MARK 4

Khaici Vawpa Thugentena

(Mat 13:1-9; Luk 8:1-15)

1Tuipi gei-ah thuhil dingin ama a kipankia hi. Ama’ kimkotah mihon tampi tahte kikhawm uh ahi ziehin gunkuong tungah ama kato-in tuanah to a, tua laitahin tuipi gei-ah mihonpite a om uhi.#Luk 5:1-3 2Ama in amate kungah thugentena tampi tawh tam bangin a gen hi: 3Ngai un! Khaici vawpa khat khaici vaw dingin a kuon hi. 4Tuale ama in khaici a vaw ciengin kimkhat lam lai-ah kie a, vate lengin a netum uhi. 5Khaici adangte ahile lei tam lona, suong tamna munah kie a, lei sa seng lo ahi ziehin thakhatthu-in po pai hi. 6Tuale ni ang suoh a, nisa in a kaa gawp hi; zung thuh hla lo ahi ziehin a vulnang pai hi. 7Adang khaicite lingkawm lahah kie a, tuale lingkungte hing khangin dep gawp ahi ziehin ga a ga zo sih hi. 8Khaici dangte lei hoina munah kie-in a kungte po-in khanglien a, a za zakhat, a za sawmguh, a za sawmthumin a ga hi. 9Ama in, “Zah nading bil nei poma in za taheh,” a ci hi.

Thugentena’ Deina

(Mat 13:10-17; Luk 8:9-10)

10Ama tanga a op laitahin ama kimvela a omte le nuazui sawm le nite in tua a thugentenate a dong uhi. 11Ama in a kung vuah, “Na tung vuah Pasien’ manggam thusimte#4:11 Ahi sihle “thu thuhpite “ theitheina ang kipieh vangin a pulama omte tungah na zosie thugentena tawh kigen hi. 12Azieh pen,

‘Amate in enen napi a mu thei lo nading,

ngaingai napi a tel thei lo nading,

amate kihei-in a mawna uh

a kimaisah lo nading,’ ahi hi,” a ci hi.#Isa 6:9-10

13Tuale ama in amate kungah, “Tami thugentena na thei sih uh amah? Tua ahile thugentena zosie bang na ci thei ta ding uh ahei? 14Khaici vawpa in thu a vaw hi. 15Lamdunga kivawte tam bang mite ahi hi: Amate in a zah uh ciengin thakhathu-tin Satan pei-in amate sunga kivawsa tua thu a lahpieh hi. 16Tuale suong tamna lei lahah a kivawte tam bang mite ahi hi: Amate in thu a zah behun lungdam tahin a sang pai uhi. 17Ahi vangin amate zung hla loin bakhat sung beh hing zo a, tua thu ziehin lungkhamna le bawlsietna a thuoh uh ciengin a puakia pai uhi. 18Adang ling lahah a kivawte pen tam bang mite ahi hi: 19Leitung lunghimawnate le hau nopnate in tua thute depgawp ahi ziehin bangma ga a nei sih uhi. 20Lei hoina munah a kivawte tam bang mite ahi hi: Amate in thu a zah ciengun pom pai-in a za zakhat, a za sawmguh, a za sawmthum a ga mite ahi hi,” a ci hi.

Law Kikhu Meivah

(Luk 8:16-18)

21Ama in amate kungah, “Meivah a tunna-ah tung loin, lawkhu ding po ahi sihle lupna nei lah po a koi dinga ang kitawi amah?#Mat 5:15; Luk 11:33 22Azieh pen pholah dingte simlo phuoldap ding bangma a om sih a, theisah dingte simlo bangma thusim zong a om sih hi.#Mat 10:26; Luk 12:2 23Zah nading bil nei poma in za ta uheh!” a ci hi. 24Ama in amate kungah, “Na thu zahte uh limtahin ngaisun un; na pieh za ma uh na ngakia ding vua, a tamzaw ang kipiehbe lai ding hi.#Mat 7:2; Luk 6:38 25Bangzieh ahei cile a neite kipiehbe ding hi; bangma a nei lote tung panin a neisun nangawn uh kilahpieh ding hi,” a ci hi.#Mat 13:12; 25:29; Luk 19:26

A Khang Khaici Thugentena

26Ama in, “Pasien’ manggam pen mi khat in lei lahah a the khaici tawh kibang hi. 27Sun le zanin kimu zel tho zel a, tua a khaici po-in na khang a, ama in bangci khan ci thu a thei sih hi. 28Leitang in ama thu-in ga a gasah a, a masa penin a kung, tua zaw ciengin a vui, tua zaw ciengin a vui sungah a tah a piengsah hi. 29Ahi vangin bu a min ciengin anlah hun tung ta ahi ziehin ama in thakhatin a phieukawi tawh pei-in a at hi,” a ci hi.#Joel 3:13

Ankam Tang Thugentena

(Mat 13:31-32; Luk 13:18-19)

30Ama in, “Pasien’ manggam pen bang tawh tekahin, bang thugentena zangin gen ding i hi ahei? 31Tua pen ankam tang tawh kibang hi, lei lahah a kivaw laitahin leitunga om khaici lah panin a neupen ahi hi; 32hizongle a kivaw ciengin ang khanglien a, ankung zosie lahah a golpen ang suoh hi, tuale a ba golpite ang zam a, vate in a hlim nei-ah bu a bawl uhi,” ci-in a gen leuleu hi.

Thugentena a Zahna

33Ama in tam bang thugentena tampi tah zangin amate thuhil a, a ngai zaw za cieng uh thu a gen hi. 34Ama in thugentena lo tawh amate tungah thu gen lo a, hinanle a nuazuite kungah a tuomin thu zosie a hilcien hi.

Jesu in Huipi Daisah

(Mat 8:23-27; Luk 8:22-25)

35Khumni nitah lam ciengin ama in amate kungah, “Tuipi kantanin galkhat lamah pei vai,” a ci hi. 36Tuale amate in mihonpite nuasie-in ama’ na tuonnasa gunkuong tungah tuongtonin a peipi uhi. Ama tawh gunkuong dangte zong a om hi. 37Huipi le guo kithuo nasie tahin lang a, tuihuol in gunkuong sat gawpin gunkuong sungah tui dimlet ta hi. 38Ama ahile gunkuong nua lamah tangkham khamin a kimu hi; tuale amate in ama phongin, “Siepa aw, ka manthai ding uh khawh ei sa lo na mah?” a ci uhi. 39Ama zong tho-in huipi kungah, “Lang nawn sin! ci-in hosie a, tuipi kungah, “Dai dide in!” a ci hi. Tua ciengin huilang khawlin a dai dide pai hi. 40Ama in amate kungah, “Bang dinga zau na hi uh ahei? Upna na nei nai sih uh amah?” a ci hi. 41Amate in lamdang sa-in khatlekhat a kiho vua, “Huipi le tuipite nangawn in a thu a mang valongin, tua ahile tampa koi ahi diei?” a kici uhi.

Currently Selected:

MARK 4: ZBOTF01

Highlight

Copy