1 ကရံၣ်သူး 14
14
တၢ်ဂ့ၢ်အဂၤတဖၣ်ဘၣ်ဃး ဒီးယွၤအသးစီဆှံအတၢ်ဟ့ၣ်
1မ့မ့ၢ်ဒ်န့ၣ်ဒီးတၢ်လၢသုကြၢးဂုာ်ကျဲးစၢးဒီးဒိးန့ၢ်အီၤန့ၣ်, မ့ၢ်ဝဲတၢ်အဲၣ်တၢ်ကွံလီၤ. ပာ်သုသးသပှၢ်ပှၢ်လၢသုကဒိးန့ၢ်ဘၣ်သးစီဆှံအတၢ်ဟ့ၣ် တဖၣ်, လီၤဆီဒၣ်တၢ်, တၢ်ဟ့ၣ်ဘၣ်ဃးဒီးတၢ်ကတိၤတၢ်လၢဝံအကျိာ်န့ၣ်တက့ၢ်. 2ပှၤတဂၤလၢအကတိၤတၢ်လၢပျ့ၤလီၤတိၢ်လီၤဆီန့ၣ်, တကတိၤတၢ်ဒီးပှၤဂၤဘၣ်. မ့ၢ်အကတိၤတၢ်ဒီးကစၢ်ယွၤလီၤ. အဂ့ၢ်ဒ်အံၤ, ပှၤတနၢ်ပၢၢ်အီၤနီတဂၤဘၣ်. အဝဲဒၣ်ကတိၤတၢ်မ့ၢ်တၢ်တီခူသူၣ်တဖၣ်, ခီဖျိသးစီဆှံအစိကမီၤန့ၣ်လီၤ. 3မ့မ့ၢ်ပှၤလၢအကတိၤတၢ်လၢဝံအကျိာ်တဂၤန့ၣ်, ကတိၤတၢ်ဒီးပှၤကညီ, ဟ့ၣ်အဝဲသ့ၣ်တၢ်မၤစၢၤ, ဟ့ၣ်ဆူၣ်ထီၣ်အဂံၢ်အဘါ, ဒီးမၤမုာ်ထီၣ်အဝဲသ့ၣ်တဖၣ်အသးန့ၣ်လီၤ. 4ပှၤတဂၤလၢအကတိၤတၢ်လၢပျ့ၤလီၤဆီတဖၣ်န့ၣ်, မၤစၢၤလီၤက့ၤအသးဒၣ်ဝဲတဂၤဧိၤလီၤ. မ့မ့ၢ်ပှၤတဂၤလၢအကတိၤတၢ်လၢဝံအကျိာ်န့ၣ်မၤစၢၤတၢ်အိၣ် ဖှိၣ်ဒီဖုညါလီၤ.
5ယအဲၣ်ဒိးလၢသုဝဲကိးဂၤဒဲးသုကကတိၤတၢ်လၢ ပျ့ၤလီၤဆီတဖၣ်လီၤ. ဘၣ်ဆၣ်ဒီးယအဲၣ်ဒိးယဲဒိၣ်ဒၣ်တၢ်တက့ၢ်လၢသုကအိၣ်ဒီးတၢ်ဟ့ၣ် ဘၣ်ဃးတၢ်ကတိၤတၢ်လၢဝံအကျိာ်န့ၣ်လီၤ. အဂ့ၢ်ဒ်အံၤ, ပှၤတဂၤလၢအကတိၤတၢ်လၢပျ့ၤလီၤဆီတဖၣ်န့ၣ် မ့တမ့ၢ်ပှၤအိၣ်ဝဲတဂၤလၢအတဲဖျါထီၣ်အဝဲအတၢ်ကတိၤတဖၣ် အခီပညီသ့ဝဲဒ်သိးအကကဲထီၣ်တၢ်မၤစၢၤလၢတၢ်အိၣ်ဖှိၣ်ဒီဖု အဂီၢ်ဘၣ်ဒီး, ပှၤကတိၤတၢ်လၢဝံအကျိာ်တဂၤအလုၢ် အပှ့ၤဒိၣ်န့ၢ်အီၤတက့ၢ်လီၤ. 6လၢတၢ်န့ၣ်အဃိ, ဖဲယဟဲယဲဆူသုအိၣ်အဆၢကတီၢ်န့ၣ်, ယမ့ၢ်ကတိၤတၢ်လၢပျ့ၤလီၤဆီတဖၣ်ဒီး, ယဘျုးကအိၣ် ဝဲလၢသုဂီၢ်မနုၤတမံၤလဲၣ်. မ့တမ့ၢ်ယဟဲစိာ်န့ၢ်သုတၢ်လီၣ်ဖျါတမံၤမံၤလၢကစၢ် ယွၤအအိၣ်, မ့တမ့ၢ်တၢ်သ့ၣ်ညါနၢ်ပၢၢ်တမံၤမံၤ, မ့တမ့ၢ်တၢ်ကတိၤလၢဝံအကျိာ်, မ့တမ့ၢ်တၢ်သိၣ်လီၤသီလီၤတမံၤမံၤဒီးယဘျုးတအိၣ်နီ တမံၤဘၣ်.
7ကွၢ်အဒိလၢတၢ်ဒ့တၢ်အူလၢအသးသမူတအိၣ်, ဒ်ပံမ့တမ့ၢ်တနၢ်န့ၣ်တက့ၢ်. မ့တမ့ၢ်လၢတၢ်အကလုၢ်တဖျၢၣ်ဘၣ်တဖျၢၣ်ဘၣ်တၢ်မၤသီၣ်ထီၣ်အီၤဆှံ ဆှံဖျါဖျါဘၣ်ဒီး, မတၤတဂၤသ့ၣ်ညါတၢ်သးဝံၣ်အယုၢ်လၢအဘၣ်တၢ်အူအီၤမ့တမ့ၢ်ဒ့ အီၤန့ၣ်ကသ့ဝဲလၢကျဲဒ်လဲၣ်. 8ဒီးပှၤလၢအအူကွဲၤတဂၤ, မ့ၢ်တဒုးသီၣ်ထီၣ်ကွဲၤအကလုၢ်ဆှံဆှံဘၣ်န့ၣ်, မ့ၢ်မတၤကအိၣ်ကတဲာ်ကတီၤထီၣ်အသးလၢတၢ်ဒုးတၢ်ယၤအဂီၢ် တဂၤလဲၣ်. 9ဒ်န့ၣ်အသိး, နတၢ်ကစီၣ်မ့ၢ်ဘၣ်တၢ်ဟ့ၣ်ထီၣ်အီၤလၢပျ့ၤလီၤတိၢ်လီၤ ဆီလၢအတသီၣ်ဆှံဆှံဘၣ်န့ၣ်, မ့ၢ်မတၤနၢ်ပၢၢ်တၢ်လၢနစံးကတိၤနဲလၢအဂ့ၢ်န့ၣ်ကသ့တဂၤလဲၣ်. နတၢ်စံးတၢ်ကတိၤတဖၣ်ကလီၤမၢ်ကွံာ်ဝဲလၢကလံၤကျါလီၤ. 10လၢဟီၣ်ခိၣ်ချၢန့ၣ်, တၢ်ကတိၤအကျိာ်အိၣ်ဝဲဒၣ်အါမံၤအါကလုာ်, ဘၣ်ဆၣ်ဒီးကျိာ်လၢအတအိၣ်ဒီးအခီပညီန့ၣ်တအိၣ်ဝဲနီတကျိာ်ဘၣ်. 11ဘၣ်ဆၣ်ဒီး, ယမ့ၢ်တနၢ်ပၢၢ်ကျိာ်လၢအဘၣ်တၢ်စံးကတိၤ အီၤဘၣ်န့ၣ်, ပှၤလၢအကတိၤအီၤတဂၤကမၤအသးဒ်ပှၤကလုာ် ဂၤလၢယဂီၢ်, ဒီးယကလီၤဂာ်ဒ်ပှၤကလုာ်ဂၤလၢအဝဲဒၣ်အဂီၢ်လီၤ. 12မ့ၢ်လၢသုသးဆူၣ်ဒိးန့ၢ်ဘၣ်သးစီဆှံအတၢ်ဟ့ၣ်အဃိ, သုကဘၣ်ဂုာ်ကျဲးစၢးအါန့ၢ်တၢ်အဂၤ, လၢသုကသူအါထီၣ်တၢ်ဟ့ၣ်သ့ၣ်တဖၣ်လၢအကမၤ စၢၤတၢ်ဒုးဒိၣ်ထီၣ်ထီထီၣ်တၢ်အိၣ်ဖှိၣ်န့ၣ်လီၤ.
13လၢတၢ်န့ၣ်အဃိပှၤတဂၤလၢအကတိၤတၢ်လၢပျ့ၤလီၤဆီတဖၣ် န့ၣ်ကဘၣ်ဃ့ဘါထုကဖၣ်တၢ်ဒ်သိးအကဒိးန့ၢ်ဘၣ်တၢ်ဟ့ၣ်လၢ အတဲဖျါထီၣ်အတၢ်ကတိၤအခီပညီန့ၣ်လီၤ. 14အဂ့ၢ်ဒ်အံၤ, ယမ့ၢ်ဃ့ဘါထုကဖၣ်တၢ်လၢကျဲဒ်အံၤန့ၣ်ယနီၢ် သးဃ့ဘါထုကဖၣ်တၢ်သပှၢ်ကတၢၢ်, ဘၣ်ဆၣ်ဒီး, ယတၢ်သ့ၣ်ညါအသးတအိၣ်ဒီးတၢ်ဘၣ်ထွဲလၢအပူၤနီ တမံၤဘၣ်. 15မ့မ့ၢ်ဒ်န့ၣ်ဒီးယကမၤယဲဒ်လဲၣ်. ယကဃ့ဘါထုကဖၣ်တၢ်လၢယနီၢ် သးဘၣ်ဆၣ်ဒီးယကဃ့ဘါထုကဖၣ်စ့ၢ်ကီးတၢ်လၢယတၢ်သ့ၣ်ညါ အသးလီၤ. ယကသးဝံၣ်တၢ်လၢယနီၢ်သး, ဘၣ်ဆၣ်ဒီးယကသးဝံၣ်စ့ၢ်ကီးတၢ်လၢယတၢ်သ့ၣ်ညါ အသးလီၤ. 16ဖဲနဟ့ၣ်တၢ်စံးထီၣ်ပတြၢၤဆူကစၢ်ယွၤအအိၣ်ထဲလၢနီၢ်သးန့ၣ်, ပှၤမုၢ်ဆ့ၣ်မုၢ်ဂီၤလၢအဘူၣ်သကိးဘါသကိးတၢ်တဂၤကစံး, “အၤမ့ၣ်” လၢနတၢ်ထုကဖၣ်စံးထီၣ်ပတြၢၤယွၤန့ၣ်ကသ့ဝဲဒ်လဲၣ်. အဝဲနၢ်ပၢၢ်နတၢ်စံးတၢ်ကတိၤတဖၣ်တသ့ဝဲလၢကျဲနီတဘိဘၣ်လီၤ. 17နတၢ်ထုကဖၣ်စံးထီၣ်ပတြၢၤယွၤမ့ၢ်ဂ့ၤကစီဒီဒၣ်လဲာ်န့ၣ်, ပှၤအဂၤတဂၤန့ၣ်တဒိးန့ၢ်တၢ်မၤစၢၤနီတမံၤဘၣ်.
18ယစံးဘျုးကစၢ်ယွၤလၢယကတိၤတၢ်လၢပျ့ၤလီၤဆီတဖၣ် အကျိာ်အါန့ၢ်သုဝဲတဂၤလၢ်လၢ်အဃိန့ၣ်လီၤ. 19ဘၣ်ဆၣ်ဒီး, ဖဲတၢ်ဘူၣ်တၢ်ဘါလၢတၢ်ဘါယွၤလီၢ်အဆၢကတီၢ် န့ၣ်, လၢယကကတိၤတၢ်ကတိၤအဖျၢၣ်တကလးလၢပျ့ၤလီၤဆီ တဖၣ်အလီၢ်, ဘၣ်ယသးလၢယကကတိၤတၢ်ကတိၤယဲၢ်ဖျၢၣ်လၢတၢ်နၢ်ပၢၢ် အီၤသ့ဝဲ, ဒ်သိးယကသိၣ်လီၤသီလီၤပှၤအဂၤတဖၣ်အဂီၢ်န့ၣ်လီၤ.
20ယဒီပုၢ်ဝဲၢ်သ့ၣ်ဧၢ, တဘၣ်လီၤဂာ်ဒီးဖိသၣ်တဖၣ်လၢသုတၢ်ဆိကမိၣ်ဆိကမး အပူၤတဂ့ၤ, ဖဲလၢအဘၣ်ဃးဒီးတၢ်အၢတၢ်သီန့ၣ်လီၤဂာ်ဒီးဖိဒံဖိသၣ်, မ့မ့ၢ်လၢသုတၢ်ဆိကမိၣ်ဆိကမးအပူၤန့ၣ်ကဲပှၤဒိၣ်တုာ်ခိၣ်ပှဲၤ တဖၣ်တက့ၢ်. 21လၢတၢ်ကွဲးအသးစီဆှံအပူၤန့ၣ်, တၢ်ကတိၤအိၣ်ကွဲးအသးဒ်အံၤ,
“ခီဖျိပှၤကညီတဖၣ်လၢ
အကတိၤကျိာ်လီၤဆီတဖၣ်န့ၣ်
ယကကတိၤတၢ်ဒီးယပှၤဂီၢ်မုၢ်လီၤ.
ကစၢ်စံးဝဲဒၣ်,
ယကကတိၤတၢ်ခီဖျိပှၤတခီဘီမုၢ်ဖိတဖၣ်အနိးဖံး,
ဘၣ်ဆၣ်ဒီး, အန့ၣ်ဒၣ်လဲာ်,
တမ့ၢ်လၢယပှၤဂီၢ်မုၢ်ကစူၢ်ယကလုၢ်ဘၣ်.”
22လၢတၢ်န့ၣ်အဃိ, တၢ်ဟ့ၣ်ဘၣ်ဃးဒီးပျ့ၤလီၤဆီတဖၣ်န့ၣ်, မ့ၢ်ဝဲတၢ်အုၣ်အသးလၢပှၤတစူၢ်တနာ်တၢ်တဖၣ်အဂီၢ်လီၤ. တမ့ၢ်လၢပှၤစူၢ်က့ၤနာ်က့ၤတၢ်တဖၣ်အဂီၢ်ဘၣ်. မ့မ့ၢ်တၢ်ဟ့ၣ်ဘၣ်ဃးတၢ်ကတိၤတၢ်လၢဝံအကျိာ်န့ၣ်, မ့ၢ်ဝဲတၢ်အုၣ်အသးလၢပှၤစူၢ်က့ၤနာ်က့ၤတၢ်တဖၣ်အဂီၢ်လီၤ. တမ့ၢ်လၢပှၤတစူၢ်တၢ်နာ်တၢ်တဖၣ်အဂီၢ်ဘၣ်.
23မ့မ့ၢ်ဒ်န့ၣ်ဒီး, တၢ်အိၣ်ဖှိၣ်ဒီဖုညါမ့ၢ်ထံၣ်လိာ်ပာ်ဖှိၣ်သကိး အသးဒီးပှၤကိးဂၤဒဲးဒီးစးထီၣ်ကတိၤတၢ်လၢပျ့ၤလီၤဆီတဖၣ်, ဒီးပှၤမုၢ်ဆ့ၣ်မုၢ်ဂီၤတနီၤမ့တမ့ၢ်ပှၤတစူၢ်တနာ်တၢ်တဖၣ်ဟဲနုာ် လီၤန့ၣ်, အဝဲသ့ၣ်ကစံးလၢသုပျုၢ်ကိးဂၤဒဲးလီၤတမ့ၢ်ဘၣ်ဧါ. 24ဘၣ်ဆၣ်ဒီး ပှၤကိးဂၤဒဲးမ့ၢ်ကတိၤတၢ်လၢဝံအကျိာ်, ဖဲပှၤတစူၢ် တနာ်တၢ်, မ့တမ့ၢ်ပှၤမုၢ်ဆ့ၣ်မုၢ်ဂီၤတဂၤဟဲနုာ်လီၤန့ၣ်, အဝဲဒၣ်ကဘၣ်တၢ်ဒုးသ့ၣ်ညါလီၤတံၢ်အီၤလၢအအိၣ်ဒီး တၢ်ဒဲးဘး, ခီဖျိတၢ်လၢအနၢ်ဟူဘၣ်ဝဲန့ၣ်လီၤ. အဝဲဒၣ်ကဘၣ်တၢ်စံၣ်ညီၣ်အီၤခီဖျိတၢ်လၢအနၢ်ဟူဘၣ်ဝဲခဲလၢာ်လီၤ. 25အဝဲဒၣ်အတၢ်ဆိကမိၣ်ခူသူၣ်တဖၣ်ကဘၣ်တၢ်ဒုးအိၣ်ဖျါထီၣ်အီၤလၢ ခိ, ဒီးအဝဲဒၣ်ကသကူးလီၤအသးဒီးဘူၣ်ထီၣ်ဘါထီၣ်ယွၤဒီးအၢၣ်လီၤ အီလီၤဝဲ, “ကစၢ်ယွၤအိၣ်မးဝဲဖဲအံၤလၢသုသိးသုကျါနီၢ်နီၢ်လီၤ.”
တၢ်ဘျၢဘၣ်ဃးဒီးတၢ်အိၣ်ဖှိၣ်ဘါသကိးတၢ်
26တၢ်လၢယသးအိၣ်စံးယဲန့ၣ်မ့ၢ်ဒ်အံၤလီၤ. ယဒီပုၢ်ဝဲၢ်သ့ၣ်ဧၢ, ဖဲသုအိၣ်ဖှိၣ်ဘါသကိးတၢ်န့ၣ်, တဂၤအိၣ်ဒီးတၢ်သးဝံၣ်စံးထီၣ်ပတြၢၤယွၤ, အဂၤတဂၤအိၣ်ဒီးတၢ်သိၣ်လီၤသီလီၤ, မၤကဒီးတဂၤအိၣ်ဒီးတၢ်လီၣ်ဖျါဟဲလၢယွၤအအိၣ်, အဂၤတဂၤအိၣ်ဒီးဝံအတၢ်ကတိၤ, ဒီးအဂၤတဂၤအိၣ်ဒီးတၢ်တဲဖျါထီၣ်တၢ်လၢအဘၣ် တၢ်စံးကတိၤအီၤတဖၣ်အခီပညီလီၤ. တၢ်ကိးမံၤဒဲးကဘၣ်ကဲထီၣ်တၢ်မၤစၢၤလၢတၢ်အိၣ်ဖှိၣ်အဂီၢ်လီၤ. 27ပှၤတဂၤဂၤမ့ၢ်အဲၣ်ဒိးကတိၤတၢ်လၢပျ့ၤလီၤတိၢ်လီၤဆီတဖၣ်န့ၣ်, ပှၤကတိၤတၢ်အအါကတၢၢ်ကဘၣ်မ့ၢ်ထဲခံဂၤမ့တမ့ၢ်သၢဂၤ, တဂၤဝံၤ တဂၤ, ဒီးပှၤတဂၤဒၣ်ကဘၣ်တဲဖျါထီၣ်တၢ်လၢအကဘၣ်တၢ်စံး ကတိၤအီၤအခီပညီလီၤ. 28ဘၣ်ဆၣ်ဒီးပှၤလၢအကတဲဖျါထီၣ်တၢ်အခီပညီမ့ၢ်တအိၣ်ဖဲန့ၣ်နီ တဂၤဘၣ်ဒီးပှၤတဂၤလၢအကတိၤတၢ်လၢပျ့ၤလီၤဆီတဖၣ်န့ၣ်ကဘၣ် အိၣ်ဘှီၣ်ဒီးကတိၤဒၣ်တၢ်လၢအဝဲဒၣ်, ဒီးကစၢ်ယွၤအဘၢၣ်စၢၤန့ၣ်လီၤ. 29ပှၤကတိၤတၢ်လၢဝံအကျိာ်ကဘၣ်အိၣ်ထဲခံဂၤမ့တမ့ၢ်သၢဂၤ, မ့မ့ၢ်ပှၤအဂၤတဖၣ်ကဘၣ်စံၣ်ညီၣ်ကွၢ်ဆိကမိၣ်ဘၣ်ဃးတၢ်လၢ အဝဲသ့ၣ်စံးကတိၤဝဲန့ၣ်လီၤ. 30ဘၣ်ဆၣ်ဒီးပှၤတဂၤဒၣ်လၢတၢ်အိၣ်ဖှိၣ်အပူၤမ့ၢ်ဒိးန့ၢ်ဘၣ်တၢ် ကစီၣ်လၢယွၤအအိၣ်န့ၣ်, ပှၤလၢအကတိၤတၢ်တဂၤကဘၣ်ဆိကတီၢ်အတၢ်ကတိၤလီၤ. 31သုဝဲကိးဂၤဒဲးသုကတိၤတၢ်လၢဝံအကျိာ်တဂၤဝံၤတဂၤသ့ဝဲ, ဒ်သိးပှၤကိးဂၤဒဲးကဒိးန့ၢ်တၢ်မၤလိ, ဒီးကဘၣ်တၢ်ဟ့ၣ်ဆူၣ်ထီၣ်အဂံၢ်အဘါအဂီၢ်လီၤ. 32တၢ်ဟ့ၣ်ဘၣ်ဃးတၢ်ကတိၤလၢဝံအကျိာ်န့ၣ်, ကြၢးဘၣ်တၢ်ပၢၤဃာ်အီၤလၢပှၤကတိၤတၢ်န့ၣ်လီၤ. 33အဂ့ၢ်ဒ်အံၤ, ကစၢ်ယွၤတဘၣ်အသးလၢပကအိၣ်ဒီးတၢ်တၢထီၣ် တၢလီၤဘၣ်. မ့ၢ်အဘၣ်အသးလၢပကအိၣ်လၢတၢ်ဃူတၢ်ဖိးဒီးတၢ်မုာ်တၢ်ခုၣ် အပူၤလီၤ.
ဒ်လၢယွၤအပှၤဂီၢ်မုၢ်အတၢ်အိၣ်ဖှိၣ်ခဲလၢာ်အပူၤအသိးန့ၣ်, 34ပှၤပိာ်မုၣ်တဖၣ်ကဘၣ်အိၣ်ဘှ့ၣ်လၢတၢ်အိၣ်ဖှိၣ်တဖၣ် အပူၤလီၤ. တၢ်တပျဲအဝဲသ့ၣ်စံးကတိၤတၢ်ဘၣ်. ဒ်ယူဒၤအတၢ်သိၣ်တၢ်သီစံးဝဲအသိးန့ၣ်အဝဲသ့ၣ် ကဘၣ်အိၣ်လၢတၢ်ပၢတၢ်ဆှၢအဖီလာ်လီၤ. 35အဝဲသ့ၣ်မ့ၢ်သးအိၣ်ဃုသ့ၣ်ညါတၢ်တမံၤမံၤန့ၣ်, ကြၢးသံကွၢ်အဝၤတဖၣ်လၢဟံၣ်လီၤ. ပှၤပိာ်မုၣ်တဂၤကစံးကတိၤတၢ်လၢတၢ်ဘါယွၤအလီၢ်န့ၣ်မ့ၢ်တၢ်လၢ အလီၤမဲာ်ဆှးလီၤ.
36မ့တမ့ၢ်ဘၣ်ဒီး, ကမ့ၢ်လၢကစၢ်ယွၤအကလုၢ်ဟဲလၢသုအိၣ်တခီ ဧါ. မ့တမ့ၢ်ဘၣ်ဒီးမ့ၢ်အဟဲထဲလၢသုဝဲတဖၣ်ဧိၤအအိၣ်လီၤဧါ. 37ပှၤတဂၤဂၤမ့ၢ်ဆိကမိၣ်လၢ, အဝဲဒၣ်မ့ၢ်ကစၢ်ယွၤအပှၤဆှၢတၢ်ကစီၣ်, မ့တမ့ၢ်အိၣ်ဒီးသးစီဆှံအတၢ်ဟ့ၣ်န့ၣ်, အဝဲဒၣ်ကဘၣ်သ့ၣ်ညါလၢတၢ်လၢယကွဲးန့ၢ်သုတဖၣ်မ့ၢ်ဝဲ ကစၢ်ယွၤအတၢ်မၤလိာ်န့ၣ်လီၤ. 38ဘၣ်ဆၣ်ဒီး, အဝဲမ့ၢ်တကနၣ်ဃုာ်တၢ်ဂ့ၢ်အဝဲအံၤန့ၣ်, တဘၣ်ကနၣ်ဃုာ်အီၤနီတစဲးတဂ့ၤ.
39မၤသးဒ်န့ၣ်ဒီး, ယဒီပုၢ်ဝဲၢ်သ့ၣ်ဧၢ, ပာ်သုသးလၢသုကကတိၤတၢ်လၢဝံအကျိာ်တက့ၢ်. ဘၣ်ဆၣ်ဒီး, တဘၣ်တြီပှၤကတိၤတၢ်လၢပျ့ၤလီၤတိၢ်လီၤဆီတဖၣ်တဂ့ၤ. 40တၢ်ကိးမံၤဒဲးကြၢးဘၣ်တၢ်မၤအီၤလၢအလီၢ်အကျဲဒီးလၢအဂ့ၢ် အဝီန့ၣ်လီၤ.
Currently Selected:
1 ကရံၣ်သူး 14: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
