Luk̆a 24

Yeso Ğuraşen Edgitun

1Dolonişi maartani ndğas, mjaçxas gemʒ̆k̆uperis, oxorcalepek na xazires k̆vanape ezdes do mezareşa mendaxtes. 2Mezares na moturt̆u kva golangrineri z̆ires. 3Doloxe amaxtesşk̆ule Mance Yesoşi xura var az̆ires. 4Hentepe ham dulyaşeni goşaşeri dgirt̆esşi, na divals dolokunupe na dolokunan jur k̆oçi mutepeşi yanis eçkindes. 5Oxorcalepes aşkurines do ti mutepeşi gendrik̆es. K̆oçepek hentepes, “Şuri na gyudgin mitxani, ğurelepeşi doloxe muşeni gorumt?”-ya uʒ̆ves. 6“Hea hak va ren, edgitu. Tkvani k̆ala Galileas rt̆uşk̆ule na giʒ̆vespe gogaşinan; 7K̆oçişskiri k̆rimoni k̆oçepeşi xes niçinasen, st̆avros geiç̆k̆adinasen do masumani ndğas ğuraşen edgitasen.” 8Hem oras oxorcalepes Yesoşi nenape kogaşines.

9Mezareşen goiktes, Vit̆oarepes do majurani iri-xolos mteli hantepe dup̆aramites. 10Ham ambaepe Mağdaluri Maria, Yoana, Yak̆ovişi nana Maria do hantepe k̆ala na rt̆es majura oxorcalepek elçepes up̆aramitesdort̆un. 11Mara ham nenape elçepes obarbalu daʒ̆ones do oxorcalepes var aceres. 12Mara xolotina P̆et̆re eiselu do mezare k̆ele uk̆ap̆u. Gedruk̆u do doloxe amaʒ̆k̆eduşi ʒ̆it̆iaşen çkva mutu var az̆iru. Ham dulyaşen gak̆virdu do goşaşeri hekole igzalu.

Emauşi Gzas Jur Mamgurale

13Hem ndğas Yesoşi jur mamgurale, Yeruşalimişen sumeneçi isici ot̆k̆oçinu k̆onari mendra na ren Emau coxoni oput̆eşa ulurt̆es. 14Mamguralepek mteli na ivupe artikarti k̆ala ip̆aramitamt̆es. 15Hentepe ok̆ip̆aramitamt̆esşi Yeso komextu do hentepe k̆ala ogzalus kogyoç̆k̆u. 16Mara mot içinomt̆an-ya do tolepe mutepeşi komatvesdort̆un. 17Yesok, “Gzas artikarti k̆ala mu ok̆oburt?”-ya do k̆itxu.

Gemzuleri kododgites. 18Hentepeşen K̆leop̆a na coxons k̆oçik hemus, “Yeruşalimis ren do ham ndğalepes na ivupeşen ambai na var uğun k̆oçi ar si xvala rei?”-ya do k̆itxu.

19Yesok, “Muşi ambai?”-ya.

Hemus “Nazareturi Yesoşi ambaepe”-ya uʒ̆ves. “Hea Ğormotişi do mteli xalk̆işi ʒ̆oxle, dulya do nenate menceloni ambayoci rt̆u. 20P̆ap̆aşumçanepe do tişinerepe çkunik hea ğuraşi xukmi konuças-ya do valis komeçes, e do st̆avros kogyoç̆k̆adapes. 21Mara çku, İsraili na moşletinasen k̆oçi hea ren-ya memaşonert̆es. Çkvati koren, ham dulyape na ivuşen doni handğa masumani ndğa ren. 22Teni oxorcalepe çkunik gomoşaşes. Handğa, ordo ç̆umani mezareşa mendaxtes. 23Mara xura muşi var az̆iresşi çkunda komoxtes do ‘Melaikepe eʒ̆emaʒ̆ires, hentepek ‘Yeso skidun’-ya miʒ̆ves’-ya. 24Çkunepeşi mitxanepe mezareşa mendaxtes do oxorcalepek muç̆oti up̆aramites heşo z̆ires mezare. Mara Yeso var az̆ires.”

25Yesok hentepes haşo uʒ̆u: “Ç̆e uğnosepe, ambayocepe na giʒ̆vespeşeni mot var gamç̆venan? 26Xrist̆e hantepe nʒ̆orasert̆u do didoba muşişa amaxtasert̆u, heşo var aç̆ereburt̆ui?” 27Uk̆ule Mose do majura ambayocepeşen kogyoç̆k̆u do mteli ʒ̆k̆onda ç̆arapes, ti muşişeni na ç̆arunpe koxoʒ̆onapu.

28Na nulurt̆es oput̆es naxolesşi Yesok gza muşis noomssteri dovu. 29Mara hentepek, “Çkuni k̆ala kododgiti, ok̆olumcun, mjora dolulun”-ya do nokaçes. Haşote Yeso seris dodginuşeni hentepe k̆ala doloxe kamaxtu.

30Yesok hentepe k̆ala magidas kodoxeduşi kovali ezdu do ixvamu. Uk̆açxe kok̆ortu do hentepes komeçu. 31Hem oras hentepes tolepe koganʒ̆k̆es do Yeso içines. Mara hea tolepe mutepeşi ʒ̆oxle gondunu. 32E do hentepek “Gzas çkuni k̆ala ip̆aramitamt̆u do ʒ̆k̆onda ç̆arape moguramt̆esşi gurepe muç̆o gamomaç̆vet̆es”-ya artikartis uʒ̆omert̆es.

33Hem oras eiseles do Yeruşalimişa goiktes. Vit̆oarepe do hentepe k̆ala na renanpe ok̆ok̆oroberi koz̆ires. 34Hentepek “Mance çkuni mtinala ğuraşen edgitu, Simonis kaʒ̆iru”-ya zop̆ont̆es. 35Jur mamguralek, gzas na ivupe do kovali ok̆ortuşk̆ule Yeso muç̆o içines, hea dip̆aramites.

Yeso Vit̆oarepes Goʒ̆aʒ̆iren

36Hantepe ip̆aramitamt̆esşi Yeso moxtu do hentepe k̆ala kogoşadgitu. Hentepes “Misoba tkvani k̆ala ivas!”-ya uʒ̆u. 37Doşkurdes, şuri komoxtu daʒ̆ones do şkurinas kodololes. 38Yesok hentepes, “Mot goişaşert? Muşeni guris mutxanepe dolingonamt?”-ya. 39“Xepes, k̆uçxepes mendomoʒ̆k̆edit, aha ma bore! Xe memonʒ̆it do oxoʒ̆onaten. Şuris xorʒi do ili var aven, mara ma mz̆iromt, ma komiğun.”

40Hantepe tkuşk̆ule hentepes xe do k̆uçxepe muşi koʒ̆iru. 41Xelebate xolo var aceret̆es, goşaşeri mamguralepe muşis, “Tkva oç̆k̆omale mutu giğunani?”-ya do k̆itxu. 42Hemus aç̆ut̆a ç̆veri çxomi komeçes. 43Yesok çxomi yuç̆opu do mutepeşi ʒ̆oxle oç̆k̆omu.

44Uk̆açxe hentepes haşo uʒ̆u: “Ma tkvani k̆ala bort̆işk̆ule, Moseşi K̆anonepes, ambayocepeşi ç̆arapes do Psalmonişi kitabis çkimişeni na ç̆arunpe mteli ivasen-ma dogiʒ̆vitdort̆un.”

45Hemindoras ʒ̆k̆onda ç̆arapeşi oxoʒ̆onuşeni hentepes nosi kogunʒ̆k̆u. 46Xolo hentepes, “Haşo ç̆arun: Xrist̆ek nʒ̆orasen do masumani ndğas ğuraşen edgitasen; 47Yeruşalimişen gyoç̆k̆asen do mteli xalk̆epes, k̆rimapeşi oxat̆iruşeni hemuşi coxote Ğormotişa goktinu ivaizasen. 48Tkva ham ambaepeşi noz̆iremi ret. 49Mati baba çkimik na mikadu tkva megincğonaten. Mara tkva, jindolen na moxtasen menceli goikunatşakis noğas dodgitit”-ya uʒ̆u.

Yeso Ʒaşa Yulun

50Yesok hentepes, noğaşi gale, Vitaniaşakis mendionu. Xepe kezdu do hentepe doʒ̆k̆ondinu. 51Hentepe oʒ̆k̆ondinamt̆uşi, hentepeşen ok̆iʒ̆k̆u do ʒaşa keizdu. 52Mamguralepe muşi hemus axvames, dido xelineri Yeruşalimişa goiktes. 53P̆anda Oxvames dodgitut̆es do Ğormoti omʒkvamt̆es.

Currently Selected:

Luk̆a 24: LZZ

Highlight

Copy