लूका 5
5
ल्यो माल्यो ङाँःर
(मत्ती ४:१८-२२; मर्कूस १:१६-२०)
1तछा गनेसरेत दह#5:1 गनेसरेत दह यादोज़्याव गालील दह ज़। छ्योक च्याँःसिद येसुए परमेस्वरए ओपाँ ओरासथैज़्याक माहोल्यार येसुए ओपाँ थैन्याए जूँनी बनै याछुइसिहुज़्याव। 2हो बेलाक दह छ्योक ऩेब्लो दोङ्गानी निरँःक्यो। नो दोङ्गा चलैज़्यावर ङाँः क्योःज़्यावर याल्यो। नोर दोङ्गानी हाइसिद याजालर याछेज़्याव। 3येसु सिमोनए ओदोङ्गाल पसिद ऱील जाँ होकसै लाँव परींद ननी ज़ परमेस्वरए ओपाँ माहोल्यारालाई यासथैक्यो।
4ओपाँ ओखेमोत सिमोनलाई, “नदोङ्गा उर्जीं ल्योदा लाँद ङाँःर यान्न्याए जूँनी नजाल ख्याके,” है ओदोक ते, 5सिमोनए, “तुबुरी ज़ धामा दाद गेनाल क़्याके गुर्बा, तोबो ङाँः ज़ गेमादैए। हैदी ब नँ है नलिकिन नँ नपाँनी ज़ ङाख्या,” है दाद, 6ओजाल ख्याक्यो। ओख्याव प़ाइँना ज़ ङाँःर बनै कुधु परिद जाल ज़ चीवा चीवा जैकेर। 7है जैद ओलापकाव छुत दोङ्गात लिज़्याव यानैंरालाई ‘सघैहुसिचिके’ लिद सान दाद यारायो प़ाइँना ज़ नोर हुकेर। नो ऩेब्लो दोङ्गाल ङाँःर ब्याल्द दोङ्गानी ब गदिवा गदिवा ताकिनी।
8है जैद सिमोन पत्रुसए नो रँःद येसुए उखँत फुलुप्सिद, “अ प्रभु, ङा इताव पापी नङ़ाक लिन्या स्यासो ङामाले। नँ ङानी बाव ताके,” है दोक्यो। 9ङाँःर बनै ल्यो माल्यो यापरिउए सिमोन ओनैंरास अचम्ब ताद यालिज़्याव। 10हो बेलाक सिमोनस य़ेन दोज़्यावनी जब्दियाए ओज़ानी याकूब स़ोनो यूहन्नानी निल्यो। नोनी ब अचम्ब ताकिनी। हाःत ज़ येसुए सिमोनलाई, “ताछे·नी, अबकिन नँलाई ङाँःर माःक, मिँर खिम्न्या ङाजैनिरिज़्या,” है दोक्यो। 11है जैद नोर यादोङ्गार पाखाक यारारैव प़ाइँना ज़ यादोङ्गार याजालर ऱास्द येसुस बाकेर।
येसुए कुऱीलाई ओसगराँव
(मत्ती ८:१-४; मर्कूस १:४०-४५)
12तछा येसु नजीलाव तोबो नाखारल उलिज़्याक तोबो कुऱीए येसुलाई रँःद ओङ़ाक फुलुप्सिद, “अ प्रभु, ङाल्योदा नयुँ ओताकिन ङालाई सगराँन्या नले,” है लिद बिन्ती ओदोव प़ाइँना ज़, 13येसुए नोलाई उकुइए छाप्द, “नल्योदा ङायुँ लिज़्या ज़, गराँनिके,” है ओदोव प़ाइँना ज़ नो कुऱीए ओबेथा चक चक ज़ म़ाके। 14येसुए फरी नोलाई, “आव नक्याँताव ङादोव य़ेन सुलाई ज़ है तारादोयो। बुरू नगराँव साचो ज़ ओल्यो लिन्या थ·रैव परींन्याए जूँनी पुजारीए ल्योक सतैंसिनाद मोसाए ओकानुनलाव मिताव चरैःन्यार चरैःनाके,”#लेबी १४:१-३२ है दोक्यो।
15हितावत ब येसुए ओबयेन झन ज़ तादा तादाङ थास्नाके। है जैद ओपाँ थैन्याए जूँनी स़ोनो याजोरो हुवर सगराँसिन्याए जूँनी मिँर ल्यो माल्यो याहुज़्याव। 16ओल कैताक याल्योनी अलगज़ा हाइसिद साइँसुइँवक बाद ओपोंखारिनाज़्याव।
येसुए उखँ उकुइ सिउलाई ओसगराँव
(मत्ती ९:१-८; मर्कूस २:१-१२)
17तछा येसुए परमेस्वरए ओपाँ ओरासथैज़्याक फरिसीर स़ोनो कानुनलाव यागुर्बार नल च़ुसिद यालिज़्याव। नोर ख्वार गालील स़ोनो यहूदिया खन्दलाव नाखार नाखारनी हुवर यालिज़्याव, ख्वार यरूसलेमनी हुवर यालिज़्याव। हो बेलाक परमेस्वरए सगराँन्या ओसक्ती येसुए ओक्याँत उलिज़्याव। 18फरी नो बेलाक ज़ तोबो उखँ उकुइ सिउलाई झेलोङ्गाल झाःद येसुए ल्योक यारैज़्याव। 19खाली मिँर बनै माहोल्या यातावए येसुए ल्योक बान्या येम मादैद नोर थालात बाद झ़िम कप्सिउ फल्यार जाँवा हाइद सघ्वाँःद नो उखँ उकुइ सिउलाई ओझेलोङ्गारास येसुए ओङ़ाक झरैदिकेर। 20येसुए नोराए यायुँ उहुबो रँःद नो उखँ उकुइ सिउलाई, “अ कान्छा, नपाप क्याल्सिके,” है दोक्यो।
21नो थैद नलाव हुव सास्त्रीर स़ोनो फरिसीराए या याल रूम्रूमैद, “आव मिँए कै जैद परमेस्वरए उमिन ओबले·ज़्याव? मिँए ओपाप क्याल्न्या ते परमेस्वरकिन सु ची उलिज़्यावदा?” है लिकेर। 22येसुए नोराए यायुँलाव पाँ सैंद, “जे काराव जेयुँल नै जेलिज़्याव? 23नो मिँलाई ‘नपाप क्याल्सिके’ है दान्या सैं ‘सोद बान्के’ है दान्या काताकाव सजालो उलिज़्याव? 24अब ङा मिँ मिन्सिद हुवए आव मानुवात पाप क्याल्न्या ङाकुइत उलिज़्याव सैं ओमालिज़्याव चिऊचिके,” है दाद नो उखँ उकुइ सिउलाई, “ङा नँलाई है ङादींज़्या, सोद नझेलोङ्गार घुर्द नझ़िमदा बान्के,” 25है ओदोव प़ाइँना ज़ नो उखँ उकुइ सिउ याङ़ाकिन ज़ सोद ओझेलोङ्गार घुर्द परमेस्वरए उमिनर सघ्योःद्याद रेंए रेंए उझ़िमदा बाके। 26नो रँःव भरी बनै अचम्ब ताद छे·द, “आछिम काता गेरँःव इताव?” लिद परमेस्वरलाई बनै घ्योःव ज़ थ·रैकेर।
येसुए लेबीलाई उसिस ओजैव
(मत्ती ९:९-१३; मर्कूस २:१३-१७)
27येसु ननी पुलुस्द ओबाज़्याक तोबो सिर्मा स्यो·ज़्याव लेबी यादोज़्यावलाई सिर्मा स्यो·न्या अद्दाक च़ुसिद उलिज़्याव रँःक्यो। येसुए नोलाई, “ङास हुन्के,” है ओदोव प़ाइँना ज़, 28नो च्याँःसिद ओय़ेन भरी ऱास्द येसुए उछींत बाके।
29नकिन लेबीए येसुलाई उझ़िमक लाँद बनै घ्योःव भत्यार जैक्यो। नो भत्यारल लेबीए ओनैंर स़ोनो सिर्मा स्यो·ज़्यावर ब कुधु ज़ याल्यो। 30फरिसीर स़ोनो यासकाव सास्त्रीराए नोरालाई येसुस सिप याज़्युज़्याव रँःद येसुए उसिसरालाई, “जे कै जैद निताव सिर्मा स्यो·ज़्यावर स़ोनो पापीरास सिप जेज़्युज़्याव?” है लिद गन गन यारादोकेर। 31नो है यारादोज़्याव येसुए थैद, “याजोरो माहुज़्यावरालाई सगराँन्या मिँ माचाहिए, याजोरो हुज़्यावरालाई वाज़ चाहिज़्या। 32हो मिताव ज़ ङा मनी ‘गे धर्मीर’ है लिज़्यावरालाई परमेस्वरए ल्योदा बान्या ङाराखुल्हुव माःक, ‘गे पापीर’ है लिज़्यावरालाई ङाराखुल्हुव ची,” है यादोक्यो।
उपासिन्या
(मत्ती ९:१४-१७; मर्कूस २:१८-२२)
33ख्वा ख्वा मिँराए येसुलाई, “ऱील सछैंज़्याव यूहन्नाए उसिसर स़ोनो फरिसीराए यासिसर एकतार ज़ उपासिद पोंखारिज़्यार। नँ नसिसर ते माउपासिद ज़्याद ओद लिज़्यार,” है यादोक ते, 34येसुए, “जन्तीर ब्याहोल्यास यालेवा पै कै जैद याउपासिज़्याव? 35खाली जो छ्यामकिन ब्याहोल्यालाई छुतैर, हो छ्यामकिन वाज़ उपासिन्या लेर,” है यादोक्यो।
36फरी घर्ती तोबो झाःद याएक्यो, “ओरे छिबो क्वालाई तालिन्याए जूँनी सुए ज़ साःरो क्वा चीद मातालिउ, म़ानी साःरो क्वा ब बलेस्ज़्या, पुराँदोत साःरो तालिसिउ ब माखैए।
37“हो मिताव ज़ पुराँदो प़िर्गुलल साःरो दाखमद्य सुए ज़ माझाःर, म़ानी उस॰ए प़िर्गुललाई सुफुद दाखमद्य ब भोन्या ले, प़िर्गुल ब खेर बान्या ले। 38है जैद साःरो दाखमद्य साःरो प़िर्गुलल वाज़ झाःर। 39पुराँदो दाखमद्य ओद बानी परिउए ‘आव ची ङमो लिज़्या’ लिद साःरो दाखमद्य ओव माभैंःए।”
Currently Selected:
लूका 5: NKham
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
