MARK 3

Khut Langkhat Si Mipa

(Mat 12:9-14; Luk 6:6-11)

1Kikhopna inn sungah ama lutkia a, khum sungah a khut langkhat si mi khat na om hi. 2Amate in ama a mawmat thei nadingun sabbath ni-in tua pa ang damsah poma ei mah, ci-in a buhdap uhi. 3Tuale ama in a khut langkhat sipa kungah, “A mailamah hing pei in,” a ci hi. 4Tua ciengin ama in amate kungah, “Sabbath ni-in a pha bawl ding le a sie bawl ding, mihing hinna hutdam ding le mi tha ding koi pen thukham tawh a kituoh ei?” a ci hi. Ahi vangin amate a sip dide uhi. 5Ama in lungthah mai tawh amate a en kawikawi hi; a lungtang uh a khauh ziehin ama da mama a, tua mipa kungah, “Na khut zah vawi,” a ci hi. Ama in a khut a zah leh a khut a dam pai hi. 6Pharisee-te pei-in ama a tha thei nadingun Herod pawlte tawh thakhatin a kikum pai uhi.

Tuipi Gei-a Mihonpite

(Mat 12:15-21)

7A nuazuite tawh tuipi lamah Jesu a kihem dawh a, Galilee gam panin mihon tampite in ama a zui uhi; 8ama’ nasepna zosie a zah ciengun Judea, Jerusalem, Idumea, Jordan galkhat, le Tyre le Sidon kima gamte panin mihon tampitah in ama kungah a pei uhi. 9Mipite a tam seng ziehin a nawh gawp khah lo nadingin gunkuong khat a baisa-a a koi nadingun ama in a nuazuite kungah a gen hi. 10Ama in cina tampi damsah zo ahi ziehin natna nei zosie in ama a thamkhah thei nadingun ama lam a neh vapual uhi.#Mrk 4:1; Luk 5:1-3 11Hlagau buate in ama a mu popo ciengun a mai-ah khupbawhin, “Nang Pasien Tapa na hi hi!” ci-in a kiko uhi. 12Ahi vangin ama koi ahei, ci mi a theisah lo nadingun khautahin amate thu a vaihlah hi.

Jesu in Nuazui Sawm le Nite Teel

(Mat 10:1-4; Luk 6:12-16)

13Muoltungah ama kato a, ama in a dei teng a kungah hlanin, tuale amate in zong ama a zuon uhi. 14Tuale ama in a sawltahpite ci-in a minvaw,#3:14 Adang tang laibute ah “sawltahpite ci-in zong minvaw a” ci om lo hi. mi sawm le nite teel a, amate pen a kithuopi ding, 15le dawite hawlkhiet nading thuneina nei ding ahi uhi. 16Tuaci’n ama in a teel mi sawm le nite:#3:16 Adang tang laibute ah “ama in a teel mi sawm le nite” ci om lo hi. Simon (Peter ci-in a minvaw pa); 17Zebedee’ tapa James le a naupa John (Vanging Tapate a cinopna Boanerges ci-in a minvawte); 18Andrew, Philip, Bartholomew, Matthew, Thomas, Alphaeus’ tapa James, Thaddaeus, Canaan mi Simon, 19le ama a lehehpa Judas Iscariot-te ahi uhi.

Jesu le Beelzebul

(Mat 12:22-32; Luk 11:14-23; 12:10)

Tua ciengin ama inn ah a pei hi; 20tuale mihonpite a kikhawmkia vua, tuaci’n amate in an nangawn a ne thei ta sih uhi. 21Mite in, “Ama a maw ahi ta hi,” ci thu a innkuonpite in a zah ciengun ama a kham dingin a pei uhi. 22Jerusalem pana a peisuh thukham hil siete in, “Ama pen Beelzebul in a mat ahi a, dawite’ mangpa suonga dawite a deldawh hi bo,” a ci uhi.#Mat 9:34; 10:25 23Tuale ama kungah amate hlan a, ama in thugentena zangin thuhil a, “Bangci bangin Satan in Satan deldawh thei ding ahei? 24Gam khat ama le ama kikhenthangin kido leh tua gam a kip zo sih ding hi. 25Innkuon khat ama le ama kikhenthangin kido leh tua innkuon zong a kip zo sih ding hi. 26Satan ama le ama kido-in kikhenthang leh kip zo lo ding a, a manthai hun a tung zo ahi ta hi. 27Hinanle mi thahatpa lep-ia masa lopi-in koima in mi thahtapa’ inn sungah lutin a neisa teng a lahpieh thei sih ding hi; tua cieng behin a inn sung a bulu thei pan ding hi.

28“A tahtah a kang ci-in, mite’ mawna le Pasien a gensietna popo uh kimaisah ding hi; 29ahi vangin Hlagau Siengtho a gensie poma a mawna uh kimaisah zo lo ding a, kumtawnin maw nei ahi ding hi,” a ci hi.#Luk 12:10 30Azieh pen amate in, “Ama hlabua nei ahi hi,” a ci uhi.

Jesu’ Unau Tahtahte

(Mat 12:46-50; Luk 8:19-21)

31Tua ciengin a nu le a naute a tung uhi; amate inn pulamah dingin ama hlan ding mi a sawl uhi. 32Ama kimvelah mihonpi a to uhi; tuale amate in ama kungah, “Nang ang hlan dingin na nu, na sanggam pasalte le na sanggam numeite#3:32 Adang tang laibute ah “sanggam numeite” ci om lo hi. a pulamah ding uhi,” a ci uhi. 33Ama in, “Ka nu le ka sanggamte i ci koite ahiei?” ci-in a dawng hi. 34Tuale ama kimvela a tote enin ama in, “Ka nu le ka sanggamte tanah a om uhi! 35Ka pa’ deina banga a gamta mi poma ka sanggam pasal, ka sanggam numei le ka nu ahi uhi,” a ci hi.

Currently Selected:

MARK 3: ZBOTF01

Highlight

Copy