Mahte 2

Shaldungc Mungx wawc Wuinz waz

(Mat 1:18-25)

1Herod hokhvmx pat, Yuda mungx Betlehem ghaq nuex Yesu jawx kaz tueq. Kvkaq yauk lox nuex dvyx, shaldungc mungx wawc phaqjic vhttax jix miq wvyvmc Yerusalem nuex httuiuc kaz vtueq, 2vkhoc wiz tueq, “Yuda Hokhvmx yaungc tvkoc jawx kaz tueq nox kuex m-yuq lac? Shaldungc mungx nuex vpiq ruiysuiyq dung tueq kuex nuiyshiq rueq khiz lvp vtueq, vpiq nawk palx kay nuiyshiq httuiuc kaz tiq,” ngoz tueq jungx tueq.#Yer 23:5; 9:9; Luk 19:38; Yoh 1:49

3Herod hokhvmx rueq kvruex lvmz kuex tay vtueq piq nuiyc Yerusalem miqsaz lotlaz thuinz phez yvp wuez tueq. 4Herod hokhvmx rueq shomc walaungx bix nuiyc Tvrac tvluingc waz hez lotlaz kuex tvtuimx gvl vtueq, “Mesia kuex mruex baung nuex lac jawx kaz tvnx?” ngoz tueq tsuinghez muex wiz tueq.

5Tsuingshiq rueq, “Yuda mungx Betlehem ghaq nuex jawx kaz tuex. Yvmx khoc lac ngoz ruiux lec shvmmax vkhoc ngoz tueq wuiyq shec tueq,

6‘Yuda mungx Betlehem ghaq lex,

mnoz kuex Yuda mungx ghaq yungx htenc htauk nuex vruinx

pinhtumc yaungx tuiux rvmuq,

ngvy miqsaz Israel kuex remc lawc tvkoc walaungx washiz kuex,

mnoz kox wawc dung tuex,’” ngoz tueq jungx tueq.#Mik 5:2

7Kvkaq Herod rueq shaldungc mungx wawc taksux vhttax jix hez kuex vyumx maq gvl vtueq, ruiysuiyq dung tueq lvmz kuex tsuinghez kox tvsuip tv-phaungc wiz tueq. 8Kvruex yimaq piq rueq tsuinghez muex, “Nuimhez kaz vtueq nox kuex humc laz juing thuiyx waung kuinz, vpiq kuex humc ruiux lec ngaz muex muinz tvtay jungx wvnc luit, ngaz rueq muinz nawk palx kuy kay muex,” ngoz tueq jungx kuq ruiux Betlehem nuex tvwaung tueq.

9-10Kvkhoc rvtueq tsuinghez kaz wvnc vtueq, lvmx maq shaldungc mungx maq tsuinghez rueq khiz tueq ruiysuiyq kuex khiz yek vtueq tsuinghez pinhtumc kokez wuez tueq! Kvruex ruiysuiyq muinz tsuinghez mamax nuex kaz vtueq, nox httax yaq khuhtauk baung nuex kvpauk kaz tueq. 11Tsuinghez kuex kvruex yuimx kvyuq nyuip wvnc koq tueq, kvruex nox kuex vnyuiuz Mary rulc vdvmz nuex khiz vtueq, tsuinghez kuix tsvrung nuex bumx ruiux vpiq muex nawk palx wuez tueq. Miqmac khak kuex daz vtueq vpiq muex kuimshawx, loban nuiyc murra htenc maq yauk noalc kuq wuez tueq.

12Herod httax yaq lvmx maq yek muq tvkoc Tishox rueq maung nuex tsuinghez muex honc tvsvmc kuq ningkhvnc nuex, tsuinghez kuex lvmx vganc maq miqmac mungx nuex yek kaz tueq.

Ejip Mungx nuex Kvhttuiyq kaz tueq

13Tsuinghez waungc wvnc yix Taungjix vpiq kamx waz washiz kuex Yosep maung nuex kvkhic kaz vtueq, “Herod rueq nox kvruex thvy gay tvkoc thuiyx yaq. Kvkhoc rvtueq kvtenc kuiuz, nox nueyc saqnyuiuz kuex shvlx wvnc vtueq Ejip mungx nuex yuz wvnc kuiuz, ngaz rueq gvl mauk wawwawx kvyuq lawx httax kuiuz,” ngoz tueq jungx tueq.

14Kvkaq Yosep kvtenc vtueq nox nueyc saqnyuiuz kuex raungwvrx nuex Ejip mungx nuex shvlx wvnc ruiux, 15Herod thueyc kay nuex httuiuc laz kvruex mungx nuex dvyx httax tueq. Vruex kuex, “Isaz kuex Ejip mungx wawc ngaz rueq gvl tauk,” ngoz tueq shvmmax nuix maq Taungjix rueq vjungx kvjaz hungx wvnc laung nuex yaungx wvnc tueq lvmz rvtueq.#Hos 11:1

Nosaz Rulx Thvt tueq lvmz

16Shaldungc mungx wawc phaqjic vhttax jix hez rueq piq lauc gay shec tueq lvmz Herod rueq helc vtueq piq pinhtumc vthuinz khaq tueq. Kvkhoc rvtueq phaqjic vhttax jix hez kox wawc wisoz tuiuz tueq rulc rv-ngvlc ruiysuiyq khiz tueq vkhing kuex hesap lawc vtueq Betlehem nuiyc kvruex tvroz miqghaq htenc wawc rullungx wawc nueyc maq kaq kox miqwaz saz htenc kuex lotlaz thvy gay tvkoc nvr tueq. 17Vruex kuex shvmmax Yeremia rueq vjungx kvjaz tvhungx rvtueq:

18“Rama ghaq nuex pinhtumc khoarnyerx yaq kuex tay lvp tiq.

Rakhel kuex vsuiuz vsaz tvkoc khoar tueq;

tsuinghez thueyc kaz koq tueq sitenc yatenc kvjaz muinz tay roc muq,” ngoz tueq.#Yer 31:15

Ejip maq Yek waung tueq

19Herod thueyc kay yimaq, Taungjix raungkamx washiz Ejip mungx maq Yosep maung nuex tvkhic kaz vtueq, 20“Kvtenc kuiuz, nox nueyc saqnyuiuz kuex shvlx wvnc vtueq Israel mungx nuex yek waung kuiuz, yvmx khoc lac ngoz ruiux lec nox thvy dvnc jix waz kuex thueyc kaz shex,” ngoz tueq jungx tueq. 21Kvkaq Yosep kvtenc ruiux tsuingnueyc saqnyuiuz kuex shvlx vtueq Israel mungx nuex yek waung tueq.

22Yuq muinz Arkelau kuex vwaz Herod kvlayc Yuda mungx nuex hokhvmx yaungx yaq lvmz kuex piq rueq tay vtueq kvruex yuq waung khvmc muq. Kvmaq hulawx raungwvrx maung maq khic yek ningkhvnc nuex piq kuex Galile mungx nuex kvyenc wvnc vtueq, 23Nazaret ngoz yaq ghaq nuex yuimx vwuik maq raz tueq httax tueq. Kvkhoc rvtueq, “Vpiq ngoc Nazaret waz ngoz tueq ngoz shuex,” ngoz tueq shvmmax bix rueq vjungx kvjaz kuex hungx waung tueq.#Mak 1:24; Luk 2:39; Yoh 1:45

Currently Selected:

Mahte 2: HNOT01

Highlight

Copy