लूका 13
13
उयुँ माफर्कैज़्यावलाई ओछ्यास लिज़्या
1हो बेलाक तोबो ऩेब्लो हुद येसुलाई, “पिलातसए मार पल्हुज़्याव गालीललावरालाई सैःद होराए याझी मारए उझीस बरे·केर,” है यादोक ते, 2येसुए नोरालाई, “नोर निताव दुखस यासिउए ‘यादेसलाव भरिरानी प़ाइँरानी पापीर ज़ याल्यो ओल्यो’ है जेलिज़्याखेहो। 3ङा ते निताव ते माःक है ङादाचिज़्या। हैदी मनी जे परमेस्वरए ल्योदा जेयुँ जेमाफर्कैकिन फाल्न्या छ्याम जेलाई ब नो मिताव ओछ्यास लिज़्या। 4हिताव ज़ फरी नो यरूसलेमलाव सिलोआम धरर धलिद अथार जना नल यासिक, नोरालाई ब ‘यरूसलेम भरिनी अपराधीर ज़ ताखेरहो’ है जेलिखेहो। 5ङा फरी हिताव ते माःक है ङादाचिज़्या। हैदी ब परमेस्वरए ल्योदा जेयुँ जेमाफर्कैकिन फाल्न्या छ्याम जेलाई ब नो मिताव ओछ्यास लिज़्या,” है यादोक्यो।
ओसै माझाःज़्याव सींए ओघर्ती
6नकिन येसुए नोरालाई तोबो घर्ती झाःद यासथैक्यो, “तोबोए ओएँःल कोराली तोबो रूपिद ओनैज़्याव। तछा ओसै उचिऊनाक ते मादैक्यो दी। 7नकिन ओय़ेन दाज़्यावलाई, ‘आव कोरालीलाई धलैके। स़ोंरिम ताके सै ज़ मासैए, एँः वाज़ छ्याज़्याव,’ है ओदोक ते, 8ओय़ेन दाज़्यावए, ‘थारे सायेब, आइँसी पै नैव ताके। ओजरा जीदा घोद मलर झाःद ङाएरिज़्या, 9कसा मासैए। नाःत ब ओमासैकिन नधलैया,’ है दोक्यो दी।”
येसुए ऩासिन्या छ्याम तोबो मेंमालाई ओसगराँव
10तछा येसुए ऩासिन्या छ्याम धर्मसास्त्र झ़िमक परमेस्वरए ओपाँ ओरासथैज़्याक, 11नल तोबो थ॰ मालिधुज़्याव घोंत्यानिसो मेंमा उलिज़्याव। नोलाई माचाव पुरूसए नै ओजैव अथार बर्स ताद उलिज़्याव। 12येसुए नोलाई रँःद ओल्योक खुल्द, “अ माँ आछिमकिन आव नदुखनी नऱास्सिके,” है दाद, 13नोए ओक्याँत उकुइ नैद ओयो प़ाइँना सोजोकाव ज़ ताद परमेस्वरलाई बनै घ्योःव ज़ थ·रैद उमिन सघ्योःदिक्यो।
14हाःत ज़ नो धर्मसास्त्र झ़िम चलैज़्यावए ऩासिन्या छ्याम येसुए नो मेंमालाई ओसगराँव रँःद बनै रसिद नक लिज़्यावरालाई, “य़ेन दान्या छ दिन जैसिउ लिज़्या। सगराँसिन्या ताकिन नाः भरिल ज़ सगराँसिहुच्यो। ऩासिन्या छ्याम माःक,” है ओरादोक ते,#प्रस २०:९-१०; ब्य ५:१३-१४ 15प्रभुए नोलाई रँःद, “ए कैफतीर, जे ऩासिन्या छ्याम जेघें जेगधाहारालाई बँनी पला·द ऱी जेरासवैनाज़्याखेहो सानी। 16झन आव अब्राहामए ओथोलाव सैतानए अथार बर्स पै किद ओनैज़्याव मेंमालाई कै जैद ऩासिन्या छ्याम मापला·न्या?” है यादोक्यो। 17निताव ओपाँए ओलकिन तँदा जैसिउ भरी लाज मोर्नो ज़ ताकेर। माहोल्याराए ते येसुए अचम्बलाव ओय़ेन रँःद यायुँ होलाँ ताद रेंकेर।
बाजीए उधुर
(मत्ती १३:३१-३२; मर्कूस ४:३०-३२)
18है जैद येसुए नोरालाई, “परमेस्वरए ओराज्या किताव उलिज़्याव, कितावनी पलास्द ङायाचिके लिक ते, 19परमेस्वरए ओराज्या तोबो बाजीए उधुर स्यासो लिज़्या। बारील झाःकिन परीद ओघ्योःवत नमताव भुर्ज़्याव बाज़ार सिपर जैद ओखारत बासिज़्यार।”#13:19 मर्क ४:३०-३२ चिऊन्या।
भरेस सोगोइन्या वासः
(मत्ती १३:३३)
20फरी येसुए, “परमेस्वरए ओराज्यालाई ङा कातास ङागोइँके ल्यो ताकिन, 21परमेस्वरए ओराज्या भरेस सोगोइन्या वासः स्यासो ब लिज़्या। सोंःसेमे मुछिसिउ कनेल तोचोप झाःदी ब प़ाइँ सरालिज़्याव,” है लिके।
चूव य़ाम
(मत्ती ७:१३-१४,२१-२३)
22येसुए नाखार नाखार, सहर सहर जीदा परमेस्वरए ओपाँ सथैए सथैए यरूसलेमदा ओबाज़्याक 23येमक तोबोए, “प्रभु, अजम्बरी जुनी दैन्यार छ्या वाज़ यालिज़्याव सा?” है ओदोक ते, 24येसुए, “चूव य़ामनी पसिन्या जोर दोच्यो। कुधु पसिउ पैंज़्यावर पसिधुन्या मालेर। 25झ़िमए ओर्गेए य़ाम ओगलो छींनी जेबाकिन लाँःक च्याँःसिद, य़ाम कोतो कोतो जैद, ‘प्रभु, गेलाई य़ाम फैद्यासिके’ है जेदोकिन, झ़िमए ओर्गेए, ‘जे काताङावर, ङा ङामासरेस्चिए,’ है दान्या ले। 26जे फरी, ‘गे नँस ज़्युज़्यावर ज़, नसथैसिज़्याव नाखारलावर ज़,’ है जेदोकिन, 27ओल फरी, ‘जे काताङावर, जात्त ज़ ङामासरेस्चिए। जे पापीर आनी पुलुस्द बाचिके,’ है दान्या ले।#भज ६:८ 28हाः बेलाक जे अब्राहाम, इसहाक, याकूब स़ोनो अगमबक्ता भरी परमेस्वरए ओराज्याल यालिज़्याव रँःन्या जेले। जे फरी, ‘गे ते लाँःक लिन्यार ची गेताव ओल्यो’ लिद जेहार ङर ङर कैद चिर्लनी बिर्ल घर्न्या जेले। 29हो छ्याम मिँर आव संसारलाव चार कोन्यानी हुद परमेस्वरए ओराज्यालाव भत्यारल च़ुसिन्या लेर। 30नो भरिनी ख्वा ख्वा ङ़ात लिज़्यावर छींत तारिज़्यार, छींत लिज़्यावर ङ़ात तारिज़्यार।”#13:30 मत्ती १९:३० चिऊन्या।
यरूसलेमए उजूँनी येसुए उयुँ माचाव ओजैव
(मत्ती २३:३७-३९)
31नाः बेलाक ज़ फरिसीर तोबो ऩेब्लो हुद येसुलाई, “हेरोद राजाए नँलाई सैःव पैंज़्याव, नँ आनी पुलुस्द बाव ताके,” है यादोक ते, 32येसुए, “नो स्याललाई है दोनाचिके, ‘तछा ऩेला पै माचाव पुरूसर पले·द यासगराँरिज़्याव दी। नकिन ओय़ेन भरी तुपिन्या ले दी।’ 33जुनी तादी ब ऩेला स़ोंलात ङाबान्या पोङ माकेस्द माताए, म़ानी अगमबक्ता यरूसलेमल मासिद काङ्ङ उसिरिज़्याव?
34“ए यरूसलेमलाव मिँर, कै जैद अगमबक्ता भरिरालाई जेरासैःज़्याव, जेल्योक परींसिउरालाई ब लुँ लुँए जेराझेःज़्याव? बामाए ओचर्ल्यानीर ओकर धूँल ओरादुप्ज़्याव मिताव, ङा ब जेलाई कुधु पाला ज़ ङाल्योदा पाथस दुपो ङापैंके, खाली जे ते जेमाभैंःके। 35है जैद जेझ़िम रितो ज़ तारिज़्या। ङा जेलाई है ङादाचिज़्या, आकिन ते ‘परमेस्वरए उमिनताव हुज़्याव धन्याकाव ओताक’ है जेमादाँवा पै ङालाई फरी रँःन्या जेमाले।”#भज ११८:२६; यर २२:५
Currently Selected:
लूका 13: NKham
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
