ၥ မိ 22

ယွၩမၪလူၬစအၫဘြဟၫ့မိလုထၪ့စအံစၭ.

1ဆၧမၩအၥၭ လၧဆၧလဖၪနီၪအလးခဲၫ့တၭ, ယွၩ မၩခွါစအၫဘြဟၫ့တၭ, စံၭဝ့ၫ, စအၫဘြဟၫ့ဧ့ၬ တၭ 2အဝ့ၫဒၪစံၭ, ယအီၪထီးယီၩလီၫ.- တၭအဝ့ၫဒၪစံၭဝ့ၫ, မၩန့နဖိၪခွၫ, နဖိၪခွၫလဂၩဎးစအံစၭ လၧနအဲၪဝ့ၫနီၪ, လ့ၩလၧခးမိၫရဲအၫတၭ, လုထၪ့အဝ့ၫထီးနီၪလၧဆၧ လုမ့ၪအဂး, လၧခိၪလီၩ့လဖျိၪ့အလီၩ့ လၧခိၪလီၩ့အ ကျၩလၧယမိလီၩဘၪနၧၩ နီၪဆံၭ.

3လၧဂီၩလခီၫနီၪ စအၫဘြဟၫ့ဂဲထုၪ့ဂီၩဂီၩတၭ,မၩ ထၪ့အကၥ့ၪယီၩ့တၭ, မၩန့အခ့ၫအၡၩနံၫဂၩ ဒဲအဖိၪ ခွၫစအံစၭတၭ, ဖၭန့ၥံၪ့မုလၧဆၧလုမ့ၪအဂးနီၪ ဂဲထုၪ့ 4လ့ၩစိၩဝ့ၫလၧအလး လၧယွၩလီၩဘၪဝဲၩဝ့ၫလီၫ. တၭ ၥၧၫ့နံၩလနံၩနီၪ, စအၫဘြဟၫ့ကျဲၪ့ထၪ့အမ့ၬတၭ, ဒၪ 5ဘၪအလးနီၪ အီၪယဲၩ့ဝ့ၫဒၪလီၫ.- တၭစအၫဘြဟၫ့ စံၭအခ့ၫအၡၩလဖၪ, နၥံၪဝ့ၫဒဲကၥ့ၪယီၩ့ အီၪထီးယီၩ ဘီၪ, တၭယဝ့ၫဒၪ ဒဲဖိၪၥၪယီၩ, ပမိလ့ၩ လၧယၫနီၪ ဘၩဆၧဂီၩ့တၭ, ပမိဂဲၫထဲၩ့ထဲၩ့ လၧနၥံၪအအီၪလီၫ. 6စအၫဘြဟၫ့မၩန့ၥံၪ့မု လၧဆၧလုမ့ၪအဂးတၭ, အီၪ က့ၪထၪ့ဝ့ၫ လၧအဖိၪခွၫစအံစၭအလီၩ့တၭ, မၩန့မ့ၪဒဲ ဒီၩလဘံၪ့ လၧအစူၪဖၧၩ့တၭ, လ့ၩဝ့ၫနံၫဂၩလူၬလစီၪ့ 7ဎးလီၫ.- စအံစၭစံၭအဖါအၫဘြဟၫ့တၭ, စံၭဝ့ၫဒၪ, ယဖါဧ့, တၭအဝ့ၫဒၪစံၭ, ယဖိၪခွၫဧ့, ယအီၪထီးယီၩ လီၫ. တၭအဝ့ၫနီၪစံၭ, ယိခွါ, မ့ၪဒဲၥံၪ့မုနီၪ, အ့ၪမွဲၥိၪ 8ဖိၪလၧဆၧလုမ့ၪအဂးနီၪ, မွဲအအီၪခီၫခီၫလဲၪ.- တၭ စအၫဘြဟၫ့စံၭဝ့ၫဒၪ, ယဖိၪခွၫဧ့, ယွၩမိတဲၩ့ဝဲၩဒၪ ၥိၪဖိၪလၧဆၧလုမ့ၪအဂးလီၫ. တၭအဝ့ၫၥံၪ လ့ၩနံၫ ဂၩလူၬလစီၪ့ဎးလီၫ.

9တၭအဝ့ၫၥံၪလ့ၩထီၩ့ လၧအလးလၧယွၩစံၭဝဲၩဝ့ၫ နီၪ, စအၫဘြဟၫ့မၩထၪ့ ဆၧလုအလးနီၪ တဲၩ့ဝဲၩၥံၪ့ မုတၭ, စၧၩ့ထၬအဖိၪခွၫ စအံစၭတၭ, အီၪက့ၪထၪ့ဝ့ၫ 10လၧဆၧလုအလး လၧၥံၪ့မုအဖၫ့ခိၪလီၫ.- စအၫဘြဟၫ့ မၩန့ဒီၩလဘံၪ့, ယၩ့ထၪ့အစူၪဘဲၫၥိၭ အမိမၩၥံၫအ 11ဖိၪခွၫလီၫ.- ယဟိဝၩအၥီၫ့ ကိၭလၩ့လၧမူၭခိၪတၭ,စံၭ ဝ့ၫဒၪ, စအၫဘြဟၫ့ဧ့ၬ စအၫဘြဟၫ့ဧ့ၬ တၭအဝ့ၫဒၪ 12စံၭ,ယအီၪထီးယီၩလီၫ.- တၭအဆၧစံၭဝ့ၫ, ထီးယၩ့ ထၪ့နစူၪ လၧဖိၪၥၪနီၪအလီၩ့လဂ့ၩ, ထီးမၩအဝ့ၫလၧ ဆၧနးမံၩ့လဂ့ၩ, အဂဲးဘဲၫယီၩ ဘိၩ့နဲၪ့ယီၩယၥ့ၪယၫ လၧနၥၭမဲၪယွၩတၭ, ယမၩန့နဖိၪခွၫ, နဖိၪခွၫလဂၩ ဎးနီၪ,နလယၭဘၪလီၫ.

13စအၫဘြဟၫ့ကျဲၪ့ထၪ့အမ့ၬ, ယိဆၧတၭ,ယိခွါ,ၥိၪ ဖၫလဒုၩအီၪ လၧအလးခဲၫ့အနိၩ့ ဘၪကွၭလၧဆၧၡိၬ ကျၩလီၫ. တၭစအၫဘြဟၫ့ လ့ၩမၩန့ၥိၪဖၫလဒုၩနီၪလု ထၪ့ဝ့ၫလၧဆၧလုမ့ၪအဂး, လၧအဖိၪခွၫအလးလီၫ. 14တၭဆၧအလးနီၪ စအၫဘြဟၫ့ကိၭဝ့ၫအမံၩ့ လၧယဟိ ဝၩယံရၫ, ဘဲၫၦစံၭ ထီးမုဆၫလနံၩယီၩအၥိၭ, လၧ ယဟိဝၩအခိၪလီၩ့ လဖျိၪ့အလီၩ့နီၪ ဆၧမိတဲၩ့ဝဲၩဝ့ၫ ဒၪလီၫ.

15တၭယဟိဝၩအၥီၫ့ကိၭလၩ့ စအၫဘြဟၫ့နီၪ လၧ 16မူၭခိၪနံၫဘျၩ့လဘျၩ့လီၫ.- စံၭဝ့ၫဒၪ, ယၧၩယဟိဝၩ ယီၩ,ယဆိၪလၩ့ယၥၭတၭ, စံၭမွဲနမၩဆၧယီၩလမံၩ့ 17တၭ,လဖီၪ့ထၬဘၪနဖိၪခွၫ, နဖိၪခွၫလဂၩဎးနီၪ,- ယမိ ဆိၪဂ့ၩနၧၩဖၭဒိၪတၭ, ယမိမၩအၪထၪ့ နချံၫနၥၪအၪ အၪလ့ၬဘဲၫၡၪၥံၪ လၧမူၭခိၪအၥိၭနီၪ, ဘဲၫမ့ၭအဖျိၪ့ လၧအအီၪဝ့ၫ လၧမၫဆမံၭနဲၩ့အၥိၭနီၪလီၫ. တၭနချံၫ 18နၥၪမိန့ဘၪအဒုၪအဒၩ အတရၫ့လီၫ.- မွဲလၧနခိၭနၪယ လူအကၠီၩ့တၭ, ကယဲၦၡၩလၧဂၪ့ခိၪချိၫ့ လဆၨၩလါ လါနီၪ မိဘၪဆၧဆိၪဂ့ၩ လၧနချံၫနၥၪအဖၧၩ့လီၫ.

19စအၫဘြဟၫ့ထဲၩ့ထဲၩ့ လၧအခ့ၫအၡၩအအီၪနီၪအ ဝ့ၫၥံၪဂဲထုၪ့တၭ, လ့ၩဝ့ၫလစီၪ့ဎး လၧဘံအၧၫၡံၫဘၫ တၭ,စအၫဘြဟၫ့အီၪဝ့ၫ လၧဘံအၧၫၡံၫဘၫလီၫ.

စနၫဟီၫအဆၨၩအဆၬအဂဲး

20ဆၧမၩအၥၭလၧဆၧလဖၪနီၪအလးခဲၫ့, ၦစံၭစအၫ ဘြဟၫ့တၭ,စံၭဝ့ၫဒၪ, ယိခွါ, နးမံလကၫအီၪဖျဲၪန့အ 21ဖိၪလဖၪလၧနထၧၫ့ဖုဝဲ စနၫဟီၫအဂးနီၪဆ့လီၫ.- စဟၧ ဇၭအဝဲၡါ, ဒဲအဖုစဘၧဇၭ ဒဲစအၫရၫ့အဖါ, စက့ၫ 22မၠႃၫအ့လၭ.- ဒဲစခံစ့ၭ, ဒဲစဟၫဇိၫ, ဒဲစပံလဒၭ, ဒဲစယံ 23ဒလၭ, ဒဲစဘၥူၫအ့လၭ,- တၭစဘၥူၫအ့လၭနီၪထၪ့ ဖိၪနးရဘ့ၭကၫနီၪလီၫ. ၦဎိၭဂၩလဂၩနီၪ, နးမံလကၫ အီၪဖျဲၪန့စအၫဘြဟၫ့ အထၧၫ့ဖုဝဲ စနၫဟီၫအဂးလီၫ. 24တၭအၥံၪမၫအမံၩ့ နးရူမၫအီၪဖျဲၪန့ စတံဘၧၫ, ဒဲစဂ့ ဟၫ့,ဒဲစၥၫဟၭ, ဒဲစမၫအခၫဆ့လီၫ.

Currently Selected:

ၥ မိ 22: pwokyn2

Highlight

Copy