ᐊᒃᓱᑕᔅ 1
1
ᐃᔅᕋᐃᓪ ᐃᔪᒡ ᑲ ᐱᐛᔨᒪᑭᓄᐅᒡ ᐊᓐᑕ ᐃᒋᑉᑎᒡ
1ᐊᐅᑯᔪᐛ ᐅᔭ ᒐᑭᑉ ᐅᑯᓴ ᑲ ᐎᒐᐅᑯᑦ ᐊᓐᑕ ᐃᒋᑉᑦ ᐊᔅᒋᒡ, ᒋ ᐸᐃᑯᓴᐳᔪᐛ ᒪᒧᐤ ᐅᑦ ᐊᐛᓯᒪ ᑲ ᐎᒐᐅᑯᑦ: 2ᕈᐱᓐ, ᓯᒥᐅᓐ, ᓕᐸᐃ, ᒍᑕ, 3ᐃᓴᑲᕐ, ᓴᐳᓕᓐ, ᐱᓐᒋᒥᓐ, 4ᑕᐊᓐ, ᓇᑉᑕᓕ, ᑲᑦ, ᐊᓱᕐ᙮ 5ᒐᑭᑉ ᑲ ᐃᑐᑕᑦ ᐊᓐᑕ ᐃᒋᑉᑎᒡ, ᓴᔅ ᐊᓐᑕ ᐅᑯᓴ ᒍᓯᐸ ᒋ ᑕᔪᐛ᙮ ᓂᔄᐅᑕᒡ ᑕᑐᔪᐤ ᒪᒧᐤ ᐎᐧᑲᓂᓴ ᒋ ᑕᑎᓯᔨᐛ ᒐᑭᑉ, ᑲ ᐎᒐᐅᑯᑦ ᐊᓐᑕ ᐃᒋᑉᑎᒡ᙮
6ᐊᑯ ᓇᓇᒐ ᒍᓯᑉ ᑭᔭ ᒥᓯᐛ ᐎᐧᑲᓂᓴ ᒂ ᐳᓂᐱᒪᑎᓯᒡ᙮ 7ᐊᑯ ᐊᓂᔭ ᐎᐧᑲᓂᓯᐛᐛ ᒋ ᒥᒐᑎᔪᐛ ᐅᑦ ᐊᐛᓯᒥᔪᐛ ᑭᔭ ᒂ ᑕᔨᒋ ᐅᓯᒥᔪᐛ ᑭᔭ ᐅᑦ ᐊᓂᔅᑯᑕᐸᓂᔪᐛ᙮ ᒋᒋᐛ ᒋ ᒋᓯᐱᔨᔪᐤ ᐊ ᒥᒐᑎᔨᒋ ᒂ ᐊᑎ ᓴᑭᔅᒋᓇᔨᒋ ᐊᓐᑕ ᑯᓯᓐ ᐊᔅᒋᒡ᙮
Exodus 1.8-2.10 (Proper-16 Year A)
8ᐊᑯ ᐊ ᐅᔅᒋᑦ ᒋᓴᐅᒋᒪᐊᐤ ᒋ ᑕᐤ, ᐊᓐᑕ ᐃᒋᑉᑎᒡ ᐊᑲ ᐅᒋ ᒋᔅᒐᔨᒪᑦ ᒍᓯᐸ᙮ 9ᒂ ᐃᑕᑦ ᐅᑦ ᐃᔨᒪ, “ᓴᔅ ᒋᒋᐛ ᒥᒐᑐᐅᒡ ᐃᔅᕋᐃᓪ ᐃᔪᒡ ᑭᔭ ᐊᑎᑐᐤ ᓴᐱᐅᒡ ᐃᔅᐱᔅ ᒋᔭᓄᐤ᙮ 10ᒐ ᐎ ᒥᔅᑲᒪᐧᒄ ᒐᒂᓐ ᒐ ᐃᑐᑐᐛᐧᑯᒡ ᒐ ᐊᑲ ᒋ ᒥᒐᑎᒡ ᐛᔅ ᒋᑭ ᐎᒐᐅᓯᐅᒡ ᓂᑐᐱᔨᓇᓄᐎᒐ ᒋᑭ ᐎᒐᐅᒡ ᐊᓂᔭ ᑲ ᐛᐧᑲᑎᔨᑕᐧᑯᐤ ᑭᔭ ᒐ ᒪᓯᐧᑲᑕᐧᑯᒡ ᑭᔭ ᒐᒃ ᒐ ᒋᑎᓯᒧᒡ ᐅᑕ ᐃᒋᑉᑎᒡ ᐅᒡ᙮”
11ᐊᑯ ᐃᒋᑉᑦ ᐃᔪᒡ ᒂ ᑎᔭᒡ ᐅᒋᒪᐤ ᐊᐱᒋᐊᑭᓇ ᐃᔅᕋᐃᓪ ᐃᔪᐛ ᐊ ᑕᔨᒋ ᒐᒋ ᓇᓇᑭᒐᔨᒋ ᑭᔭ ᒐ ᒥᔅᑎ ᐊᑐᔅᑲᐊᔨᒋ᙮ ᐃᔅᕋᐃᓪ ᐃᔪᒡ ᒂ ᐅᓯᑕᒡ ᐱᑐᒻ ᑭᔭ ᕋᒪᓯᔅ ᐅᑕᓇᐛ, ᐊᓐᑕ ᒐ ᐊᔅᑕᓱᐅᔨᒋ ᒋᓴᐅᒋᒪᐛ᙮ 12ᒥᒄ ᐊᑎᑐᐤ ᒋ ᐊᑎ ᓇᐧᑲᒐᑭᓄᐅᒡ ᐃᔅᕋᐃᓪ ᐃᔪᒡ, ᐊᑎᑐᐤ ᒂ ᐊᑎ ᒥᒐᑎᒡ ᐸᑎᒪ ᒥᓯᐛ ᐊᓐᑕ ᐊᔅᒋᒡ ᑲᒋ ᐃᑕᒡ᙮ ᐊᑯ ᐃᒋᑉᑦ ᐃᔪᒡ ᒐᒃ ᒂ ᑯᔅᑕᒡ ᐃᔅᕋᐃᓪ ᐃᔪᐛ᙮ 13ᑭᔭ ᐃᒋᑉᑦ ᐃᔪᒡ ᐊᑎᑐᐤ ᒂ ᐊᑎ ᒥᔅᑎ ᐊᑐᔅᑲᐊᒡ ᐃᔅᕋᐃᓪ ᐃᔪᐛ᙮ 14ᒋᒋᐛ ᒋ ᓂᓇᐧᑲᑕᔨᑎᒧᒡ ᐃᔅᕋᐃᓪ ᐃᔪᒡ ᐊ ᒥᔅᑎ ᐊᑐᔅᒐᒡ ᐊ ᐅᓯᐊᒡ ᐊ ᑭᒋᒐᔭᐱᔅᒋᔨᒋ ᐊᓯᓂᔭ ᑭᔭ ᐊᓯᔅᒍᐛ ᑭᔭ ᒥᓯᐛ ᐊ ᐃᓯ ᐊᑐᔅᒐᒡ ᐊᓐᑕ ᓂᑕᐅᒋᒋᑭᓂᒡ᙮
15ᐊᑯ ᐃᒋᑉᑎᒡ ᒋᓴᐅᒋᒪᐤ ᒂ ᐃᑕᑦ ᓂᓱ ᐃᑉᕈᐤ ᐃᔎᐛ, ᓯᑉᕋ ᑭᔭ ᐳᐊ ᐊ ᐃᓯᓂᐧᑲᓱᔨᒋ, ᐊᓐᒡ ᐛᒐᐅᒡ ᐊ ᐎ ᐛᐱᒪᐅᓱᔨᒋ ᐃᔎᐛ᙮ 16“ᐃᔅᐱ ᐛᒐᐊᑯ ᐃᑉᕈᐤ ᐃᔎᐤ ᐊ ᐛᐱᒪᐅᓱᑦ, ᒐ ᓂᐸᐃᒪᑯ ᓂᔭᐸᓯᐎᔨᒋ ᐅᑦ ᐊᐛᓯᒪ᙮ ᐊᑯ ᐃᔎᓯᐎᒐᓂ ᒐ ᐊᑲ ᓂᐸᐃᒪᑯ, ᒐ ᒥᔨᒪᑯ ᒐᒋ ᐱᒪᑎᓯᔨᒋ᙮” 17ᐊᑯ ᐊᓐᒡ ᐃᔎᐅᒡ ᐛᒐᐊᒡ ᐊ ᐛᐱᒪᐅᓯᔨᒋ ᐃᔎᐛ ᒋ ᓇᓂᒋᔅᑐᐛᐅᒡ ᒋᓴᒪᓂᑐᐛ ᑭᔭ ᓇᒪ ᐅᒋ ᑕᑈᑐᐛᐅᒡ ᒋᓴᐅᒋᒪᐛ ᑲ ᐃᑎᓱᒥᑯᒡ, ᓇᒪ ᐅᒋ ᓂᐸᐊᐅᒡ ᓇᐸᓴ ᐊ ᐃᔪᔨᒋ᙮ 18ᐊᑯ ᒋᓴᐅᒋᒪᐤ ᒂ ᐎᓴᒪᑦ ᐊᓂᔭ ᐃᔎᐛ ᑭᔭ ᒂ ᐃᑕᑦ, “ᒐᒂᓐ ᐅ ᑲ ᐃᑐᑎᒪᒄ ? ᒐᒂᓐ ᐛᒋ ᓇᐊᔨᒪᑯᒡ ᒐᒋ ᐱᒪᑎᓯᒡ ᐊᓐᒡ ᓇᐸᓯᒡ ?”
19ᐊᑯ ᐊᓐᒡ ᐃᔎᐅᒡ ᐛᒐᐊᒡ ᐊ ᐛᐱᒪᐅᓯᔨᒋ ᐃᔎᐛ, ᒂ ᐃᑕᒡ ᒋᓴᐅᒋᒪᐛ, “ᓴᔅ ᒋ ᐃᔪᐃᓯᐱᓂ ᐃᑉᕈᐤ ᐃᔎᐅᒡ ᐅᑦ ᐊᐛᓯᒧᐛᐛ ᐊᒺᔭ ᓂᑐᐛᐱᒥᑯᑥᐎ ᐃᔎᐛ ᒐ ᐛᐎᒋᐃᑯᒡ᙮”
20ᐊᑯ ᒋᓴᒪᓂᑐᐤ ᒂ ᒥᔪᑐᑐᐛᑦ ᐊᓂᔭ ᓂᓱ ᐃᔎᐛ ᐛᒐᔨᒋ ᐊ ᐛᐱᒪᐅᓱᔨᒋ ᐃᔎᐛ, ᒂ ᒥᔭᑦ ᒐᒋ ᐅᑦ ᐊᐛᓯᒥᔨᒋ ᑭᔭ ᐊᑎᑐᐤ ᒂ ᒥᒐᑎᒡ ᑭᔭ ᒂ ᓱᒋᓯᒡ ᐃᔅᕋᐃᓪ ᐃᔪᒡ᙮ 21ᐊᑯ ᐊᓐᒡ ᐃᔎᐅᒡ ᐊᒋ ᓇᓂᒋᔅᑐᐛᒡ ᒋᓴᒪᓂᑐᐛ, ᒋ ᓱᐛᔨᑕᑯᐃᑯᐅᒡ ᑭᔭ ᒋ ᒥᔨᑯᐅᒡ ᒐᒋ ᐸᐃᑯᔅᑲᓇᓯᒡ᙮
22ᐊᑯ ᒋᓴᐅᒋᒪᐤ ᒂ ᐃᑎᓱᒪᑦ ᐅᑦ ᐃᔨᒪ, “ᒥᓯᐛ ᑕᑐᐤ ᐃᑉᕈᐤ ᓇᐸᓯᒡ ᐊ ᐃᔪᑥᐎ, ᓇᐃᔭᓪ ᓯᐱᒡ ᐊᓐᑕ ᒐ ᐱᑭᔅᑐᐛᐱᓇᑯᒡ, ᐊᑯ ᐊᓐᒡ ᐊ ᐃᔎᓯᐅᒡ ᒐ ᐊᑲ ᓂᐸᐊᑯᒡ᙮”
Currently Selected:
ᐊᒃᓱᑕᔅ 1: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
