Markkoc 13

OIeccuo peret thokïttako thonoppan toKapik

(Maththa 24.1–2; Lukka 21.5–6)

1Anakka kwokat cik akwoththe nokaꞌran konoppan toKapik, apilin nti iul iammakothok iꞌrekathok itti, “Pul ipangkene, antokatha, akka mothok imïttïmïttïk ana kaman kopeththere.”

2AIeccuo othïat tit itti, “Onon thimmat kaman engki ikïttïttïk appiki? Pothok pella pulukku pakwentako nopangken, müntat nocapu mulumuluk appik.”

Aꞌrupu iakaik aIeccuo parthuk okkaprttako

(Maththa 24.3–14; Lukka 21.7–19)

3Anakka oIeccuo pokat cik akwikkoik nocoꞌrong coCeththun icakatha noppan toKapik, oPoththuruc ana oIakup ana oIuanna ana Anthrauc ipittathok therek itti, 4“Iiꞌrethenïn itti lon elli lakaik acintha? Ana lon liatha ilakene itti lon elli lathokaik?”

5AIeccuo iꞌrekat kin itti, “Noꞌrumoik akka apilin ammikkot non. 6Okin thoppot thanthan ngkꞌran kin akin iꞌre itti, ‘Oun oMiccie’ ana okin ammikkot ul woppot. 7Nokorronno ona nꞌre amma onon thoccïkothe itti thoꞌrak thaik ana karra kothoꞌrak, lon ila ammakka elli lakaik anaruk caꞌri carthuk anthan. 8Ul nomoꞌrong mꞌrek aprttakot iul wonomoꞌrong mꞌrek ana ngili ngaprttakarot tit. Thaꞌrïntïttako thocapu ncik appik thakaik naꞌran woppot ana tï takaik. Elli laka ere thokꞌrellako thokkul iakwonta thonomun. Lon elli lakene itti lon ilaik lanthan lantruko ncik.

9Onon thonu itti onon thaꞌrumoik. Onon thikkettat nili ana akin okkwet non nomuththun maꞌrama. Onon thanekittat tokït konili inarran ana inïttïnïttïk nti ilon lin. Anaruk loporot othakka itti annokenekin lon lin. 10Ana lon iloporot loIeccuo lonu itti langkenetta ul nomothok appik cittokït. 11Amma onon thocciccokittathe ana onekittat imakkma, nokorronno ipo nꞌre itti onon thathiꞌre itti tat. Niꞌre lon ilettathenon nocaꞌri cen itti onon thiꞌre, akka onon akkakannoka thaik there, anaruk Kanang ikupupure.

12Ukul wakero opang akwokkuttat ana oththan pokkul okero ukul wung akkuttat. Nyukul nyaprttakot iaththangon akin okorronno kin akin ongutta. 13Ul appik wꞌranon nti ilon lin, anaruk okkwi ipoccokothe cïkït ilon puccuk mono alocothakat ana kwaꞌrettat.”

Thoccokot thiak

(Maththa 24.15–28; Lukka 21.20–24)

14“Amma onon thimmat lon lothokïttakoik#Thanial 9.27; 11.31; 12.11 lurokot nokaꞌran ika lon akkira akkakannoka nan (aul iakkakkaro iatham ina lon len) nokorronno okin ithaik noththok poIouthia akin ollot toꞌra womoꞌrong. 15Nokorronno okorronno opilin ipaik toꞌra woman mung itti kuo ntan akwiꞌriko noppan itti kwummo papꞌrek. 16Ana okkwi ipaik topon akwokorronno opakkot tuan itti kwathummo kret kothongkuꞌrupakot. 17Laka laraththa noul ioppeppethe ana iokwonot. 18Naꞌra ngaꞌrama othakka itti alon elli okonnoka nothuput thoricpo, 19akka ul waccokot thiak cannan nomaꞌri men. Okin thaccokot thiak cannan nothiak ithakin thoccokothe ammakka Kapik kokuꞌret capu ncik, ana thoccokot thiak ammakka enthi thella pꞌrïn. 20Ana amma Kapik kakorronno orpet maꞌri men cik mothoccokot thiak, pul pella pakwentako. Anaruk nti ithocumorit thoul ia kwocumot tit, kwathikkienet kin muththumuththut. 21Ana nocaꞌri cen amma opilin piꞌrethung itti, ‘Okatha oMiccie pei’ ana itti ‘Okatha okkweꞌre ceneket,’ nokorronno occïkot lon len. 22Akka ul wanthan iiꞌre itti okin oMiccie ngkarra ana ul wothernte lon loKapik ngkarra akkot lon ilommaththik akin ammikkot ul ngngin ana akin ammikkot manna ul ia Kapik kakkarot amma okin akkiothe kathar ikakin ammikkot kin ngngin. 23Ittina noꞌrumoik mperenet non lon appik acaꞌri cen carthuk anthan.”

Thao thokkul wopul iponyi

(Maththa 24.29–31; Lukka 21.25–28)

24“Anaruk nomaꞌri imomakothe maꞌri mothiak

‘ngïꞌrïmak ngaꞌroik,

ana kwanok kakannupuka#Iccaia 13.10

25ana mothot mapukkwo ntothiꞌrot

ana aꞌrupu worothiꞌrot waꞌrïntïttako ncik appik.’#Iccaia 34.4

26Caꞌri cen ul ionyi wimma ukul wopul iponyi anthan nti inuththe mpuꞌran ana nthïrïk. 27Ana kwathïot uꞌrupa wothothïlettat wung aꞌrntot okkwion ithakkarakot nnocapu ncik appik.”

Thongkene thopira popïcït

(Maththa 24.32–35; Lukka 21.29–33)

28“Inenni nina lon lopira popïcït amma natha nopira popïcït iat ana anocokka, onon thina itti karran kakko napuththut. 29Ittina amma onon thimmat lon len alokkattat onon thina itti lon len laik napuththupuththut. 30Mpiꞌret non ïcarïcat itti lon elli lakkattat appik aul enni inenni warthuk ille. 31Tothiꞌrot ana capu thintat cik anaruk lon lin lakorronno intat cik aththik.”

Okuccekotheik

(Maththa 24.36–44)

32“Pul pella manna pina caꞌri cen ana cïngkï cen manna uꞌrupa wothothïlettat woKapik ci tothiꞌrot womma ana manna ukul ngka kung ukul acakuruk womma, oththan pulluk akkina. 33Noꞌrumoik ana ikkoik ngkït thapat akka onon thomma itti caꞌri canthan acin. 34Likkoik ere pul paik paeo imakkren, kwaththe nokaman kung, kwakwentot ul iarekinok iere ngen kurekkurek ana kwiꞌret pul ipangwot cik nocürük itti kwangwot cik.

35Ittina noꞌrumoik akka onon thomma itti pul poruan pakkaprttako ntan acin, cipini ana amma okorronno oka cipin ana thampang thongkꞌrai, ana manna athakꞌruk ooi ana manna ngïꞌrïmak nthuput thorrori? 36Amma ook akkat omolittorit korronno okorronnok itti kwathiot non inthe. 37Ila aniꞌret non, mpaik mperene ul appik, ‘Noccot kït cik.’”

Currently Selected:

Markkoc 13: Lumun

Highlight

Copy