1 ကရံၣ်သူး 12
12
တၢ်ဟ့ၣ်လၢသးစီဆှံအအိၣ်တဖၣ်
1ခဲကနံၣ်အံၤ, ဘၣ်ဃးဒီးတၢ်လၢသုကွဲးတ့ၢ်သုဝဲလၢသးစီဆှံ အတၢ်ဟ့ၣ်အဂ့ၢ်န့ၣ်
ယသးအိၣ်လၢသုကသ့ၣ်ညါတၢ်မ့ၢ်တၢ်တီဘၣ်ဃးဒီး အဝဲသ့ၣ်အဂ့ၢ်လီၤ. ယဒီပုၢ်ဝဲၢ်သ့ၣ်ဧၢ, 2သုသ့ၣ်ညါသုဝဲလၢဖဲသုမ့ၢ်ဒံးပှၤသူခိၣ်ဖိအဆၢကတီၢ်န့ၣ်, သုဘၣ်တၢ်ဆှၢဖျိးသုလၢကျဲအါဘိအပူၤဆူတၢ်ဘါတၢ်ဂီၤ တၢ်ဖီၣ်လၢအသးသမူတအိၣ်တဖၣ်န့ၣ်လီၤ. 3ယအဲၣ်ဒိးသုကသ့ၣ်ညါလၢပှၤလၢယွၤအသးစီဆှံဆှၢအီၤ တဂၤန့ၣ်ကစံးဝဲ, “မ်ယ့ၣ်ၡူးဘၣ်တၢ်ဆိၣ်အၢတက့ၢ်” န့ၣ် တသ့ဘၣ်. ဒီးမ့တမ့ၢ်လၢပှၤတဂၤဘၣ်တၢ်ဆှၢအီၤလၢသးစီဆှံန့ၣ်, ပှၤအဝဲန့ၣ်အၢၣ်လီၤအီလီၤလၢ “ယ့ၣ်ၡူးမ့ၢ်ကစၢ်” န့ၣ်တသ့ဘၣ်.
4သးစီဆှံအတၢ်ဟ့ၣ်န့ၣ်အိၣ်ဝဲဒၣ်အါကလုာ်အါမံၤ, ဘၣ်ဆၣ်ဒီးပှၤလၢအဟ့ၣ်တၢ်န့ၣ်မ့ၢ်ဝဲသးစီဆှံတဂၤဃီလီၤ. 5တၢ်ဖံးတၢ်မၤလၢယွၤအဂီၢ်န့ၣ်အကျဲအိၣ်ဝဲအါဘိ, ဘၣ်ဆၣ်ဒီးမ့ၢ်တၢ်ဖံးတၢ်မၤလၢကစၢ်တဂၤဃီအဂီၢ်လီၤ. 6တၢ်သ့တၢ်ဘၣ်လၢအဘၣ်ဃးဒီးတၢ်ဖံးတၢ်မၤတၢ်လၢယွၤ အဂီၢ်န့ၣ်, အိၣ်ဝဲဒၣ်အါကလုာ်အါမံၤ, ဘၣ်ဆၣ်ဒီးပှၤလၢ အဟ့ၣ်တၢ်သ့တၢ်ဘၣ်ဆူပှၤတဂၤဘၣ်တဂၤလၢအကမၤ တၢ်ဖံးတၢ်မၤလီၤဆီဆီတမံၤမံၤန့ၣ်, မ့ၢ်ဒၣ်ကစၢ်ယွၤတဂၤ ဃီလီၤ. 7သးစီဆှံအတၢ်အိၣ်ဝဲလၢပှၤသိးပှၤကျါန့ၣ်, ဘၣ်တၢ်ဒုးနဲၣ်ဖျါထီၣ်အီၤလၢကျဲတဘိဘိလၢပှၤတဂၤ စုာ်စုာ်အပူၤ, လၢပှၤကိးဂၤဒဲးအတၢ်ဂ့ၤအဂီၢ်လီၤ. 8သးစီဆှံဟ့ၣ်ပှၤတဂၤတၢ်ကစီၣ်လၢအလၢပှဲၤဒီးတၢ်ကူၣ်ဘၣ်ကူၣ် သ့, ဖဲပှၤတဂၤဒၣ်ဘၣ်တၢ်ဟ့ၣ်အီၤတၢ်ကစီၣ်လၢပှဲၤဒီး တၢ်သ့ၣ်ညါနၢ်ပၢၢ်, လၢသးစီဆှံတဂၤဃီလီၤ. 9သးစီဆှံတဂၤဃီဟ့ၣ်ပှၤတဂၤလၢတၢ်စူၢ်တၢ်နာ်, ဒီးပှၤတဂၤဒၣ်လၢတၢ်စိတၢ်ကမီၤဘၣ်ဃးဒီးတၢ်မၤဘျါက့ၤ တၢ်လီၤ. 10သးစီဆှံဟ့ၣ်ပှၤတဂၤတၢ်စိတၢ်ကမီၤလၢအကမၤတၢ်လီၤလးတဖၣ်, ပှၤအဂၤတဂၤ, တၢ်ဟ့ၣ်ဘၣ်ဃးတၢ်ကတိၤတၢ်လၢဝံအကျိာ်, ဒီးပှၤတဂၤဒၣ်တၢ်သ့တၢ်ဘၣ်လၢအကပဲာ်ဖးနီၤဖးတၢ်ဟ့ၣ်တဖၣ်လၢ အဟဲလၢသးစီဆှံအအိၣ်ဒီးတၢ်ဟ့ၣ်တဖၣ်လၢအတဟဲလၢသးစီဆှံ အအိၣ်န့ၣ်အတၢ်လီၤဆီလီၤ. ဆူပှၤတဂၤအအိၣ်န့ၣ်, အဝဲဟ့ၣ်တၢ်သ့တၢ်ဘၣ်လၢအကတဲဖျါထီၣ်တၢ်လၢအဘၣ်တၢ်စံး ကတိၤလၢကျိာ်လၢပှၤတနၢ်ပၢၢ်အီၤတဖၣ်, ဒီးဆူပှၤတဂၤဒၣ် အဝဲဟ့ၣ်တၢ်သ့တၢ်ဘၣ်လၢအကတဲဖျါထီၣ်တၢ်လၢအဘၣ် တၢ်စံးကတိၤလၢကျိာ်လၢပှၤတနၢ်ပၢၢ်ဘၣ်တဖၣ်အခီပညီန့ၣ်လီၤ. 11ဘၣ်ဆၣ်ဒီး, ပှၤလၢအမၤတၢ်သ့ၣ်တဖၣ်အံၤခဲလၢာ်န့ၣ်, မ့ၢ်ဝဲသးစီဆှံတဂၤဃီလီၤ. အဝဲဒၣ်ဟ့ၣ်ပှၤတဂၤဘၣ်တဂၤလၢတၢ်ဟ့ၣ်လီၤဆီတမံၤဒ် အသးအိၣ်မၤဝဲအသိးလီၤ.
နီၢ်ခိတဂၤဃီအိၣ်ဒီးက့ၢ်ဂီၤအါမံၤ
12ခရံာ်လီၤဂာ်ဒ်နီၢ်ခိထဲတဂၤဃီလၢအအိၣ်ဒီးက့ၢ်ဂီၤအါမံၤလီၤ. အဝဲဒၣ်ဘၣ်တၢ်ဒုးအိၣ်ထီၣ်အီၤအိၣ်ဒီးက့ၢ်ဂီၤအါမံၤဘၣ်ဆၣ် ဒီး, မ့ၢ်ဒၣ်နီၢ်ခိတဂၤဃီလီၤ. 13လၢကျဲတဘိဃီန့ၣ်, ပဝဲကိးနီၢ်ဂၤဒဲး, ပှၤယူဒၤဖိမ့ၢ်ဂ့ၤ, ပှၤကလုာ်ဂၤမ့ၢ်ဂ့ၤ, ကုၢ်မ့ၢ်ဂ့ၤ, ပှၤသဘျ့မ့ၢ်ဂ့ၤ, ပဘၣ်တၢ်ဒိးဘျၢတ့ၢ်ပှၤဆူနီၢ်ခိတဂၤဃီလၢသးစီဆှံတဂၤဃီ, ဒီးပဝဲကိးဂၤဒဲးပဘၣ်တၢ်ဟ့ၣ်တ့ၢ်ပှၤသးစီဆှံတဂၤဃီ လၢပကအီအီၤအဂီၢ်န့ၣ်လီၤ.
14အဂ့ၢ်ဒ်အံၤ, နီၢ်ခိအနီၢ်ကစၢ်ဒၣ်ဝဲတဘၣ်တၢ်ဒုးအိၣ်ထီၣ်အီၤအိၣ်ဒီးက့ၢ်ဂီၤထဲ တမံၤဧိၤဘၣ်, မ့မ့ၢ်က့ၢ်ဂီၤအါမံၤလီၤ. 15ခီၣ်တခီမ့ၢ်စံးဝဲ, “ယတမ့ၢ်စုတခီအဃိယတဘၣ်ထွဲဒီးနီၢ်ခိဘၣ်” သနာ်က့ကဘၣ်ထွဲဒံးဒၣ်တၢ်လၢနီၢ်ခိဒ်က့ၢ်ဂီၤတမံၤန့ၣ်လီၤ. 16ဒီးနၢ်တခီမ့ၢ်စံး, “ယတမ့ၢ်မဲာ်ချံတခီအဃိ, ယတဘၣ်ထွဲဒီးနီၢ် ခိဘၣ်” သနာ်က့ကဘၣ်ထွဲဒံးဒၣ်တၢ်လၢနီၢ်ခိ, ဒ်က့ၢ်ဂီၤတမံၤ န့ၣ်လီၤ. 17နီၢ်ဒီဂၤညါမ့မ့ၢ်ဒၣ်မဲာ်ချံတတိၣ်န့ၣ်ကနၢ်ဟူတၢ်လၢကျဲဒ်လဲၣ်. ဒီးမ့မ့ၢ်ဒၣ်နၢ်တခီန့ၣ်ကနၢဘၣ်တၢ်လၢကျဲဒ်လဲၣ်. 18ဘၣ်ဆၣ်ဒီးဒ်တၢ်မၤအသးအသိးန့ၣ်, ကစၢ်ယွၤပာ်က့ၢ်ဂီၤလီၤဆီတမံၤဘၣ်တမံၤလၢနီၢ်ခိအလိၤဒ် အသးအိၣ်မၤဝဲအသိးလီၤ. 19နီၢ်ခိမ့မ့ၢ်က့ၢ်ဂီၤထဲတမံၤဧိၤဒီး, နီၢ်ခိတအိၣ်လၢၤဘၣ်. 20ဒ်တၢ်မၤအသးအသိးန့ၣ်, က့ၢ်ဂီၤအိၣ်ဝဲဒၣ်အါမံၤဘၣ်ဆၣ်နီၢ်ခိအိၣ်ထဲတဂၤဧိၤလီၤ.
21လၢတၢ်န့ၣ်အဃိ, မဲာ်ချံစံးဘၣ်စု, “ယတလိၣ်ဘၣ် နၤဘၣ်” န့ၣ်တသ့ဘၣ်. ဒ်န့ၣ်အသိးခိၣ်စံးဘၣ်ခီၣ်, “ခဲကနံၣ်အံၤ, ယတလိၣ်ဘၣ်နၤဘၣ်” န့ၣ်တသ့ဘၣ်. 22အခိၣ်တလိာ်, နီၢ်ခိအက့ၢ်အဂီၤတဖၣ်လၢအအိၣ်ဖျါဒ် အမ့ၢ်တၢ်ဂံၢ်စၢ်ဘါစၢ်တဖၣ်န့ၣ်, မ့ၢ်တအိၣ်ဒီးပအိၣ်တသ့ဘၣ်. 23ဒီးက့ၢ်ဂီၤလၢပဆိကမိၣ်အလုၢ်အပှ့ၤတအိၣ်ကဲၣ်ဆိးတဖၣ်န့ၣ်, မ့ၢ်က့ၢ်ဂီၤတဖၣ်လၢပကတဲာ်ကတီၤဒီးမၤဘၣ်အီၤလၢတၢ်ပလီၢ် ပဒီဒိၣ်ဒၣ်တၢ်တက့ၢ်, ဖဲအက့ၢ်အဂီၤတဖၣ်လၢအတအိၣ်ဖျါဂ့ၤကဲၣ်ဆိး တဖၣ်န့ၣ်ပကတဲာ်ကတီၤဒီးမၤဘၣ်အီၤလၢတၢ်လီၤတံၢ်လီၤ ဆဲးလီၤဆီဒၣ်တၢ်အပူၤလီၤ. 24မ့မ့ၢ်က့ၢ်ဂီၤလၢအဃံလၤဒိၣ်န့ၢ်အီၤတဖၣ်, တလိၣ်ဘၣ်တၢ်ကတဲာ်ကတီၤဒီးတၢ်အံးတၢ်ကွၢ်လီၤဆီဒ်အံၤ အသိးဘၣ်. ကစၢ်ယွၤအနီၢ်ကစၢ်ဒၣ်ဝဲပာ်ဖှိၣ်နီၢ်ခိအက့ၢ် အဂီၤလၢကျဲတဘိဒ်သိးအကဟ့ၣ်တၢ်လၤကပီၤဒိၣ်ဒၣ်တၢ် တက့ၢ်ဆူက့ၢ်ဂီၤလၢအလိၣ်ဘၣ်တၢ်လၤကပီၤဒ်န့ၣ်အသိး တဖၣ်လီၤ. 25ဒီးလၢတၢ်န့ၣ်အဃိ, တၢ်လီၤမုၢ်လီၤဖးတအိၣ်ဝဲလၢနီၢ်ခိအပူၤ ဘၣ်. မ့မ့ၢ်, က့ၢ်ဂီၤတဖၣ်ခဲလၢာ်အိၣ်ဒီးတၢ်ကွၢ်တၢ်လၢတမံၤဒီး တမံၤအဂီၢ်ပှဲၤသိးသိးလီၤ. 26နီၢ်ခိအက့ၢ်အဂီၤတမံၤမ့ၢ်တူၢ်ဘၣ်တၢ်ဒီး, က့ၢ်ဂီၤအဂၤခဲလၢာ်တူၢ်ဘၣ်ဃုာ်တၢ်ဒီးအီၤ, က့ၢ်ဂီၤတမံၤမ့ၢ်ဘၣ်တၢ်စံးထီၣ်ပတြၢၤအီၤဒီး က့ၢ်ဂီၤအဂၤတဖၣ်ခဲလၢာ်ဒိးန့ၢ်ဘၣ်ဃုာ်အဝဲဒၣ် အတၢ်သးခုလီၤ.
27သုဝဲခဲလၢာ်သုမ့ၢ်ခရံာ်အနီၢ်ခိ, ဒီးသုဝဲတဂၤဘၣ်တဂၤသုမ့ၢ်အက့ၢ်အဂီၤတမံၤစုာ်စုာ်လီၤ. 28လၢတၢ်အိၣ်ဖှိၣ်အပူၤန့ၣ်, ကစၢ်ယွၤပာ်ပှၤကိးဂၤဒဲးလၢအလီၢ် အကျဲဒၣ်ဝဲလီၤ. အဆိကတၢၢ်ပှၤတၢ်မၢဖိတဖၣ်, ခံဖုတဖု, ဝံဧိၤမီၣ်ဧိၤတဖၣ်, သၢဖုတဖု, သရၣ်တဖၣ်, အန့ၣ်ဝံၤပှၤလၢအမၤတၢ်လီၤလးတဖၣ်, ဒီးပိာ်ထီၣ်အခံလၢပှၤဘၣ်တၢ်ဟ့ၣ်စိဟ့ၣ်ကမီၤအီၤ လၢကမၤဘျါက့ၤတၢ်, မ့တမ့ၢ်ကမၤစၢၤပှၤဂၤတဖၣ်, မ့တမ့ၢ်ကနဲၣ်န့ၢ်အဝဲသ့ၣ်အကျဲ, မ့တမ့ၢ်ကစံးကတိၤတၢ်လၢကျိာ်လၢပှၤနၢ်တပၢၢ်တဖၣ်န့ၣ်လီၤ. 29အဝဲသ့ၣ်ကိးဂၤဒဲးတမ့ၢ်ပှၤတၢ်မၢဖိတဖၣ်, မ့တမ့ၢ်ဝံဧိၤမီၣ်ဧိၤ တဖၣ်, မ့တမ့ၢ်သရၣ်တဖၣ်ဘၣ်. အဝဲသ့ၣ်ကိးဂၤဒဲးတအိၣ်ဒီးတၢ်စိတၢ်ကမီၤလၢအကမၤတၢ်လီၤလး တဖၣ်, 30မ့တမ့ၢ်အမၤဘျါတၢ်ဆူးတၢ်ဆါ, မ့တမ့ၢ်ကကတိၤတၢ်လၢကျိာ်လၢပှၤနၢ်တပၢၢ်တဖၣ်, မ့တမ့ၢ်ကတဲဖျါတၢ်လၢအဘၣ်တၢ်စံးကတိၤအီၤန့ၣ်ဘၣ်. 31မ့မ့ၢ်ဒ်န့ၣ်ဒီး, ပာ်သုသးသပှၢ်ပှၢ်လၢတၢ်ဆၢမိၣ်န့ၢ်ဘၣ်တၢ်ဟ့ၣ်လၢ အကါဒိၣ်န့ၢ်တၢ်ဟ့ၣ်အဂၤန့ၣ်တက့ၢ်.
ဘၣ်ဆၣ်ဒီး, အဂ့ၤကတၢၢ်မ့ၢ်ဝဲကျဲလၢလာ်တဘိအံၤန့ၣ်လီၤ.
Currently Selected:
1 ကရံၣ်သူး 12: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
