ओसाचीर 5
5
हननिया स़ोनो सफीरानी
1फरी तोबो हननिया यादोज़्यावए ओज्या सफीरास निएँः तोथो यो·द, 2ओरेए नो एँःए ओएः ओज्यासकाव निसल्लाए तभा ओलस नैद उपुर्काव भरी येसुए ओसाचीराए ल्योक लाँक्यो। 3ओसाचीराए ल्योक ओरैव प़ाइँना ज़ पत्रुसए, “ए हननिया, कै जैद सैतानए नयुँल पसिद छैंव पुरूसलाई धुतैव उपरींनिज़्याव? नो एँःए ओएः तभा नँस नैद ‘आःज़’ है नलिज़्याव। 4नो एँः ङ़ादा नँ नमीं ज़ ओल्यो। यो·द ओएः भरी जो नजैदी ब नमाहाँ ज़ ओल्यो। कै जैद नयुँल इताव नचेतैव? नँ गेलाई नधुतैसिज़्याव माःक, परमेस्वरलाई नधुतैज़्याव ची,” है दोक्यो।
5हननिया नो पाँ भरी ओथैव प़ाइँना नक ज़ धलिद सिके। नो थैवर प़ाइँ ज़ बनै छे·केर। 6हाःत ज़ नक लिज़्याव धापाज़ाकावराए नोए ओमोरोलाई क्वाए लुम्बैद गादैनाकेर।
7नो भरी ओताव स़ोंघन्ता छींनी हननियाए ओज्या सफीरा मनी नक हुके। ओरेलाई अइ ताके लिन्या काता ज़ ओमासैंज़्याव। 8हाःत ज़ पत्रुसए, “नो जिन्यो·व एँःए ओएः आःज़ रो?” है ओदोक ते, नोए, “नाः ज़,” है दोक्यो। 9नकिन पत्रुसए फरी, “जिन ज्या-रीए काराव परमेस्वरए उपुरूसलाई उयुँ कोला कोला जैद्यान्या बुद्धी जिन्कमैव? दे, नरेलाई गादैना बावर य़ामक ज़ हुद लेर। नँलाई मनी लाँद गादैनिरिज़्यार,” है ओदोव प़ाइँना ज़, 10नो मनी होक ज़ धलिद उस॰ फ्या·के। हाःत ज़ नो ओरेलाई गादैना बाव छोर्यार खादरनी ओल्द हुद झ़िमल यापसिक ओज्यालाई मनी सिउ ज़ दैकेर। नोलाई मनी लाँद ओरेए ओलापक ज़ गादैकेर। 11नो पाँनी ज़ मन्दली भरी स़ोनो उपुर्काव थैज़्याव मिँ भरी ब बनै छे·केर।
येसुए ओसाचीराए याजोरो हुवरालाई यारासगराँव
12हाः बेलाक मिँराए याखार्ल येसुए ओसाचीराए याक्याँनी ज़ अचम्बलाव सरेसर ओताज़्याव। येसुए ओपाँत लिज़्यावर प़ाइँए तयुँ जैद ध्यान झ़िमलाव सोलोमन मैराल दुप्सिउ ज़ यालिज़्याव। 13उपुर्काव मिँराए नोरालाई बनै घ्योःव यारामानिदी ब नोरास खदेप लिन्या याछे·ज़्याव। 14हैदी ब कुधु मिँर, खेपा मेंमा प़ाइँ प्रभुए ओपाँत चा·सिहुव ज़ यालिज़्याव। 15मिँराए, “याजोरो हुवराए याक्याँत पत्रुसए ओसाँ वाज़ उपरिदी ब गराँन्या ज़ लेर,” लिद नो याजोरो हुवरालाई याझेलोङ्गा यातैंरास पत्रुसए ओयेमक यारानैज़्याव। 16यरूसलेम सहर लापजीकाव नाखार नाखारलाव मिँराए मनी याजोरो हुवर स़ोनो माचाव पुरूसराए क्योःद यारानैज़्यावरालाई येसुए उसिसराए ल्योक यारारैक नोर मनी यागराँज़्याव।
येसुए ओसाचीराए याखिरी यापसिनाव
17छींनी प्रधान पुजारी स़ोनो ओलसकाव सदुकी दललाव ओनैंराए येसुए ओसाचीरालाई रँःद यामी बनै तूद, 18नोरालाई क्योःद झ्यालखानाल याराझाःकेर। 19हो छ्याम रील परमेस्वरए ओचाकर्या हुद झ्यालखानालाव य़ामर फैद्याद नोरालाई पले·द, 20“जे ध्यान झ़िमल बाद प़ाइँए याङ़ाक च्याँःसिद आव साःरो जुनीए जूँनी ओपो·स ज़ यारासथैचिके,” है दाद याख्यानैक्यो। 21नोए है ओरादो पाँ भैंःद नोर नम उसँनाक ध्यान झ़िमल बाद मिँरालाई यारासथैकेर।
हो छ्याम ज़ छकाल्न्या प्रधान पुजारी स़ोनो ओलसकाव लिज़्याव ओनैंराए इस्राएल देसलाव यास़ेररालाई घ्योःव कचरील दुप्द तोबो ऩेब्लो यासिपाईंरालाई नो झ्यालखानाल लिज़्याव येसुए ओसाचीरालाई च़ानाव यारापरींकेर। 22नोर बाद झ्यालखानाल सुलाई ज़ यामारादैवए ननी ओल्द बाद नो घेप्पारालाई, 23“गे झ्यालखानाल गेबाक प़ाइँत ज़ तालकुची झाःसिउ लिज़्या, पाल्यार मनी य़ामक च्याँःसिउ ज़ लिज़्यार। खाली य़ाम फैद नल गेराचिऊक ते सु ज़ मालेर,” है यारादोक ते, 24नो ध्यान झ़िमलाव पाल्याराए याकप्तान स़ोनो मुख्या पुजारीराए नो पाँ थैद, “अब कै तान्या ओताव?” लिद यायुँ बनै आँचानी पाँचा ओताज़्याव। 25हो प़ाइँना ज़ याल्योक तोबो मिँ हुद, “दे, नो झ्यालखानाल जेराझाःव मिँर ते ध्यान झ़िमल ची च्याँःसिद प़ाइँलाई ज़ येसुए ओपाँ यारासथैज़्यार,” है ओरादोक ते, 26नो ध्यान झ़िमलाव कप्तान उसिपाईंरास लाला लुलु बाद नोरालाई ननी कचरी झ़िमल चावस ज़ यारारैकेर। “मिँराए गेलाई लुँराए प़ोसिर्या,” लिद जबरज्यास्ती क्योःन्या याछे·ज़्याव।
27नो घ्योःव कचरील दुप्सिउ स़ेरराए याङ़ाक फरी ब यारासच्याँवत नो प्रधान पुजारीए, 28“गे जेलाई ‘येसुए उमिननी काता पाँर ब तारासथैच्यो’ है गेदाचिउ सैं माःक? जे ते झन नोए ओपाँ यरूसलेम भरिल फींजैद, नोलाई यासैःव गल्ती ब गे गेङ़ैत झाःव जेपैंज़्या,” है ओरादोक ते, 29पत्रुस स़ोनो येसुए छुत ओसाचीराए, “मिँराए यापाँकिन बुरू गे परमेस्वरए ओपाँ भैंःव ताके। 30नो क्रुसत तङ्गैद जेसैःव येसुलाई गेजिज्यु बाज्युराए यापरमेस्वरए ज़ सिउनी सोचोइक्यो। 31नोलाई ज़ फरी परमेस्वरए स्वर्गताव प़ाइँरानी ओमान ल्यो झेंःव पोल नैद गेराजा जैद्यासिक्यो, पापनी ऱास्न्या ब जैद्यासिक्यो। गे इस्राएलीरालाई गेयुँर त़ोद्याद गेपापर क्याल्द्यान्या ओल ज़ लिज़्या। 32गे फरी नो पाँ भरित ओसाचीर गेलिज़्या। खाली गे वाज़ माःक, छैंव पुरूस ब लिज़्या। नो पुरूस गे परमेस्वरए ओपाँ भैंःज़्याव भरिरालाई गेक्याँत ज़ याद नैसिउ,” है यारादोकेर।
गमलिएलए ओसल्ला
33नो घ्योःव कचरीलाव मिँराए पत्रुसए ओपाँ भरी थैद यायुँर बनै कोला कोला ताद नो उसिसरालाई सैःव पैंकेर। 34हाःत ज़ तोबो यासकाव गमलिएल यादोज़्याव नो कचरीराए याङ़ाक च्याँःसिके। नो मिँ बनै मान दैव फरिसीरासकाव कानुनलाव यागुर्बा ओल्यो। है जैद नोए येसुए उसिसरालाई तखेप लाँःदा पले·व परींद नो घेप्पारालाई है यादोक्यो, 35“अ इस्राएली ङानैंर, आवराए याक्याँत जेदोरिज़्याव य़ेन बनै जोगोइसिद वाज़ दोच्यो। 36नो तालाङाव थुदासए मनी तघरीत ज़ उमिन बनै सघ्योःद ओल्योदा चार सयवा मिँर याजैक्यो। छींनी नोलाई यासैःवत उमींर प़ाइँ चितराँ पुतराँ ताद उमिन ज़ म़ाके। 37नकिन फरी नो गालीललाव यहूदाए मनी, जनसंख्या यासर्ज़्याव बेलाक, मिँरालाई सर्बा ज़ ओल्योदा याजैक्यो। नोलाई मनी यासैःक उमींर आदा बाकेर लिन्या ज़ माताके। 38है जैद आछिम ङा जेलाई आव सल्ला ङायाचिज़्या — आव मिँरालाई कैज़ ताराजैच्यो, बुरू याराऱास्चिके। आवराए याबिचार याय़ेनर अइज़ मिँनिकाव हुव ताकिन नो ओलनी ज़ म़ान्या ले। 39नो याय़ेन फरी परमेस्वरनिकाव हुव ताकिन जे वैंधुन्या जेमाले। झन परमेस्वरकिन तँदा जैसिद ओलस लरैं जेदोज़्याव मिताव तान्या ले,” है ओरादोक ते, 40नोराए नोए ओपाँ भैंःद येसुए ओसाचीरालाई फरी ब याल्योक खुल्द, “येसुए उमिननी काता पाँर ब तारासथैच्यो,” लिद हप्कैद रीःद अइज़ याराऱास्केर। 41नोर नो कचरीनी पुलुस्द, ‘परमेस्वरए गेलाई येसुए उमिनत दुख सहिन्या स्यासोर ओथ·रैसिउ ओल्यो’ लिद बनै रेंए रेंए बाकेर।
42नकिन दिनकाव ज़ ध्यान झ़िमल स़ोनो मिँराए झ़िम झ़िमक दुप्सिद, “येसु परमेस्वरनी हुव ख्रीस ज़,” लिद च़िम मादाद सथैव ज़ यारानैकेर।
Currently Selected:
ओसाचीर 5: NKham
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
