လံာ်ယၡါယၤ 38
38
စီၤပၤဃံးစကံယၤအတၢ်ဆူးတၢ်ဆါ ဒီးအတၢ်အိၣ်ဆူၣ်အိၣ်ချ့ထီၣ်က့ၤ
(၂စီၤပၤ ၂၀:၁-၁၁; ၂ကွဲး. ၃၂:၂၄-၂၆)
1ဖဲတၢ်ဆၢကတီၢ်အံၤအဘၢၣ်ကဝီၤန့ၣ်, စီၤပၤဃံးစကံယၤဆါထီၣ် ဘူးတ့ၢ်မးကသံဝဲလီၤ. စီၤအၤမိာ်အဖိခွါဝံယၡါယၤလဲၤဆူအ အိၣ်ဒီးစံးဘၣ်အီၤ, “ယွၤစံးဘၣ်နၤဒ်သိးနကကတဲာ်ကတီၤတၢ်ခဲ လၢာ်လၢအဂ့ၢ်အဝီဒၣ်ဝဲလီၤ. အဂ့ၢ်ဒ်အံၤ, နတအိၣ်ဆူၣ်အိၣ်ချ့ထီၣ်က့ၤလၢၤဘၣ်. ကတဲာ်ကတီၤနသးလၢ နကသံတက့ၢ်.”
2စီၤဃံးစကံယၤဃၣ်ကွံာ်အမဲာ်ဆူတၢ်ဒူၣ်ဒီးဃ့ဘါထုကဖၣ်တၢ် လီၤ. 3“ယွၤဧၢ, သ့ၣ်နီၣ်ထီၣ်က့ၤလၢယမၤတ့ၢ်နတၢ်မၤလၢတၢ်ကလုၢ်တီ ဒီးတၢ်သူၣ်တီသးရၤအပူၤ, ဒီးထီဘိန့ၣ်ယကျဲးစၢးမၤတ့ၢ်တၢ်လၢနသးအိၣ်လၢယကမၤအီၤန့ၣ် တက့ၢ်.” ဝံၤဒီးအဝဲဟီၣ်နးနးကလဲာ်န့ၣ်လီၤ.
4အန့ၣ်ဒီး, ယွၤမၤလိာ်ဝံယၡါယၤ,
5ဒ်သိးအကလဲၤကဒါက့ၤဆူစီၤပၤဃံးစကံယၤအအိၣ်ဒီးစံးဘၣ် အီၤ, “ယၤ, ယွၤ, နပၢ်ဖးဒိၣ်စီၤဒၤဝံးအကစၢ်ယွၤ, နၢ်ဟူတ့ၢ်နတၢ်ထုကဖၣ်ဒီးထံၣ်တ့ၢ်နမဲာ်ထံမဲာ်နိတဖၣ်လီၤ. ယကပျဲနအိၣ်မူယံာ်ထီၣ်အါထီၣ်တဆံယဲၢ်နံၣ်လီၤ. 6ယကမၤပူၤဖျဲးနၤဒီးဝ့ၢ်ယရူၤၡလ့ၣ်အံၤလၢကီၢ်အၤၡူၢ်အစီၤပၤ ဖးဒိၣ်အစုပူၤ, ဒီးယကဒီဒၣ်အိၣ်ပှိၤဒံးဝ့ၢ်အံၤဆူညါန့ၣ်လီၤ.
7ယွၤကဟ့ၣ်နၤတၢ်အုၣ်သးအပနီၣ်တမံၤလၢအဝဲကတီဒီးအတၢ် အၢၣ်လီၤန့ၣ်လီၤ. 8ကွၢ်ကွၢ်, ယကဒုးက့ၤကဒါက့ၤတၢ်ကဒုလၢအတီၤတဖၣ်လၢအလဲၤ လီၤပူၤကွံာ်တ့ၢ်လၢစီၤအၤဃးအမုၢ်အနၣ်ရံၣ်အလိၤ, ကက့ၤကဒါက့ၤအတီၤဆံဆဲၣ်တီၤလီၤ.” ဒီးမုၢ်န့ၣ်က့ၤက့ၤကဒါက့ၤဆံဆဲၣ်တီၤလၢအလဲၤလီၤပူၤကွံာ် တ့ၢ်ဝဲလီၤ.
9ဖဲစီၤပၤဃံးစကံယၤဘျါက့ၤလၢအတၢ်ဆါဝံၤအလီၢ်ခံဒီး, အဝဲကွဲးထါစံးထီၣ်ပတြၢၤအံၤန့ၣ်လီၤ.
10ယဆိကမိၣ်တ့ၢ်လၢ, လၢတၢ်အိၣ်မူမုၢ်ထူၣ်အကတီၢ်န့ၣ်,
ယလဲၤလီၤတ့ၢ်ဆူပှၤသံတဖၣ်အကီၢ်ပူၤဒီးတအိၣ်မူဘၣ်လၢၤ ယတၢ်အိၣ်မူနီတစုဘၣ်န့ၣ်လီၤ.
11ယဆိကမိၣ်တ့ၢ်, လၢပှၤမူတဖၣ်အကီၢ်ပူၤအံၤ,
ယတထံၣ်ဘၣ်ကဒီးယွၤမ့ၢ်ဂ့ၤ,
ပှၤအမူတဂၤဂၤမ့ၢ်ဂ့ၤ, နီတစုလၢၤဘၣ်.
12ယတၢ်အိၣ်မူဘၣ်တၢ်မၤထီၣ်တဲာ်ကွံာ်အီၤဒီးကတၢၢ်ဝဲ,
လီၤဂာ်ဒ်ဒဲတဖျၢၣ်လၢဘၣ်တၢ်ဃိလီၤပှီၢ်ကွံာ်အီၤ
ဒီးတၢ်ကံးယာ်လၢဘၣ်တၢ်ကူးတဲာ်ကွံာ်အီၤလၢ ထၣ်အလိၤအသိးန့ၣ်လီၤ.
ယဆိကမိၣ်တ့ၢ်လၢကစၢ်ယွၤမၤကတၢၢ်ယတၢ်အိၣ်မူလံန့ၣ်လီၤ.
13ဒီနၤညါန့ၣ်, ယကိးထီၣ်လၢတၢ်ဆူးတၢ်ဆါအပူၤ,
မၤသးဒ်သိးခ့ယုၢ်တဒုမၤကၢ်ယဃံယကွဲတဖၣ်န့ၣ်လီၤ.
ယဆိကမိၣ်တ့ၢ်လၢကစၢ်ယွၤမၤကတၢၢ်ယတၢ်အိၣ်မူလံန့ၣ်လီၤ.
14ယကလုၢ်သီၣ်ကသွံဒံဒီးစၢ်ဝဲလီၤ.
ယကအုဒ်ထိၣ်လွံၢ်အသိးလီၤ.
ယမဲာ်ချံလီၤဘှံးဝဲလၢယကွၢ်ထီၣ်တၢ်ဆူမူခိၣ်အဃိလီၤ.
ယွၤဧၢ, မၤပူၤမၤဖျဲးယၤလၢကယဲၢ်တၢ်ကီတၢ်ခဲတဖၣ်အံၤတက့ၢ်.
15ယစံးမနုၤကသ့လဲၣ်. ယွၤမၤတ့ၢ်တၢ်အံၤလီၤ.
ယသးခၣ်ဝဲဒီးယမံတန့ၢ်ဘၣ်.
16ယွၤဧၢ, ယအိၣ်မူလၢနဂီၢ်, ထဲနၤတဂၤဧိၤအဂီၢ်လီၤ.
မၤဘျါက့ၤယၤဒီးဒုးအိၣ်မူယၤတက့ၢ်.
17ယတၢ်သးခၣ်ကဃၣ်က့ၤအသးဆူတၢ်ဃူတၢ်ဖိးလီၤ.
နအုၣ်က့ၤခီၣ်က့ၤယသးသမူလၢတၢ်လီၤပျံၤ လီၤဘၣ်ယိၣ်ခဲလၢာ်
ဒီးနပျၢ်ယတၢ်ဒဲးဘးခဲလၢာ်လီၤ.
18ပှၤလၢတၢ်သံအကီၢ်ပူၤလၢအစံးထီၣ်ပတြၢၤနၤသ့တအိၣ်နီ တဂၤဘၣ်.
ပှၤလၢအလဲၤလီၤဆူပျူၤပူၤတဖၣ်နာ်နတၢ်သူၣ်တီသးရၤတသ့ဘၣ်.
19ဒ်ယစံးထီၣ်ပတြၢၤနၤခဲအံၤအသိး,
ပှၤလၢအစံးထီၣ်ပတြၢၤနၤမ့ၢ်ပှၤအမူန့ၣ်လီၤ.
ပၢ်တဖၣ်စံးဘၣ်တဲဘၣ်အဖိတဖၣ်လၢနသူၣ်တီသးရၤထဲလဲၣ်အဂ့ၢ် န့ၣ်လီၤ.
20ယွၤဧၢ, နမၤဘျါတ့ၢ်ယၤလံ.
ပကဒ့တနၢ်သီတူၢ်တဖၣ်ဒီးသးဝံၣ် နတၢ်စံးထီၣ်ပတြၢၤလီၤ.
ပကသးဝံၣ်စံးထီၣ်ပတြၢၤတၢ်လၢနတၢ်လုၢ်ဟံၣ်အပူၤလၢပသးသမူ တစိၤဒၣ်ပှၤလီၤ.
21အဂ့ၢ်ဒ်အံၤ, ဝံယၡါယၤစံးတ့ၢ်ဝဲစီၤပၤ, “ပျဲအဝဲသ့ၣ်ဟံး န့ၢ်ချၢၣ်ဒၢသၣ်အဃ့တလိၣ်, စံၢ်အီၤဒီးပဲလီၤအီၤလၢတၢ်ဝ့အ ဖီခိၣ်တက့ၢ်. ဒီးကဘျါက့ၤဝဲလီၤ.”
22ဒီးစီၤပၤဃံးစကံယၤစ့ၢ်ကီးသံကွၢ်တ့ၢ်ဝဲ, “လၢယကလဲၤထီၣ်ဆူယွၤအဟံၣ်အဂီၢ်, တၢ်ပနီၣ်မ့ၢ်တၢ်မနုၤလဲၣ်,” န့ၣ်လီၤ.
Currently Selected:
လံာ်ယၡါယၤ 38: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
