Lukka 1
1
1Pangkin oThiappiloc, ul woppot wokurrot lon ana aꞌrupu iokat cik ïcat tokït konnon. 2Okin thokurrot lon ammakka lerettanet nïn nul immat lon ncinomun ana okin ithongkenet lon loKapik. 3Ana inakka oun ngka kin pommakothe lon appik nci nomun kicce, mpongothe itti mpakurrot cene othettot cik kicce anokurrinung oThiappiloc pul iprïk, 4othakka itti aina anganna lon ilaik ïcat ila ngkwappongkenettat.
Thokwonta thoIuanna pomamuthie thiꞌrettat
5Nocaꞌri coIruthuc ili woIouthia, pul pꞌrek pokat cik ponoppan toKapik poccot kꞌran itti oCekkeria ipokat ikuthuk koul wonoppan toKapik wApia ana opari Alicepeth pokat cakuruk pothiki thoul wonoppan toKapik worikuthuk kArun. 6Okin oththuththeꞌra thokat thoporot tokït koKapik ana nthoccokothe lon loIli appik iliꞌrettat ana nthoꞌrumot nolon ilamakittat papenang. 7Anaruk okin thellat nyukul akka Alicepeth pokat papucung ana okin aththeꞌra thokat thukkwat.
8Caꞌri cꞌrek caCekkeria pokat cik akwokkot ngre noppan toKapik ammakka ook pul ponoppan toKapik nocaꞌri cung icapinthok 9kwokat pummuntat nthokkwo moꞌrio ammakka thathuma thoul wonoppan toKapik thokat akweo noppan toIli akwothokꞌre ngaꞌra iokkunako amutha. 10Anakka caꞌri caat cothokꞌre ngaꞌra iakkunako amutha, ul iaꞌra ngaꞌrama wokat cik waꞌrantakothe thapat aꞌra ngaꞌrama.
11Ittina auꞌrupa wothothïlettat woIli ummanthok ncik, acoꞌrat thokkun wothothari woruꞌrot tonoppan toKapik na ngaꞌra iakkunako ngokat akꞌrettat. 12Anakka oCekkeria pimmat uꞌrupa wothothïlettat woKapik akwirrat tit akwipat nꞌre. 13Anaruk uꞌrupa wothothïlettat woKapik wiꞌrekathok itti, “Cekkeria, kirrnni ipo nꞌre. Kapik koccïkothe ngaꞌrama ngang, opari pang Alicepeth pakwoninung ukul iocura ana ngkwaccie kꞌran itti oIuanna. 14Kwapirieng noka ana ul woppot wapirane thokwonta thung noka 15akka kwaka prïk tokït koIli. Kwakannïkko ngapak ana Kanang ikupupure kaka naak nciki icarak connan. 16Kwakkaprtto ul woIccereil woppot nti ilon ilokithak apakkinthet Ili Kapik ken. 17Ana kweo tokït koIli iKanang ikupupure ana puꞌran popul pothernte lon loKapik oIlia ana kwapakket mïkït moththan ponyukulon ikuꞌri nynyukul nyen, ana kwakkaprtto ul iokat wꞌrat lon ilocoꞌrotheik angkot lon lothina cik nti ica loul woKapik. Kwakuccenthet thanthan thoIli ul cik.”#Malakki 4.5–6
18ACekkeria ipittat uꞌrupa wothothïlettat woKapik itti, “Mpina itti laik ïcat taththa? Mpukkwat ana opari pin pukkwat.”
19Uꞌrupa wothothïlettat woKapik wothïanthok tit itti, “Oun oCepereil. Mpaik pacoꞌro tokït koKapik ana mpothïlathe anathiꞌrethung lon elli iloporot. 20Anaruk inakka ngkworakket lon lin ilathokaik ïcat nocaꞌri cen, ngkwannere puccuk alon ila mpiꞌrethung othakkakat.”
21Caꞌri cen ul wokat cik aꞌrïkot oCekkeria thapat aprttakot tit itti ngintha akka kwoccinet cik puccuk noppan toKapik. 22Anakka kwoppothe thapat kwommakathe erenekin akwikat cik akwere nyaun akin inakat itti kwimmathe loꞌrek noppan toKapik anaruk kwoꞌrungkwathe pomma nthon.
23Anakka maꞌri mung mothokkot ngre noppan toKapik momttathe kwopakkothe tuan. 24Anakka lon len lomttathe ana nomaꞌri motte apari Alicepeth oppekathe ana kwikkatheik noppan anok ukuluk okorronno oppot thapat. 25Kwiꞌrekathe itti, “Ili akkokkinthin elli, kokenerin thongat thung nomaꞌri emmi ana kwopaꞌrenin thothia cik thin tokït koul.”
Theret thokwonta thoIeccuo
26Nokwanok ikꞌrakkuruk aKapik othïat uꞌrupa wothothïlettat wung ioccot kꞌran itti oCepereil ciki nokaꞌran koNaccir ikaik noththok poCelïl, 27nokkul ioiꞌre iakannaꞌrutta ngngin aththik woccot kꞌran itti oMeriom iokat wokkaccakinet pul ipoccot kꞌran itti oIuccip thiki thoThauth. 28Uꞌrupa wothothïlettat woKapik woingkanthok aiꞌrekat itti, “Taththa okkwi ipa Kapik kongothe cannan, Ili waik naung.”
29OMeriom pipanthet lon len nꞌre akwoprttakanthet thomicco then tit. 30Anaruk uꞌrupa wothothïlettat woKapik wiꞌrekathok itti, “Meriom, kirrnni ipo nꞌre, oung pul ipa Kapik kongothe. 31Ngkwappet ana ngkwakwono ukul iocura ana ngkwaccie kꞌran itti oIeccuo. 32Kwaka prïk ana kwakkarako itti ukul wokkwi ipaik cittothiꞌrot. Ili Kapik wethok prrok poththan oThauth, 33ana kwathakka ili wothiki thoIakup thupuththuput ana ngili ngung ngakannomttat thupuththuput.”
34AMeriom ipittat uꞌrupa wothothïlettat woKapik itti, “Elli lathakka taththa akka mparthuk poiꞌre ana mpomma pul ipocura?”
35Auꞌrupa wothothïlettat woKapik othïat tit itti, “Kanang ikupupure kanthan naung ana puꞌran poKapik korothiꞌrot paka naung. Ilen akka ukul iakwonta nti iaung wakkarako itti ukul woKapik. 36Ana manna Alicepeth pokuꞌri kang poppethe ipa ul wokat cik aere itti kwokat pucung. Ana kwoppethe ponu anok wꞌrakkuruk. 37Akka lon lella ilalkothe Kapik.”
38AMeriom othïat tit itti, “Oun pul iparekine Ili. Alothakkanin menik ammakka ngkwiꞌret.” Auꞌrupa wothothïlettat woKapik oththekat naak.
OMeriom paththokatha nAlicepeth
39Caꞌri cen oMeriom purokathe akwiꞌrikittakat okuꞌrot nokaꞌran noththok poIouthia. 40Akwoingkat tuan thoCekkerian akwomiccat Alicepeth. 41Anakka Alicepeth poccïkothe poꞌre poMeriom aukul ikkat cik aurttuko nti icarak aKanang ikupupure oꞌrat nAlicepeth. 42Akwiꞌrekat lon mpoꞌre cittan itti, “Oung akkethïettat nti iul iari appik ana ukul iathokwono wethïettat. 43Turuk itti ngintha akka mpongakinthet ittina, itti onnan poIli painin? 44Akka poꞌre pothomicco thang poꞌrorin iunu aukul ikkat cik aurttuko nthopira noka nciki icarak. 45Pul pethïekothe cik ipoccokothe lon loKapik nocïkït ila Ili wiꞌrethung lathakka ïcat.”
Kunye koMeriom kothomereket Kapik
46AMeriom iꞌrekat itti,
“Mpopiranet Ili noka nci noucce win
47ana kanang kin kopiranet Kapik noka akka ook pothoꞌret thin
48akka kwokwarikothin ipa piak pung.
Inenni thiki enthi appik thakkaron itti pul ipa Kapik kethïetheik.
49Akka okkwi ipakannalkakot pokkinthin lon lrïk
kꞌran kung kupupupure.
50Thiak thung thaine ul iothianok cik thiki thiki.
51Kwokkothe ngre mpuꞌran pung
ana kwopettothe ul cik iipot ka thoura ana iongothe lon loka ken.
52Kworpethe nili cik nnorrok wen
anaruk kwoꞌrumot noul ia ul wella kït ken.
53Kwoththikiethe ul iamat naꞌrupu woppot ioporot
anaruk kwothïlethe aꞌrthan ikathar nyaun incürük.
54Kwittarothe piak pung iparekinok oIccereil,
ana kwokwarikathe itti kwipo thiak thung.
55Ana ammakka kwonekkenthet Aprein ongappa ponnon lon cik ana thiki thung thupuththuput.”
56OMeriom pikkatheik okin Alicepeth anok wꞌrapuruk akwopakkat tuan thanung.
Thokwonta thoIuanna pomamuthie
57Anakka caꞌri cainet Alicepeth itti kwakwono akwokonat ukul iocura. 58Ul wonocürük ana kuꞌri kung woccïkathe itti Ili wipot thiak thung nthokkinthok lon iloporot ana okin thopirakathe noka okin aththungon.
59Anakka ukul wothikkiet maꞌri mormor okin thakkakathe akin athokekkiet ana okin thokat thongothe itti okin thaccie kꞌran koththan itti oCekkeria 60anaruk onnan piꞌrekathe itti, “Aa, kwaccietta kꞌran itti oIuanna.”
61Aul iꞌrekathok itti, “Pul pella nti ikuꞌri kang iponu kꞌran ammakka engki.”
62Ittina akin erekanthet oththan pokkul inyaun itti akwiꞌrekin itti ukul wacco kꞌran itti okkwen. 63Akwipittat kuruthut akwokurrot nan itti, “Kꞌran kung itti oIuanna.” Aul oprttakat tit appik. 64Nci cïnang athon thoththan pokkul anyat ana thuꞌre thung apprikat akwikkat cik akwere lon lothomereket Kapik. 65Ul wonocürük wipathe nꞌre appik ana ul wikkatheik aeret lon len appik naꞌran wonoththok poIouthia. 66Ana okkwion ithoccïkothe lon len thikkatheik akin oprttakot tit akin ipittarot lon itti, “Ukul enni wathothakka ngintha amma wocokkat?” akka ukun woIli Kapik wokat naak.
Kunye koCekkeria kothomereket Kapik
67AKanang ikupupure oꞌrat naththan oCekkeria akwikkat cik akwere lon ilanthan akwiꞌrekat itti,
68“Athopira noka oka noIli, Kapik koIccereil
akka kwaat ana kwelikkot ul wung.
69Kwonekkenthet ton pul cik mpuꞌran prïk pathoꞌret ton pothiki thoThauth.
70Ammakka kwiꞌrethe ul wothernte lon lung womaꞌrot.
71Itti kwaꞌret ton nnothoꞌrak thonnon
ana nti inyaun nyoul iꞌrat ton.
72Okkwokenet ongappan thonnon thoporot
ana nthoccot kït nothonekket lon cik thung ithupupure,
73thonekket lon cik itha kwonekketheik okin ongappa ponnon Aprein.
74Itti kwakkieron cik nti inyaun nyothoꞌrak thonnon
ana okwokorronnoron aron ella nꞌre.
75Ana oka thupupure ana thoporot tokït kung thupuththuput ammakka oron thaik.”
OCekkeria paik peret ukul wung
76“Ana oung ukul win, ngkwakkarako itti pul pothernte lon loKapik kocittothiꞌrot
ngkwaeo tokït koIli akuccenthok kathar,
77atherene ul wung lon lothoꞌrettat itti laka
nthoccïkarnthet lon ilokithak.
78Elli akka Kapik konnon konu thiak thonnon.
Ana nti ithiak enthi oMiccie paineron ntothiꞌrot ere cïngkï amma acoppo.
79OMiccie pathere lon ilaik ïcat ilaka ere kꞌran kocïngkï ikathocciene ul cik iaik iꞌrïmak
ana ionu nꞌre nothille
kwakkot lon elli itti akwipot ton ikathar kothikkoik thoporot tokït koKapik.”
80Ana ukul wokat cik acokka ana athakka wonthomat iKanang ikupupure, ana kwikkatheik ithampang ithonthomat puccuk mono akwummat ncik tokït koul woIccereil.
Currently Selected:
Lukka 1: Lumun
Highlight
Share
Copy
Want to have your highlights saved across all your devices? Sign up or sign in
´© (Active), Wycliffe Bible Translators, Inc. All rights reserved
