ᐊᒃᓱᑕᔅ 12
12
ᐎᒪᔅᑲᒐᐅᓐ
Exodus 12.1-14 (Proper-18 Year A)
1ᑎᐸᔨᒋᒐᓱᐤ ᒪᒃ ᒋ ᐃᔨᒪᐊᐤ ᒧᓱᓴ ᑭᔭ ᐊᕋᓇ ᐊᓐᑕ ᐃᒋᑉᑎᒡ, ᐊ ᐃᑕᑦ, 2“ᐊᓄᒡ ᐅ ᐱᓯᒻ ᐊᐅᒄ ᒐ ᐅᔅᑭᑯᒋᐧᒄ ᐱᓯᒻ, ᐊᓐ ᐅᔅᑭᒡ ᐱᓯᒻ ᒐ ᐱᐳᒡ᙮ 3ᐃᔨᒪᐧᑯᒡ ᒥᓯᐛ ᐃᔅᕋᐃᓪ ᐃᔪᒡ, ᐊ ᐃᑕᑯᒡ, ᐃᔅᐱ ᐸᐃᑯᔪᐛ ᒋᓯᑲᒐ ᐅ ᐱᓯᒻ, ᒋᑭ ᐅᑎᓇᒪᓱᐤ ᒥᓯᐛ ᓇᐸᐤ ᐊᓐᑕ ᐊ ᐸᐃᑯᔅᑲᓇᓯᑦ ᐸᐃᒄ ᒪᔭᑕᓂᓯᓴ᙮ 4ᒧᔭᒻ ᒪᒃ ᐊ ᐸᐃᑯᑕᐅᓯᒡ ᐸᐃᒄ ᒥᒋᐛᐱᒡ ᐊᑲ ᒥᒐᑎᑥᐛ ᐸᐃᒄ ᒪᔭᑕᓂᓴ ᒐᒋ ᐅᑎᓇᒡ, ᐊᑯᔅ ᐎᔨᐛᐤ ᑭᔭ ᐎᒋᒪᑭᓄᐛᐛ ᒥᒋᒪ ᑲ ᐎᒋᔨᒋ ᒋᑭ ᒪᒧᐧᑯᐛᐅᒡ, ᒋᔨᐛᐤ ᒋᑭ ᒋᔅᒐᔨᑕᓇᐛᐤ ᐊ ᑕᑎᓯᒡ ᐊᐛᓐᒋ; ᒥᓯᐛ ᑕᑐᐤ ᐃᔪᐤ ᒐ ᐃᔅᐱᔅ ᒥᒋᓱᑦ᙮
5ᓇᒪ ᒋᑭ ᐎ ᒪᔅᒋᔪᐤ ᒋᒪᔭᑕᓂᓯᒧᐛᐤ, ᓇᐸ ᒪᔭᑕᓂᔅ ᐊ ᐸᐃᑯᐱᐳᓇᓯᑦ; ᒪᔭᑕᓂᔅ ᑭᔭ ᒪᒃ ᑲ ᐅᑦ ᐊᔅᑭᓂᓯᑦ ᑲ ᐊᐱᓯᓯᒡ ᐊᐛᓯᓯᒡ ᒋᑭ ᐅᒋ ᐅᑎᓇᐛᐅᒡ᙮ 6ᒋᑭ ᑭᓄᐛᔨᒪᐛᐤ ᒪᒃ ᐃᔅᐱᔅ ᓇᐅᓴᑉ ᐊ ᒋᓯᑲᒡ ᐊᓐ ᐱᓯᒻ: ᑭᔭ ᒥᓯᐛ ᑲ ᒪᒧᐎᒡ ᐃᔅᕋᐃᓪ ᐃᔪᒡ ᒋᑭ ᓂᐸᐊᐅᒡ ᐊᑎ ᐅᑕᑯᓯᔨᒐ᙮
7ᒋᑭ ᐅᑎᓂᒺᐅᒡ ᒪᒃ ᐱᔅᒐ ᐅᒥᐧᑯᔪᐤ, ᑭᔭ ᒋᑭ ᒥᓯᒂᐊᒧᒡ ᐊᔨᑐᐤ ᔅᑐᐧᑭᓇᑎᑯᒡ, ᑭᔭ ᑕᐧᑯᒡ ᔅᑐᐧᑭᓇᑎᑯᒡ ᐊᓐᑕ ᒥᒋᐛᐱᒡ ᒐ ᒧᐛᒡ᙮
8ᒋᑭ ᒥᒍᐛᐅᒡ ᒪᒃ ᐅᐎᔭᓯᔪᐤ ᐊᓂᔭ ᐊ ᑎᐱᔅᑲᔨᒡ; ᐊ ᓯᑭᑈᓄᐎᒡ ᒋᒡ ᑭᔭ ᐊᑲ ᐅᐱᓱᐎᔨᒋ ᐸᒂᓯᑭᓇ, ᒋᒡ ᑭᔭ ᐎᓴᒋᐸᒂ ᒋᑭ ᐃᓯ ᒥᒍᐅᒡ᙮ 9ᐊᑲᐎᔭ ᒥᒋᒄ ᐊ ᐊᔅᑲᒡ, ᐊᑲ ᑭᔭ ᑲ ᐅᓯᑭᓄᐅᒡ; ᒥᒄ ᐊ ᓴᑭᑈᓄᐅᒡ, ᐊᓯᒡ ᐅᔅᑎᒂᓐ ᑭᔭ ᐅᔅᑲᑕ, ᑭᔭ ᐊᓯᒡ ᑕᒥᔪᐤ᙮ 10ᓇᒪᐎᔾ ᒐᒂᓐ ᒪᒃ ᒋᑭ ᐎᔅᑯᐱᔪᐤ ᒐᒋᓴᐸᔭᒐ: ᐊᓐ ᒪᒃ ᒐ ᐃᔅᑯᐱᔨᒡ ᒐᒋᓴᐸᔭᒐ, ᒋᑭ ᐃᔎᓴᓇᐛᐤ᙮ 11ᐊᐅᒄ ᒪᒃ ᒐ ᐃᓯ ᒥᒋᔭᒄ; ᐊ ᐱᒂᑕᐅᔭᒄ, ᐊ ᒋᑭᔅᒋᓇᔭᒄ, ᑭᔭ ᐊ ᑕᐧᑯᓂᒪᒄ ᒋᓯᔅᑲᐅᓄᐛᐛ: ᑭᔭ ᒋᑭ ᔭᓯᒋᐳᓇᐛᐤ; ᐊᐅᒄ ᐅᒪ ᑎᐸᔨᒋᒐᓱᐤ ᐅᐎᒪᔅᑲᒐᐎᓐ᙮
12ᐛᔅ ᓂᑭ ᓴᐳᑐᐛᔅᑲᓐ ᐃᒋᑉᑦ ᐊᔅᒋᔾ ᐊᓐ ᒐ ᑎᐱᔅᑲᒡ, ᒥᓯᐛ ᓂᔅᑎᒧᓴᓐᒡ ᑲ ᓇᐸᓯᐅᒡ ᓂᑭ ᓂᐸᐅᒡ ᐊᓐᑕ ᐃᒋᑉᑦ ᐊᔅᒋᒡ, ᑕᐱᔅᑯᓐ ᐃᔪᐤ ᑭᔭ ᐊᐛᓯᔅ᙮ ᒥᓯᐛ ᐃᒋᑉᑎᒡ ᒥᓂᑐᐧᑲᓐᒡ ᓂᑭ ᐊᓏᔨᒪᐅᒡ; ᓂᔾ ᐅ ᑎᐸᔨᒋᒐᓱᐤ᙮ 13ᐊᓐ ᒥᐧᒄ ᒪᒃ ᒋᑭ ᐅᒋᔅᒋᓄᐛᒋᒋᑭᓂᓇᐛᐤ ᒥᒋᐛᐱᒡ ᐊ ᑕᔭᒄ: ᐃᔅᐱ ᒪᒃ ᐛᐸᑎᒪᓇ ᒥᐧᒄ, ᒋᑭ ᐎᒪᔅᑲᑎᓇᐛᐤ, ᑭᔭ ᐊᐧᑯᐃᑕᔅᐱᓇᐅᓐ ᓇᒪᐎᔾ ᒋᑭ ᐅᑎᑎᑯᓇᐛᐤ ᒐᒋ ᓂᓱᐅᓇᒋᐃᑯᔭᒄ, ᐃᔅᐱ ᐅᑕᒪᐊᒪᓇ ᐃᒋᑉᑦ ᐊᔅᒋᔾ᙮
14ᐊᓄᒡ ᐊ ᒋᓯᑲᒡ ᒪᒃ ᒋᑭ ᐅᒋᔅᒋᓄᐛᒋᒋᑭᓂᓇᐛᐤ; ᒋᑭ ᑭᓄᐛᔨᑕᓇᐛᐤ ᒪᒃ ᐊ ᒥᑯᓴᔅᑐᐛᒄ ᑎᐸᔨᒋᒐᓱᐤ ᐃᔅᐱᔅ ᒐ ᐊᑎ ᐊᔭᓂᔅᒐ ᐱᒪᑎᓯᐛᐛᒂ: ᒋᑭ ᑭᓄᐛᔨᑕᓇᐛᐤ ᐊ ᒥᑯᓴᔭᒄ ᐊ ᐃᑎᓱᐛᓄᐅᒡ ᑲᒋᒡ᙮
15ᐃᔅᐱᔅ ᓂᔄᐅᑕᒡ ᒋᓯᑲᐛ ᒋᑭ ᐎ ᒧᐛᐛᐤ ᐸᒂᓯᑭᓐ ᐊᑲ ᐅᐱᓱᑦ᙮ ᐊᓐ ᓂᔅᑎᒻ ᒋᓯᒄ ᒐ ᐎᐎᑎᓯᓇᒃ ᓯᐅᔅᑎᒪᑭᓐ, ᐅ ᒥᒄ ᐊᐛᓐ ᒥᒋᒐ ᒐᒂᔪᐤ ᓯᐅᔅᑎᒪᑭᓇ ᐊ ᐅᒋ ᐅᓯᑕᑭᓄᐎᒡ ᒪᒂᒡ ᐊᓂᔭ ᓂᔄᐅᑕᒡ ᒋᓯᒂ, ᒋ ᐃᑲᑎᓴᐛᑭᓄᐤ ᐊᓐᑕ ᐃᔅᕋᐃᓪ ᐅᒡ᙮ 16ᐅᔅᑭᒡ ᐊ ᒋᓯᑲᒡ ᒐ ᒪᒧᐎᔭᒃ, ᑭᔭ ᓂᔄᐅᑕᒡ ᐊ ᒋᓯᑲᒡ ᐃᔭᐱᒡ ᒐ ᒪᒧᐎᔭᒃ᙮ ᓇᒪ ᒋᑭ ᐊᑐᔅᒐᓄᐤ ᐅᔭ ᒋᓯᒂ, ᒥᒄ ᒐ ᐊᔭᔅᑯᔅᑕᔭᒄ ᒥᒋᒻ ᓄᑎᒻ ᐊᐛᓐ ᒐᒋ ᒥᒋᓱᑦ ᐊᐅᑯᓐ ᒥᒄ ᒐᒋ ᑐᑕᑭᓄᐅᒡ᙮
17ᒐ ᒥᑯᓴᔭᒃ ᐊ ᒥᒋᓱᓇᓂᒐᔭᒃ ᐸᒂᓯᑭᓐ ᐊᑲ ᐅᐱᓱᑦ, ᐛᔅ ᐊᐅᑯᓐ ᐅ ᓇᐊᐤ ᒋᓯᒄ ᑲ ᐎᐎᑕᔨᑎᑯᒡ ᐃᒋᑉᑎᒡ ᐅᒡ᙮ ᒐ ᒥᑯᓴᔭᒄ ᐅ ᒋᓯᒄ ᒐ ᐊᑎ ᐊᓂᔅᒐ ᐱᒪᑎᓯᔭᒄ᙮ 18ᐅᔅᑭᒡ ᐱᓯᒻ ᒐ ᐊᑲ ᒧᐛᒄ ᐸᒂᓯᑭᓐ ᐊᓯᐅᔅᑎᒪᑭᓄᐅᑦ, ᐊ ᓇᐅᓴᑉ ᒋᓯᑲᒡ ᐊ ᐅᑕᑯᓯᒡ ᐅᒡ ᐃᔅᐱᔅ ᓂᓱᔪᐤ ᐊᓱ ᐸᐃᒄ ᐊ ᒋᓯᑲᒡ ᐊ ᐅᑕᑯᓯᒡ᙮ 19ᓂᔄᐅᑕᒡ ᑕᑐ ᒋᓯᑲᐛ ᐃᔅᐱᔅ ᓇᒪ ᒋᑭ ᐎ ᑕᐤ ᓯᐅᔅᑎᒪᑭᓐ ᐊᓐᑕ ᐱᑎᑭᒥᒡ ᒋᒋᐛᐛᒡ᙮ ᒥᒋᒐ ᐊᐛᓐ ᒐᒂᔪᐤ ᐊ ᐅᐱᓯᔪᐎᒡ, ᒋᑭ ᐃᑲᑎᓴᐛᑭᓄᐤ ᐊᓐᑕ ᐃᔅᕋᐃᓪ ᐃᔪᐛ ᐅᒡ᙮ 20ᒐ ᐊᑲ ᒥᒋᔭᒄ ᒐᒂᓐ ᓯᐅᔅᑎᒪᑭᓐ ᐊᔅᒋᐱᔨᑦ᙮ ᒥᒄ ᑕᓐᑕ ᒐ ᐊᑎ ᐃᑕᔭᒃ, ᒐ ᒧᐛᒃ ᐸᒂᓯᑭᓐ ᐊᑲ ᐅᐱᓱᑦ᙮”
21ᐊᑯ ᒧᓱᔅ ᒂ ᒪᒧᐅᓇᑦ ᒥᓯᐛ ᐃᔅᕋᐃᓪ ᒋᓴᐃᔪᐛ ᑭᔭ ᒂ ᐃᑕᑦ, “ᒪᒋᒃ ᑎᐛᒡ ᔅᑐᑕᒪᒃ ᑭᔭ ᒐ ᐅᑎᓂᒪᓱᔭᒄ ᒋᒪᔭᑕᓂᓯᒧᐛᐅᒡ ᑭᔭ ᒐ ᓂᐸᐊᑯᒡ᙮ ᐊᐅᑯᓐᒡ ᐅᒡ ᐎᒪᔅᑲᒐᐅ ᒪᔭᑕᓂᓯᒡ᙮ 22ᒐ ᐅᑎᓇᑯᒡ ᐃᓴᑉ ᓂᐱᓯᔭᑎᑯᒡ ᑭᔭ ᒥᐧᑯᒡ ᒐ ᑯᒋᒪᑯᒡ ᐊᓐᑕ ᐊᔅᒋᐧᑯᒡ ᑭᔭ ᒐ ᒥᓯᒂᐊᒪᒄ ᐊᓐᑕ ᐃᔅᐱᒥᒡ ᔅᑐᐧᑭᓇᑎᑯᒡ ᑭᔭ ᐊᓐᑕ ᐊᔨᑐᐤ ᔅᑐᐧᑭᓇᑎᑯᒡ᙮ ᒥᓯᐛ ᐊᐛᓐ ᐱᑎᑭᒥᒡ ᒋᑭ ᐎ ᑕᐤ ᐃᔅᐱᔅ ᒐᒋᓴᐸᔭᒐ᙮ 23ᐊᓄᒡ ᒐ ᑎᐱᔅᑲᒡ ᒋᑭ ᐃᑐᑕᐤ ᑎᐸᔨᒋᒐᓱᐤ ᐊᓐᑕ ᒥᓯᐛ ᐃᒋᑉᑎᒡ ᒐᒋ ᓂᐸᐊᑦ ᒥᓯᐛ ᓂᔅᑎᒧᓴᓇ ᑲ ᓇᐸᓯᔪᐎᔨᒋ ᐅᑯᓯᒪᐛ ᐃᒋᑉᑦ ᐊ ᐃᑎᔅᑲᓇᓯᔨᒋ, ᐛᐸᑎᒥᔨᒐᓂ ᒥᐧᑯᔪᐤ ᐊᓐᑕ ᔅᑐᐧᑭᓇᑎᑯᒡ ᐊᑯ ᓇᒪ ᒋᑭ ᓇᐊᔨᒪᐤ ᐊᓐᒋᓇ ᑲ ᓂᐸᔪᐛᔨᒋ ᒐᒋ ᐱᑎᒂᑎᔨᑕᑯᐤ ᒐᒋ ᓂᐸᐃᑎᑕᑯᐤ᙮
24ᒋᔾ ᑭᔭ ᒋᑦ ᐊᐛᓯᒥᒡ ᒋᑭ ᐎ ᓇᔨᑕᓇᐛᐤ ᐅᔭ ᐃᑎᓱᐛᐅᓇ ᒧᔅ ᑲᒋᒡ᙮ 25ᑎᑯᓯᓂᔭᒂ ᐊᓐᑕ ᐊᔅᒋᒡ ᑎᐸᔨᒋᒐᓱᐤ ᑲ ᐊᓱᑎᒪᑕᒄ ᒐᒋ ᒥᔨᑕᒄ, ᒐ ᑭᓄᐛᔨᑎᒪᒄ ᐅ ᐃᑐᐅᓐ᙮ 26ᑭᔭ ᑭ ᑯᒂᒋᒥᑕᒂᐛ ᒋᑦ ᐊᐛᓯᒧᐛᐅᒡ, ‘ᒐᒂᓐ ᐅ ᐛᒋ ᒥᑯᓴᔭᐧᒄ ?’ 27ᐊᑯ ᒐ ᐃᑕᑯᒡ, ‘ᐎᒪᔅᑲᒐᐅ ᐱᔅᑎᓂᒐᐅᓐ ᐅ ᒐᒋ ᒋᔅᑕᔨᒪᑭᓄᐅᑦ ᑎᐸᔨᒋᒐᓱᐤ, ᐛᔅ ᒋ ᐎᒪᔅᑭᒻ ᐃᔅᕋᐃᓪ ᐃᔪᐛ ᐎᒋᔪᐤ ᐊᓐᑕ ᐃᒋᑉᑎᒡ ᑲ ᑕᓄᐎᒡ ᑭᔭ ᓇᒪ ᐅᒋ ᐎᔭᔅᑐᑐᐛᐤ ᐃᔅᕋᐃᓪ ᐃᔪᐛ ᑲ ᐊᓏᔨᒪᑦ ᐃᒋᑉᑦ ᐃᔪᐛ᙮’ ”
ᐊᑯ ᒂ ᐊᑎ ᓂᐱᔅᑯᐱᒋ ᐃᔪᐛ ᑭᔭ ᒂ ᐊᔭᒥᐊᒪᔅᑐᐛᔨᒋ ᑎᐸᔨᒋᒐᓱᐛ᙮ 28ᐃᔅᕋᐃᓪ ᐃᔪᒡ ᒋ ᐃᑐᑎᒧᒡ ᒐᒂᔪᐤ ᑲ ᐃᑎᓯᒥᑯᒡ ᒧᓱᓴ ᑭᔭ ᐊᕋᓇ᙮
29ᐊᐱᑕᑎᐱᔅᑲᔨᒡ ᑎᐸᔨᒋᒐᓱᐤ ᒂ ᓂᐸᐊᑦ ᒥᓯᐛ ᓂᔅᑎᒧᓴᓇ ᑲ ᓇᐸᓯᔪᐎᒋ ᐊᓐᑕ ᐃᒋᑉᑎᒡ, ᒋᓴᐅᒋᒪᐤ ᐅᓂᔅᑎᒧᓴᓇ ᐅᒡ ᐃᔅᐱᔅ ᐊᓂᔭ ᑲ ᒪᑯᓇᑭᓄᓯᔨᒋ ᑲ ᓇᐸᓯᔪᐎᒋ ᐅᓂᔅᑎᒧᓴᓂᔪᐛ, ᐊᓐᑕ ᑲ ᑕᔨᒋ ᑲᒪᑯᓄᐛᓯᐅᒋᐛᐱᒡ, ᑭᔭ ᐊᓂᔭ ᐃᔭᐱᒡ ᐅᔅᑭᒡ ᓇᐸ ᐊᐛᓯᓴ᙮ 30ᒋᓴᐅᒋᒪᐤ ᑭᔭ ᐅᑯᐸᓇᒪ ᑭᔭ ᐊᓐᒡ ᒥᓯᐛ ᐃᒋᑉᑦ ᐃᔪᒡ ᒂ ᐸᑯᐱᔨᒡ ᑕᐱᔅᑲᔨᒡ, ᒋ ᐸᑕᑯᓐ ᐊ ᒥᔅᑎᒪᓄᐅᒡ ᐊᓐᑕ ᐃᒋᑉᑎᒡ, ᓇᔅᒡ ᓇᒪ ᐅᒋ ᑎᑯᓐ ᐸᐃᒄ ᒥᒋᐛᑉ ᐊ ᐊᑲ ᑕᑦ ᐊᐛᓐ ᐊ ᐳᓂᐱᒪᑎᓯᑦ᙮
ᐃᔅᕋᐃᓪ ᐃᔪᒡ ᑲ ᓂᑭᑕᒡ ᐃᒋᑉᑎᔪᐤ
31ᒪᒂᒡ ᐊ ᑎᐱᔅᑲᔨᒡ ᒋᓴᐅᒋᒪᐤ ᒂ ᐎᓴᒪᑦ ᒧᓱᓴ ᑭᔭ ᐊᕋᓇ ᑭᔭ ᒂ ᐃᑕᑦ, “ᒪᒋᒃ ! ᔅᑐᑕᒪᒃ, ᒋᔾ ᑭᔭ ᐃᔅᕋᐃᓪ ᐃᔪᒡ ! ᓂᑭᑎᒥᒄ ᓂᑦ ᐊᔅᒋᔾ᙮ ᒪᒋᒃ, ᒐ ᐊᔭᒥᐊᔅᑐᐛᒄ ᑎᐸᔨᒋᒐᓱᐤ ᐊᓐ ᑲ ᐃᓯ ᓂᑐᐛᔨᑎᒪᒃ᙮ 32ᒐ ᐅᑎᓇᑯᒡ ᒋ ᒪᔭᑕᓂᓯᒧᐛᐅᒡ ᑭᔭ ᒋᑦ ᐊᐛᓯᓯᒧᐅᒡ, ᒧᔭᒻ ᑲ ᐃᔅᒋᔄᔭᒄ ᑭᔭ ᒐ ᔅᑐᑕᔭᒃ᙮ ᑭᔭ ᒐ ᓂᑐᐛᔨᑎᒧᐛᒄ ᒋ ᑎᐸᔨᒋᒐᓯᒧᐛᐤ ᒐᒋ ᓱᐛᔨᑕᑯᔨᑦ᙮”
33ᐃᒋᑉᑦ ᐃᔪᒡ ᓇᔅᒡ ᒋ ᐅᔅᑯᐎᔅᑐᐛᐅᒡ ᒐᒋ ᒋᔅᑕᑉ ᓂᑭᑎᒥᔨᒋ ᐊᓂᔭ ᐊᔅᒋᔪᐤ᙮ ᐛᔅ ᒋ ᐃᔅᒋᔄᐅᒡ, “ᒥᓯᐛ ᓂᑭ ᐳᓂᐱᒪᑎᓯᓇᓐ ᐊ ᐊᑲ ᔅᑐᑕᔭᒂ” 34ᒂ ᐊᑎ ᐅᑎᓇᒡ ᐃᔅᕋᐃᓪ ᐃᔪᒡ ᐸᑎᑯᓇᑭᓇ ᐊᑲ ᐅᐱᔨᒋ, ᒂ ᐱᑕᐛᒡ ᐊᓐᑕ ᐊᔅᒋᐧᑯᒡ ᐊ ᐎᔎᔭᒋᓇᒡ ᐊᐱᒋᑕᐅᓂᒡ ᐅᑎᑎᒥᓄᐛᒡ ᐊ ᐎᐅᓯᒡ᙮ 35ᐃᔅᕋᐃᓪ ᐃᔪᒡ ᒋ ᐃᑐᑎᒧᒡ ᒐᒂᔪᐤ ᑲ ᐃᑎᓯᒥᑯᒡ ᒧᓱᓴ ᐊᑯ ᒋ ᑯᒂᒋᒪᐅᒡ ᐊᓂᔭ ᐃᒋᑉᑦ ᐃᔪᐛ ᐊ ᓱᓇᔭᐱᔅᑯᔨᒡ ᑭᔭ ᐊ ᐎᓴᐅᓱᓇᔭᐎᒡ ᒐᒂᔪᐛ, ᐊᓯᒡ ᐊᐱᒋᑕᐅᓇ᙮ 36ᑎᐸᔨᒋᒐᓱᐤ ᒋ ᐃᑐᑐᐛᐤ ᐃᒋᑉᑦ ᐃᔪᐛ ᒐᒋ ᒥᔪᐃᑕᔨᒪᔨᒋ ᐃᔅᕋᐃᓪ ᐃᔪᐛ, ᑭᔭ ᒂ ᒥᔭᔨᒋ ᒥᒄ ᒐᒂᔪᐤ ᓇᑐᐛᔨᑎᒥᒋ, ᒥᓯᐛ ᒋ ᔅᑐᑕᐛᐅᒡ ᐊᓱᓇᔭᐎᒋ ᒐᒂᔪᐛ ᑲ ᑎᐸᔨᑎᒥᔨᒋ ᐃᒋᑉᑦ ᐃᔪᐛ᙮
37ᐃᔅᕋᐃᓪ ᐃᔪᒡ ᒋ ᓂᑭᑎᒧᒡ ᕋᒪᓯᔅ ᐃᑕᐅᓂᔪᐤ ᒂ ᐃᑐᑕᒡ ᐊᓐᑕ ᓱᑯᑦ᙮ ᒐᑲᑦ ᐊᓱᑕᒡ ᒐᓯᐱᔪᐤ ᓇᐸᐅᒡ ᒋ ᐃᑕᑎᓱᐅᒡ ᐊ ᐱᒧᑕᒡ, ᐊᑲ ᒋᒪᑭᓄᐅᒡ ᐃᔎᐅᒡ ᑭᔭ ᐊᐛᓯᒡ᙮ 38ᒥᒐᑦ ᑯᑎᑲ ᐃᔪᐛ ᒋ ᐎᒐᐅᑯᐅᒡ ᐃᔭᐱᒡ ᐊᐛᓯᓴ, ᒪᔭᑕᓂᓴ ᑭᔭ ᒥᔅᑐᓴ᙮ 39ᐊᑯ ᐊᓂᔭ ᑲ ᐸᓱᐛᒡ ᐸᑎᑯᓇᑭᓇ ᐃᒋᑉᑎᒡ ᐅᒡ, ᒂ ᐸᒂᓯᑭᓂᒐᒡ ᐊᑲ ᐅᐱᓱᔨᒋ ᐸᑎᑯᓇᑭᓇ ᐅᒡ᙮ ᐛᔅ ᓯᔅᒋᑯᒡ ᑲ ᐃᑲᑎᓴᐛᑭᓄᐅᒡ ᐊᓐᑕ ᐃᒋᑉᑎᒡ ᐅᒡ ᓇᒪ ᐅᒋ ᐃᔅᐱᓯᔪᐅᒡ ᒐᒋ ᐃᔭᔅᑯᔅᑕᒡ ᒥᒋᒥᔪᐤ ᑭᔭ ᒪᒃ ᒐᒋ ᐊᔭᔅᑯᐛᐊᒡ ᐊ ᐅᐱᓱᔨᒋ ᐸᑎᑯᓇᑭᓇ᙮ 40ᓇᐤ ᒥᑕᓯᒥᑎᓄᐤ ᐊᓱ ᓂᔅᑐᔪᐛ ᐱᐳᓇ ᒋ ᐃᔅᐱᔅ ᐎᒍᐅᒡ ᐃᔅᕋᐃᓪ ᐃᔪᒡ ᐊᓐᑕ ᐃᒋᑉᑦ ᐊᔅᒋᒡ᙮ 41ᐊᑯ ᐊᓂᔭ ᑲ ᐃᔎᐱᔨᒡ ᓇᐤ ᒥᑕᓯᒥᑎᓄᐤ ᐊᓱ ᓂᔅᑐᔪᐛ ᐱᐳᓇ, ᓇᐊᐤ ᐊᓂᔭ ᒋᓯᑯᔪᐤ ᐊᐅᑯᔪᐤ ᐊᓂᔭ ᑎᐸᔨᒋᒐᓱᐤ ᐅᑦ ᐃᔨᒪ ᑲ ᓂᑭᑕᒡ ᐃᒋᑉᑦ ᐊᔅᒋᔪᐤ᙮ 42ᐊᑯ ᒂ ᓇᑭᑐᐛᐱᒥᑯᒡ ᑎᐸᔨᒋᒐᓱᐛ ᑕᐱᔅᑲᔨᒡ ᒐᒋ ᐎᐎᑕᐃᑯᒡ ᐊᓐᑕ ᐃᒋᑉᑎᒡ ᐅᒡ, ᐊᐅᑯᔪᐤ ᐅᔭ ᐸᐃᑯᑕᐤ ᑕᐱᔅᑲᔨᒡ ᒥᓯᐛ ᐃᔅᕋᐃᓪ ᐃᔪᒡ ᐊ ᑎᐱᔅᑲᐤ ᐊᔭᒥᐊᒡ ᒐ ᐃᔅᐱᔅ ᐊᓂᔅᒐ ᐱᒪᑎᓯᒡ ᐊᔅᑕᔨᒪᒡ ᑎᐸᔨᒋᒐᓱᐛ᙮
ᒐ ᐃᓯ ᑐᑕᑭᓄᐅᒡ ᐎᒪᔅᑲᒐᐅ-ᒥᑯᓴᐅᓐ
43ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ ᑭᔭ ᐊᕋᓇ, “ᐊᐅᑯᐤ ᐅᔭ ᒐᒂᔪᐛ ᒐ ᓇᓴᐊᒪᒄ ᐅᑎᒋᐱᔨᒐ ᐎᒪᔅᑲᒐᐅ-ᒥᑯᓴᐅᓐ: ᒐ ᐊᑲ ᒥᒋᑦ ᒪᓐᑕᐤ ᐊᓂᔭ ᐎᒪᔅᑲᒐᐅ-ᒥᑯᓴᐅ-ᒥᒋᒥᔪᐤ᙮ 44ᑲ ᐃᔭᐛᒄ ᐊᐱᒋᐊᑭᓐ ᒋᑭ ᒋ ᒥᒍᐤ ᐊᓂᔭ ᐎᒪᔅᑲᒐᐅ-ᒥᑯᓴᐅ-ᒥᒋᒥᔪᐤ ᑲᒋ ᒋᔅᒋᓄᐛᒋᔄᑭᓄᒂ, 45ᒥᒄ ᒪᓐᑕᐤ ᑭᔭ ᐊᓐ ᑲ ᐅᑎᓇᒄ ᒐᒋ ᐊᑐᔅᑲᔅᑕᑕᒄ ᓇᒪ ᒋᑭ ᐅᒋ ᒥᒋᐤ ᐊᓂᔭ ᒥᒋᒥᔪᐤ᙮ 46ᐱᑎᑭᒥᒡ ᒋᑭ ᐎ ᒥᒋᓇᓄᐤ ᐊᓐᑕ ᒥᒋᐛᐱᒡ ᑲ ᐊᔭᔅᑯᔅᑕᑭᓄᐅᒡ ᒥᒋᒻ; ᑭᔭ ᒐ ᐊᑲ ᐎᐎᑕᑭᓄᐅᒡ ᐎᔭᔅ ᐊᓐᑕ ᒥᒋᐛᐱᒡ ᐅᒡ, ᒐ ᐊᑲ ᐛᒋ ᐸᐃᒄ ᐱᒂᐊᒪᒄ ᐊᓂᔭ ᐅᔅᑭᓇ᙮ 47ᒥᓯᐛ ᐃᔅᕋᐃᓪ ᐃᔪᐤ ᐊ ᐃᑎᔅᑲᓇᓯᑦ ᒋᑭ ᐎ ᒥᑯᓴᐤ᙮
48ᐊᐛᓐ ᐊ ᒪᓐᑕᐅᑦ ᐊ ᐎᒋᒥᑕᒄ ᐎ ᒥᑯᓴᒐ ᐅᔭ ᑎᐸᔨᒋᒐᓱᐛ ᐎᒪᔅᑲᒐᐅᓂᔪᐤ, ᒥᓯᐛ ᓂᔭᐸᐅᐎᔨᒋ ᐊᓐᑕ ᐎᒋᒡ ᒋᑭ ᐎ ᒋᔅᒋᓄᐛᒋᔄᑭᓄᐎᔪᐛ; ᐊᑯ ᐸᑐᔅ ᒐᒋ ᒥᒋᑦ ᒧᔭᒻ ᐃᔅᕋᐃᓪ ᐃᔪᐛ᙮ ᓇᒪ ᒋᑭ ᒥᒍᐤ ᓇᐸᐤ ᐊᑲ ᒋᔅᒋᓄᐛᒋᔄᑭᓄᐅᑦ᙮ 49ᐃᔅᕋᐃᓪ ᑲ ᐃᑎᔅᑲᓇᓯᑦ ᑭᔭ ᒪᒃ ᒪᓐᑕᐤ ᐊ ᐎᒋᒥᑕᒄ ᒋᑭ ᐎ ᓇᓴᐊᒻ ᐅᔭ ᐃᑎᓱᐛᐅᓂᔪᐤ᙮”
50ᒥᓯᐛ ᐃᔅᕋᐃᓪ ᐃᔪᒡ ᒋ ᐃᑐᑎᒧᒡ ᒐᒂᔪᐤ ᑎᐸᔨᒋᒐᓱᐛ ᑲ ᐃᑎᓱᒪᔨᒋ ᒧᓱᓴ ᑭᔭ ᐊᕋᓇ᙮ 51ᑭᔭ ᓇᐊᐤ ᐊᓂᔭ ᒋᓯᑯᔪᐤ ᑎᐸᔨᒋᒐᓱᐤ ᒂ ᐎᐎᑕᐊᑦ ᐃᔅᕋᐃᓪ ᐃᔪᐛ ᐊᓐᑕ ᐃᒋᑉᑎᒡ ᐅᒡ᙮
Currently Selected:
ᐊᒃᓱᑕᔅ 12: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
