यूहन्ना 7
7
छापरा बासलाव पर्ब
1आव भरी ओतावत येसु गालील जीदा आदा होदा लिनाके। यहूदियालाव यहूदीराए यास़ेरराए ओललाई सैःव यापैंज़्यावए नजीदा नोराए ल्योनी ओतर्किज़्याव। 2नो बेलाक यहूदीर सालकाव तखेप छापरा जैद यामानिज़्याव पर्ब हुनाद उलिज़्याव।#लेबी २३:३४; ब्य १६:१३ 3है जैद येसुए ओभाइराए, “नँ आव पोलाई ऱास्द यहूदियाल बान्के। हो ताकिन नसिसराए नङ मनी नदोज़्याव य़ेनर रँःन्या लेर। 4उमिन सथासो पैंज़्याव मिँए मनी सुए ज़ ओय़ेन म़ोंद मादोव। नँ इताव य़ेनर दोव नपैंकिन मिँ भरिराए ङ़ाक सतैंसिउ ताके,” है दोकेर। 5काराव ल्यो ताकिन नो ओभाइराए मनी ओललाई यायुँ ओमाहुप्ज़्याव। 6येसुए नोरालाई, “ङा निताव य़ेन दान्या बेला माहुताए, खाली जे जेजूँनी ते बेला एकम्न्या लिज़्या। 7जेलाई आव मानुवाताव मिँराए सुए ज़ मासोचिर। ङा फरी आव मानुवाताव मिँराए माचाव याय़ेन सतैंद ङाराएज़्यावए ङालाई सोनाज़्यार। 8जे आव पर्ब मानिना बाचिके, ङा आख ङामाबा, ङाबेला माहुताए,” 9है दाद ओल गालीलल ज़ लिके।
10हैदी ब येसुए ओभाइर पर्ब मानिना याबाव छींनी ओल मनी सुए यामासैंद होदा ज़ बाके। 11हो बेलाक पर्बत यहूदीराए यास़ेरराए, ‘येसु काङ्क उलिज़्याव?’ लिद सापो ज़ यालिज़्याव। 12नो माहोल्याराए मनी येसुए उजूँनी कुधु ज़ यापाँज़्याव। ख्वाराए, “नो मिँ बनै चाव लिज़्या,” है यालिज़्याव, ख्वाराए फरी, “माःक, नोए ते झन मिँर तँदा ज़ यालाँज़्याव,” है यालिज़्याव। 13हैदी ब यहूदीराए यास़ेरराए छ्याचेए सुए ज़ पाखात मापाँधुकेर।
येसुए पर्बत परमेस्वरए ओपाँ ओरासथैव
14नो पर्ब ऩेला स़ोंला ओतावत येसु ध्यान झ़िमल बाद परमेस्वरए ओपाँ ओरासथैज़्याव। 15ओपाँ थैद यहूदीराए यास़ेरर अचम्ब ताद, “आव मिँ प़रि ज़ माप़रिउए कै जैद नाः ओसैंज़्याव?” है यालिज़्याव 16येसुए थैद, “आव ङासथैचिज़्याव पाँ ङा ङापाँ माःक, ङालाई परींज़्यावए ओपाँ ची। 17परमेस्वरए उयुँलाव मिताव य़ेन दोव पैंज़्यावए वाज़ आव पाँ परमेस्वरए ओपाँ सैं ङा ङापाँ ओताव लिन्या प़ाल्धुज़्याव। 18ओलनी पाँज़्यावए ते ओल उमिन सथासो पैंज़्याव। ओललाई परींज़्यावए उमिन सथासो पैंज़्याव ते ओखत माल्यो सोजो मिँ ज़ लिज़्या। 19जे परमेस्वरए ओकानुन मोसाए ल्योनी जेदैके, खाली जे नो कानुनलाव य़ेन ते जेमादोके। झन ङालाई सैःव जेपैंज़्या,” है ओरादोक ते, 20नो माहोल्याराए, “नँ दासा बिसा ताद नले, नँलाई सुए सैःव ओपैंज़्याव?” है यादोक ते, 21येसुए नोरालाई, “जे काराव ऩासिन्या छ्याम तोबो य़ेन ङादोक हार जेमानिज़्याव? 22मोसाए जेलाई क्याल्न्या सरेस जैन्या कानुन याद नैचिउ। तान्या ते नो कानुन मोसाए ओयाचिउ ते माःक, जेसाखा पुर्खाराए यायाचिउ ची। नो सरेस जैन्या ऩासिन्या छ्याम उपरिकिन जे मनी ते हो छ्याम क्याल्न्या सरेस जेराजैज़्या।#उत १७:१०; लेबी १२:३ 23निताव मोसाए ओकानुनलाई माबिरैन्याए जूँनी ऩासिन्या छ्याम क्याल्न्या सरेस जैन्या ओताज़्याव ताकिन, ऩासिन्या छ्याम ङा तोबो मिँलाई ङासगराँक जे काराव जेरिस ओचोज़्याव? 24जे मिँ रँःद माःक, साचो युँनी फाल्नाच्यो।”
येसुलाई आव ज़ लिद यामाथ·रैधुव
25हाःत ज़ यरूसलेमलाव ख्वा ख्वा मिँराए, “नो सैःव यापैंज़्याव मिँ आव माःक रो? 26झन निताव प़ाइँए ङ़ाक माम़ोंसिद ओपाँक ब सुए ज़ घाइ मादोर। सैं गेस़ेरराए मनी ‘गेलाई बाँचैना हुव ख्रीस आव ज़’ है लिद याथ·रैज़्याव ओताव? 27साचो ख्रीस ओताव ताकिन ते आनी उहुव लिन्या सुए ज़ मासैंखेरहो। गे ते आवलाई आनी हुव ज़ लिन्या प़ाइँए गेसैंज़्या,” है लिकेर।
28हाःत ज़ येसुए ध्यान झ़िमल ओर्गा बनै सघ्योःद अइ लिद यासथैक्यो, “जे ङालाई ब जेसरेस्नाज़्या, आनी उहुव लिन्या ब जेसैंज़्या। हैदी ब ङानी ङाहुव माःक, ङालाई परींव ओल साचो परमेस्वरए ज़। नोलाई ते जेमासरेसे। 29ङा ते ङासरेस्ज़्या। ङा ओल्योनी ज़ ङाहुके, ङालाई परींज़्याव ब ओल ज़,” है ओरादोव प़ाइँना ज़, 30नोराए क्योःव पैंकेर। खाली ओबेला ओमाहुतावए सुए ज़ हिउ माझाःधुकेर। 31हितावत ब नलाव लिज़्यावर कुधुए ज़ येसुलाई यायुँ हुप्द, “नो हुरिज़्या है यालिज़्याव ख्रीस उहुवत, आव मिँकिन घेप्पा य़ेन ओदोधुरिज़्याव रो?” है लिकेर।
32नो मोहोल्याराए येसुए उजूँनी इताव खास खासनी खुस खुस यापाँज़्याव फरिसीराए थैद नोर मुख्या पुजारीरास खैद ओललाई क्योःना ध्यान झ़िमलाव पाल्यार यारापरींकेर। 33नो बेलाक ज़ येसुए, “ङा जाँवा पै वाज़ जेस ङालिरिज़्या, नकिन ङालाई परींज़्यावए ल्योदा ङाबारिज़्या। 34हाःकिन ङालाई जेसाप्नादी ब दैधुन्या जेमाले, ङालिज़्याव पोल जे हुधुन्या ब जेमाले,” है ओरादोक ते, 35यहूदीराए यास़ेरर या याल है लिकेर, “आव मिँ काताङ म़ोंसिनाव ओपैंज़्याव ब्याँ? ‘ङालाई दैधुन्या जेमाले’ है लिज़्या। सैं आव देसलाई ऱास्द ग्रीकराए खार्लाव चितराँ पुतराँ ताव यहूदीराए खार्ल लिनाद नोरालाई ओल्योदा ओराजैनारिज़्याव ओताव? 36नोए, ‘ङालाई जेसाप्नादी ब दैधुन्या जेमाले, ङालिज़्याव पोल ब हुधुन्या जेमाले,’ है उलिज़्यावए ओअर्थ काता ओताव?” है लिकेर।
जींदो ऱी
37पर्ब स्यो·न्या, प़ाइँरानी घेप्पा छ्याम, येसुए प़ाइँराए ङ़ाक च्याँःसिद ओर्गा बनै सथास्द, “छोस्ज़्याव मिँ ङाल्योक हुद उऱीछो ओसैःहुवक।#लेबी २३:३६ 38धर्मसास्त्रलाव सर्सिउ मिताव, जोए ङालाई उयुँ हुप्ज़्या, होए उयुँनी जींदो ऱीमुल मिताव पुलुस्न्या ले,” है लिद यासथैक्यो।#इज ४७:१; जक १४:८
39नो जींदो ऱी है उलिज़्याव ओललाई यायुँ हुप्ज़्यावराए छैंव पुरूस यादैरिज़्यावए जूँनी ज़ ओपाँज़्याव। हाः बेलाक पै येसु स्वर्गदा ओमाबातावए छैंव पुरूस परमेस्वरए ओमाराएताव।
40हाःत ज़ नो माहोल्यारानी ख्वा ख्वाराए येसुए ओपाँ चावस थैद, “साचो आव ज़ ओल्यो, हुरिज़्या है यालिज़्याव अगमबक्ता,” है लिकेर। 41ख्वाराए फरी, “नो ते परमेस्वरनी बाँचैना हुरिज़्या है यालिज़्याव ख्रीस ज़,” है लिकेर। ख्वाराए फरी, “ख्रीस ताकिन गालीलनी ते हुव मापरिन्या। 42ख्रीस दाऊदए ओथोल जर्मिद दाऊदए ओनाखार बेथलेहेमनी हुन्या ले लिद धर्मसास्त्रल सर्सिउ लिज़्या सानी।”#२ समू ७:१२; मीका ५:२ 43है जैद येसुए उजूँनी नो माहोल्यार यापाँ माखैद कुधु खर्लेसिकेर। 44ख्वाराए ते ओललाई क्योःव यापैंज़्याव, खाली सुए ज़ हिउ माझाःकेर।
येसुलाई यामाक्योःधुव
45छींनी नो फरिसीर स़ोनो मुख्या पुजारीराए येसुलाई क्योःना यारापरींव ध्यान झ़िमलाव पाल्यार अइज़ ओल्द याहुवए फरिसीराए, “येसुलाई काराव क्योःद जेमारैव?” है यारादोक ते, 46नो पाल्याराए, “नोए ओपाँज़्याव मिताव ते आःपै खर्क ज़ गेमाथैताए,” है यारादोक ते, 47नो फरिसीराए, “जे मनी काता घरी नोए ओपाँ थैद तँदा जेबाधुव। 48गे फरिसीर स़ोनो स़ेरर ते नोए ओपाँत तोबो ब गेमाबाए सानी। 49इताव मोसाए ओपाँ मासैंज़्याव याफ्या·हुव माहोल्याराए वाज़ नोए ओपाँ थैज़्यार,” है लिद यारासिङार्केर।
50हाःत ज़ नक लिज़्याव फरिसीरानी येसुलाई ङ़ादा तखेप दैना हुज़्याव नो निकोदेमसए, 51“गे गेकानुनल जो मिँलाई तादी ब नोए ओपाँ माफाल्द ओय़ेनताव ओगल्ती माथ·रैद कै जैद नोलाई सजा यान्या ओताज़्याव?” है ओरादोक ते, 52नोराए, “काता नँ मनी नोसकाव गालीललाव ज़ रो? अगमबक्ता गालीलनी सु ज़ हुन्या माले, अछादी नँ ज़ धर्मसास्त्रल चावस चिऊके,” है दोकेर।
53[हाःत ज़ मिँ भरी सु सु याझ़िमदा बाकेर।
Currently Selected:
यूहन्ना 7: NKham
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
