1 ကရံၣ်သူး 11
11
1လၢတၢ်န့ၣ်အဃိ, ကွၢ်လိယၤ, ဒ်ယကွၢ်လိခရံာ်အသိးန့ၣ်တက့ၢ်.
တၢ်မၤဘၢခိၣ်ဖဲတၢ်ဘူၣ်တၢ်ဘါအဆၢကတီၢ်
2ယစံးထီၣ်ပတြၢၤသုလီၤ. အဂ့ၢ်ဒ်အံၤ, ထီဘိန့ၣ်သုသ့ၣ်နီၣ် ထီၣ်ယၤဒီးပိာ်ထွဲတၢ်သိၣ်လီၤသီလီၤလၢယဟ့ၣ်လီၤတ့ၢ်ယဲဆူ သုအိၣ်တဖၣ်လီၤ. 3ဘၣ်ဆၣ်ဒီးယအဲၣ်ဒိးသုကနၢ်ပၢၢ်လၢခရံာ်မ့ၢ်ပှၤပိာ်ခွါကိး ဂၤဒဲးအခိၣ်, ဝၤမ့ၢ်မါအခိၣ်, ဒီးကစၢ်ယွၤမ့ၢ်ခရံာ်အခိၣ်န့ၣ်လီၤ. 4လၢတၢ်န့ၣ်အဃိ, ပှၤပိာ်ခွါတဂၤလၢအဃ့ဘါထုကဖၣ်တၢ်, မ့တမ့ၢ်ကတိၤတၢ်လၢဝံအကျိာ်ဖဲပှၤဂီၢ်မုၢ်အတၢ်ဘူၣ်ထီၣ်ဘါ ထီၣ်အဆၢကတီၢ်, မ့ၢ်ဖၢၣ်ဘၢဃာ်အခိၣ်ဒီးမ့ၢ်အမၤဟးဂီၤ အခိၣ်, ခရံာ်အလၤကပီၤန့ၣ်လီၤ. 5ဒီးပှၤပိာ်မုၣ်တဂၤဂၤလၢအဃ့ဘါထုကဖၣ်, မ့တမ့ၢ်, ကတိၤတၢ်လၢဝံအကျိာ်ဖဲပှၤဂီၢ်မုၢ်အတၢ်ဘူၣ်ထီၣ်ဘါထီၣ်အဆၢ ကတီၢ်န့ၣ်မ့ၢ်တဖၢၣ်ဘၢဃာ်အခိၣ်လၢတၢ်နီတစဲးဒီးမ့ၢ်အမၤဟးဂီၤ အဝၤအလၤကပီၤလီၤ. အဝဲဒၣ်တလီၤဆီဒီးပိာ်မုၣ်လၢအခိၣ်သူဘၣ်တၢ်လူၤကွံာ်အီၤ တဂၤဘၣ်. 6ပိာ်မုၣ်တဂၤန့ၣ်မ့ၢ်တမၤဘၢဃာ်အခိၣ်ဒီး, ဂ့ၤတက့ၢ်လၢအကတံာ်ကွံာ်အခိၣ်သူလီၤ. ဒီးမ့ၢ်လၢပိာ်မုၣ်တဂၤကလူၤအခိၣ်, မ့တမ့ၢ်ကတံာ်ကွံာ်အခိၣ်သူအဂီၢ်မ့ၢ်တၢ်လီၤမဲာ်ဆှး တမံၤအဃိ, အဝဲဒၣ်ကြၢးဖၢၣ်ဘၢဃာ်အခိၣ်လီၤ. 7ပှၤပိာ်ခွါတဂၤန့ၣ်အလီၢ်တအိၣ်လၢအကဖၢၣ်ဘၢဃာ်အခိၣ် ဘၣ်. အဂ့ၢ်ဒ်အံၤ, အဝဲဒၣ်မၤဖျါထီၣ်ကဒါက့ၤအကစၢ်ယွၤ အက့ၢ်အဂီၤဒီးအလၤကပီၤန့ၣ်လီၤ. မ့မ့ၢ်, ပိာ်မုၣ်န့ၣ်မၤဖျါက့ၤပိာ်ခွါအလၤကပီၤလီၤ. 8အဂ့ၢ်ဒ်အံၤ, ပှၤပိာ်ခွါန့ၣ်တဘၣ်တၢ်တ့လီၤအီၤလၢပိာ်မုၣ် အအိၣ်ဘၣ်. မ့မ့ၢ်, ပိာ်မုၣ်န့ၣ်ဘၣ်တၢ်တ့လီၤအီၤလၢပိာ်ခွါ အအိၣ်လီၤ. 9ဒ်န့ၣ်အသိး, ပိာ်ခွါတဘၣ်တၢ်တ့လီၤအီၤလၢပိာ်မုၣ်အဂီၢ် ဘၣ်. မ့မ့ၢ်ပိာ်မုၣ်ဘၣ်တၢ်တ့လီၤအီၤလၢပိာ်ခွါအဂီၢ်လီၤ. 10လၢမူခိၣ်ကလူးတဖၣ်အဃိ, ပိာ်မုၣ်တဂၤကြၢးအိၣ်ဒီးခိၣ်ဖၢၣ် လၢအခိၣ်လိၤ, ဒ်သိးအကဒုးနဲၣ်ဖျါလၢအဝဲဒၣ်အိၣ်လၢအဝၤ အတၢ်စိတၢ်ကမီၤအဖီလာ်အဂီၢ်န့ၣ်လီၤ. 11မ့ၢ်နာ်သက့ဒ်န့ၣ်ဒီး, လၢပတၢ်အိၣ်မူလၢကစၢ်အပူၤန့ၣ်, ပိာ်မုၣ်တအိၣ်သဘျ့ဒီးပိာ်ခွါ, ဒီးပိာ်ခွါတအိၣ်သဘျ့စ့ၢ်ကီးဒီးပိာ်မုၣ်ဘၣ်. 12အဂ့ၢ်ဒ်အံၤ, ဒ်ပိာ်မုၣ်ဘၣ်တၢ်ဒုးအိၣ်ထီၣ်အီၤလၢပိာ်ခွါအသိးန့ၣ် ပိာ်ခွါဘၣ်အိၣ်ဖျဲၣ်ထီၣ်လၢပိာ်မုၣ်ဒီးပှၤလၢအဒုးအိၣ်ထီၣ် တၢ်ခဲလၢာ်ခဲဆ့န့ၣ်မ့ၢ်ကစၢ်ယွၤလီၤ.
13ကွၢ်ဆိကမိၣ်ဒၣ်သုဝဲတက့ၢ်. ပှၤပိာ်မုၣ်တဂၤကဃ့ဘါထု ကဖၣ်တၢ်ဆူကစၢ်ယွၤအအိၣ်တအိၣ်ဒီးတၢ်ဖၢၣ်ဘၢဃာ် အခိၣ်န့ၣ်, မ့ၢ်တၢ်လၢအကြၢးဝဲဘၣ်ဝဲကစီဒီဧါ. 14အဂ့ၢ်ဒ်လဲၣ်, န့ဆၢၣ်ဒၣ်လဲာ်သိၣ်လိသုလၢပှၤပိာ်ခွါတဂၤအိၣ် ဒီးအခိၣ်သူအထီန့ၣ်, မ့ၢ်တၢ်မၤဟးဂီၤအလၤကပီၤတမ့ၢ်ဘၣ်ဧါ. 15မ့မ့ၢ်လၢပိာ်မုၣ်အလိၤန့ၣ်, မ့ၢ်လၢတၢ်ဃံတၢ်လၤတမံၤလီၤ. အဝဲဒၣ်အခိၣ်သူအထီန့ၣ်, ဘၣ်တၢ်ဟ့ၣ်တ့ၢ်အီၤဒ်သိးအကမၤဘၢဃာ်အခိၣ်အဂီၢ်န့ၣ်လီၤ. 16ဘၣ်ဆၣ်ဒီးပှၤတဂၤဂၤမ့ၢ်အဲၣ်ဒိးဂ့ၢ်လိာ်ဘှီလိာ်လၢအဂ့ၢ်န့ၣ်, ယစံးယဲသ့ဒၣ်လၢပဝဲဒၣ်မ့ၢ်ဂ့ၤ, ယွၤအတၢ်အိၣ်ဖှိၣ်တဖၣ် မ့ၢ်ဂ့ၤတအိၣ်ဒီးလုၢ်လၢ်အဂၤလၢတၢ်ဘူၣ်တၢ်ဘါအပူၤနီ တမံၤဘၣ်လီၤ.
ကစၢ်အတၢ်အီၣ်လၢဟါအီၣ်
(မး. ၂၆:၂ ၆-၂၉; မၢ်. ၁၄:၂၂-၂၅; လူၤ. ၂၂:၁ ၄-၂၀)
17မ့မ့ၢ်, ဖဲလၢအဘၣ်ဃးဒီးတၢ်သိၣ်လိနဲၣ်ကျဲလၢလာ်တဖၣ်န့ၣ်, ယတစံးထီၣ်ပတြၢၤသုဘၣ်. အဂ့ၢ်ဒ်အံၤ, သုတၢ်အိၣ်ဖှိၣ်ဘူၣ် သကိးဘါသကိးတၢ်န့ၣ်, မၤအၢတၢ်နီၢ်နီၢ်အါန့ၢ်အမၤဂ့ၤတၢ်နီၢ်နီၢ် တက့ၢ်လီၤ. 18အဆိကတၢၢ်န့ၣ်, ယဘၣ်တၢ်စံးဘၣ်တဲဘၣ်ယၤလၢသုတၢ်ပာ်ဖှိၣ်ထီၣ် သကိးသုသးအပူၤန့ၣ်တၢ်ထီဒုၣ်ထီဒါလိာ်သုသးအိၣ်ဝဲဒၣ်, ဒီးယနာ်လၢတၢ်ဂ့ၢ်အဝဲအံၤမ့ၢ်ဝဲတီဝဲတနီၤလီၤ. 19သပှၢ်ကတၢၢ်တၢ်လီၤမုၢ်လီၤဖးကအိၣ်ဝဲဒၣ်လၢသုသိးသုကျါ, ဒ်သိးပှၤလၢအဂ့ၤအဝါတဖၣ်ကဘၣ်တၢ်ထံၣ်သ့ၣ်ညါအီၤဖျါဖျါ အဂီၢ်န့ၣ်လီၤ. 20ဖဲသုအီၣ်သကိးတၢ်တပူၤဃီဒ်ပှၤတဖုအသိးန့ၣ်, တမ့ၢ်သုအီၣ်ကစၢ်အတၢ်အီၣ်လၢဟါအီၣ်ဘၣ်. 21အဂ့ၢ်ဒ်အံၤ, ဖဲသုအီၣ်တၢ်န့ၣ်, သုဝဲတဂၤဒီးတဂၤသုအီၣ်ဆိ သုတၢ်အီၣ်ဒၣ်သုဝဲ, ဒီးတဂၤတၢ်သၣ်ဝံၤအသးဖဲအဂၤတဂၤ အီၣ်လုၣ်ကိအီလုၣ်ကပာ်တၢ်န့ၣ်လီၤ. 22မ့ၢ်သုတအိၣ်ဒီးသုဟံၣ်သုဃီဒၣ်သုဝဲလၢသုကအီၣ်တၢ် အီတၢ်လၢအပူၤဘၣ်ဧါ. မ့တမ့ၢ်ဘၣ်ဒီး, မ့ၢ်သုကကွၢ်တလီၤယွၤအတၢ်အိၣ်ဖှိၣ်, ဒီးဒုးမဲာ်ဆှးပှၤလိၣ်ဘၣ်တၢ်မၤစၢၤတဖၣ်န့ၣ်ဧါ. ဘၣ်ဃးဒီးတၢ်တမံၤအံၤအဂ့ၢ်န့ၣ်မ့ၢ်သုမုၢ်လၢ်လၢယကစံး ယဲဒ်လဲၣ်. မ့ၢ်ယကစံးထီၣ်ပတြၢၤသုဧါ. သပှၢ်ကတၢၢ်ယတမၤဘၣ်.
23အဂ့ၢ်ဒ်အံၤ, ယဒိးန့ၢ်ဘၣ်တ့ၢ်ယဲလၢကစၢ်အအိၣ်, တၢ်သိၣ်လီၤသီလီၤလၢယဟ့ၣ်လီၤကဒီးဆူသုအိၣ်တဆီ, လၢအမ့ၢ်ဝဲ, ကစၢ်ယ့ၣ်ၡူးဖဲမုၢ်တနၤလၢအဝဲဘၣ်တၢ်ဆါလီၤ အီၣ်ကွံာ်အီၤန့ၣ်, ဟံးန့ၢ်ကိၣ်တလိၣ်, 24ဟ့ၣ်တၢ်စံးထီၣ်ပတြၢၤဆူကစၢ်ယွၤ, စိၢ်ဘျဲးဝဲဒီးစံး, “အဝဲအံၤမ့ၢ်ယနီၢ်ခိလၢအမ့ၢ်ဝဲလၢသုဂီၢ်လီၤ. မၤတၢ်အဝဲအံၤလၢတၢ်သ့ၣ်နီၣ်ထီၣ်က့ၤယၤအဂီၢ်တက့ၢ်.” 25လၢကျဲတဘိဃီန့ၣ်, အီၣ်တၢ်အီၣ်ဝံၤအလီၢ်ခံအဝဲဒၣ်ဟံးန့ၢ်လီ ခီဒီးစံးဝဲ, “လီခီအံၤ, မ့ၢ်ယွၤအတၢ်အၢၣ်လီၤအီလီၤအသီ, လၢအဘၣ်တၢ်စဲပနီၣ်ဃာ်အီၤလၢယသွံၣ်လီၤ. တဘျီလၢ်လၢ်ဖဲသုအီအီၤန့ၣ်မၤအီၤလၢတၢ်သ့ၣ်နီၣ်ထီၣ်က့ၤယၤ အဂီၢ်န့ၣ်တက့ၢ်.”
26အဝဲအံၤန့ၣ်အခီပညီမ့ၢ်ဝဲ, တဘျီလၢ်လၢ်ဖဲသုအီၣ်ကိၣ် အဝဲအံၤ, ဒီးအီတၢ်လၢလီခီအဝဲအံၤအပူၤန့ၣ်, မ့ၢ်သုဘိးဘၣ်သ့ၣ်ညါ ကစၢ်အတၢ်သံအဂ့ၢ်, တုၤလီၤလၢအဝဲဒၣ်ဟဲတစုလီၤ. 27လၢတၢ်န့ၣ်အဃိပှၤတဂၤလၢအအီၣ်ကစၢ်အကိၣ်, ဒီးအီတၢ်လၢအလီခီပူၤလၢကျဲလၢအမၤဟးဂီၤအဝဲဒၣ် အလၤကပီၤန့ၣ်, အဝဲဒၣ်မၤကမၣ်ဘၣ်ကစၢ်အနီၢ်ခိဒီးအသွံၣ်လီၤ. 28မ်ဒ်န့ၣ်ဒီး, ပှၤကိးဂၤဒဲးကြၢးသမံသမိးဆိလီၤအသးဝံၤအလီၢ်ခံ, အီၣ်အဝဲန့ၣ်ဒီးအီတၢ်လၢလီခီအဝဲန့ၣ်အပူၤလီၤ. 29အဂ့ၢ်ဒ်အံၤ, အဝဲဒၣ်မ့ၢ်တသ့ၣ်ညါတၢ်အခီပညီဘၣ်ဃးဒီး ကစၢ်အနီၢ်ခိဖဲအအီၣ်ကိၣ်ဒီးအီတၢ်လၢလီခီအပူၤန့ၣ်, အဝဲဒၣ်ဒုးတုၤလီၤတၢ်စံၣ်ညီၣ်လၢအနီၢ်ကစၢ်ဒၣ်ဝဲအလိၤဖဲ အအီၣ်တၢ်ဒီးအီတၢ်အဆၢကတီၢ်န့ၣ်လီၤ. 30လၢတၢ်ဂ့ၢ်အဝဲန့ၣ်အဃိ, သုဝဲအါဒံအါဂၤသုဂံၢ်စၢ်ဘါစၢ်, ဒီးဆူးဝဲဆါဝဲ, ဒီးတနီၤသံကွံာ်ဝဲဒၣ်န့ၣ်လီၤ. 31ပမ့ၢ်သမံသမိးဆိလီၤက့ၤပသးဒီး, တမ့ၢ်လၢပကဘၣ်ယွၤ အတၢ်စံၣ်ညီၣ်ဘၣ်. 32ဘၣ်ဆၣ်ဒီးပဘၣ်တၢ်စံၣ်ညီၣ်ဒီးသိၣ်ဃီၣ်ပှၤလၢကစၢ်, ဒ်သိးပသုတဘၣ်တၢ်စံၣ်ညီၣ်ဃုာ်ပှၤတပူၤဃီဒီးဟီၣ်ခိၣ် တဂ့ၤအဂီၢ်န့ၣ်လီၤ.
33လၢတၢ်န့ၣ်အဃိ, ယဒီပုၢ်ဝဲၢ်သ့ၣ်ဧၢ, ဖဲသုပာ်ဖှိၣ်သုသးတပူၤဃီလၢသုကအီၣ်ကစၢ်အတၢ်အီၣ် လၢဟါအီၣ်အဂီၢ်န့ၣ်, အိၣ်ခိးလိာ်သုသးတဂၤဒီးတဂၤန့ၣ် တက့ၢ်. 34ဒီးပှၤတဂၤဂၤတၢ်မ့ၢ်သၣ်ဝံၤအသးန့ၣ်, ကြၢးအီၣ်တၢ်လၢဟံၣ်, ဒ်သိးသုတဘၣ်ကစၢ်ယွၤအတၢ်စံၣ်ညီၣ်ဖဲသုအိၣ်ဖှိၣ်သကိး အဆၢကတီၢ်တဂ့ၤအဂီၢ်လီၤ. မ့မ့ၢ်တၢ်ဂ့ၢ်တၢ်ကျိၤအဂၤတဖၣ်န့ၣ်, ယကကွၢ်သုးကျဲၤကတိၤပျီက့ၤယဲလၢအဂ့ၢ်ဖဲယဟဲအဆၢ ကတီၢ်လီၤ.
Currently Selected:
1 ကရံၣ်သူး 11: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
