MARK 1

Baptize-pa John Thugenna

(Mat 3:1-12; Luk 3:1-20; Jhn 1:19-28)

1Pasien Tapa#1:1 Adang tang laibute ah “Pasien Tapa” ci om lo hi. Jesu Khris’ lungdamna thu a kipatna tam bang ahi hi.

2Kamsang Isaiah#1:2 Adang tang laibute ah “kamsangte laibu sungah” ci-in kigiel hi. Laibu sunga a kigiel bangin,

“En in, na lampi a siel dingin na mai-ah

ka kamtaipa ka sawl hi;#Mal 3:1

3gamlahah mi khat tam bangin kiko hi:

‘Topa pei nading lampi siel unlen,

ama’ lampi na tangsah un,’ ci hi,” a ci hi.#Isa 40:3

4Gamlahah baptize-pa John kihil a, mawna maisah nading kisiakiana tawh kisai baptize-na thu hil hi. 5Judea gam buppi le Jerusalem-a mi zosie ama kungah pei-in a mawnate uh a pulah vua, tuaci’n Jordan gun sungah a ki-baptize uhi. 6Tu-in John in kala-oh mul tawh a kigan puon sil a, a kawngah savun kawnggah gahin kauphe le khuoizu-in a kiva hi.#2Kum 1:8 7Ama in, “Ka nua-a ang pei ding pa pen kei sangin vanglien zawtham a, kunin a kedap khaute sut ding nangawnin ka kilawm sih hi. 8Keima in tui tawh note kang baptize hi; hizongle ama in Hlagau Siengtho tawh note ang baptize ding hi,” a ci hi.

Jesu a Ki-Baptizena

(Mat 3:13-17; Luk 3:21-22; Jhn 1:29-34)

9Khum hun lai-in Galilee gam Nazareth khuo panin Jesu pei-in John in Jordan gunah a baptize hi. 10Tui sung panin a thawto laitahin vantung kiphalsuo a mu a, ama tungah vakhu bangin Hlagau Siengtho a kumsuh hi. 11Vantung panin aw khat ging a, “Nang pen kang it mama ka Tapa na hi hi; nang tungah ka lungkim mama hi,” a ci hi.#Pien 22:2; Late 2:7; Isa 42:1; Mat 3:17; 12:18; Mrk 9:7; Luk 3:22

Jesu Kize-etna

(Mat 4:1-11; Luk 4:1-13)

12Tuale thakhatthu-in Hlagau Siengtho in ama senel gamah a sawl pai hi. 13Senel gam sungah ni sawmli sung om a, Satan in ama a ze-et hi; tuale gamsate tawh omton a, vantung mite in ama kem hi.

Galilee ah Nasep a Kipatna

(Mat 4:12-17; Luk 4:14-15)

14John a kimat zaw ciengin Galilee gamah Jesu pei-in Pasien#1:14 Adang tang laibute ah “kumpi gam” ci-in kigiel hi. lungdamna thutha tangko a, 15tuale ama in, “A hun ang tung ta a, Pasien’ manggam ang nai ta hi; kisiakia unlen lungdamna thu tha um un,” a ci hi.#Mat 3:2

Jesu in Nuazui Masate a Hlatna

(Mat 4:18-22; Luk 5:1-11)

16Galilee Tuipi dung zui-in Jesu a pei laitahin Simon le a naupa Andrew, tui sungah len a khu laitah uh a mu hi, azieh pen ama gel pen ngabengte ahi uhi. 17Tuale Jesu in ama gel kungah, “Keima ei zui un, tua hile mi mante kang suohsah ding hi,” a ci hi. 18Ama gel in zong thakhatin a len uh nuasie-in ama a zui pai uhi. 19Bakhat a pei zaw ciengin ama in gunkuong sunga len phaw-a a om Zebedee’ tapa James le a sanggampa John a mu hi. 20Ama in thakhatin ama gel hlan a, ama gel in zong a pa uh Zebedee le a thacielte uh gunkuong tawh nuasie-in ama a zui pai uhi.

Hlabua Vei Mipa

(Luk 4:31-37)

21Capernaum khuo ah amate a pei uhi; tuale sabbath ni a tun ciengin kikhopna inn sungah ama lutin thu a hil hi. 22Amate in ama’ thuhilna lamdang a sa uhi, azieh pen ama in thukham hil siete bang hi loin thuneipa khat bangin thu hil hi.#Mat 7:28-29 23Tua laitahin a kikhopna inn vuah hlabua in a mat mi khat om a, 24“Nazareth mi Jesu aw, nang le ko bang kisai i hei? Ko ei susie dinga ang pei na hi amah? Pasien’ Mi Siengtho na hi lam ka thei hi,” ci-in a kiko hi. 25Ahi vangin Jesu in ama ngelawt a, “Ham sin, tampa sung panin pusuoh in,” a ci hi. 26Tua hlabua in mipa kongkawsah a, a aw nei za tawh awngin ama sung panin a pusuoh hi. 27Amate in a unpi-un lamdang a sa vua, “Tam thu bang hi poma ahei? Thuneina tawh a kigen thuhilna tha khat ahi hi! Ama in thu pie po leh hlabuate nangawn in mang na lai uhi,” ci-in khatlekhat a kidong uhi. 28Thakhatthu-in Galilee gam kimvel zosie ah a minthanna a kizel pai hi.

Simon’ Innah Jesu in Mi Tampi Damsah

(Mat 8:14-15; Luk 4:38-41)

29Amate in kikhopna inn a nuasie behun Simon le Andrew-te inn ah James le John tawh a lut uhi. 30Simon’ sungnu cithuo-in lupmun tung ngahin om a, tuale ama kungah tua nu thu thakhatin a gen pai uhi. 31Ama pei-in a khut tawh tua nu kai-in a phongto hi. Tua ciengin a cithuo natna dam a, zindo a kipan pai hi.

32Khumi nitah, nitum zaw ciengin amate in cina zosie le dawivei zosie ama kungah a peipi uhi. 33Tuale a khuozangpi-un kotkhah gei-ah a kikhawm uhi. 34Ama in natna tuomtuom a vei cina tampite damsah a, dawi tampitah a notmang hi; dawite in a thei ziehin ama in a ham ding uh a phal sih hi.

Galilee-ah Thugen dinga Khuolzinna

(Luk 4:42-44)

35Zingmawng khuova masangin gamdaina munah ama pei-in tuanah thu a ngen hi. 36Simon le a guolte in ama a sui uhi. 37Ama a mu ciengun amate in, “Mi zosie in ang sui uhi,” a ci uhi. 38Ama in, “Tam khuoveng tengah pei vai, tuate lahah zong thu ka gen ding hi; azieh pen tami sem dinga ang pei ka hi hi,” a ci hi. 39Galilee gam muncin tengah ama zinin a kikhopna uh innte sungah thu genin dawite a notmang hi.#Mat 4:23; 9:35

Jesu in Miphah Khat Damsah

(Mat 8:1-4; Luk 5:12-16)

40Miphah#1:40 “miphah” le “phah natna” ci kammal in natna tuomtuomte a genna zong hi thei hi. khat ama kungah pei-in khupdin#1:40 Adang tang laibute ah “khupdin” ci om lo hi. a, “Nei damsah nop po leh nei damsah thei hi,” ci-in a thum hi. 41Jesu in hepihuoisa-in#1:41 Adang tang laibute ah “lungthah” ci-in kigiel hi. a khut zahin tham a, ama kungah, “Kang damsah nuom hi. Dam pai in!” a ci hi. 42Thakhatin a phahnatna in ama nuasie-in a dam pai hi. 43Khautahin ama thu a hilkhol zaw ciengin thakhatin peisah pai a, 44ama kungah, “Tami thu koima kungah gen malmal sin; ahi vangin pei-in siempu pa kungah va kilah ta’nlen amate tungah teci ahi dingin Moses thupieh bangin na damna ziehin biehna pie in,” a ci hi.#Siem 14:1-32 45Hizongle ama pei-in a genthang kawikawi hi. Tua ahi ziehin khuopi sungah Jesu a langtangin lut thei ta loin khuo pulam gamlahah a om hi; hizongle ama kungah mun zosie panin mite pei veve hi.

Currently Selected:

MARK 1: ZBOTF01

Highlight

Copy