MATTHEW 28

Jesu’ Thawkiana

(Mrk 16:1-8; Luk 24:1-12; Jhn 20:1-10)

1Sabbath ni zaw, nipi kal khat sunga ni masa pen ni, phalvah hunin Mary Magdalene le adang Mary-te han vil dingin a pei uhi. 2Tuale thakhatthu-in zil nahpi-in a kiling hi; bangzieh ahei cile vantung panin Topa’ vantungmi khat kumsuh a, hankhuh suongpi liamang dawhin a tungah a to hi. 3Ama’ mel pen tunphe tawh kibang a, a puonte vua bangin a ngo hi. 4Han cingte in ama a giin ziehun citunin a sibup uhi. 5Ahi vangin tua vantungmi in numeite kungah, “Zau sih un; singlamte tunga kikhai Jesu a sui na hi lam uh ka thei hi. 6Tam tahah ama om nawn lo hi; azieh pen a gensa bangin ama tho zo hi. Hing pei unlen ama#28:6 Adang tang laibute ah “Topa” kibelap hi. a kisielna mun hing en un. 7Tua ciengin mallang tahin pei unlen a nuazuite kungah, ‘Misite lah panin#28:7 Adang tang laibute ah “Misite lah pan” ci om lo hi. ama thokia zo a, Galilee gama na masang vuah a pei tahpi ding hi; tua munah ama na mu ding uhi,’ ci-in va gen ta un. Note dinga kang thupuoh tami ahi hi,” a ci hi. 8Tuaci’n amate in zau le thanuom kawmin thakhatin han nuasie-in a nuazuite kungah a gen dingin a tai pai uhi. 9Jesu in thakhatin amate na lamdot a, “Na dam vuoi mah!”a ci hi. Tuale amate a kungah a pei vua, a keng kawipomin a bie uhi. 10Tua ciengin Jesu in amate kungah, “Zau sih un; pei unlen Galilee-a haw dingin ka sanggamte kungah va gen ta un; amate in khum munah kei ei mu ding uhi,” a ci hi.

Hancingte Thupuoh

11Amate a pei laitahin khuopi sungah hancingte pawlkhat a pei vua, siempu liente kungah a thupieng zosie a gen uhi. 12Siempu liente#28:12 Gk “amate” le upate a kisuhtuo zaw uh ciengin, galkapte sum tampi pieh dingin gelna khat a nei vua, 13“Amate kungah, ‘Zanlai ka kimut laitahun a nuazuite hing pei-in a luong a gudap ta uhi,’ ci-in gen un. 14Gam uhpa in tam thu a za khah tah leh zong ama ka lungkimsah ding vua, no kang buoisah sih ding uhi,” a ci uhi. 15Tuaci’n amate in a sumte a sang vua, tuale a kisawl bangin amate a gamta uhi. Tami tangthu pen Judah mite lahah tuni dongin kigen lai hi.

Nuazuite Sawlkhietna

16Tua ciengin nuazui sawm le khatte zong, Jesu in amate kunga a gensa bangin Galilee gam muol tungah a pei uhi.#Mat 26:32; Mrk 14:28 17Amate in ama a mu ciengun a bie uhi; ahi vangin pawlkhat a tahsang sih uhi. 18Tuale Jesu pei-in amate kungah, “Vantung le leitunga thuneina zosie kei tungah ei kipie zo ta hi. 19Tua ahi ziehin note pei-in minam zosie ka nuazui suohsah unlen, Pa, Tapa, le Hlagau Siengtho’ min tawh na baptize un.#Sawl 1:8 20Tua ciengin kang thupieh zosie a zui nadingun amate na hil un. Tuale hun tawp dongin keima in note kang ompi zing ding ahi lam phawh un,” a ci hi.#28:20 Adang tang laibute ah “Amen” kibelap

Currently Selected:

MATTHEW 28: ZBOTF01

Highlight

Copy