मत्ती 6
6
माल्योरालाई यान्या
1“मिँराए याङ़ाक वाज़ सतैंसिन्या धर्मनी जोगोइसिद लिच्यो, म़ानी स्वर्गताव जेबाबुए ल्योनी काता ज़ दैन्या जेमाले। 2है जैद जे मायो·व माथैंवरालाई जेराएक नो कैफतीराए याराएज़्याव मिताव माःक। नोर मिँराए ङ़ाक चाव धर्मी सरैंःसिन्याए जूँनी धर्मसास्त्र झ़िम जीदा, बजार जीदा भोंकरर तप्द दुलिज़्यार। जेलाई साचो है ङादाचिज़्या, नोराए याइनाम नाः ज़। 3है जैद जे मायो·व माथैंवरालाई जेराएक वोर्फताव जेकुइए जेभाःव दाबर्याफताव जेकुइए तासैंवक। 4सुए ज़ यामासैंद जेभाःव मिताव ओताक। हो ताकिन ची म़ोंसिउलाव रँःज़्याव परमेस्वर जेबाबुए नो जेदोव रँःद स्वर्गताव जेइनाम यान्या ले।”
परमेस्वरलाई पोंखारिन्या
(लूका ११:२-४)
5“परमेस्वरलाई जेपोंखारिक ब नो कैफतीराए यापोंखारिज़्याव मिताव पोंखारिन्या माःक। नोर धर्मसास्त्र झ़िम जीदा, येम खार जीदा ‘प़ाइँए घरँःसिरक’ लिद च्याँःसिद पोंखारिन्या युँ दोज़्यार। साचो है ङादाचिज़्या, नोराए याइनाम नाः ज़। 6बुरू जे ते परमेस्वरलाई जेपोंखारिक तोबो कुन्तील पसिद य़ाम गल्द सुए ज़ यामारँःद स्वर्गताव जेबाबुलाई पोंखारिच्यो। हो ताकिन ची म़ोंसिउलाव रँःज़्याव परमेस्वर जेबाबुए स्वर्गताव इनाम यान्या ले। 7फरी जे जेपोंखारिक परमेस्वरलाई मासरेस्ज़्यावराए माँःती पर्बख्यान तालिच्यो। नोराए ‘कुधु ख्यो·व गेपोंखारिकिन थैद्यासिवा’ लिन्या सम्जिज़्यार। 8जे ते नितावर ताताच्यो। जे जेमापोंखारिद ज़ परमेस्वर जेबाबुए ‘आव आव चाहिज़्या’ लिन्या ङ़ादा ज़ सैंज़्याव। 9जे जेपोंखारिक इतावनी पोंखारिच्यो,
‘अ स्वर्गत लिज़्याव गेबाबु,
नँ नमिन प़ाइँए ज़ छैंव ओथ·रैरक।
10स्वर्गताव नराज्या आव नामल उहुक,
स्वर्गताव है नलिज़्याव मिताव आव मानुवाल ब ओताक।
11गेलाई चाहिज़्याव ज़्याव दिनकाव ज़ जोरैद्यासियो।
12नउपर्त गेदोव पापरानी ऱास्सियो।
हो मिताव ज़ गे ब मिँराए गेउपर्त यादोव पापरानी गेराऱास्ज़्या।
13गेलाई माचाव चेतैन्यारानी जोगोइद
माचाव भरिनी पले·द पाथस नैसियो।
[खर्क ज़ माखेम्न्या राज्या ब नमीं ज़,
सक्ती ब नमीं ज़, ज़गै मगै ब नमीं ज़। आमेन।’]
14जे जेङ़ैताव पाप दोज़्यावलाई जेऱास्किन, स्वर्गताव जेबाबुए जेलाई मनी ऱास्न्या ले। 15फरी जे जेङ़ैताव पाप दोज़्यावलाई ऱासो जेमाभैंःकिन स्वर्गताव जेबाबुए जेलाई ब ऱास्न्या माले।”
उपासिन्या
16“जे जेउपासिक कैफतीराए यादोज़्याव मिताव तादोच्यो। नोर, ‘हत्या गेकातिज़्याव प़ाइँए घरँःसिरक’ लिद याङाःर ब हुली हुली च्या·व जैसिज़्यार। जेलाई साचो है ङादाचिज़्या, नोराए याइनाम नाः ज़। 17जे ते जेउपासिक ‘मिँराए तासरेस्सिरक’ लिद जेङाःर हुर्सिद म़ासर थीसिद ल्यो ताके। 18हो ताकिन ची म़ोंसिउलाव रँःज़्याव स्वर्गताव जेबाबुए ओल ज़ सैंद स्वर्गताव जेइनाम नैद्यान्या ले।”
स्वर्गताव धन
(लूका १२:३३-३६; १६:१३)
19“जे आव मानुवात जेजूँनी धन सम्पती तादुप्च्यो। आव मानुवाताव धन भरी घुनराए ब ज़्युज़्यार, खैए ब कैज़्याव, चोरराए ब झ़िम पा·द कुज़्यार। 20है जैद जे जेसम्पती स्वर्गत दुप्चिके। नल घुनए ब माज़्युव, खैए ब माकैव, चोरराए ब मालाँर। 21काराव ल्यो ताकिन जोङ जेधन लिज़्या, जेयुँ ब होङ ज़ तान्या ले।
22“जेक्याँताव बत्ती जेमी लिज़्या। है जैद जेमी चाव उलिकिन जेक्याँ भरी पलाँव ज़ ताज़्या। 23फरी जेमी माचाव उलिकिन जेक्याँ भरी चुम चुमोल ज़ ताज़्या। है जैद नो जेक्याँताव पलाँव ताव परिन्या चुम चुमो ओताकिन झन ज़ छाम छाम तान्या ताज़्या।
24“तोबो बाँदाए ऩेब्लो साहुनी निय़ेन मादोधुव। दाव उपरिकिन नोए तोबोलाई सोद तोबोलाई चाव रँःन्या ले, कितर तोबोए ओपाँ भैंःद तोबोलाई ओलेखा नैद्यान्या माले। हिताव ज़ जे मनी परमेस्वरए ओसेवा स़ोनो पैसाए ओसेवा तखेप्त जेमादोधुइ।”
व़ीनी फुइ मालिन्या
(लूका १२:२२-३४)
25“है जैद ङा जेलाई है ङादाचिज़्या, जे जेक्याँए उजूँनी ‘काता ङाज़्युके, काता ङाओके, काता ङाक्वाइसिके’ लिद व़ीनी फुइ तालिच्यो। आव गेजिउ ज़्यान्या क्वाइसिन्याए जूँनी वाज़ माःक। 26नमताव बाज़ारालाई याराचिऊचिके। नोराए धुर ब माझाःर, क्या·न्या ब माक्या·र, ज़्याव ब मादुप्र। हितावत ब नोरालाई चाहिज़्याव भरी स्वर्गताव जेबाबुए याएज़्याव। परमेस्वरए जेलाई झन बाज़ाराकिन घेप्पा रँःचिज़्याव। 27जेनी सुए ची सोगो दाद जेजिउत तघन्ता जेचा·धुरिज़्याव?
28“है जैद काताए जूँनी क्वाइसिन्या क्वारात सोगो जेदोज़्याव? बुखीताव वासर याराचिऊचिके। नोराए धामा दाद माखल्र। 29हितावत ब सोलोमन राजा बनै तह महौ ओजैसिदी ब वास तकल माताए।#१ राज १०:४-७; २ इति ९:३-६ 30परमेस्वरए आछिम वैद पराःती मेंःल बाज़्याव छीर नाः चाव याजैज़्याव ल्यो ताकिन जेलाई झन कै जैद माक्वाइचिउके? काता नाः जेयुँ माहुबोर जेलिज़्याव!
31“है जैद जे ‘काता ङाज़्युके, काता ङाओके, काता ङाक्वाइसिके’ लिन्यादा जेयुँ थू जैद व़ीनी फुइ तालिच्यो। 32आव भरी ते परमेस्वरलाई मासरेस्ज़्यावराए याध्यावना ची। जे जेजूँनी चाहिज़्याव भरी ते स्वर्गताव जेबाबुए ज़ सैंज़्याव। 33बुरू जे प़ाइँरानी ङ़ात परमेस्वरए ओराज्या खिम्द उयुँलाव मिताव य़ेन दान्या जैसिचिके। हो ताकिन ची जेलाई चाहिज़्याव भरी ओल ज़ जोरैद्याचिरिज़्याव। 34है जैद जे पराःतीकावए जूँनी सोगो तादोच्यो। पराःतीकाव सोगो हो छ्याम ज़ खेम्ज़्या। काताए जूँनी आछिमकाव सोगोत झन होलाई ब चा·व जेपैंज़्याव?”
Currently Selected:
मत्ती 6: NKham
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
