ᐊᑈᔅᑕᓇᒡ 3
3
ᐊᑲ ᒋᐱᒧᑕᑦ ᓇᐸᐤ ᑲ ᒥᓏᒋᑭᓄᐅᑦ
1ᐸᐃᒂᐤ ᐱᑕᕐ ᑭᔭ ᒠᓐ ᒋ ᐃᑐᑕᐅᒡ ᐊᓐᑕ ᒋᓴᐊᔭᒥᐊᐅᒋᐛᐱᒡ ᓂᔅᑐ ᑎᐸᐃᑭᓐ ᐊ ᐃᔅᐱᔨᒋ ᐊᒋ ᐃᓯ ᐊᐱᑕᒋᓯᑲᔨᒡ, ᐊᓐᑕ ᐊ ᐅᑎᒋᐱᔨᒡ ᑲᒋ ᐊᔭᒥᐊᓄᐎᒡ᙮ 2ᓇᔅᒡ ᒋ ᒥᓯᑐᐤ ᐊᓐ ᔅᑐᐧᑭᓐ ᐊᓐᑕ ᐊ ᐅᒋ ᐱᑐᒐᓄᒡ ᐊᓐ ᒋᓴᐊᔭᒥᐊᐅᒋᐛᑉ ᑲ ᒥᔽᓯᒡ ᒋᐱᔎᐤ ᒋ ᐃᓯᓂᐧᑲᑕᑭᓄᐤ, ᐊᑯᑕ ᑲ ᐊᐱᑦ ᓇᐸᐤ ᐊᑲ ᐅᒋ ᓂᑕᐅᑕᑦ᙮ ᐊᓯᑯᒻ ᒋᓯᑲᐛ ᐊᒋ ᐃᑐᑕᐊᑭᓄᐅᑦ ᐊᓐᑕ, ᒐᒋ ᓂᑐᑎᒧᐛᑦ ᐊᐛᔪᐤ ᓱᓇᔭᔪᐤ ᐊᓐᑕ ᐊᔭᒥᐊᐅᒋᐛᐱᒡ ᐊ ᐃᑐᑕᔨᒋ᙮ 3ᐃᔅᐱ ᒪᒃ ᐊᓐ ᓇᐸᐤ ᐎᔭᐱᒪᑦ ᐊᓂᔭᔪᐛ ᐱᑕᕋ ᑭᔭ ᒠᓇ ᒐ ᐊᑎ ᐱᒐᔨᒋ ᐊᓂᔭᔪᐛ ᒋᓴᐊᔭᒥᐊᐅᒋᐛᐱᔪᐤ ᒋ ᓂᑐᐛᔨᑎᒧᐛᐤ ᓱᓇᔭᔪᐤ᙮ 4ᑯᐃᔅᒄ ᒪᒃ ᒋ ᑭᓄᐛᐱᒪᐅᒡ ᐊᓂᔭᔪᐛ ᓇᐸᐛ, ᐊᑯ ᐱᑕᕐ ᒂ ᐃᑕᑦ, “ᐸᒋ ᑭᓄᐛᐱᒥᓇᓐ ᒪ᙮” 5ᐊᑯ ᒂ ᑭᓄᐛᐱᒥᑯᒡ ᐊᓂᔭᔪᐛ ᓇᐸᐛ, ᐊ ᐱᑯᓴᔨᒥᑯᒡ ᒐᒂᔪᐤ ᒐᒋ ᒥᔭᒡ᙮
6ᐊᑯ ᐱᑕᕐ ᒂ ᐃᑕᑦ, “ᓇᒪ ᓇᔅᒡ ᓂ ᑭᓄᐛᔨᑕᓐ ᓱᓇᔭᐤ ᒐᒋ ᒥᔨᑕᓐ, ᒥᒄ ᒪᒃ ᒋᑭ ᐎᒋᐃᑎᓐ ᒐᒋ ᒥᓏᑎᓯᔨᓐ᙮ ᐅᑦ ᐃᓯᓂᐧᑲᓱᐅᓂᒡ ᐅᒡ ᒋᓴᔅ ᙭ ᓇᓴᕆᑎᒡ ᑲ ᐅᒋᑦ, ᐱᓯᑯ ᒐ ᐱᒧᑕᔨᓐ᙮” 7ᐊᑯ ᐱᑕᕐ ᑲ ᐅᑎᓂᒺᑦ ᐊᓂᔭᔪᐤ ᐅᒥᔪᓂᑎᒋᔪᐤ ᒂ ᐎᒋᐊᑦ ᐊ ᐱᓯᑯᔨᒋ᙮ ᑎᐛᒡ ᒪᒃ ᐊᓐ ᓇᐸᐤ, ᐅᓯᑕ ᑭᔭ ᐛᐧᑯᓇ ᒋ ᐅᒋ ᓴᐱᒥᑭᓂᔪᐛ᙮ 8ᒋ ᐱᓯᑯᓯᐱᑕᐤ ᒪᒃ, ᒂ ᓂᐳᐅᑦ, ᒂ ᐊᑎ ᐱᐸᒧᑕᑦ᙮ ᒂ ᐎᒐᐛᑦ ᐊᓂᔭᔪᐛ ᐱᑕᕋ ᑭᔭ ᒠᓇ ᐊ ᐱᒐᔨᒋ ᐊᓐᑕ ᒋᓴᐊᔭᒥᐊᐅᒋᐛᐱᒡ, ᐊ ᐱᒧᑕᑦ, ᐊ ᒂᔎᔅᑯᑎᑦ, ᐊ ᒪᒥᒋᒪᑦ ᒋᓴᒪᓂᑐᐛ᙮ 9ᒥᓯᐛ ᒪᒃ ᐊᐛᔪᐤ ᐊᓐᑕ ᑲ ᑕᔨᒋ ᒋ ᐛᐱᒥᑯᐤ ᐊ ᐱᒧᑕᑦ ᑭᔭ ᐊ ᒪᒥᒋᒪᑦ ᒋᓴᒪᓂᑐᐛ᙮ 10ᒋ ᓂᔅᑐᓄᐛᐅᒡ ᒪᒃ ᐊᐅᒄ ᐊᓂᔭᔪᐛ ᐊᐎᔨᒋ ᓇᐸᐛ ᑲᒋ ᐊᐱᔨᒋ ᐊ ᐱᑯᓴᔨᒧᔨᒋ ᐊᓐᑕ ᑲ ᒥᔽᓯᔨᒡ ᒋᐱᔎᐤ ᑲ ᐃᓯᓂᐧᑲᑕᔨᒡ᙮ ᒥᓯᐛ ᒪᒃ ᒋ ᑯᔅᑯᐱᔪᒡ ᑭᔭ ᒋ ᒥᔅᑲᑕᔨᑎᒧᒡ ᑕᓐ ᑲ ᐃᔅᐱᔨᒡ᙮
ᑕᓐ ᑲ ᐃᓯ ᐎᑕᐧᒃ ᐱᑕᕐ ᐊᓐᑕ ᒋᓴᐊᔭᒥᐊᐅᒋᐛᐱᒡ
11ᐊᓐ ᒪᒃ ᓇᐸᐤ ᐊᑲ ᐅᒋ ᓂᑕᐅᑕᑦ ᒋ ᒪᒪᒋᑯᓇᐤ ᐊᓂᔭᔪᐛ ᐱᑕᕋ ᑭᔭ ᒠᓇ, ᐊᑯ ᒥᓯᐛ ᐊᐛᓐᒋ ᑲ ᐃᔅᐸᔨᑐᒡ ᐊᓐᑕ ᐊ ᓂᐳᔨᒋ ᐊᓐᑕ ᓴᓚᒥᓐ ᐅᒋᐱᔎᒻ ᑲ ᐃᓯᓂᐧᑲᑕᔨᒡ, ᒥᓯᐛ ᓇᔅᒡ ᒋ ᑯᔅᑯᓴᐱᒧᐅᒡ᙮
Acts 3.12-19 (Easter-3 Year B)
12ᐃᔅᐱ ᒪᒃ ᐱᑕᕐ ᐛᔭᐱᒪᑦ ᐊᓂᔭᔪᐛ ᐃᔪᐛ, ᒋ ᐃᑕᐤ, “ᒋᔨᐛᐤ ᐃᔅᕋᐃᓕᒡ ᑲ ᐅᒋᔭᒄ, ᒐᒂᓐ ᐛᒋ ᓇᔅᒡ ᑯᔅᑯᓴᐱᒧᔭᒄ ᐅ, ᑭᔭ ᒐᒂᓐ ᓇᔅᒡ ᐛᒡ ᒥᔅᑲᓯᓄᐅᔭᒡ ? ᒋᑦ ᐃᑕᔨᑕᓇᐛᐤ ᐊ ᓂᔭᓐ ᑎᐱᔨᐛ ᓂᒥᔅᑯᓯᐅᓇᒡ ᒪᒃ ᓂᑦ ᐊᔭᒥᐊᐛᑎᓯᐅᓇᒡ ᐛᒋ ᐱᒧᑕᑦ ᐅ ᓇᐸᐤ ? 13ᐊᓂᔭᔪᐛ ᒋᓴᒪᓂᑐᐛ ᑲ ᐊᑐᔅᑯᐛᒡ ᐊᓂᔭᐧᑲ, ᐊᑉᕋᐊᒻ, ᐊᐃᓯᒃ ᑭᔭ ᒐᑭᑉ ᑭᔭ ᐅᑕᒡ ᒍᑕᐎᓄᒡ ᒋᔅᑕᔨᑕᑯᐊᐤ ᐊᓂᔭᔪᐛ ᐅᑦ ᐊᐱᒋᐊᑭᓇ, ᐊᐅᒄ ᐅᔭ ᒋᓴᓴ᙮ ᒋᔨᐛᐤ ᒪᒃ ᔅᒋ ᐃᑐᑐᐛᐛᐤ ᒐᒋ ᐱᔅᑎᓇᑭᓄᐅᑦ ᐊᓐᑕ ᕈᒻ ᒋᓴᐅᒋᒪᐤ ᐊ ᑕᔨᒋ᙮ ᐊᒋ ᐊᑐᐛᔨᒪᒄ ᐅᑎᔅᑯᐤ ᑈᓚᑕ ᐊ ᑕᔨᒋ, ᐊᑎ ᐃᔅᐱᔅ ᑈᓚᑦ ᑲ ᐎ ᐱᔅᑎᓇᑦ᙮ 14ᐃᔭᐱᒡ ᒋᔨᐛᐤ ᔅᒋ ᐊᑐᐛᔨᒪᐛᐤ ᐊᓐ ᑲ ᐸᔭᒋᓯᑦ ᑭᔭ ᑲ ᑯᐃᔅᑯᑕᑎᓯᑦ ᑭᔭ ᐊᒋ ᐃᔅᒋᔄᔭᒄ ᑲ ᓂᐸᐃᐛᑦ ᓇᐸᐤ ᐃᔭᐱᒡ ᒐᒋ ᐱᔅᑎᓂᒪᑯᐅᔭᒄ᙮ 15ᑭᔭ ᔅᒋ ᐃᑐᑐᐛᐛᐤ ᒋᓴᔅ ᒐᒋ ᓂᐸᐊᑭᓄᐅᑦ ᐊᓐ ᑲ ᒥᔭᑦ ᐊᐛᔪᐤ ᐱᒪᑎᓯᐅᓂᔪᐤ᙮ ᒥᒄ ᒪᒃ ᒋᓴᒪᓂᑐᐤ ᒋ ᐃᑐᑐᐛᐤ ᒥᓐ ᑲᐤ ᒐᒋ ᐱᒪᑎᓯᔨᒋ᙮ ᐛᔅ ᓂᒋ ᐛᐱᒥᓇᓐ ᒥᓐ ᑲᐤ ᑲ ᐅᓂᔅᑲᑦ ᒋᓴᔅ᙮ ᓂ ᒋᔅᒐᔨᑕᓇᓐ ᒪᒃ ᐊ ᑕᑈᒥᑲᒡ ᐅ᙮ 16ᐊᓂᔭᔪᐤ ᐊ ᓱᒐᔨᑕᑯᓂᔨᒡ ᒋᓴᔅ ᐅᑦ ᐃᓯᓂᐧᑲᓱᐅᓐ ᐊᐅᒄ ᐅᔭ ᐛᒋ ᒥᓏᑎᓯᑦ ᐅ ᓇᐸᐤ᙮ ᔅᒋ ᒋᔅᒐᔨᒪᐛᐤ ᑭᔭ ᔅᒋ ᐛᐱᒪᐛᐤ ᑕᓐ ᑲ ᐃᓯᓇᑯᓯᑦ᙮ ᔅᒋ ᐛᐱᒪᐛᐤ ᒪᒃ ᐊᓐᑕ ᐅᑎᔅᑯᐤ ᐊ ᑕᔭᒄ ᑲ ᒥᓏᒋᐊᑭᓄᐅᑦ ᐊᓂᔭᔪᐤ ᐊ ᑕᑈᔭᔨᒪᑦ ᒋᓴᓴ ᐅᒡ᙮”
17“ᐊᑯ ᒪᒃ ᓂᐧᑲᓂᓯᑐᒄ, ᓂ ᒋᔅᒐᔨᑕᓐ ᒋᔨᐛᐤ ᑭᔭ ᐊᓐᒡ ᑲ ᓂᑲᓂᔅᑲᑕᑯᒡ ᐊᑲ ᐅᒋ ᒋᔅᒐᔨᑎᒪᒄ ᑕᓐ ᐊᓐ ᐊ ᐃᑎᔭᒄ ᐊᓂᔭᔪᐤ ᑲ ᐃᑐᑐᐛᒄ ᒋᓴᔅ᙮ 18ᒋᓴᒪᓂᑐᐤ ᒋ ᒥᔭᐤ ᐊᓂᔭᔪᐛ ᐅᒋᔅᒋᐛᐃᒐᓱᐛ ᒐᒋ ᓂᑲᓐ ᐎᑎᒥᔨᒋ ᒐ ᐛᐎᓯᒐᔨᑎᒥᔨᒋ ᙭ᑕ ᐊᓂᔭᔪᐛ ᑲ ᐅᑎᓇᑦ᙮ ᒋᓴᒪᓂᑐᐤ ᒪᒃ ᒋ ᑎᐱᐱᔨᑕᐤ ᐅᔭ᙮ 19ᒂᔅᑲᑎᓯᒄ, ᒥᑕᒋᔨᐛᔨᑎᒧᒄ ᑕᓐ ᑲ ᐃᓯ ᒥᒋᑐᑎᒪᒄ᙮ ᓇᑎᐧᒄ ᒋᓴᒪᓂᑐᐤ ᒐᒋ ᐛᐸᔨᑎᒪᑕᒄ ᒋᒥᒋᑥᐅᓄᐛᐛ᙮ ᐊᑯ ᒪᒃ ᐅᑎᐸᔨᒋᒐᐤ ᒐ ᐃᑐᑕᑕᒄ ᒥᓐ ᒐᒋ ᓯᑭᒪᒋᐅᔭᒄ ᒋᑦ ᐊᒐᐧᑯᐛᒡ᙮ 20ᑭᔭ ᒋᑭ ᐸᒋ ᐃᑎᓴᐛᐤ ᒋᓴᔅ ᙭ᑕ, ᐊᓂᔭᔪᐛ ᓴᔅ ᑲ ᐅᑎᓇᑦ ᒐ ᐃᑎᓴᐊᒪᑕᒄ᙮ 21ᐊᑯᑕ ᒪᒃ ᐊᓐᑕ ᒋᒋᒋᓯᑯᒡ ᒐ ᑕᑦ ᐸᑐᔅ ᒥᓯᐛ ᒐᒂᔪᐤ ᐅᔅᒋᑕᑭᓄᔨᒐ ᐊᓂᔭᔪᐤ ᑕᓐ ᑲ ᐃᓯ ᓂᑲᓐ ᐎᑕᒡ ᒐ ᐃᔅᐱᔨᒡ ᐊᓂᔭᐧᑲ ᐛᔅᑭᒡ ᑲ ᐸᔭᒋᓯᒡ ᐅᒋᔅᒋᐛᐃᒐᓱᒡ᙮ 22ᐛᔅ ᐊᓂᔭ ᒧᓱᔅ ᒋ ᐃᔅᒋᔄᐤ ᐛᔅᑭᒡ ᐊ ᐊᔨᒧᒪᑦ ᒋᓴᓴ,
ᒋᓴᒪᓂᑐᐤ, ᒋᑭ ᐊᐱᒋᐊᐤ ᐊᐛᔪᐛ ᐊᓐᑕ ᓂᑲᓄᒡ ᒐ ᒋᔅᒋᐛᐃᒐᔨᒋ, ᒧᔭᒻ ᓂᔾ ᐊ ᐃᓯ ᐊᐱᒋᐃᑦ ᐊ ᒋᔅᒋᐛᐃᒐᔭᓐ᙮ ᐊᓐᑕ ᒋᔨᐛᐤ ᐊ ᐃᑎᔅᑲᓇᓯᔭᒄ, ᐊᑯᑕ ᒐ ᐅᒋᔨᒋ᙮ ᒋᑭ ᓂᑐᑐᐛᐛᐤ ᑭᔭ ᒋᑭ ᓂᓇᐃᑐᐛᐛᐤ ᑕᓐ ᒐ ᐃᑎᑕᒄ᙮ 23ᐊᓐ ᒪᒃ ᐊᐛᓐ ᒐ ᐊᑲ ᓂᑐᑐᐛᒂ ᐅᔭ ᒐ ᐅᒋᔅᒋᐛᐃᒐᓱᔨᒋ, ᒋᑭ ᐃᒐᓇᑭᓄᐤ ᐊᓐᑕ ᐅᒋ ᒋᓴᒪᓂᑐᐛ ᐅᑦ ᐃᔨᒥᔪᐛ ᐊ ᑕᔨᒋ, ᐊᑯ ᒪᒃ ᒐ ᓂᓱᐅᓇᒋᐊᑭᓄᐅᑦ᙮”
ᐊᐅᒄ ᐅᔭ ᑲ ᐎᑕᐧᒃ ᐱᑕᕐ ᐊᒋ ᐃᔅᒋᔄᔨᒂᓂ ᐊᓂᔭ ᒧᓱᓴ᙮
ᐊᑯ ᒥᓐ ᒂ ᐊᑎ ᐃᔅᒋᔄᑦ ᐱᑕᕐ, 24“ᓴᒻᔪᐃᓪ ᐊᑯ ᒪᒃ ᐊᓐᒡ ᑯᑎᑭᒡ ᐅᒋᔅᒋᐛᐃᒐᓱᒡ ᒋ ᓂᑲᓐ ᐎᑎᒧᒡ ᐅᔭ ᑕᓐ ᒐ ᐃᔅᐱᔨᒋ ᐊᓄᒡ ᒐᓯᑲᒋ᙮ 25ᒋᑦ ᐊᓂᔅᒐ ᐎᐧᑲᓂᓯᓇᐛᐤ ᐊᓂᔭᐧᑲ ᐅᒋᔅᒋᐛᐃᒐᓱᒡ, ᐊᓂᔭᔪᐤ ᒪᒃ ᓂᔅᑯᒧᐅᓂᔪᐤ ᑕᓐ ᑲ ᐃᓯ ᒥᔨᑯᒡ ᒋᓴᒪᓂᑐᐛ ᑭᔭ ᒋᔨᐛᐤ ᐊᓐᑕ ᒋᑦ ᐊᔅᑎᓯᓇᓱᓇᐛᐤ᙮ ᐛᔅ ᒋᓴᒪᓂᑐᐤ ᒋ ᐃᑕᐤ ᐊᓂᔭ ᐊᑉᕋᐊᒪ,
ᐊᓐᑕ ᓂᔅᑕᒥᒡ ᒋᑦ ᐊᐛᓯᒥᒡ ᓂᑭ ᐅᒋ ᐅᑎᓇᐤ ᐸᐃᒄ ᐊᐛᓐ ᐊᓐᑕ ᐅᒋ ᒐᒋ ᐅᒋ ᓱᐛᔨᒥᒂᐤ ᒥᓯᐛ ᐊᐛᓐᒋ ᐅᑕ ᐊᔅᒋᒡ᙮
26ᒋ ᐅᑎᓇᐤ ᒪᒃ ᒋᓴᒪᓂᑐᐤ ᐅᔭ ᐅᑦ ᐊᐱᒋᐊᑭᓇ ᒋᔨᐛᐤ ᒪᐅᒡ ᓂᔅᑎᒻ ᒐᒋ ᐃᑎᓴᐊᒪᑕᒄ᙮ ᒋᑭ ᓱᐛᔨᒥᑯᐛᐤ ᐊ ᐃᑐᑕᑯᐅᔭᒄ ᒥᓯᐛ ᐊ ᑎᓯᔭᒄ ᒐᒋ ᓂᑭᑎᒪᒄ ᒋᒥᒐᑎᓯᐅᓄᐛᐛ᙮”
Currently Selected:
ᐊᑈᔅᑕᓇᒡ 3: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
