ᐊᒃᓱᑕᔅ 14
14
ᒋ ᑎᔅᑭᒧᑕᐅᒡ ᒥᒂᑭᒥ ᐎᓂᐸᑯᔪᐤ ᐊ ᐸᔎᑭᒥᑲᔨᒡ
1ᐊᑯ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, 2“ᒐ ᐎᑎᒧᐅᑥᐤ ᐃᔅᕋᐃᓪ ᐃᔪᒡ ᒐᒋ ᑲᐤ ᒐᒋ ᒋᐛᒡ ᑭᔭ ᒐᒋ ᒪᓂᑲᓱᒡ ᒥᒋᒪ ᐊᓐᑕ ᐸᐃ-ᐦᐊᐦᐃᕈᑦ ᐅᑕᓇᔪᐤ, ᑎᔅᑐᐎᒡ ᒥᒃᑕᐅᓪ ᑭᔭ ᑲ ᒥᒂᔨᒡ ᐎᓂᐸᑯᔪᐤ ᒥᒋᒪ ᐸᐊᓪ-ᓯᐳᓐ ᐅᑕᓇᔪᐤ᙮ 3ᒋᓴᐅᒋᒪᐤ ᒋᑭ ᐃᑕᔨᑎᒻ, ‘ᐃᔅᕋᐃᓪ ᐃᔪᒡ ᐱᐸᒥᔨᑕᐅᒡ ᐊᓐᑕ ᐊᔅᒋᒡ, ᐊ ᒋᔎᐃᑯᒡ ᐸᐧᑯᑎᔅᑭᒥᑯᔪᐤ᙮’ 4ᑭᔭ ᓂᑭ ᐃᑐᑐᐛᐤ ᒋᓴᐅᒋᒪᐤ ᒥᓐ ᒐᒋ ᒥᔅᑯᔅᑎᒂᓇᑦ, ᑭᔭ ᒋᑭ ᓇᓴᐛᐤ ᐃᔪᐛ ᑭᔭ ᓂᑭ ᓴᐧᑯᒋᐊᐤ ᒋᓴᐅᒋᒪᐤ ᑭᔭ ᐅᓂᑐᐱᔪᐅ-ᐃᔨᒪ ᑭᔭ ᓂᑭ ᒋᔅᑕᔨᑕᑯᐃᑯᐅᓐ᙮ ᐊᑯ ᐃᒋᑉᑦ ᐃᔪᒡ ᒐᔅᒐᔨᑕᒡ ᓂᔾ ᐊᐅᔭᓐ ᑎᐸᔨᒋᒐᓱᐤ᙮” ᐊᑯ ᐃᔅᕋᐃᓪ ᐃᔪᒡ ᒂ ᓂᓇᐃᑐᐛᒡ ᑎᐸᔨᒋᒐᓱᐛ ᑭᔭ ᒂ ᒪᓂᑲᓱᒡ ᐊᓐᑕ ᑲ ᐃᑎᑯᒡ ᒐᒋ ᒪᓂᑲᓱᒡ᙮
5ᐃᔅᐱ ᑲ ᐎᑎᒧᐛᑭᓄᐅᑦ ᐃᒋᑉᑦ ᒋᓴᐅᒋᒪᐤ ᐊᒋ ᔅᑐᑕᔨᒋ ᐃᔅᕋᐃᓪ ᐃᔪᐛ, ᒋᓴᐅᒋᒪᐤ ᑭᔭ ᐅᑯᐸᓇᒪ ᒂ ᒂᔅᒐᔨᑕᒡ ᑭᔭ ᒂ ᐃᔅᒋᔄᒡ, “ᑕᓐ ᑲ ᐊᐃᑎᔭᐧᒃ ᐅ ? ᔅᒋ ᐱᔅᑎᓇᓄᐅᒡ ᐃᔅᕋᐃᓪ ᐃᔪᒡ ᑭᔭ ᓇᒪ ᒋᑭ ᒋ ᓴᔅ ᐅᑯᐸᓇᒥᑐᐛᓄᐅᒡ !” 6ᐊᑯ ᒂ ᓂᑐᐛᔨᑕᐧᒃ ᒋᓴᐅᒋᒪᐤ ᒐᒋ ᐊᔭᔅᑯᐛᔭᑭᓄᐎᒋ ᐅᑎᑎᐱᑕᐸᓇᔎ ᑭᔭ ᐅᓂᑐᐱᔪᐅ-ᐃᔨᒪ᙮ 7ᒂ ᔅᑐᑕᐊᑦ ᐊᓱᑕᒡ ᑕᑐᐤ ᒥᑕᓯᒥᑎᓄᐤ ᐛᒋ ᒥᔪᓯᔨᒋ ᑎᑎᐱᑕᐸᓇᔎ, ᑭᔭ ᒥᓯᐛ ᑯᑎᒂ ᑎᑎᐱᑕᐸᓇᔎ ᐊᓐᑕ ᐃᒋᑉᑎᒡ ᐊᓯᒡ ᐅᓂᑐᐱᔪᐅ-ᐃᔨᒪ᙮ 8ᑎᐸᔨᒋᒐᓱᐤ ᒋ ᐃᑐᑐᐛᐤ ᒋᓴᐅᒋᒪᐛ ᒐᒋ ᒥᔅᑯᔅᑎᒂᓇᔨᒋ, ᐊᑯ ᒋᓴᐅᒋᒪᐤ ᒂ ᓇᓴᐛᑦ ᐊᓂᔭ ᐃᔅᕋᐃᓪ ᐃᔪᐛ, ᑲ ᔅᑐᑕᔨᒋ ᐊ ᓱᒋᑕᐊᔨᒋ᙮ 9ᐃᒋᑉᑦ ᐃᔪᒡ ᒋ ᓇᓴᐛᐅᒡ ᐃᔅᕋᐃᓪ ᐃᔪᐛ ᒂ ᒐᔅᑎᐱᑕᒡ ᒪᒂᒡ ᑲ ᐎᒋᔨᒋ ᒥᒋᒪ ᐸᐃ-ᐦᐊᐦᐃᕈᑦ, ᒂᔅᑕᒐ ᐸᐊᓪ-ᓯᐳᓐ ᐅᑕᓇᔪᐤ᙮ 10ᐃᔅᐱ ᐃᔅᕋᐃᓪ ᐃᔪᒡ ᐎᔭᐱᒪᒡ ᒋᓴᐅᒋᒪᐛ ᑭᔭ ᐅᓂᑐᐱᔪᐅ-ᐃᔨᐛ ᐊ ᓇᓴᐅᑯᒡ, ᓇᔅᒡ ᒋ ᓴᒋᓯᐅᒡ ᑭᔭ ᒂ ᑕᑈᑕᒡ ᑎᐸᔨᒋᒐᓱᐛ᙮
11ᒂ ᐃᑕᒡ ᒧᓱᓴ, “ᓇᒪ ᓇ ᐅᒋᑎᑯᓇ ᓂᒂᔅᑲᓇ ᐊᓐᑕ ᐃᒋᑉᑎᒡ ? ᒋᒋ ᐸᓱᐅᓇᓐ ᐊ ᐅᑕ ᐸᐧᑯᑎᔅᑭᒥᑲᒡ ᒐᒋ ᓂᐱᔭᒡ ? ᒋ ᐛᐸᑕᓐ ᐊ ᐊᑐᑎᒥᓐ ᑲ ᐎᐎᑕᔨᔭᒡ ᐃᒋᑉᑎᒡ ! 12ᐊᐅᒄ ᐊᓐ ᑲ ᐎᑎᒪᑕᒡ ᐊᓐᑕ ᑲ ᑕᔭᐧᒃ ᐃᒋᑉᑎᒡ ! ᓂᒋ ᐃᔅᒋᔄᓇᓐ, ‘ᓂᑭᓯᓇᓐ, ᑭᔭ ᒥᔨᓇᓐ ᒐᒋ ᐊᑐᔅᑲᔨᒥᒡ ᐃᒋᑉᑦ ᐃᔪᒡ᙮’ ᐊᑎᑐᐤ ᒋᐸ ᒥᔽᐱᓐ ᒐᒋ ᐊᑐᔅᑲᔨᒥᒡ ᐃᒋᑉᑦ ᐃᔪᒡ ᐃᔅᐱᔅ ᐎ ᒐᒋ ᐳᓂᐱᒪᑎᓯᔭᒡ ᐅᑕ ᐸᐧᑯᑎᔅᑭᒥᑲᒡ !”
13ᒧᓱᔅ ᒂ ᐃᑕᑦ ᐃᔪᐛ, “ᐊᑲ ᓴᒋᓱᒄ ! ᐎ ᓱᒋᓯᒄ, ᑭᔭ ᒋᑭ ᐛᐸᑎᒺᓇᐛᐤ ᒐᒂᔪᐤ ᒐ ᐃᑐᑕᐧᒃ ᑎᐸᔨᒋᒐᓱᐤ ᒐᒋ ᐱᒪᒋᐃᑕᒄ ᐊᓄᒡ᙮ ᓇᒪ ᒋᑭ ᓄᒋᐧᑲᑯᐛᐅᒡ ᒥᓐ ᐊᓐᒡ ᐃᒋᑉᑦ ᐃᔪᒡ᙮ 14ᑎᐸᔨᒋᒐᓱᐤ ᒋᑭ ᒪᓯᒐᔅᑎᒪᑯᐛᐤ, ᓇᒪ ᒐᒂᓐ ᒋᑭ ᑎᑯᓐ ᒐ ᐃᑐᑎᒪᒄ᙮”
15ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒐᒂᓐ ᐛᒋ ᑕᑈᓯᔭᒄ ᒐᒋ ᐎᒋᐃᑎᑯᒡ ? ᐃᓯᒡ ᐃᔅᕋᐃᓪ ᐃᔪᒡ ᒐᒋ ᔅᑐᑕᒡ᙮ 16ᐊᑯ ᒪᒃ ᒐ ᐅᐱᓂᒥᓐ ᒋᓯᔅᑲᐅᓐ, ᐎᓂᐸᑯᒡ ᒐ ᐃᓯ ᓱᓂᔅᒐᔨᓐ᙮ ᒋᑭ ᑎᐸᓂᐱᔨᐛ ᓂᐱᔭ ᐎᓂᐸᑯᒡ ᐊᑯ ᒐ ᐱᒧᑕᒡ ᐊᓐᑕ ᐊ ᐸᔅᑕᐛᔅᑲᒥᑲᔨᒡ᙮ 17ᓂᑭ ᐃᑐᑐᐛᐅᒡ ᐃᒋᑉᑦ ᐃᔪᒡ ᓇᔅᒡ ᒐᒋ ᒥᔅᑯᔅᑎᒂᓇᒡ, ᐊᑯ ᒐ ᓇᓴᐛᒡ ᐃᔅᕋᐃᓪ ᐃᔪᐛ᙮ ᐊᑯ ᒐᔅᑕᔨᑕᑯᐃᑯᐅᔭᓐ ᒋ ᓴᐧᑯᒋᐃᒂᐛ ᒋᓴᐅᒋᒪᐤ ᑭᔭ ᐅᓂᑐᐱᔪᐅ-ᐃᔨᒪ᙮ 18ᐃᔅᐱ ᒋ ᓴᐧᑯᒋᐃᒂᐛ, ᒋᑭ ᒋᔅᒐᔨᑎᒧᒡ ᐃᒋᑉᑦ ᐃᔪᒡ ᓂᔾ ᐊ ᐎᔭᓐ ᑎᐸᔨᒋᒐᓱᐤ᙮”
Exodus 14.19-31 (Proper-19 Year A)
19ᒋᓴᒪᓂᑐᐤ ᐅᑦ ᐊᓐᒋᓂᒪ ᒪᒃ, ᑲ ᓂᑲᓄᑐᐛᑦ ᐊᓂᔭ ᐃᔅᕋᐃᓪ ᓂᑐᐱᔪᐅ-ᐃᔪᐛ, ᒋ ᐊᒋᐱᔪᐤ ᐊ ᐅᑕᒐᔅᑯᐛᑦ; ᑭᔅᑯᐅᓇ ᒪᒃ ᑲᒋ ᐱᒥᐅᑎᔅᑲᐎᔅᑲᑯᒡ ᒋ ᐊᒋᐱᔪᐛ ᐊ ᐅᑕᒐᔅᑲᑯᒡ᙮ 20ᒋ ᐸᒋ ᐃᑐᑕᐱᔪᐛ ᒪᒃ ᑎᔅᑐᐎᒡ ᐊᓐᑕ ᑲ ᐃᑕᒡ ᐃᒋᑉᑦ ᐃᔪᒡ ᑭᔭ ᐃᔅᕋᐃᓪ ᐃᔪᒡ; ᐊᓐᒡ ᒋ ᐊᑯᐛᒋᐱᑕᐤ ᑭᔭ ᐅᓂᑎᐱᔅᑲᒋᔅᑲᑯᐛᒡ, ᒪᒃ ᐊᑯ ᒋ ᐛᔅᑕᓂᒪᑯᐅᒡ ᐊ ᒪᒂᑎᐱᔅᑲᔨᒡ᙮ ᓇᒪᐎᔾ ᒪᒃ ᒥᒋᒪ ᒋ ᐸᒋ ᓇᑎᑯᐅᒡ ᐃᔅᑭᓐ ᑎᐱᔅᑲᐛ᙮
21ᒧᓱᔅ ᒪᒃ ᐎᓂᐸᑯᒡ ᒋ ᐃᓯ ᓱᐅᓂᔅᒐᔪᐤ, ᑎᐸᔨᒋᒐᓱᐤ ᒪᒃ ᒋ ᒋᐛᐱᔨᑕᐤ ᓂᐱᔭ ᐊ ᒥᔅᑎᔪᑎᓂᔨᒡ ᐛᐱᓄᑕᒡ ᐅᒋ ᐃᔅᑭᓐ ᑎᐱᔅᑲᐛ, ᒋ ᐸᔅᑕᐛᔅᑲᒥᒋᑕᐤ ᒪᒃ ᐎᓂᐸᑯᔪᐤ, ᓂᐱᔭ ᒪᒃ ᒋ ᑎᐸᓂᐱᔨᐛ᙮ 22ᐊᓐᒡ ᐃᔅᕋᐃᓪ ᐃᔪᒡ ᒪᒃ ᒋ ᐱᒧᑕᐅᒡ ᑕᑕᐅᒡ ᐎᓂᐸᑯᒡ ᐊ ᐸᒂᔅᑭᒥᑲᔨᒡ᙮ ᓂᐱᔭ ᒪᒃ ᒋ ᒪᓂᑭᓂᔅᑲᑯᐅᒡ ᐅᒥᔪᓄᐛᒡ ᐃᑕᒐ, ᑭᔭ ᐅᓂᔅᐸᒋᐅᓄᐛᒡ ᐃᑕᒐ᙮ 23ᐃᒋᑉᑦ ᐃᔪᒡ ᒪᒃ ᒋ ᐱᒥᑎᓴᐛᐅᒡ, ᐊ ᓇᓴᐛᒡ, ᑕᑕᐅᒡ ᐎᓂᐸᑯᒡ ᐃᔅᐱᔅ, ᒥᓯᐛ ᒋᓴᐅᒋᒪᐤ ᐅᑲᐸᐃᑭᔎᒪ, ᐅᑎᑎᐱᑕᐸᓇᔎ, ᑭᔭ ᑲᐸᐃᑭᔎᐛ ᓇᐸᐛ ᑲ ᐳᓯᔨᒋ᙮
24ᒋ ᐃᔅᐱᔪᐤ ᒪᒃ ᐃᔅᐱ ᐱᔭᑕᐸᓂᔨᒡ, ᐅᑎᐸᔨᒋᒐᐤ ᒋ ᑭᓄᐛᐱᒪᐤ ᐃᒋᑉᑦ ᓂᑐᐱᔪᐅ-ᐃᔪᐛ ᐃᔅᑯᑕᐤ ᓯᑥᔎᐃᑭᓂᒡ ᑭᔭ ᑭᔅᑯᐅᓂᒡ ᐅᒋ, ᑭᔭ ᒋ ᒥᑯᔅᑲᑕᔨᑎᒪᐊᐤ ᐃᒋᑉᑦ ᓂᑐᐱᔪᐅ-ᐃᔪᐛ᙮ 25ᒋ ᒥᓂᐱᑎᒺᐤ ᒪᒃ ᐅᑎᑎᐱᑕᐸᓇᔎ ᑎᑎᐱᓂᑭᓂᔪᐛ, ᒐᒋ ᐅᒋ ᑯᓯᑯᐸᔨᒋ᙮ ᐊᑯ ᒪᒃ ᐊ ᐃᑕᒡ ᐃᒋᑉᑦ ᐃᔪᒡ, “ᐊᑯᔅ ᒋ ᑎᓯᒪᑕᐅᓐᒋ ᐃᔅᕋᐃᓪ ᐃᔪᒡ; ᐛᔅ ᑎᐸᔨᒋᒐᓱᐤ ᒋᒪᓯᒐᔅᑎᒧᐛᐤ ᐊ ᒪᓴᐊᑦ ᐃᒋᑉᑦ ᐃᔪᐛ᙮”
26ᑎᐸᔨᒋᒐᓱᐤ ᒪᒃ ᒋ ᐃᑕᐤ ᒧᓱᓴ, “ᐎᓂᐸᑯᒡ ᐃᓯ ᓱᐅᓂᔅᒐᔨ ᒐᒋ ᒋᐛᐊᒂᓇᔅᑲᑯᒡ ᐃᒋᑉᑦ ᐃᔪᒡ, ᑭᔭ ᐅᑎᑎᐱᑕᐸᓇᔅᑯᒥᐛᐛ, ᑭᔭ ᑲᐸᐃᑭᔎᐛ ᑲ ᐊᐱᒋᐊᒡ᙮” 27ᒧᓱᔅ ᒪᒃ ᒋ ᓱᐅᓂᔅᒐᔨᔅᑎᒻ ᐎᓂᐸᑯᔪᐤ, ᐎᓂᐸᒄ ᒪᒃ ᒋᓱᐧᑲᑎᓯᐅᓐ ᐊ ᐸᒋ ᒋᐛᐱᔨᒡ, ᐃᒋᑉᑦ ᐃᔪᒡ ᒪᒃ ᒋ ᒋᑎᓯᒧᑎᒧᒡ: ᑎᐸᔨᒋᒐᓱᐤ ᒪᒃ ᒋ ᒂᑎᐱᐛᐸᐛᐤ ᑕᑕᐅᒡ ᐎᓂᐸᑯᒡ᙮ 28ᓂᐱᔾ ᒪᒃ ᒋ ᒋᐛᐱᔪᐤ, ᑎᑎᐱᑕᐸᓇᔎᒡ ᑭᔭ ᑲᐸᐃᑭᔎᐛ ᑲ ᐊᐱᒋᐊᒡ ᑭᔭ ᒥᓯᐛ ᐅᓂᑐᐱᔪᐅ-ᐃᔨᒪ ᒋᓴᐅᒋᒪᐤ ᐎᓂᐸᑯᒡ ᑲᒋ ᐃᓯ ᓇᓴᐛᒡ ᑕᒥᐸᑯᒡ ᒋ ᑕᔪᐛ: ᓇᒪᐎᔾ ᐛᐛᒡ ᐸᐃᒄ ᐊ ᐃᑕᓯᒡ ᒋ ᐃᔅᑯᐱᔪᐅᒡ᙮
29ᒥᒄ ᐊᓐᒡ ᐃᔅᕋᐃᓪ ᐃᔪᒡ ᒋ ᐱᒧᑕᐅᒡ ᐊ ᐸᒂᔅᑭᒥᑲᔨᒡ ᑕᑕᐅᒡ ᐎᓂᐸᑯᒡ: ᓂᐱᔭ ᒪᒃ ᒋ ᒪᓂᔅᑲᑎᑯᐛᔅᑲᑯᐅᒡ ᐅᒥᔪᓄᐛᒡ ᐃᑕᒐ, ᑭᔭ ᐅᓂᔅᐸᒋᐅᓄᐛᒡ ᐃᑕᒐ᙮ 30ᐊᑯ ᒪᒃ ᑎᐸᔨᒋᒐᓱᐤ ᐸᒪᒋᐊᑦ ᐃᔅᕋᐃᓪ ᐃᔪᐛ ᐊᓂᔭ ᐊ ᒋᓯᑲᔨᒡ ᐃᒋᑉᑦ ᐃᔪᐛ ᐅᑎᒋᔨᒡ ᐅᒋ: ᐃᔅᕋᐃᓪ ᐃᔪᒡ ᒪᒃ ᒋ ᐛᐱᒪᐅᒡ ᐃᒋᑉᑦ ᐃᔪᐛ ᐊ ᓂᐱᔨᒋ ᐎᓂᐸᑯᒡ᙮ 31ᐃᔅᕋᐃᓪ ᐃᔪᒡ ᒪᒃ ᒋ ᐛᐸᑎᒧᒡ ᐊᓂᔭᔪᐤ ᑲ ᒋᒋ ᐃᑕᔨᑕᒂᓂᔨᒡ ᑎᐸᔨᒋᒐᓱᐤ ᑲᒋ ᐃᑐᑐᐛᑦ ᐃᒋᑉᑦ ᐃᔪᐛ: ᐃᔪᒡ ᒪᒃ ᒋ ᓇᓂᒋᔅᑐᐛᐅᒡ ᑎᐸᔨᒋᒐᓱᐛ, ᑭᔭ ᒋ ᑕᑈᑐᐛᐅᒡ ᑎᐸᔨᒋᒐᓱᐛ, ᑭᔭ ᐅᑦ ᐊᑐᔅᒐᔭᑭᓂᔪᐛ ᒧᓱᓴ᙮
Currently Selected:
ᐊᒃᓱᑕᔅ 14: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
