤ ᐸᐃᑯᔪᐤ ᐊ ᒋᓏᑲᒋ ᐊ ᒥᔽᓯᔨᒋ ᐱᒍᐎᔭᓇ ᐊ ᐊᐱᒋᑕᒡ, ᐊ ᓂᔅᑯᐛᐱᔅᑕᐛᒡ ᑲ ᐱᔅᑭᓂᓯᔨᒋ ᑭᔭ ᑲ ᐱᒋᒥᓇᑯᓯᔨᒋ ᑭᔭ ᑲ ᒥᐧᑯᓯᔨᒋ ᐊᓯᑭᓇᔭᐱᔭ᙮ ᒋᑭ ᒥᒪᑕᐅᒂᑕᐅᒡ ᐊᓐᑕ ᐊᐛᓯᓴ ᐊ ᐅᑎᑎᑭᓄᐎᒋ᙮ 2ᒥᓯᐛ ᐸᐃᑯᑕᐤ ᒋᑭ ᐎ ᐃᔅᐱᓴᑭᓇ ᐱᒍᐎᔭᓇ: ᓇᐅᓴᑉ ᑎᐸᔎᐃᑭᓇ ᐊᔅᐱᔅ ᒋᓏᒋ ᑭᔭ ᓂᓱ ᑎᐸᔎᐃᑭᓇ ᐊᔅᐱᔅ ᐃᔨᑭᔅᑲᔨᒋ᙮ 3ᒪᒧᐤ ᐱᑕᑕᒡ ᒋᑭ ᒪᒧᒂᑎᒧᒡ ᐱᒍᐎᔭᓇ ᒐᒋ ᐸᐃᑯᓂᔨᒡ ᑭᔭ ᐸᐃᑯᑕᐤ ᒋᑭ ᐃᑐᑎᒧᒡ ᐊᓂᔭ ᑯᑎᑲ ᐱᑕᑕᒡ᙮ 4ᐊᓂᔭ ᑕᑐᐤ ᐊ ᐸᐃᒂᑭᓂᔨᒋ, ᒋᑭ ᐛᐅᔭᔭᐸᒋᓂᒧᒡ ᐊ ᐱᔅᑭᓇᔨᒋ ᐱᒍᐎᔭᓇ ᐊᓐᑕ ᐊᔨᑐᐤ᙮ 5ᐱᑕᑕᒡ ᑕᑐᔪᐤ ᒋᑭ ᐛᐅᔭᔭᐸᒋᓂᒧᒡ ᐊᓐᑕ ᐊ ᐅᓂᔎᑭᓂᔨᒋ ᓂᔅᑎᒻ ᐊ ᐸᐃᒂᑭᓂᔨᒡ ᐱᒍᐎᔭᓂᒡ ᑭᔭ ᐱᑕᑕᒡ ᑕᑐᔪᐤ ᐊᓐᑕ ᐊ ᐅᓂᔎᑭᓂᔨᒡ ᑯᑎᒋᔪᐤ ᐱᒍᐎᔭᓂᒡ᙮ 6ᐊᑯ ᒐ ᐛᓯᑕᒡ ᐱᑕᑕᒡ ᑕᑐᔪᐤ ᐊ ᐎᔄᐅᓱᓇᔭᐱᓯᔨᒋ ᓯᒋᐸᒋᑭᓇ ᒐᒋ ᑕᐱᑐᒧᒋ ᐱᒍᐎᔭᓇ ᒐᒋ ᐸᐃᒂᑲᒡ, ᐊᑯ ᒧᔭᒻ ᐊ ᐸᐃᒂᒡ ᒐᒋ ᐃᓯᓇᒂᒡ ᐸᔭᒋ-ᐱᒍᐎᔭᓂᒋᐛᑉ᙮
7ᐃᔭᐱᒡ ᒋᑭ ᐅᓯᑕᐅᒡ ᐊᑯᐛᑲᐃᑭᓂᔪᐤ ᒐᒋ ᒋᐸᐃᑭᓄᐅᒡ ᐸᔭᒋ-ᐱᒍᐎᔭᓂᒋᐛᑉ ᐸᐃᑯᓴᑉ ᐊᑕᑥᑲᒋ ᐱᒍᐎᔭᓇ ᒥᔅᑐᓯᔅ ᐅᐱᐎᔭ ᐊ ᐅᒋ ᐅᓯᑕᑭᓄᐅᒋ᙮ 8ᒥᓯᐛ ᐸᐃᑯᑕᐤ ᒋᑭ ᐎ ᐃᔅᐱᓴᐛ: ᐱᑕᑕᒡ ᑕᑐᓴᑉ ᑎᐸᔎᐃᑭᓇ ᐊᔅᐱᔅ ᒋᓏᒋ ᑭᔭ ᓂᓱ ᑎᐸᔎᐃᑭᓇ ᐊᔅᐱᔅ ᐃᔨᑭᔅᑲᒋ᙮ 9ᒪᒧᐤ ᐱᑕᑕᒡ ᒋᑭ ᒪᒧᒂᑎᒧᒡ ᐱᒍᐎᔭᓇ ᒐᒋ ᐸᐃᒂᑭᓂᔨᒡ ᑭᔭ ᒪᒧᐤ ᑯᑎᑲ ᐊᓱᑕᒡ ᒋᑭ ᒪᒧᒂᑎᒧᒡ ᐱᒍᐎᔭᓇ ᒐᒋ ᐸᐃᒂᑭᓂᔨᒡ᙮ ᒋᑭ ᐎ ᓂᔄᒋᓂᒧᒡ ᐊᓂᔭ ᐊᓱᑕᒡ ᐊᑕᑥᑭᓂᔨᒋ ᐱᒍᐎᔭᓇ ᒐᒋ ᐊᑯᓇᐃᑭᓄᐎᒡ ᓂᑲᓐ ᐸᔭᒋ-ᐱᒍᐎᔭᓂᒋᐛᐱᔪᐤ᙮ 10ᒋᑭ ᐅᓴᐅᒡ ᐱᑕᑕᒡ ᑕᑐᔪᐤ ᒐ ᐛᐅᔭᔭᐸᒋᓇᒡ ᐊᐱᔅᑭᓇᔨᒋ ᐱᒍᐎᔭᓇ ᑭᔭ ᒐ ᒋᑭᒺᐊᒡ ᐊᓂᔭ ᐱᑕᑕᒡ ᑕᑐᔪᐤ ᐊᓐᑕ ᐊ ᐅᓂᔎᓂᔨᒡ ᐊ ᐸᐃᒂᑭᔨᒡ ᐱᒍᐎᔭᓂᔪᐤ᙮ 11ᐊᑯ ᒐ ᐛᓯᑕᒡ ᐱᑕᑕᒡ ᑕᑐᔪᐤ ᑲ ᐎᔄᐛᐱᔅᑯᔨᒋ ᓯᒋᐸᒋᑭᓇ᙮ ᒋᑭ ᒪᑯᐱᑎᒧᒡ ᓯᒋᐸᒋᑭᓇ ᐊᑯ ᒐ ᒋᑭᒧᑕᒡ ᐊᓐᑕ ᑲ ᐛᐅᔭᔭᐸᒋᓇᒡ ᑲ ᐱᔅᑭᓇᔨᒋ ᐱᒍᐎᔭᓇ, ᐊᑯ ᒐ ᒪᒧᒋᑭᒧᑕᒡ ᒐᒋ ᐸᐃᒂᑭᓂᔨᒡ᙮ 12ᐊᔅᑯᐱᔨᒡ ᐱᒍᐎᔭᓐ ᐅᑕᒡ ᐊᓐᑕ ᐸᔭᒋ-ᐱᒍᐎᔭᓂᒋᐛᐱᒡ ᒐ ᐱᔅᑕᑭᔅᑕᒡ᙮ 13ᐊᓐ ᐊᔅᑯᐱᔨᒡ ᐳᔅᒄ ᑎᐸᔎᐃᑭᓇ ᐊᔨᑐᐤ ᐊᓐᑕ ᐸᔭᒋ-ᐱᒍᐎᔭᓂᒋᐛᐱᒡ ᒐ ᐱᔅᑕᑭᔅᑕᒡ᙮ 14ᒋᑭ ᐅᓯᑕᐅᒡ ᒥᓐ ᓂᓱ ᐊᑯᓇᐃᑭᓇ᙮ ᐸᐃᒄ ᓇᐸ ᒪᔭᑕᓂᓱᐎᔭᓇ ᐊ ᒋᓯᓇᑭᓄᔨᒋ ᐊᐱᒋᐊᒡ᙮ ᐊᑯ ᐊᓐ ᑯᑎᒃ ᐊ ᒥᔽᒡ ᐱᓴᑭᓐ, ᐅᔅᒡ ᒐᒋ ᐅᒋ ᐱᔅᑕᑭᔅᑕᔨᒡ᙮
15ᓇᐎᔪᐤ ᐊᓱ ᔭᓇᐤ ᐊᐱᓱᔭ ᒋᑭ ᐅᓴᐅᒡ ᐊᑲᓯᔭ ᒥᔅᑎᒂ ᐅᒋ ᒐᒋ ᒋᒥᑕᔨᒋ᙮ 16ᐸᐃᒄ ᐊᐱᓱᔾ ᐱᑕᑕᒡ ᑕᑐᓴᑉ ᒥᓯᑦ ᒋᑭ ᐃᔎᔅᑯᓱᐤ ᑭᔭ ᓂᓱᔪᐤ ᐊᓱ ᓂᔄᐅᑕᒡ ᒥᒋᒋᓐ ᒋᑭ ᐃᔅᐱᔅ ᐃᔨᑭᔅᒋᔪᐤ᙮ 17ᒋᑭ ᓂᓯᓇ ᐊᓐᑕ ᐊᓇᒡ ᐊᐱᓱᔨᒡ ᐊ ᓂᓱᑲᐳᐅᒋ ᒥᔅᑎᒂ ᒐᒋ ᒪᒧᑭᒧᒋ ᐊᒋᒥᑕᒋ ᐊᐱᓱᔭ᙮ ᒥᓯᐛ ᑕᑐᐤ ᑕᐱᔅᑯᓐ ᒋᑭ ᐎ ᐃᓯᓇᑯᑕᐅᒡ᙮ 18ᒋᑭ ᐅᓯᑕᐅᒡ ᓂᓱᔪᐤ ᐊᐱᓱᔭ ᐱᓯᒧᑕᒡ ᐃᑕᒐ ᒐᒋ ᒋᒥᑕᒋ᙮ 19ᑭᔭ ᓇᐎᔪᐤ ᐊ ᓱᓇᔭᐱᔅᑯᔨᒋ ᑕᑕᐃᑭᓇ ᐊᓇᒡ ᒐᒋ ᐊᔅᑕᒋ, ᓂᓱ ᑕᑕᐃᑭᓇ ᐊᓇᒡ ᐸᐃᒄ ᐊᐱᓱᔨᒡ ᒐᒋ ᒋᒥᑕᒋ ᐊᐱᓱᔭ ᒐᒋ ᒥᒋᒪᔨᑭᓄᔨᒋ᙮ 20ᒋᑭ ᐅᓯᑕᐅᒡ ᓂᓱᔪᐤ ᐊᐱᓱᔭ ᒋᐛᑎᓄᑕᒡ ᐃᑕᒐ ᐸᔭᒋ-ᐱᒍᐎᔭᓂᒋᐛᐱᒡ ᒐᒋ ᒋᒥᑕᔨᒋ 21ᑭᔭ ᓇᐎᔪᐤ ᐊ ᓱᓇᔭᐱᔅᑯᔨᒋ ᑕᑕᐃᑭᓇ, ᓂᓱ ᑕᑕᐃᑭᓇ ᐊᓇᒡ ᐸᐃᒄ ᐊᐱᓱᔨᒡ᙮ 22ᐊᓱᑕᒡ ᐊᐱᓱᔭ ᒋᑭ ᐅᓯᑕᐅᒡ ᐊᓐᑕ ᐅᑕᒡ ᐸᔭᒋ-ᐱᒍᐎᔭᓂᒋᐛᐱᒡ, ᐊᑎᒪᐱᓯᒧᑕᒡ ᐃᑕᒐ, 23ᑭᔭ ᓂᓱ ᐊᐱᓱᔭ ᐊᓐᑕ ᐊ ᒋᒐᔭᒡ ᐅᑕᒡ ᐸᔭᒋ-ᐱᒍᐎᔭᓂᒋᐛᐱᒡ᙮ 24ᒋᑭ ᐊᓂᔅᑯᒺᐅᒡ ᐊᓂᔭ ᐊ ᒋᒐᔭᔨᒡ ᐊᐱᓱᔭ ᐊᓐᑕ ᐊᓇᒡ ᐃᔅᐱᔅ ᑕᐧᑯᒡ᙮ 25ᐊᑯ ᒪᒧᐤ ᔭᓇᐤ ᐊᐱᓱᔭ ᒋᑭ ᐃᑕᑎᓂᔨᐛ ᑭᔭ ᐊᓱᑕᒡ ᑕᑐᓴᑉ ᐊ ᓱᓇᔭᐱᔅᑯᔨᒋ ᑕᑕᐃᑭᓐ, ᓇᓂᓱ ᐊᓇᒡ ᐊᐱᓱᔭ ᒐᒋ ᑎᒂᒋ᙮
26ᐱᑕᑕᒡ ᑕᑐᓴᑉ ᓯᐸᔅᑯᓂᑭᓇ ᒋᑭ ᐅᓯᑕᐅᒡ ᐊᑲᓯᔭ ᒥᔅᑎᒂ ᐅᒡ, ᐱᑕᑕᒡ ᓯᐸᔅᑯᓂᑭᓇ ᐊᓐᑕ ᐊᐱᓱᔨᒡ ᐊᓐᑕ ᐅᐱᒪ ᐸᔭᒋ-ᐱᒍᐎᔭᓂᒋᐛᐱᒡ ᐃᑕᒐ, 27ᑭᔭ ᐱᑕᑕᒡ ᓯᐸᔅᑯᓂᑭᓇ ᐊᓐᑕ ᐊᐱᓱᔨᒡ ᒂᔅᑕᒐ ᐃᑕᒐ ᐸᔭᒋ-ᐱᒍᐎᔭᓂᒋᐛᐱᒡ᙮ ᑭᔭ ᐱᑕᑕᒡ ᓯᐸᔅᑯᓂᑭᓇ ᐊᓐᑕ ᐊᐱᓱᔨᒡ ᓂᔅᐸᒋᐅᓂᒡ ᐃᑕᒐ ᐅᑕᒡ ᐸᔭᒋ-ᐱᒍᐎᔭᓂᒋᐛᐱᒡ᙮ 28ᒋᑭ ᒪᑯᐱᑕᐅᒡ ᓯᐸᔅᑯᓂᑭᓇ ᐊᓐᑕ ᑕᑕᐅᒡ ᐊᐱᓱᔨᒡ ᒥᓯᐛ ᐊᔅᐱᓴᔨᒡ ᐸᔭᒋ-ᐱᒍᐎᔭᓂᒋᐛᐱᒡ᙮ 29ᐎᔄᐅᓱᓇᔭᐤ ᒋᑭ ᐎᔎᔭᒋᓂᒧᒡ ᐊᐱᓱᔭ ᑭᔭ ᒋᑭ ᐅᓯᐊᐅᒡ ᐊ ᐎᔄᐅᓱᓇᔭᔨᒡ ᐛᐎᔭᐱᔎ ᒐᒋ ᒋᑭᒧᒋ ᓯᐸᔅᑯᓂᑭᓇ ᐊᓐᑕ ᐊᐱᓱᔨᒡ᙮ ᐎᔄᐅᓱᓇᔭᔪᐤ ᐃᔭᐱᒡ ᒋᑭ ᐎᔎᔭᒋᓂᒧᒡ ᓯᐸᔅᑯᓂᑭᓂᒡ᙮
30ᐊᑯ ᒐ ᐎᑲᐳᑕᒡ ᐸᔭᒋ-ᐱᒍᐎᔭᓂᒋᐛᐱᔪᐤ ᒧᔭᒻ ᑲ ᐃᓯ ᐛᐸᑎᔨᑕᓐ ᐊᓐᑕ ᐱᔅᑯᑎᓇᒡ ᑲ ᑕᔭᐧᒄ᙮
31ᒋᑭ ᐅᓯᑕᐅᒡ ᐊᑯᐛᑲᐃᑭᓇ ᒐᒋ ᒋᐸᐃᑭᓄᔨᒋ ᑲ ᐸᔭᐧᑭᓂᔨᒋ ᐊᔅᐱᔅᒋᒐᔨᒋ ᐊ ᒥᔽᓯᔨᒋ ᐱᒍᐎᔭᓇ ᐊ ᐊᐱᒋᑕᒡ, ᐊ ᓂᔅᑯᐛᐱᔅᑕᐛᒡ ᑲ ᐱᔅᑭᓂᓯᔨᒋ ᑭᔭ ᑲ ᐱᒋᒥᓇᑯᓯᔨᒋ ᑭᔭ ᑲ ᒥᐧᑯᓯᔨᒋ ᐊᓯᑭᓇᔭᐱᔭ᙮ ᒋᑭ ᒥᒪᑕᐅᒂᑕᐅᒡ ᐊᓐᑕ ᐊᐛᓯᓴ ᐊ ᐅᑎᑎᑭᓄᐎᒋ᙮ 32ᒋᑭ ᐊᑯᑕᐅᒡ ᐊᑯᐛᑲᐃᑭᓇ ᐊᓐᑕ ᓇᐤ ᐊᑲᓯᐊ ᒥᔅᑎᒂ ᓯᑥᔎᐃᑭᓂᒡ ᐎᔄᐅᓱᓇᔭᐤ ᐊ ᐎᔎᔭᒋᓇᑭᓄᔨᒡ, ᓯᒋᐸᒋᑭᓇ ᐊ ᒋᑭᒧᒋ ᑭᔭ ᒐᒥᑕᒋ ᐊᓐᑕ ᓇᐤ ᐊ ᓱᓇᔭᐱᔅᑯᔨᒋ ᑕᑕᐃᑭᓇ᙮ 33ᒋᑭ ᐊᑯᑕᐅᒡ ᐊᑯᐛᑲᐃᑭᓇ ᐊᓐᑕ ᓯᐸᔅᑯᓂᑭᓂᒡ ᐃᔅᐱᒥᒡ ᐸᔭᒋ-ᐱᒍᐎᔭᓂᒋᐛᐱᒡ, ᑭᔭ ᐅᑕᒡ ᐊᑯᐛᑲᐃᑭᓂᒡ ᒋᑭ ᐊᔅᑕᐅᒡ ᐸᔭᒋ-ᒥᐅᑎᔪᐤ ᐊᓐᑕ ᐸᒋᑎᒋ ᓂᓱ ᑲ ᐱᐱᒋᓯᒡ ᐊᓯᓂᔨᒡ ᐊᓐᑕ ᑲ ᒥᓯᓇᐃᑭᓄᐅᒋ ᓂᐎᓱᐛᐅᓇ᙮ ᐊᑯᐛᑲᐃᑭᓐ ᒋᑭ ᑎᐸᓂᒧᒥᑭᓐ ᑲ ᐸᔭᒋᒥᑲᒡ ᑲᐱᔅᒋᒐᔭᒡ ᑭᔭ ᑲᐱᔅᒋᒐᔭᒡ ᒪᐅᒡ ᑲ ᐸᔭᒋᓯᒥᑲᒡ᙮ 34ᒋᑭ ᒋᐸᐊᒧᒡ ᐸᔭᒋ-ᒥᐅᑎᔪᐤ᙮ 35ᐎᐎᑎᒥᒡ ᐊᓐᑕ ᑲᐱᔅᒋᒐᔭᔨᒡ ᒪᐅᒡ ᑲ ᐸᔭᒋᓯᒥᑭᓂᔨᒡ ᒋᑭ ᐊᔅᑕᐅᒡ ᒥᒋᓱᐛᑭᓇᑎᑯᔪᐤ ᐊᓐᑕ ᒋᐛᑎᓄᑕᒡ ᐸᔭᒋ-ᐱᒍᐎᔭᓂᒋᐛᐱᒡ ᑭᔭ ᐛᔅᑕᓂᐱᒪᑭᓇᑎᒂ ᐊᓐᑕ ᐱᓯᒧᑕᒡ ᐃᑕᒐ᙮
36ᒋᑭ ᐅᓯᑕᐅᒡ ᐊᑯᐛᑲᐃᑭᓂᔪᐤ ᒐᒋ ᒋᐸᐃᑭᓄᐅᒡ ᐛᒋ ᐱᒐᓄᐅᒡ ᐸᔭᒋ-ᐱᒍᐎᔭᓂᒋᐛᑉ ᐊ ᒥᔽᔨᒡ ᐱᒍᐎᔭᓂᔪᐤ ᐊ ᐊᐱᒋᑕᒡ ᐊ ᒥᒪᑕᐅᒂᑕᑭᓄᔨᒡ ᑲ ᐱᔅᑭᓂᓯᔨᒋ ᑭᔭ ᑲ ᐱᒋᒥᓇᑯᓯᔨᒋ ᑭᔭ ᑲ ᒥᐧᑯᓯᔨᒋ ᐊᓯᑭᓇᔭᐱᔭ᙮ 37ᐊᓐᑕ ᒐᒋᑭᒧᒡ ᐊᑯᐛᑲᐃᑭᓐ, ᒋᑭ ᐅᓯᐊᐅᒡ ᐱᑕᑕᒡ ᐊᑲᓯᐊ ᒥᔅᑎᒄ ᐊᐱᓱᔭ ᐎᔄᐅᓱᓇᔭᔪᐤ ᐊ ᐎᔎᔭᒋᓇᑭᓄᔨᒋ ᓯᒋᐸᒋᑭᓇ ᐊ ᒋᑭᒧᔨᒋ; ᒋᑭ ᐅᓯᐊᐅᒡ ᐱᑕᑕᒡ ᐊ ᐎᔄᐛᐱᔅᑯᔨᒋ ᑕᑕᐃᑭᓇ ᐊᓐᑕ ᒐ ᒋᒥᓱᔨᒋ ᐊᐱᓱᔭ᙮”
Currently Selected:
ᐊᒃᓱᑕᔅ 26: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
