လံာ်တၢ်ကဲထီၣ်အခီၣ်ထံး 39
39
စီၤယိၤသးဒီးစီၤပိၤတံၤဖၢ်အမါ
1ခဲအံၤ, ပှၤယံးၡမၤဧ့လးဖိသ့ၣ်တဖၣ်လဲၤကိးစီၤယိၤသးဆူ ကီၢ်အဲၤကူပတူးဒီးဆါကွံာ်အီၤဆူစီၤပိၤတံၤဖၢ်, လၢအမ့ၢ်စီၤပၤအပဒိၣ်ပပှၢ်တဖၣ်အကျါတဂၤလၢအမ့ၢ်ပှၤပၢၤနီအခိၣ် တဂၤန့ၣ်အအိၣ်လီၤ. 2ယွၤအိၣ်ဒီးစီၤယိၤသးဒီးဒုးကဲထီၣ်အီၤလၢပှၤမၤတၢ်ကဲထီၣ် လိၣ်ထီၣ်တဂၤန့ၣ်လီၤ. အဝဲအိၣ်ဆိးတ့ၢ်လၢအကစၢ်ပှၤအဲၤကူပတူးဖိအဟံၣ်, 3ဒီးအကစၢ်ထံၣ်ဝဲလၢယွၤအိၣ်ဒီးစီၤယိၤသးဒီးဒုးကဲထီၣ်လိၣ် ထီၣ်တၢ်လၢအမၤဝဲတမံၤလၢ်လၢ်န့ၣ်လီၤ. 4စီၤပိၤတံၤဖၢ်ဘၣ်သူၣ်ဘၣ်သးလၢအီၤဒီးဒုးကဲထီၣ်အီၤလၢ အနီၢ်ကစၢ်ဒၣ်ဝဲအတၢ်ခ့တၢ်ပှၤဒီးပာ်အီၤလၢပှၤပၢၤဘၣ်အဟံၣ်ဒီး တၢ်လၢအမ့ၢ်အတၢ်ခဲလၢာ်န့ၣ်လီၤ. 5စးထီၣ်ဖဲန့ၣ်, ယွၤဆိၣ်ဂ့ၤပှၤအဲၤကူပတူးဖိအပှၤဟံၣ်ဖိဃီ ဖိဒီးကယဲၢ်တၢ်အိၣ်လၢအဟံၣ်အဃီပူၤဒီးအစံာ်ပူၤပျီပူၤခဲ လၢာ်လၢစီၤယိၤသးအဃိလီၤ. 6စီၤပိၤတံၤဖၢ်အးလီၤတၢ်လၢအအိၣ်ဒီးအီၤကိးမံၤဒဲးလၢစီၤ ယိၤသးအတၢ်အံးထွဲကွၢ်ထွဲအပူၤ, ဒီးမ့တမ့ၢ်လၢတၢ်အီၣ်လၢအအီၣ်ဝဲဧိၤဘၣ်န့ၣ်, အဝဲတမၤတံာ်တာ်အသးလၢတၢ်အဂၤနီတမံၤဘၣ်.
စီၤယိၤသးအိၣ်ပှဲၤဒီးဒုၣ်ဒီးဒ့ဒီးပကွၢ်အီၤဂ့ၤလီၤ. 7တယံာ်ဘၣ်အလီၢ်ခံန့ၣ်, အကစၢ်အမါစးထီၣ်မဲာ်ဘၣ်စီၤယိၤသးဒီး မၢအီၤလၢကမံဃုာ်ဒီးအီၤလီၤ. 8အဝဲဂ့ၢ်လိာ်ဝဲဒီးစံးဘၣ်အီၤ, “ကွၢ်, ယကစၢ်တမၤတံာ်တာ်အသး ဒီးတၢ်အိၣ်လၢဟံၣ်ပူၤနီတမံၤဘၣ်, မ့ၢ်လၢယအိၣ်ဖဲအံၤအဃိလီၤ. အဝဲပာ်လီၤယၤလၢပှၤပၢၤဘၣ်တၢ် ကိးမံၤဒဲးလၢအအိၣ်ဒီးအီၤန့ၣ်လီၤ. 9ယအိၣ်ဒီးတၢ်စိတၢ်ကမီၤထဲသိးဒီးအီၤလၢဟံၣ်အံၤအပူၤန့ၣ် လီၤ. မ့တမ့ၢ်ဘၣ်ထဲလၢနၤတဂၤဧိၤဘၣ်ဒီး, အဝဲတတြီဃာ်တၢ်အဂုၤအဂၤနီတမံၤလၢယကပၢၤအီၤဘၣ်လီၤ. လၢတၢ်န့ၣ်အဃိ, ယကမၤတၢ်အၢတၢ်သီဒ်သိးအံၤတမံၤဒီးမၤတၢ်ဒဲး ဘးထီဒါကစၢ်ယွၤဒ်လဲၣ်.” 10အဝဲမၢစီၤယိၤသးမံဃုာ်ဒီးအီၤတနံၤဘၣ်တနံၤဒၣ်လဲာ်, စီၤယိၤသးတမံဃုာ်ဘၣ်ဒီးအီၤဘၣ်.
11ဘၣ်ဆၣ်, တနံၤဖဲစီၤယိၤသးလဲၤနုာ်ဆူဟံၣ်ပူၤလၢအကမၤအတၢ်မၤ န့ၣ်, ဟံၣ်အတၢ်ခ့တၢ်ပှၤတအိၣ်ဘၣ်ဖဲန့ၣ်နီတဂၤဘၣ်. 12ဒီးအကစၢ်အမါဖီၣ်ထဲးအဆ့ဒီးစံးဝဲ, “ဟဲမံဃုာ်ဒီးယၤတ က့ၢ်.” ဘၣ်ဆၣ်အဝဲဃ့ၢ်ထူၣ်ဖျဲးထီၣ်ကွံာ်ဆူတၢ်ချၢဒီးပာ်တီၢ်အဆ့ကၤ လၢအစုပူၤလီၤ. 13တုၤအကစၢ်အမါထံၣ်ဝဲလၢစီၤယိၤသးပာ်တီၢ်အဆ့ကၤဃ့ၢ်ထီၣ်ကွံာ် ဆူဟံၣ်အချၢလံဒီး, 14ကိးဃီၤအဟံၣ်အတၢ်ခ့တၢ်ပှၤတဖၣ်ဒီးစံးဝဲ, “ကွၢ်တၢ်အံၤတက့ၢ်. ပှၤဧ့ၤဘြံၤဖိလၢယဝၤဟဲက့ၤကိးဆူဟံၣ် တဂၤအံၤ, မၤတရီတပါပှၤလီၤ. အဝဲဟဲနုာ်ဃီၤဆူယဒၢးပူၤဒီးကျဲးစၢး မၤဆူၣ်မၤစိးယၤလီၤ. ဘၣ်ဆၣ်ဒီးယကိးကလူထီၣ်လၢယကလုၢ်ဖးဒိၣ်လီၤ. 15တုၤအဝဲနၢ်ဟူယကိးကလူထီၣ်န့ၣ်, အဝဲထွးထီၣ်ဃ့ၢ်ကွံာ်ဆူ တၢ်ချၢဒီးပာ်တီၢ်အဆ့ကၤဖဲယကပၤန့ၣ်လီၤ.”
16ဒီးအဝဲပၢၤဃာ်ဆ့ကၤန့ၣ်ဒီးအီၤတုၤစီၤယိၤသးအကစၢ်ဟဲက့ၤ ဆူဟံၣ်တစုန့ၣ်လီၤ. 17အန့ၣ်ဒီးစီၤပိၤတံၤဖၢ်အမါတဲဘၣ်အဝၤလၢတၢ်ဂ့ၢ်တမံၤဃီဒီး စံးဝဲ, “ပှၤဧ့ၤဘြံၤကုၢ်ဖိလၢနဟဲက့ၤစိာ်အီၤဖဲအံၤတဂၤန့ၣ်, ဟဲနုာ်ဆူယမံဒၢးပူၤဒီးမၤတရီတပါယၤလီၤ. 18ဘၣ်ဆၣ်ဒီးတုၤယကိးကလူထီၣ်န့ၣ်, အဝဲထွးထီၣ်ဃ့ၢ်ကွံာ်ဆူ တၢ်ချၢဒီးပာ်တီၢ်အဆ့ကၤလၢယကပၤန့ၣ်လီၤ.”
19-20စီၤယိၤသးအကစၢ်အသးထီၣ်ကဲၤဝဲ, ဒီးဖီၣ်န့ၢ်စီၤယိၤသးဒီးဒၢနုာ်အီၤလၢဃိာ်ပူၤဖဲစီၤပၤ အပှၤဃိာ်ဖိတဖၣ်ဘၣ်တၢ်ပာ်အီၤအလီၢ်, ဒီးအဝဲအိၣ်ဝဲဖဲန့ၣ်လီၤ. 21ဘၣ်ဆၣ်ယွၤအိၣ်ဒီးစီၤယိၤသးဒီးဆိၣ်ဂ့ၤအီၤလီၤ. ဒီးဃိာ်ဒိၣ်ဘၣ်သူၣ်ဘၣ်သးအီၤလီၤ. 22အဝဲပာ်စီၤယိၤသးလၢပှၤပၢၤဘၣ်ပှၤဃိာ်ဖိအဂၤတဖၣ်ဒီးဒုးဘၣ် မူဘၣ်ဒါအီၤလၢတၢ်ကိးမံၤဒဲးလၢအဘၣ်တၢ်မၤအီၤလၢဃိာ်ပူၤ န့ၣ်လီၤ. 23တၢ်လၢစီၤယိၤသးအိၣ်မူအိၣ်ဒါဝဲတမံၤလၢ်လၢ်အဂီၢ်န့ၣ်, ဃိာ်ဒိၣ်ကွၢ်ထွဲအလီၢ်တအိၣ်လၢၤဘၣ်, မ့ၢ်လၢယွၤအိၣ်ဒီးစီၤယိၤ သးဒီးဒုးကဲထီၣ်လိၣ်ထီၣ်တၢ်လၢအမၤဝဲကိးမံၤဒဲးအဃိလီၤ.
Currently Selected:
လံာ်တၢ်ကဲထီၣ်အခီၣ်ထံး 39: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
